revelation manuscript book in display case

Rau Hli Ntuj 21–27

Lus Qhuab Qhia thiab Kev Khi Lus 67–70

“Muaj Nqis … Li tej Kev Nplua Nuj ntawm Tag Nrho lub Ntiaj Teb”

Txawm yog tej kev tshwm sim hauv phau Lus Qhuab Qhia thiab Kev Khi Lus feem ntau yog hais rau tib neeg uas muaj tej xwm txheej rau lawv tus kheej, tej kev tshwm sim no yeej “muaj nqis rau neeg sawv daws” (“Zaj Lus Tim Khawv ntawm Kaum Ob tug Thwj Tim txog Qhov Tseeb ntawm Phau Lus Qhuab Qhia thiab Kev Khi Lus,” zaj lus piav rau phau Lus Qhuab Qhia thiab Kev Khi Lus). Thaum koj kawm, nrhiav tej yam tseeb thiab tej ntsiab cai uas muaj nqis rau koj.

Sau Ntawv txog Koj tej Kev Tshoov Siab

Txij thaum xyoo 1828 mus txog 1831, tus Yaj Saub Joseph Smith tau txais tej kev tshwm sim ntau los ntawm tus Tswv, tsis hais tej lus ntuas rau tib neeg, tej lus qhia kom paub kav lub Koom Txoos, thiab tej kev ua yog toog pom hnub nyoog kawg. Tiam sis Haiv Neeg Ntseeg feem coob tsis tau nyeem. Tej kev tshwm sim no los tseem tsis tau muab luam tawm, thiab tsuas muaj tej daim uas neeg tau sau ntawv thiab cov mej zeej ib leeg tau muab rau ib leeg thiab cov tub txib nqa mus.

Ces, thaum lub Kaum Ib Hlis Ntuj 1831, Joseph hu kom lub Koom Txoos cov thawj coj sib sab laj txog kev muab tej kev tshwm sim no luam tawm. Tom qab lawv thov kom paub tus Tswv lub siab nyiam, cov thawj coj no tau npaj muab Phau Ntawv Lus Txib luam tawm—yog phau ntawv ua tom qab ntawd yog phau Lus Qhuab Qhia thiab Kev Khi Lus. Tsis ntev tom qab ntawd txhua tus nyeem tau Vajtswv txoj lus uas ib tug yaj saub muaj sia nyob tau muab tshwm sim, yog qhov puav pheej uas qhia tias “cov yawm sij ntawm tej txuj ci uas neeg tsis paub txog peb tus Cawm Seej lub nceeg vaj rau neeg dua ib zaug ntxiv.” Yog vim li no thiab ntau yam ntxiv, Tsoom Haiv Neeg Ntseeg thaum ntawd thiab tam sim no xav tias tej kev tshwm sim no “muaj nqis … tshaj li tej kev nplua nuj ntawm tag nrho lub Ntiaj Teb” (Lus Qhuab Qhia thiab Kev Khi Lus 70, zaj lus piav txog tshooj).

Saib Saints, 1:140–43.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 67:1–9; 68:3–6

Vajtswv txhawb nqa Nws cov tub qhe thiab cov lus uas lawv hais los ntawm Nws lub npe.

Tej zaum yus xav tias kev txiav txim muab tej kev tshwm sim uas Joseph Smith txais luam tawm yeej yog kev txiav txim yooj yim heev, tiam sis muaj ib co thawj coj ntawm lub Koom Txoos uas xav tias tej zaum tsis yog ib lub tswv yim zoo. Ib yam uas lawv txhawj txog yog qhov uas tej lus Joseph Smith tau siv kom sau tej kev tshwm sim los tsis zoo tag. Kev tshwm sim hauv tshooj 67 tau los kom teb kev txhawj ntawd. Koj kawm dab tsi txog cov yaj saub thiab kev tshwm sim los ntawm nqe 1–9? Koj kawm dab tsi ntxiv los ntawm 68:3–6?

