“Rau Hli Ntuj 28–Xya Hli Ntuj 4. Lus Qhuab Qhia thiab Kev Khi Lus 71–75: ‘Tsis Muaj Riam Phom Twg uas Tawm Tsam Nej Yuav Vam Meej,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)

“Rau Hli Ntuj 28–Xya Hli Ntuj 4. Lus Qhuab Qhia thiab Kev Khi Lus 71–75,” Los, Nrog Kuv Mus—Rau Ib Leeg thiab Tsev Neeg: 2021

Daim Duab

Yexus nrog cov yaj

Tus Tswv Yug Yaj Muaj lub Siab Hlub, los ntawm Simon Dewey

Rau Hli Ntuj 28–Xya Hli Ntuj 4

Lus Qhuab Qhia thiab Kev Khi Lus 71–75

“Tsis Muaj Riam Phom Twg uas Tawm Tsam Nej Yuav Vam Meej”

Txwj Laug Quentin L. Cook qhia hais tias, “Tej kev tshoov siab ntawm tus Vaj Ntsuj Plig Dawb Huv feem ntau muaj los thaum lawv kawm vaj lug kub thiab thov Vajtswv lawv tus kheej hauv tsev” (“Kev Hloov Siab Los Ntseeg rau ntawm Leej Txiv Saum Ntuj Ceeb Tsheej thiab tus Tswv Yexus Khetos uas Tob Heev thiab Kav Ntev,” Ensign los sis Liahona, Kaum Ib Hlis Ntuj 2018, 10).

Sau Ntawv txog Koj tej Kev Tshoov Siab

Txij thaum nws yog ib tug tub hluas, Joseph Smith muaj neeg cem nws—yeej muaj yeeb ncuab—thaum nws sim ua Vajtswv txoj hauj lwm. Tiam sis qhov tu siab tshaj yog thaum xyoo 1831 Ezra Booth pib cem lub Koom Txoos tab meeg txhua tus, vim zaum no tus uas cem yog ib tug neeg ntseeg dhau los. Ezra twb pom Joseph siv Vajtswv lub hwj chim kho ib tug poj niam zoo lawm. Joseph twb caw nws nrog nws mus saib xyuas thaj av Xi-oos nyob hauv Missouri. Tiam sis Ezra twb tso txoj kev ntseeg tseg, thiab xwv kom ua rau tus Yaj Saub poob ntsej muag, nws tau muab tej tsab ntawv luam tawm hauv ntawv xov xwm nyob hauv Ohio. Thiab zoo li nws raug neeg lub siab: “tej kev tsis sib raug zoo … tau hlav tuaj tawm tsam lub Koom Txoos” nyob hauv cheeb tsam ntawd (Lus Qhuab Qhia thiab Kev Khi Lus 71, zaj lus piav txog tshooj). Cov neeg uas ntseeg yuav tsum ua li cas thaum muaj xwm txheej li ntawd? Tsis muaj ib txoj kev xwb rau txhua lub sij hawm, tiam sis feem ntau—tsis hais thaum lub sij hawm rau xyoo 1831 los yog—ib feem ntawm tus Tswv tej lus teb yog hais kom peb tiv thaiv qhov tseeb thiab kho tej lus cuav los ntawm kev “plov meej … txoj moo zoo” (nqe 1). Muaj tseeb tiag, yeej yuav muaj neeg cem txog tus Tswv txoj hauj lwm, tiam sis thaum kawg, “tsis muaj ib yam riam phom twg uas yog tsim los tawm tsam [txoj hauj lwm ntawd] es yuav vam meej;” (nqe 9).

Saib “Ezra Booth and Isaac Morley,” Revelations in Context, 134.

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 71

Raws li Nws lub sij hawm tus Tswv mam li ua rau cov neeg uas cem Nws txoj hauj lwm tsis paub hais.

