lub pas dej me thaum hnub tuaj

Tsib Hlis Ntuj 10–16

Lus Qhuab Qhia thiab Kev Khi Lus 49–50

“Qhov uas Yog Vajtswv Li Yog Qhov Kaj”

“Tus uas txais qhov kaj, thiab mus ntxiv nrog Vajtswv, yuav txais qhov kaj ntxiv; thiab qhov kaj ntawd yuav ci loj zuj zus mus txog hnub uas zoo tag nrho” (Lus Qhuab Qhia thiab Kev Khi Lus 50:24). Cia li xav seb koj txais qhov kaj los ntawm qhov uas koj mus ntxiv nrog Vajtswv.

Sau Ntawv txog Koj tej Kev Tshoov Siab

Tus Cawm Seej yog peb “tus tswv yug yaj zoo” (Lus Qhuab Qhia thiab Kev Khi Lus 50:44). Nws paub tias tej lub sij hawm cov yaj ua loj leeb thiab roob moj sab qhua muaj ntau yam txaus ntshai. Yog li ntawd nws hlub peb thiab coj peb mus rau kev nyab xeeb ntawm Nws cov lus qhuab qhia, kom tsis raug tej xwm txheej ceev xws li cov “ntsuj plig cuav, uas tau tawm mus rau hauv lub ntiaj teb, dag ntxias neeg ntiaj teb” (Lus Qhuab Qhia thiab Kev Khi Lus 50:2). Kev coj raws li Nws txhais hais tias peb yuav tsum muab tej lub tswv yim los sis kab lig kev cai cuav tso tseg. Leman Copley thiab lwm tus uas tau txais txoj moo zoo nyob hauv Ohio yuav tsum ua li no thiab vim lawv tseem ntseeg tej yam uas tsis yog lawm. Nyob hauv phau Lus Qhuab Qhia thiab Kev Khi Lus 49, tus Tswv tau hais tej yam tseeb uas qhia qhov yog txog Leman txoj kev ntseeg tas los hais txog tej yam xws li kev sib yuav thiab tus Cawm Seej txoj Kev Los Zaum Ob. Thiab thaum cov neeg hloov siab los ntseeg hauv Ohio “tau txais tej ntsuj plig uas [lawv] tsis muaj peev xwm to taub,” tus Tswv tau qhia lawv paub tus Ntsuj Plig tej kev tshwm sim uas muaj tseeb (Lus Qhuab Qhia thiab Kev Khi Lus 50:15). Tus Tswv Yug Yaj Zoo yeej ua siab ntev; Nws paub tias Haiv Neeg Ntseeg no---zoo li peb txhua tus—yog “me nyuam yaus” uas lawv “lub dag zog ntawm sab ntsuj plig thiab txoj kev paub qhov tseeb yuav tsum loj tuaj” (Lus Qhuab Qhia thiab Kev Khi Lus 50:40).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 49:5–23

Tej yam tseeb ntawm txoj moo zoo yuav pab kuv paub tej lus qhia uas tsis yog lawm.

Ua ntej nws koom lub Koom Txoos, Leman Copley yog ib tug mej zeej hauv ib pawg hu ua United Society of Believers in Christ’s Second Appearing, los yog cov neeg Shakers (saib “Leman Copley and the Shakers,” Revelations in Context, 117–21). Tom qab nws nrog Leman tham, Joseph Smith xav paub los ntawm tus Tswv txog cov neeg Shaker tej lus qhia, thiab tus Tswv teb nws nyob hauv kev tshwm sim hauv tshooj 49.

Koj kawm tau txog cov neeg Shakers tej kev ntseeg uas hais nyob hauv zaj lus piav txog tshooj 49. Xav seb koj puas sau lub cim rau tej yam tseeb hauv nqe 5–23 uas qhia txog tej kev ntseeg ntawd. Cia li xav txog lwm yam tej lus qhia los sis kab lig kev cai uas tsis yog nyob hauv lub ntiaj teb hnub no. Tej yam tseeb ntawm txoj moo zoo twg yuav pab koj pov hwm koj tus kheej kom txhob ntseeg tej ntawd?

