tib neeg sib ntsib ze lub pas dej

Pawg Neeg Sib Ntsib, los ntawm Worthington Whittredge

Tsib Hlis Ntuj 3–9

Lus Qhuab Qhia thiab Kev Khi Lus 46–48

“Mob Siab Nrhiav tej Txiaj Ntsim Zoo Tshaj Plaws”

Thaum koj nyeem phau Lus Qhuab Qhia thiab Kev Khi Lus 46–48, cia li sau ntawv txog tej kev tshoov siab uas koj txais tau. Ces zoo li Txwj Laug Richard G. Scott qhia, tej zaum koj yuav xav nug hais tias, “Puas muaj dab tsi uas kuv yuav tsum paub?” (“To Acquire Spiritual Guidance” Ensign los sis Liahona, Kaum Ib Hlis Ntuj 2009, 8).

Sau Ntawv txog Koj tej Kev Tshoov Siab

Thaum Parley P. Pratt, Oliver Cowdery, Ziba Peterson, thiab Peter Whitmer tus Hluas ncaim Kirtland mus thiab tau mus ua lwm yam hauj lwm, lawv tseg ib puas tawm tus neeg hloov siab los ntseeg tshiab nyob ntawd, cov uas mob siab heev tiam sis tsis tau paub ntau. Tsis tau muaj tej phau ntawv qhia txheej txheem, tsis muaj kev sib ntsib qhia cov thawj coj, tsis muaj kev tshaj tawm lub tuam rooj sab laj—muaj tseeb tiag, tsis muaj Phau Ntawv Maumoos ntau pes tsawg rau txhua tus. Cov neeg ntseeg tshiab no feem coob twb los ntseeg txoj moo zoo vim tau cog lus tias yuav muaj tej kev tshwm sim los ntawm tus Ntsuj Plig ntau, qhov tseem ceeb yog tej uas lawv tau kawm los ntawm Phau Tshiab (saib, ua piv txwv, 1 Kauleethaus 12:1–11). Tsis ntev, ces muaj neeg uas ua kev teev tiam txawv heev—xws li kev vau rau hauv av los sis ntswj mus ntswj los zoo li ib tug nab—nyob hauv lub Koom Txoos tej kev sib ntsib. Nyuaj rau neeg feem coob paub tej yam twg yog los ntawm tus Ntsuj Plig thiab tej yam twg tsis yog. Vim nws pom tias lawv tsis to taub zoo, Joseph Smith tau thov Vajtswv pab. Tus Tswv tej lus teb yeej muaj nqis rau peb niaj hnub nim no, hauv ib lub caij uas tib neeg xyeej los sis tsis quav ntsej txog tej yam los ntawm tus Ntsuj Plig. Tus Tswv qhia tias yeej muaj kev tshwm sim ntawm sab ntsuj plig tiag tiag thiab piav meej tias tej ntawd yog dab tsi—yeej yog tej txiaj ntsim los ntawm Leej Txiv Saum Ntuj Ceeb Tsheej, “kom pab rau cov uas hlub [Nws] thiab ua raws li tag nrho [Nws] tej lus txib” (Lus Qhuab Qhia thiab Kev Khi Lus 46:9).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 46:1–6

Txhua tus uas mob siab nrhiav yeej teev tiam tau nyob hauv tus Tswv lub Koom Txoos.

Tej kev sib ntsib ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej yuav tsum tos txais lwm tus thiab muaj kev tshoov siab ntau tshaj plaws nyob thoob plaws lub ntiaj teb. Tus Tswv qhia dab tsi rau peb nyob hauv Lus Qhuab Qhia thiab Kev Khi Lus 46:1–6 kom peb tos txais lwm tus uas tuaj koom peb tej kev sib ntsib? Koj cov phooj ywg thiab cov neeg hauv zej zog los puas zoo siab tuaj rau koj pawg ntseeg tej kev sib ntsib teev tiam Vajtswv? Koj ua li cas kom kho koj tej kev sib ntsib hauv lub Koom Txoos ua rau tib neeg xav rov qab tuaj? Cia li xav seb qhov uas koj rau siab coj raws li tus Vaj Ntsuj Plig Dawb Huv nyob hauv lub Koom Txoos tej kev sib ntsib yuav pab koj li cas.

