tus neeg ua liaj teb nrog cov nyuj

Thawj Kwj Av, los ntawm James Taylor Harwood

Tsib Hlis Ntuj 17–23

Lus Qhuab Qhia thiab Kev Khi Lus 51–57

“Ib tug Saib Xyuas uas Rau Siab Ntseeg, Ncaj Ncees, thiab Muaj Tswv Yim”

Kev kawm vaj lug kub pab koj paub tus Tswv lub suab, vim Nws yog tus uas muab vaj lug kub rau koj los ntawm Nws tus Ntsuj Plig (saib Lus Qhuab Qhia thiab Kev Khi Lus 18:34–36).

Sau Ntawv txog Koj tej Kev Tshoov Siab

Rau lub Koom Txoos cov mej zeej hauv tej xyoo 1830, kev muab Haiv Neeg Ntseeg sau los ua ke thiab kev txhim tsa lub nroog Xi-oos yeej yog tej hauj lwm ntawm sab ntsuj plig thiab ntawm sab cev nqaij daim tawv, es muaj ntau yam xwm txheej uas yuav tsum xav txog: Yuav tsum muaj neeg yuav thiab faib tej thaj av rau Haiv Neeg Ntseeg los nyob. Yuav tsum muaj ib tug luam ntawv. Thiab ib tug yuav tsum ua tus tswv tsev muag khoom rau cov neeg nyob hauv Xi-oos. Nyob hauv tej kev tshwm sim hauv phau Lus Qhuab Qhia thiab Kev Khi Lus 51–57, tus Tswv tau tsa neeg thiab qhia lawv ua tej hauj lwm no, thiab Nws qhia tias lub zos Independence, Missouri, yog “qhov chaw hauv plawv” ntawm Xi-oos (Lus Qhuab Qhia thiab Kev Khi Lus 57:3).

Tiam sis txawm tej txuj ci xws li kev yuav thaj av, kev luam ntawv, thiab ua tus tswv tsev muag khoom yeej muaj nqis rau tej hauj lwm ntawm sab cev nqaij daim tawv ntawm kev txhim tsa Xi-oos, tej kev tshwm sim no kuj qhia tias tus Tswv xav kom Nws Haiv Neeg Ntseeg yuav los ua neeg tsim nyog ntawm sab ntsuj plig thiaj hu tau lawv ua cov neeg Xi-oos. Nws hais kom peb txhua tus ua “ib tug saib xyuas uas rau siab ntseeg, ncaj ncees, thiab mauj tswv yim,” uas muaj siab xav ua zoo, “nyob khov kho” ua lub luag hauj lwm uas Nws tau muab tsa rau peb (saib Lus Qhuab Qhia thiab Kev Khi Lus 51:19; 52:15; 54:2). Yog peb ua tau li ntawd—txawm peb muaj txuj ci ntawm sab cev nqaij daim tawv li cas los—tus Tswv yeej siv tau peb los txhim tsa Xi-oos thiab Nws yuav “rhawv lub nroog nrawm nroos thaum txog lub sij hawm tsim nyog” (Lus Qhuab Qhia thiab Kev Khi Lus 52:43).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 51

Tus Tswv xav kom kuv ua ib tug saib xyuas uas rau siab ntseeg, ncaj ncees, thiab muaj tswv yim.

Yog tias koj yog ib tug mej zeej hauv lub Koom Txoos thaum xyoo 1831, tej zaum yuav muaj neeg caw koj ua raws li txoj kev cai fij tseg tso cai rau lub Koom Txoos txais tau koj tej teej tug los ntawm tus npisov. Ces feem ntau, nws yuav muab tej yam uas koj tau pub lawm rov qab los rau koj, tej lub sij hawm pub ntau tshaj. Tiam sis tsis yog koj tej teej tug lawm xwb—yog tej yam uas koj yuav saib xyuas.

