“Xya Hli Ntuj 12–18. Lus Qhuab Qhia thiab Kev Khi Lus 77–80: ‘Kuv Yuav Coj Nej Kev,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Xya Hli Ntuj 12–18. Lus Qhuab Qhia thiab Kev Khi Lus 77–80,” Los, Nrog Kuv Mus—Rau Ib Leeg thiab Tsev Neeg: 2021
Mus Tsev, los ntawm Yongsung Kim
Xya Hli Ntuj 12–18
Lus Qhuab Qhia thiab Kev Khi Lus 77–80
“Kuv Yuav Coj Nej Kev”
Tus Tswv tau qhia Joseph Smith hais tias Nws yuav “hais tej lus tswv yim rau hauv [koj] pob ntseg” (Lus Qhuab Qhia thiab Kev Khi Lus 78:2). Koj txais tej lus tswv yim twg thaum koj kawm phau Lus Qhuab Qhia thiab Kev Khi Lus 77–80?
Sau Ntawv txog Koj tej Kev Tshoov Siab
Tsis tau txog ob xyoos tom qab tau muab Yexus Khetos lub Koom Txoos txum tim rov qab los, es twb muaj 2,000 tus mej zeej thiab txoj moo zoo tseem ri mus sai heev. Thaum lub Peb Hlis Ntuj 1832 Joseph Smith sib ntsib nrog lwm tus thawj coj hauv lub Koom Txoos “tej xwm ntawm lub Koom Txoos”: yuav tsum muab tej kev tshwm sim luam tawm, yuav thaj av rau kev sau los ua ke, thiab saib xyuas cov pluag (saib Lus Qhuab Qhia thiab Kev Khi Lus 78, zaj lus piav txog tshooj). Xwv kom pab ua li ntawd, tus Tswv tau hu ob peb tug thawj coj hauv lub Koom Txoos kom koom ua lub Koom Haum Ua Lag Luam Koom Siab, yog ib pawg uas yav koom siab “txhawb nqa [tus Tswv] txoj hauj lwm” (nqe 4) nyob hauv tej cheeb tsam ntawd. Tiam sis txawm yog tej xwm zoo li no los, tus Tswv tseem tsom ntsoov rau tej yam uas nyob mus ib txhis. Thaum kawg, lub ntsiab ntawm kev muaj ib lub tshuab luam ntawv los sis ib lub tsev rau khoom—ib yam li txhua yam hauv Vajtswv lub nceeg vaj—yog kom npaj Nws cov me nyuam txais “ib qho chaw rau [lawv] nyob saum lub ntuj xilethi-aus” thiab “tej kev nplua nuj nyob mus ib txhis” (nqe 7, 18). Thiab yog tias nyuaj rau peb xav txog cov koob hmoov ntawd tam sim no, thaum peb maj ua neej niaj hnub, Nws nplij peb lub siab tias, “Cia li zoo siab, vim kuv yuav coj nej kev” (nqe 18).
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 77
Vajtswv muab tej yam uas tsis muaj leej twg paub qhia rau cov uas nrhiav thiab xav paub tej ntawd.
Kaum ob xyoos tom qab Thawj Zaug Ua Yog Toog, tej lus hauv Yakaunpaus 1:5 kom “thov Vajtswv” tau pab Joseph Smith thaum nws tsis muaj tswv yim. Thaum nws thiab Sidney Rigdon muaj tej lus nug txog phau Tshwm Sim thaum nkawd tab tom txhais lus phau Npaivnpaum, Joseph nrhiav tswv yim los ntawm Vajtswv. Thaum koj nyeem Lus Qhuab Qhia thiab Kev Khi Lus 77, cia li xav seb koj puas sau ntawv txog koj tej lub tswv yim txog tej yam uas muaj hauv tej tshooj ntawm phau Tshwm Sim.
Tsis tas li ntawd, xav seb koj yuav ua il cas kom coj raws li tus Yaj Saub Joseph tus yam ntxwv thaum koj kawm vaj lug kub. Tej zaum koj yuav xav thov Leej Txiv Saum Ntuj Ceeb Tsheej, “Koj xav kom kuv to taub dab tsi?”