Tej zaum peb txhawj heev thaum peb hnov tib neeg cem los sis thuam lub Koom Txoos los sis cov thawj coj, qhov tseem ceeb yog thaum peb ntshai tib neeg uas peb paub thiab hlub yuav mloog lawv tej lus ntawd. Tiam sis thaum muaj xwm txheej zoo li ntawd nyob hauv Ohio thaum xyoo 1831 (saib zaj piav txog tshooj ntawm phau Lus Qhuab Qhia thiab Kev Khi Lus 71), tus Tswv zaj lus rau Joseph Smith thiab Sidney Rigdon yog hais txog kev ntseeg, tsis yog kev ntshai. Thaum koj kawm Lus Qhuab Qhia thiab Kev Khi Lus 71, koj nrhiav tau dab tsi uas txhawb koj txoj kev ntseeg tus Tswv thiab Nws txoj hauj lwm? Koj txais kev tshoov siab li cas txog tej lus qhia uas tus Tswv hais rau Nws cov tub qhe thaum muaj xwm txheej li no?

Kuj saib Robert D. Hales, “Christian Courage: The Price of Discipleship,” Ensign los sis Liahona, Kaum Ib Hlis Ntuj 2008, 72–75; Jörg Klebingat, “Defending the Faith,” Ensign, Cuaj Hlis Ntuj 2017, 49–53.

Lus Qhuab Qhia thiab Kev Khi Lus 72

Cov npisov yog cov uas saib xyuas tej xwm ntawm sab ntsuj plig thiab sab cev nqaij daim tawv hauv tus Tswv lub nceeg vaj.

Thaum tus Tswv tau hu Newel K. Whitney ua tus npisov thib ob hauv lub Koom Txoos, nws tej dej num yeej txawv me ntsis ntawm tej yam uas cov npisov ua niaj hnub nim no. Piv txwv hais tias, Npisov Whitney tau saib xyuas kev muab tej teej tug fij tseg thiab kev tso cai tsiv mus rau Missouri, nyob hauv thaj av Xi-oos. Tiam sis thaum koj nyeem txog nws txoj kev hu thiab tej dej num nyob hauv Lus Qhuab Qhia thiab Kev Khi Lus 72, tej zaum koj yuav pom tej yam uas cov npisov ua niaj hnub nim no—tej zaum tsis yog tib yam li ntawd, tiam sis lub ntsiab ntawm lawv tej dej num. Piv txwv hais tias, koj ua li cas kom “ceev ib zaj” rau koj tus npisov? (nqe 5). Koj tus npisov ua li cas kom “tswj tus Tswv lub tsev rau khoom” thiab saib xyuas tej uas cov mej zeej hauv nws pawg ntseeg muab fij tseg? (saib nqe 10, 12). Ib tug npisov tau pab koj li cas?

Kuj saib Gospel Topics, “Bishop,” topics.ChurchofJesusChrist.org.

Newel K. Whitney tau tswj tus npisov lub tsev rau khoom.

Lus Qhuab Qhia thiab Kev Khi Lus 73

Kuv muaj peev xwm nrhiav cib fim qhia txoj moo zoo.

Tom qab Joseph Smith thiab Sidney Rigdon tau mus tshaj tawm txoj moo zoo me ntsis es nkawd rov qab los kom kho tej yam uas Ezra Booth tau ua (saib Lus Qhuab Qhia thiab Kev Khi Lus 71), tus Tswv hais kom nkawd rov qab ua hauj lwm txhais phau Npaivnpaum (saib Bible Dictionary, “Joseph Smith Translation”). Tiam sis Nws tseem xav kom nkawd mus qhia txoj moo zoo ntxiv. Thaum koj nyeem Lus Qhuab Qhia thiab Kev Khi Lus 73, cia li xav txog qhov uas koj yuav ua li cas kom tshaj tawm txoj moo zoo tsis tu tsis tseg, raws li koj “muaj peev xwm ua tau” (nqe 4)—los sis koj ua tau tiag li—thaum koj ua koj tej kev lav ris hauv koj lub neej txhua hnub.

Lus Qhuab Qhia thiab Kev Khi Lus 75:1–12

Tus Tswv foom koob hmoov cov uas rau siab ntseeg plov meej Nws txoj moo zoo.