Ua ntej tau muab Phau Ntawv Lus Txib luam tawm, ob peb tug thawj coj ntawm lub Koom Txoos tau sau ib zaj lus tim khawv hais tias tej kev tshwm sim hauv phau ntawv ntawd muaj tseeb. Yog xav saib lawv zaj lus tim khawv, saib “Testimony, circa 2 Kaum Ib Hlis Ntuj 1831,” Revelation Book 1, 121, josephsmithpapers.org.

Lus Qhuab Qhia thiab Kev Khi Lus 68:1–8

Tej kev tshoov siab los ntawm tus Vaj Ntsuj Plig Dawb Huv qhia txog tus Tswv lub siab nyiam.

Tej lus hauv tej nqe no los tau hais rau Orson Hyde thiab lwm tus thaum Vajtswv hu lawv “mus plov meej txoj moo zoo uas kav ib txhis, los ntawm tus Vajtswv muaj sia zees nyob tus Ntsuj Plig, rau ntawm ib co neeg mus rau ib co, thiab ntawm ib thaj av mus rau ib thaj” (nqe 1). Tej lus uas muaj nyob hauv nqe 4 yuav pab ib tug neeg li cas yog tias tau xa nws mus tshaj tawm txoj moo zoo? Tej lus no muaj nqis dab tsi rau koj? Cia li xav txog ib lub sij hawm thaum “tus Vaj Ntsuj Plig Dawb Huv tshoov [koj] lub siab” (nqe 3) hais los sis ua ib yam dab tsi. Koj kawm dab tsi hauv tej nqe no uas ua rau koj tso siab tias koj yuav muaj peev xwm ua raws li tej kev tshoov siab ntawm sab ntsuj plig.

Lus Qhuab Qhia thiab Kev Khi Lus 68:25–28

Cov niam tsev txiv tsev muaj kev lav ris qhia lawv cov me nyuam.

Muam Joy D. Jones, lub Koom Haum Me Nyuam Yaus tus Tuam Thawj Tswj Hwm, qhia hais tias, “Yog li ntawd, qhov thib peb uas pab cov me nyuam tsis xav ua txhaum yog kev pib thaum lawv tseem yog me nyuam yaus qhia lawv txog cov lus qhuab qhia thiab ntsiab cai ntawm txoj moo zoo—siv tej yam xws li cov vaj lug kub, Tej Nqe Kev Ntseeg, phau Kom Ntxiv Dag Zog rau cov Tub Hluas Ntxhais Hluas, tej zaj nkauj ntawm lub Koom Haum Me Nyuam Yaus, tej zaj nkauj qhuas Vajtswv, thiab peb zaj lus tim khawv—kom coj cov me nyuam los cuag tus Cawm Seej.” (“Ib Tiam Neeg Tsis Xav Ua Txhaum,” Ensign los sis Liahona, Tsib Hlis Ntuj 2017, 88).

Raws li muaj nyob hauv Lus Qhuab Qhia thiab Kev Khi Lus 68:25–28, tej “ntsiab cai ntawm txoj moo zoo” uas Muam Jones hais uas cov niam tsev txiv tsev qhia tau lawv cov me nyuam yog dab tsi? Vim li cas tau muab kev lav ris tseem ceeb no rau cov niam tsev txiv tsev? Koj yuav hais li cas rau ib tug niam tsev txiv tsev uas xav tias nws tsis tsim nyog qhia tej no rau nws cov me nyuam.

Kuj saib Tad R. Callister, “Niam Txiv: Thawj cov Xib Hwb uas Qhia txoj Moo Zoo rau Lawv cov Me Nyuam,” Ensign los sis Liahona, Kaum Ib Hlis Ntuj 2014, 32–34.

tsev neeg kawm ua ke

Lub tsev yog qhov chaw zoo tshaj plaws rau cov me nyuam kawm txoj moo zoo.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 67:10–14.Vim li cas kev khib siab, kev ntshai, thiab kev muab hlob ua rau peb tsis nyob ze tus Tswv? Vim li cas ib tug “neeg ntawm sab cev nqaij daim tawv” nyob tsis taus nrog tus Tswv? (nqe 12; kuj saib Mauxiyas 3:19). Peb kawm dab tsi hauv tej nqe no uas tshoov peb lub siab kom “ua siab ntev mus ntxiv kom txog thaum [peb] ua tau zoo tag nrho”? (nqe 13).