Hnub no tej txheej txheem txawv tas lawm, tiam sis lub ntsiab cai ntawm kev fij tseg thiab kev saib xyuas yeej tseem ceeb rau tus Tswv txoj hauj lwm. Cia li xav txog Txwj Laug Quentin L. Cook tej lus no: “Peb nyob hauv ib lub caij nyoog txaus ntshai heev thaum neeg coob ntseeg tias lawv tsis muaj kev lav ris rau Vajtswv thiab peb tsis muaj kev lav ris saib xyuas peb tus kheej los yog lwm tus. Neeg coob hauv lub ntiaj teb no tsom ntsoov rau kev ua rau lav tus kheej zoo siab xwb … [thiab] tsis ntseeg tias lawv yuav tsum saib xyuas lwm tus neeg. Tiam sis nyob hauv lub Koom Txoos, peb ntseeg tias tej kev saib xyuas no yog tej hauj lwm dawb ceev” (“Stewardship—a Sacred Trust,” Ensign los sis Liahona, Kaum Ib Hlis Ntuj 2009, 91).

Thaum koj nyeem tshooj 51, cia li xav seb Vajtswv tau muab hauj lwm dab tsi rau koj ua. Tej lus “saib xyuas” (nqe 19) thiab “fij tseg” (nqe 5) txhais li cas, thiab qhia dab tsi rau koj txog tej yam uas Vajtswv xav kom koj ua? Koj nrhiav tau tej ntsiab cai twg hauv tshooj 51 thiab hauv Txwj Laug Cook tej lus uas qhia koj tias kev ua ib tug saib xyuas txhais li cas? (qhov tseem ceeb saib nqe 9, 15–20).

Kuj saib Mathais 25:14–30; “The Law of Consecration,” video, ChurchofJesusChrist.org.

Lus Qhuab Qhia thiab Kev Khi Lus 52:14–19

Vajtswv tau muab ib tug txheej txheem rau peb kom txhob raug ntxias.

Vim muaj neeg coob uas hais tias lawv tau txais kev tshwm sim ntawm sab ntsuj plig, Haiv Neeg Ntseeg thaum ub tau txhawj tias lawv yuav raug ntxias. Lawv yuav ua li cas kom paub Vajtswv yuav “txais” leej twg? (nqe 15). Nyob hauv phau Lus Qhuab Qhia thiab Kev Khi Lus 52:14–19, tus Tswv tau muab ib txheej txheem uas pab tau. Nej yuav ua li cas siv tus txheej txheem no kom paub txog tej xov cuav hauv lub ntiaj teb no? Tej zaum koj yuav xav siv tus txheej txheem no ntsuam xyuas koj tus kheej: xav seb koj puas siv tej lus los ntawm tej nqe no kom sau tej lus nug xws li “Thaum kuv hais lus, kuv lub siab puas xav ua zoo?”

Lus Qhuab Qhia thiab Kev Khi Lus 54

Kuv tig mus rau tus Tswv thaum tej yam uas lwm tus xaiv ua rau kuv nyuaj siab.

Thaum Haiv Neeg Ntseeg sau los ua ke nyob hauv Ohio, muaj ib pawg uas Newel Knight coj tuaj Colesville, New York tuaj, es lawv xav tau chaw nyob. Leman Copley muaj ib daim liaj teb loj heev nyob ze Kirtland, thiab nws tau khi lus cia Haiv Neeg Ntseeg nyob hauv nws thaj av. Tiam sis, tsis ntev tom qab lawv pib los nyob ntawd, Copley tsis tshua muaj siab ntseeg ntxiv lawm, nws rhuav nws txoj kev khi lus, thiab ntiab Haiv Neeg Ntseeg tawm nws tej teej tug (saib Saints, 1:125–28).

Raws li sau nyob hauv section 54, tus Tswv qhia Newel Knight tias Haiv Neeg Ntseeg yuav tsum ua li cas. Koj kawm dab tsi hauv kev tshwm sim no uas yuav pab koj thaum lwm tus neeg tsis ua raws li lawv tau cog lus los sis tej yam uas lwm tus xaiv ua rau koj raug xwm txheej?

liaj teb ntsuab

Qhov chaw rau liaj teb hauv Ohio uas Leman Copley tau cog lus yuav muab rau lub Koom Txoos.