Muaj cov txwj laug rau siab ntseeg uas xav paub ntxiv txog qhov uas tus Tswv xav kom lawv ua raws li Nws txib lawv mus “mus thoob plaws lub ntiaj teb” tshaj tawm txoj moo zoo rau txhua tus neeg (Lus Qhuab Qhia thiab Kev Khi Lus 68:8). Koj nrhiav tau tej lus twg nyob hauv Lus Qhuab Qhia thiab Kev Khi Lus 75:1–12 uas pab koj to taub ua li cas thiaj li qhia tau txoj moo zoo? Tus Tswv tau cog lus tias cov tub txib rau siab ntseeg yuav tau koob hmoov zoo li cas? Cia li xav txog qhov uas tej lus qhia thiab cov koob hmoov no muaj nqis rau koj thaum koj qhia txog txoj moo zoo.

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 71.Tau hais kom Joseph Smith thiab Sidney Rigdon ua li cas thaum lwm tus cem lub Koom Txoos thiab cov thawj coj? Peb yuav ua li cas kom “npaj txoj kev” rau tib neeg txais tau Vajtswv tej kev tshwm sim? Lus Qhuab Qhia thiab Kev Khi Lus 71:4).

Lus Qhuab Qhia thiab Kev Khi Lus 72:2.Cov npisov tau ua li cas kom foom koob hmoov rau peb tsev neeg? Peb tus npisov tau thov kom peb ua dab tsi, thiab peb yuav ua li cas kom txhawb nqa nws? Tej zaum nej tsev neeg yuav xav sau ib daim kom ua nej tus npisov tsaug rau nws txoj kev ua hauj lwm.

Lus Qhuab Qhia thiab Kev Khi Lus 73:3–4.Nej tsev neeg puas txais kev pab yog lawv kawm txog Joseph Smith Kev Txhais phau Npaivnpaum? (saib Bible Dictionary, “Joseph Smith Translation”). Tej zaum nej yuav xav kawm txog ob peb nqe uas tau kho hauv Joseph Smith Kev Txhais thiab sib tham txog tej yam tseeb uas tus Tswv tau tshwm sim dhau los ntawm tus Yaj Saub. Xwv kom muaj piv txwv, saib Joseph Smith Kev Txhais Chiv Keeb 14:25–40 and Chiv Keeb 50:24–38 nyob hauv phau Npaivnpaum cov ntawv ntxiv rau tom qab; tej cim nram qab nyob hauv Mathais 4:1–11; thiab Lukas 2:46, lub cim nram qab c.

Lus Qhuab Qhia thiab Kev Khi Lus 74:7.Nqe no qhia dab tsi rau peb txog Yexus Khetos thiab cov me nyuam yaus?

Lus Qhuab Qhia thiab Kev Khi Lus 75:3–5, 13, 16.Pab nej tsev neeg to taub tiag tus Tswv xav kom peb ua li cas ua hauj lwm rau Nws thaum nej sib tham txog qhov uas “tub nkeeg” thiab “khwv ua hauj lwm nrog [peb] lub zog” ob qho no sib txawv li cas. Tej zaum nej yuav xav xaiv ob peb txoj hauj lwm uas ua hauv tsev thiab caw nej tsev neeg qhia ua tej hauj lwm ntawd zoo li lawv tub nkeeg thiab tom qab ntawd thaum lawv kwv nrog tag nrho lawv lub zog. Peb yuav ua li cas kom ua hauj lwm rau tus Tswv nrog tag nrho peb lub zog? Raws li hais nyob hauv phau Lus Qhuab Qhia thiab Kev Khi Lus 75:3–5, 13, 16, Nws cog lus tias Nws cov tub qhe uas rau siab ntseeg yuav txais dab tsi?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Cia Peb Sawv Daws Sib Zog Ua Vajtswv Tes Num,” Cov Nkauj Qhuas Vajtswv, zaj 113.

Kev Kawm Zoo Dua Ntxiv ntawm Yus Ib Leeg

Nrhiav tej lus uas tshoov koj lub siab. Thaum koj nyeem, tej zaum tus Ntsuj Plig yuav ua rau koj tsom ntsoov rau ib co lus. Xav seb koj puas sau tej lus los ntawm phau Lus Qhuab Qhia thiab Kev Khi Lus 71–75 uas tshooj koj lub siab.