Lus Qhuab Qhia thiab Kev Khi Lus 49:15–17

Txoj kev sib yuav ntawm ib tug txiv neej thiab ib tug poj niam tseem ceeb heev rau Vajtswv txoj hau kev.

Koj kawm tej yam tseeb twg los ntawm phau Lus Qhuab Qhia thiab Kev Khi Lus 49:15–17 txog kev sib yuav? Vim li cas koj xav tias qhov uas yuav tsum muaj ib tug txiv neej thiab ib tug poj niam sib yuav yog ib qho tseem ceeb rau Leej Txiv Saum Ntuj Ceeb Tsheej txoj hau kev? Txwj Laug David A. Bednar hais ob qho: “Qhov 1: Txiv neej thiab poj niam ntsuj plig ua ke ua rau ob leeg zoo tag nrho, thiab yog li ntawd txiv neej thiab poj niam yuav tsum nyob ua ke kom muaj kev tsa nto. … Qhov 2: Vajtswv tau pom zoo kom muab ib tub txiv neej thiab ib tug poj niam ua ke kom muaj me nyuam nyob hauv lub ntiaj teb thiab npaj chaw zoo tshaj plaws rau kev tu thiab saib xyuas cov me nyuam” (“Marriage Is Essential to His Eternal Plan,” Ensign, Rau Hli Ntuj 2006, 83–84).

Kuj saib Chiv Keeb 2:20–24; 1 Kauleethaus 11:11; “Tsev Neeg: Ib Zaj Lus Tshaj Tawm rau lub Ntiaj Teb,” Ensign los sis Liahona, Tsib Hlis Ntuj 2017, 145.

ib khub niam txiv nyob rau ntawm ib lub tuam tsev

Vajtswv pom zoo rau kev sib yuav ntawm ib tug txiv neej thiab ib tug poj niam.

Lus Qhuab Qhia thiab Kev Khi Lus 50

Tus Tswv tej lus qhia yeej pov hwm kuv kom txhob raug Dab Ntxwg Nyoog tej kev ntxias.

Cov neeg hloov siab los ntseeg tshiab hauv Ohio xav txais kev tshwm sim ntawm sab ntsuj plig uas tau cog lus tias lawv txais tau hauv vaj lug kub, tiam sis Dab Ntxwg Nyoog kuj xav ntxias lawv. Lawv xav paub tias, thaum twg ib tug neeg qw los yog tsaus muag, puas yog tus Ntsuj Plig ua li ntawd?

Cia li xav seb lawv thov koj pab cov neeg hloov siab los ntseeg tshiab no to taub yuav ua li cas kom paub tej yam twg yog kev tshwm sim tseeb ntawm tus Vaj Ntsuj Plig Dawb Huv thiab kom lawv tsis txhob raug ntxias los ntawm Dab Ntxwg Nyoog tej kev qog tej ntawd. Koj nrhiav tau tej ntsiab cai twg nyob hauv Lus Qhuab Qhia thiab Kev Khi Lus 50 uas koj qhia tau rau lawv? (qhov tseem ceeb saib nqe 22–25, 29–34, 40–46).

Kuj saib 2 Timautes 3:13–17.

Lus Qhuab Qhia thiab Kev Khi Lus 50:13–24

Cov neeg uas qhia thiab cov uas kawm yeej txais kev txhawb nqa los ntawm tus Ntsuj Plig.