Lus Qhuab Qhia thiab Kev Khi Lus 56:14–20

Cov neeg uas muaj lub siab dawb tau koob hmoov.

Nyob hauv tej nqe no, tus Tswv hais lus rau cov neeg nplua nuj thiab cov neeg pluag; tej zaum yuav zoo muab Nws tej lus ntuas rau ob pawg no sib piv. Muaj dab tsi hauv tej nqe no uas koj siv tau koj tus kheej? Kev tsom ntsoov rau kev nplua nuj yuav ua li cas ho ua rau koj tus ntsuj plig “liam”? (nqe 16). Koj xav tias qhov uas koj “muaj lub siab dawb” (nqe 18) thaum hais txog tej khoom ntawm sab cev nqaij daim tawv txhais li cas?

Kuj saib Yakhauj 2:17–21.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 51:9.Tej zaum nej yuav xav ua si ib yam uas nej tsev neeg nyiam ces sib tham txog qhov uas yuav zoo li cas yog tias muaj neeg uas nyiag ua tsis ncaj. Vim li cas peb yuav tsum “coj ncaj ncees” ib leeg rau ib leeg? Kev ua siab ncaj yuav pab peb “ua tau ib lub siab” li cas?

Lus Qhuab Qhia thiab Kev Khi Lus 52:14–19.Thaum nej sib tham txog tus txheej txheem hauv tej nqe no, tej zaum nej tsev neeg yuav nyiam xav txog lwm tus txheej txheem uas nej siv—xws li thaum xaws khaub ncaws los sis ua khoom. Tej zaum nej yuav xav ua hauj lwm ua ke ua ib yam khoom dab tsi thaum nej sib tham txog tus txheej txheem uas tus Tswv qhia kom peb tsis raug ntxias.

Lus Qhuab Qhia thiab Kev Khi Lus 53:1.Xav seb puas qhia rau nej tsev neeg txog ib lub sij hawm thaum nej ua li Sidney Gilbert, nug tus Tswv “ntsig txog qhov uas Vajtswv hu [nej].”

Lus Qhuab Qhia thiab Kev Khi Lus 54:2; 57:6–7.Cov lus “nyob khov kho” (Lus Qhuab Qhia thiab Kev Khi Lus 54:2) txhais li cas thaum hais txog tej yam uas Vajtswv hais kom peb ua? Tej zaum nej yuav xav caw nej tsev neeg sawv thiab hais ib yam uas Vajtswv tau hais kom lawv ua.

Lus Qhuab Qhia thiab Kev Khi Lus 55.Tus Tswv tau ua li cas siv William Phelps tej txuj ci ua ib tug kws sau ntawv thiab luam ntawv? (ua piv txwv, cia li saib nyob hauv phau nkauj qhuas Vajtswv rau tej zaj nkauj uas nws tau sau). Tej zaum nej tsev neeg yuav xav sib tham txog tej txuj ci thiab tej kev muaj peev xwm uas nej pom tias nej muaj. Peb yuav siv peb tej txuj ci ua ke kom koom tes ua Vajtswv txoj hauj lwm?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “‘Give,’ Said the Little Stream,” Children’s Songbook, 236.

Kev Kawm Zoo Dua Ntxiv ntawm Yus Ib Leeg

Muaj ib phau ntawv txog kev kawm vaj lug kub. Tej zaum yuav pa koj yog koj siv ib phau ntawv ceev xwm txheej los yog ib phau ntawv sau txog koj tej kev xav, tej lub tswv yim, tej lus nug, los yog kev tshoov siab uas los rau koj thaum koj kawm vaj lug kub.

cov mej zeej muab khoom rau Edward Partridge

Npisov Partridge Txais tej uas Tau Fij Tseg, los ntawm Albin Veselka