Tej zaum nej tsev neeg yuav xav nyeem Txwj Laug Jeffrey R. Holland zaj lus “Ua Neeg Zoo Tag Nrho—Thaum Kawg” (Ensign los sis Liahona, Kaum Ib Hlis Ntuj 2017, 40–42).

Lus Qhuab Qhia thiab Kev Khi Lus 68:3–4.Tej zaum nej tsev neeg yuav xav qhia txog tej lub sij hawm thaum lawv txais kev txhawb nqa rau lawv txoj kev ntseeg tias tus Tswv cov tub qhe tej lus yog “tus Tswv lub siab nyiam,” “qhov tus Tswv xav,” thiab “Vajtswv lub hwj chim rau kev cawm seej” (nqe 4). Los sis tej zaum nej yuav xav nrhiav tej zaj los ntawm lub tuam rooj sab laj uas hais txog ib qho teeb meem uas nej tsev neeg muaj tam sim no.

Lus Qhuab Qhia thiab Kev Khi Lus 68:25–35.Tej nqe no muaj tej lus ntuas tseem ceeb rau “cov neeg nyob hauv Xi-oos” (nqe 26). Peb txais kev tshoov siab kom ua dab tsi zoo dua ntxiv tom qab peb nyeem tej nqe no? Tej zaum yuav lom zem yog nej kos duab txog tej ntsiab cai hauv tej nqe no thiab muab zais thoob plaws nej lub tsev. Ces, ob peb hnub tom ntej thaum ib tug neeg nrhiav tau ib daim duab, nej siv tau lub cib fim ntawd qhia lawv txog lub ntsiab cai ntawd. Vim li cas lub tsev yog qhov chaw zoo tshaj plaws rau cov me nyuam kawm txog tej yam no?

Lus Qhuab Qhia thiab Kev Khi Lus 69:1–2.Tus Tswv tau xa Oliver Cowdery mus rau Missouri nrog tej daim ntawv uas muaj tus Yaj Saub tej kev tshwm sim kom muab luam tawm, thiab cov nyiaj uas yuav pab txhim tsa lub Koom Txoos nyob ntawd. Tus Tswv tau muab tej lus qhia twg nyob hauv nqe 1 txog Oliver txoj kev mus? Vim li cas yog ib qho tseem ceeb nyob nrog tib neeg uas yuav ncaj thiab tso siab tau? (nqe 1). Thaum twg peb tau muaj phooj ywg uas ua rau peb txiav txim raws li qhov zoo los sis qhov phem? Peb yuav ua li cas kom pab lwm tus txiav txim siab zoo?

Lus Qhuab Qhia thiab Kev Khi Lus 70:1–4.Tus Tswv tau muab kev lav ris saib xyuas kev muab tej kev tshwm sim luam tawm rau ib co txwj laug. Txawm yog peb tsis muaj kev lav ris ntawd los, peb ho zoo li “cov saib xyuas tej kev tshwm sim thiab tej lus txib” li cas? (nqe 3).

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Lub Tsev Zoo Li Ntuj Ceeb Tsheej,” Cov Nkauj Qhuas Vajtswv, zaj 139.

Kev Qhia Zoo Dua Ntxiv

Ua neej raws li cov vaj lug kub qhia. Tom qab nej nyeem ib nqe vaj lug kub, caw nej tsev neeg ua neej raws li vaj lug kub qhia. Piv txwv hais tias, tej zaum nej yuav caw lawv xav txog tej xwm txheej uas lawv yuav raug es lawv siv tau tej ntsiab cai ntawm txoj moo zoo ib yam li muaj hauv nqe vaj lug kub ntawd.

Grandin lub tshuab luam ntawv

Phau Ntawv Lus Txib, phau ua ntej phau Lus Qhuab Qhia thiab Kev Khi Lus, los tau muab luam tawm hauv ib lub tshuab zoo li no.