Kev Txhais phau Npaivnpaum, los ntawm Liz Lemon Swindle
Lus Qhuab Qhia thiab Kev Khi Lus 78
Lub Koom Haum Ua Lag Luam Koom Siab yog dab tsi?
Twb tau tsa lub Koom Haum Ua Lag Luam Koom Siab kom saib xyuas lub Koom Txoos txoj kev luam ntawv thiab tej xwm ua lag luam hauv lub xeev Ohio thiab Missouri. Lub koom haum no muaj Joseph Smith, Newel K. Whitney, thiab lwm tus thawj coj hauv lub Koom Txoos uas tau tso lawv tej khoom ua ke kom pab cov Neeg Ntseeg uas loj tuaj tej kev xav tau. Tiam sis, lub Koom Haum Ua Lag Luam Koom Siab twb tiv nqi thiab raug tso tseg thaum xyoo 1834 thaum them tsis taus tej nqi ntawd.
Kuj saib “Newel K. Whitney and the United Firm,” Revelations in Context, 142–47; “United Firm,” Church History Topics, ChurchofJesusChrist.org/study/church-history.
Lus Qhuab Qhia thiab Kev Khi Lus 78:1–7
Kuv muaj peev xwm pab “txhawb nqa txoj hauj lwm” ntawm lub Koom Txoos.
Tus Tswv tau qhia Joseph Smith thiab lwm tus thawj coj ntawm lub Koom Txoos tias kev saib xyuas ib lub tsev rau khoom thiab ib lub tshuab luam ntawv yuav pab “txhawb nqa txoj hauj lwm no, uas nej tau rau siab ua” (Lus Qhuab Qhia thiab Kev Khi Lus 78:4). Koj yuav hais li cas tias “txoj hauj lwm” ntawm lub Koom Txoos yog dab tsi? Cia li xav txog qhov no thaum koj nyeem Lus Qhuab Qhia thiab Kev Khi Lus 78:1–7. Tej zaum qhov uas koj xav txog tej nqe no yuav pab koj thaum koj ua koj txoj kev hu hauv lub Koom Txoos los sis ua hauj lwm pab koj tsev neeg. Koj txoj kev pab lwm tus yuav ua li cas kom “txhawb nqa [tus Tswv] txoj hauj lwm”? Vim li cas kev ua li no yuav npaj koj muaj “ib qho chaw rau [koj] nyob saum lub ntuj xilethi-aus”? (nqe 7).
Lus Qhuab Qhia thiab Kev Khi Lus 78:17–22
Tus Tswv yuav coj kuv kev.
Puas muaj sij hawm thaum koj xav tias koj zoo li ib tug me nyuam yaus, vim muaj dab tsi uas koj “tseem tsis to taub” los sis “ris tsis taus”? (Lus Qhuab Qhia thiab Kev Khi Lus 78:17–18). Nrhiav tej lus ntuas hauv tej nqe no uas yuav pab koj “cia li zoo siab” (nqe 18) thaum muaj sij hawm zoo li no. Koj xav yog vim li cas tus Tswv hu cov uas coj raws li Nws hu ua “me nyuam yaus”? (nqe 17). Tej zaum koj kuj yuav xav txog qhov uas tus Tswv ua li cas kom “coj [koj] kev” (nqe 18).
Lus Qhuab Qhia thiab Kev Khi Lus 79–80
Qhov uas Vajtswv hu kuv ua hauj lwm rau Nws yeej yog ib qho tseem ceeb tshaj qhov chaw uas kuv ua hauj lwm ntawd.