Ib yam koj ua tau kom kawm phau Lus Qhuab Qhia thiab Kev Khi Lus 50:13–24 yog kev kos duab txog ib tug uas qhia thiab ib tug uas kawm thiab, ze rau ob tug no, sau tej lus los ntawm tej nqe no uas qhia koj txog kev kawm txoj moo zoo thiab kev qhia txoj moo zoo. Thaum twg tau muaj tej yam uas qhia koj txog qhov uas yuav tsum muaj tus Ntsuj Plig thaum koj qhia thiab kawm? Xav seb koj yuav ua li cas kom ua ib tug kawm txoj moo zoo thiab ib tug neeg qhia zoo dua ntxiv.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 49:2.Qhov uas hais tias “xav paub qhov tseeb ib txhia, tiam sis tsis yog tag nrho” txhais li cas? Tej zaum nej muab ib daim duab uas npog ib feem rau nej tsev neeg saib thiab cia lawv twv seb yog dab tsi. Yuav muaj li cas yog peb lees txais iqhov tseeb ib feem xwb? (saib 2 Nifais 28:29). Txoj moo zoo uas muaj txhij txhua vim li cas yog ib txoj koob hmoov rau peb?

Lus Qhuab Qhia thiab Kev Khi Lus 49:26–28.Peb tau koob hmoov li cas los ntawm tus Tswv cov lus cog tseg hais tias “Kuv yuav mus ua nej ntej thiab ua tus thaiv tom nej qab; thiab kuv yuav nrog nraim nej”? Nej tsev neeg qhia tau txog tej lub sij hawm uas lawv paub tus Tswv tau “mus ua [lawv] ntej” los sis xav tias Nws “nrog nraim [lawv].”

Lus Qhuab Qhia thiab Kev Khi Lus 50:23–25.Tej zaum nej yuav xav koom ua ke hauv ib chav tsaus ntuj kom nyeem phau Lus Qhuab Qhia thiab Kev Khi Lus 50:23–25 thiab muaj txoj kev kaj ntxiv zuj zus thaum nej cig tej tswm ciab los sis taws teeb zuj zus. Tej zaum nej yuav xav nyeem tej nqe no thaum nej saib hnub tuaj thaum sawv ntxov. Peb yuav ua li cas kom peb txoj kev kaj ntawm txoj moo zoo loj tuaj? Thaum nej tsev neeg kawm ib yam dab tsi tshiab txog txoj moo zoo thaum lub lim tiam no, yaum kom lawv qhia yam ntawd rau nej tsev neeg thaum lawv sau ib tsab ntawv thiab txuas rau ib lub teeb nyob hauv lub tsev.

Lus Qhuab Qhia thiab Kev Khi Lus 50:40–46.Tom qab nej nyeem phau Lus Qhuab Qhia thiab Kev Khi Lus 50:40–46, tej zaum nej yuav xav muab daim duab txog tus Cawm Seej uas txuas rau tus txheej txheem qhia no rau lawv saib thiab nug tej yam xws li no: Nej paub yog vim li cas tus Cawm Seej hlub cov yaj? Tus Cawm Seej ua li cas kom ua peb tus tswv yug yaj? Tej lus twg los ntawm vaj lug kub qhia tias tus Cawm Seej yog tus tswv yug yaj thiab peb yog Nws cov yaj?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Shine On,” Children’s Songbook, 144.

Kev Qhia Zoo Dua Ntxiv

Cia li hloov yooj yim. Tej lub sij hawm qhia zoo tshaj plaws, nyob hauv lub tsev, yeej yog thaum twg yus tsis tau xav yuav qhia ua ntej: tej zaum ib pluas mov uas tsev neeg noj ua ke yuav ua rau nej sib tham txog kev mloog ntsoov Vajtswv txoj lus, thiab ib kob nag yuav ua rau nej muaj cib fim ua tim khawv txog cov dej uas cawm txoj sia. Yog nej npaj siab ntawm sab ntsuj plig, tus Tswv muab rau nej “thaum lub sij hawm ntawd kiag, muaj tseeb tiag, tam sim ntawd kiag, tej uas [nej] yuav hais” (Lus Qhuab Qhia thiab Kev Khi Lus 100:6).

Yexus nrog ib tug me nyuam yaj

Neeg Yug Yaj uas Siab Muag, los ntawm Kim Yongsung