Kuj saib 3 Nifais 18:22–23; Maulaunais 6:5–9; “Welcome,” video, ComeUntoChrist.org; “Religious Enthusiasm among Early Ohio Converts,” Revelations in Context, 105–11.

Lus Qhuab Qhia thiab Kev Khi Lus 46:7–33

Vajtswv tau muab tej txiaj ntsim ntawm sab ntsuj plig kom foom koob hmoov rau Nws cov me nyuam.

Haiv Neeg Ntseeg thaum ub ntseeg tias muaj tej txiaj ntsim ntawm sab ntsuj plig tiam sis lawv yuav tau kawm txog qhov uas vim li cas muaj tej ntawd. Thaum koj kawm txog tus Ntsuj Plig tej txiaj ntsim los ntawm Lus Qhuab Qhia thiab Kev Khi Lus 46:7–33, cia li xav seb koj yuav tsum “[nco ntsoov] yog vim li cas ho muab tej txiaj ntsim ntawd los” (nqe 8). Cia li xav seb tej nqe no txuas rau Txwj Laug Robert D. Hales tej lus hais tias: “Vajtswv muab tej txiaj ntsim no rau cov uas coj raws nraim li Khetos. Tej no yuav pab peb paub thiab qhia qhov tseeb ntawm txoj moo zoo. Tej no yuav pab peb foom koob hmoov rau lwm tus. Tej no yuav pab coj peb rov qab mus cuag peb Leej Txiv Saum Ntuj Ceeb Tsheej” (“Gifts of the Spirit,” Ensign, Ob Hlis Ntuj 2002, 16). Koj kawm dab tsi ntxiv los ntawm tej nqe no txog tej kev tshwm sim ntawm sab ntsuj plig? Tej yam tseeb no yuav pab koj li cas kom tsis txhob “raug ntxias”? (nqe 8).

Cia li xav seb koj tej txiaj ntsim ntawm sab ntsuj plig yog dab tsi—thiab koj yuav siv li cas kom “pab tau Vajtswv cov me nyuam” (nqe 26). Yog koj muaj yawg suab txoj koob hmoov, ces tej zaum nws qhia tias koj tau txais tej txiaj ntsim twg.

Kuj saib Gospel Topics, “Spiritual Gifts,” topics.ChurchofJesusChrist.org.

Lus Qhuab Qhia thiab Kev Khi Lus 47

Tus Tswv xav kom Nws lub Koom Txooa sau ib zaj keeb kwm.

John Whitmer txoj kev hu kom sau keeb kwm rau lub Koom Txoos twb yog raws li txij thaum ub los thaum cov neeg ceev xwm txheej hauv Vajtswv cov neeg tau sau keeb kwm (saib 2 Nifais 29:11–12; Mauxes 6:5; Anplaham 1:28, 31). Muaj tseeb tiag, tseem muaj ib tug lub Koom Txoos tus Kws Sau Keeb Kwm thiab tus Teev Ntawv niaj hnub nim no thiab. Koj xav tias yog vim li cas tus Tswv saib kev sau keeb kwm tseem ceeb npaum li no? Cia li xav txog qhov no thaum koj nyeem Nws tej lus qhia John Whitmer txog kev txib no nyob hauv tshooj 47. Kuj xav seb koj yuav tsum sau tej yam twg los ntawm koj lub neej. Piv txwv hais tias, tus Tswv tau qhia dab tsi rau koj uas koj xav ceev tseg?