Hais txog phau Lus Qhuab Qhia thiab Kev Khi Lus 80, Txwj Laug David A. Bednar qhia tias, “Tej zaum ib zaj lus tseem ceeb uas tus Cawm Seej qhia peb hauv kev tshwm sim no yog qhov uas kev txib ua dej num hauv ib qho chaw yeej tseem ceeb heev tiam sis qhov tseem ceeb tshaj plaws yog kev hu ua hauj lwm.” (“Txais Kev Hu Ua Hauj Lwm,” Ensign los sis Liahona, Tsib Hlis Ntuj 2017, 68). Cia li xav txog tej kev hu koj ua hauj lwm hauv lub Koom Txoos tam sim no los yog yav tas los. Tej yam twg tau pab koj kawm tias Txwj Laug Bednar tej lus muaj tseeb? Koj kawm tau dab tsi ntxiv nyob hauv Lus Qhuab Qhia thiab Kev Khi Lus 79–80 ua yuav pab tau lwm tus uas txais ib txoj kev hu tshiab?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 77:2.Tom qab nej nyeem nqe no, tej zaum nej tsev neeg yuav xav kos duab txog cov “tsiaj, … tej yam uas txawj nkag mus kev, … [los sis] tej noog saum nruab ntug” nej nyiam tshaj uas Vajtswv tau tsim. Peb kawm dab tsi txog tej yam uas Vajtswv tau tsim los ntawm tej nqe no? (kuj saib Lus Qhuab Qhia thiab Kev Khi Lus 59:16–20). Tej zaum nej kuj yuav xav hu ib zaj nkauj txog tej uas Vajtswv tau tsim, xws li“My Heavenly Father Loves Me” (Children’s Songbook, 228–29), thiab muab daim duab uas txuas rau tus txheej txheem qhia no rau lawv saib.
-
Lus Qhuab Qhia thiab Kev Khi Lus 77:14.Nqe no piav tias Yauhas tau noj ib phau ntawv uas piv txog nws lub luag hauj lwm kom muab Ixayees sau los ua ke. Lub cim ntawm kev noj no qhia dab tsi rau peb tias peb yuav tsum ua peb txoj hauj lwm muab Ixayees sau los ua ke zoo li cas los sis ua lwm yam uas tus Tswv xav kom peb ua? Nov yog ob peb nqe vaj lug kub ntxiv uas siv txoj kev noj kom qhia txog qhov tseeb ntawm sab ntsuj plig : Yauhas 6:48–51; 2 Nifais 32:3; Maulaunais 4. Tej zaum nej yuav xav ua ib pluas mov uas nej tsev neeg nyiam noj ua ke thaum nej sib tham txog qhov no.
-
Lus Qhuab Qhia thiab Kev Khi Lus 78:17–19.Tej zaum nej tsev neeg yuav xav kos duab txog cov koob hmoov los ntawm Vajtswv uas ua rau lawv xav ua Nws tsaug. Peb ua li cas kom qhia Vajtswv tias peb ua Nws tsaug rau cov koob hmoov ntawd? Tej zaum nej kuj yuav xav sib tham txog qhov uas nej tsev neeg ua li cas kom txais “txhua yam nrog txoj kev ua tsaug los” (nqe 19). Tus Tswv cog lus tias Nws yuav muab dab tsi rau cov uas ua li ntawd?
-
Lus Qhuab Qhia thiab Kev Khi Lus 79:1.Qhia nej zaj lus tim khawv txog “lub hwj chim” uas nej tau txais thaum tau tsa nej ua tej kev hu hauv lub Koom Txoos. Tus Tswv tau muab tej txiaj ntsim thiab tej kev tshoov siab twg kom foom koob hmoov rau nej thaum nej ua hauj lwm li ntawd?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Suav Nej cov Koob Hmoov Ntau,” Cov Nkauj Qhuas Vajtswv, zaj 112.
Kev Qhia Zoo Dua Ntxiv
Kos ib daim duab. Nrog nej tsev neeg, tej zaum nej yuav xav nyeem ob peb nqe ces cia muaj sij hawm rau nej tsev neeg kos duab txog tej yam uas lawv tau nyeem. Muab cov duab dai rau ub rau no hauv nej tsev kom nej tsev neeg nco txog tej ntsiab cai uas nej tau kawm.
Vajtswv lub Vaj, los ntawm Sam Lawlor