Thaum koj xav txog tej lus nug no, cia li xav txog tej lus qhia no los ntawm Txwj Laug Marlin K. Jensen ntawm Pawg Xya Caum, uas yog lub Koom Txoos tus Kws Sau Keeb Kwm thiab tus Teev Ntawv txij ntawm xyoo 2005 mus txog 2012:

“Peb ceev xwm txheej kom pab peb nco ntsoov. … Peb xav pab lub Koom Txoos cov mej zeej nco txog tej yam zoo uas Vajtswv tau ua rau Nws cov me nyuam. … Tej zaj lus qhia los ntawm yav tas los pab peb hauv hnub nyoog no thiab pab peb cia siab rau yav tom ntej” (“There Shall Be a Record Kept among You,” Ensign, Kaum Ob Hlis Ntuj 2007, 28, 33).

Yog xav kawm txog tej hauj lwm uas lawv ua raws li lub Koom Txoos tus Kws Sau Keeb Kwm qhia, visit history.ChurchofJesusChrist.org.

John Whitmer

Tau hu John Whitmer sau keeb kwm txog lub Koom Txoos.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 46:2–6.Peb tsev neeg yuav ua li cas kom tos txais lwm tus nyob hauv peb tej kev sib ntsib hauv lub Koom Txoos? (kuj saib 3 Nifais 18:22–23). Daim duab uas txuas rau cov ntawv qhia txheej txheem no tej zaum pab tau nej sib tham txog qhov no.

Lus Qhuab Qhia thiab Kev Khi Lus 46:7–26.Peb ib leeg saib tias ib leeg muaj tej txiaj ntsim ntawm sab ntsuj plig twg? Tej txiaj ntsim ntawd yuav ua li cas foom koob hmoov rau peb tsev neeg?

Lus Qhuab Qhia thiab Kev Khi Lus 47.Nej yuav ua li cas kom yaum nej tsev neeg sau lawv zaj keeb kwm tas lub lim tiam no? Tej zaum nej yuav xav nyeem tej zaj los ntawm nej phau ceev xwm txheej los sis hais dab neeg txog ib tug poj koob yawm txwv (saib FamilySearch.org). Muaj ib txhia tsev neeg uas tseg ob peb feeb txhua lub lim tiam kom cia txhua tus sau hauv lawv tej phau ceev xwm txheej. Tej zaum nej yuav xav hais tej lus kom lawv paub sau txog dab tsi, xws li “Lub lim tiam no muaj dab tsi tshwm sim uas nej xav kom nej cov xeeb ntxwv paub txog?” los sis “Nej tau pom tus Tswv txhais tes pab nej li cas hauv nej lub neej lub lim tiam no?” Cov me nyuam yaus kos duab txog tej no los tau, los sis nej kaw tau lawv lub suab thaum lawv hais lawv tej zaj. Peb tau tej koob hmoov twg thaum peb ceev “ib zaj keeb kwm mus zuj zus”? (nqe 1).

Lus Qhuab Qhia thiab Kev Khi Lus 48.Tau txib Haiv Neeg Ntseg nyob hauv Ohio kom faib lawv cov av nrog cov uas tuaj ntawm lub Teb Chaws Amelikas sab hnub tuaj rau lub xeev Ohio. Muaj dab tsi uas peb faib tau kom pab lwm tus?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Kuv Puas Tau Ua Zoo Hnub No?” (Cov Nkauj Qhuas Vajtswv, zaj 101).

Kev Qhia Zoo Dua Ntxiv

Siv tej zaj dab neeg thiab zaj lus piv txwv. Tus Cawm Seej tau hais dab neeg thiab tej zaj lus piv txwv ntau kom qhia txog tej ntsiab cai ntawm txoj moo zoo. Cia li xav txog tej zaj lus piv txwv thiab dab neeg los ntawm nej lub neej uas yuav ua rau nej tsev neeg to taub zoo txog ib lub ntsiab cai ntawm txoj moo zoo (saib Teaching in the Savior’s Way, 22).

tib neeg nyob hauv lub tsev koom txoos

Leej Txiv Saum Ntuj Ceeb Tsheej pub tej txiaj ntsim ntawm sab ntsuj plig rau Nws cov me nyuam kom lawv yuav foom koob hmoov rau lwm tus.