“Xya Hli Ntuj 5–11. Lus Qhuab Qhia thiab Kev Khi Lus 76: ‘Lawv Yuav Txais Nqi Zog Tseem Ceeb thiab Lawv lub Yeeb Koob Yuav Nyob Mus Ib Txhis,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Xya Hli Ntuj 5–11. Lus Qhuab Qhia thiab Kev Khi Lus 76,” Los, Nrog Kuv Mus—Rau Ib Leeg thiab Tsev Neeg: 2021
Qhov Chaw Tiv Thaiv, los ntawm Shaelynn Abel
Xya Hli Ntuj 5–11
Lus Qhuab Qhia thiab Kev Khi Lus 76
“Lawv Yuav Txais Nqi Zog Tseem Ceeb thiab Lawv lub Yeeb Koob Yuav Nyob Mus Ib Txhis”
Nyob hauv tshooj 76, tus Tswv qhia tias Nws xav tshwm sim qhov tseeb rau peb npaum li cas (saib nqe 7–10). Cia li nyeem cov vaj lug kub nrog kev ntseeg tias Nws muaj peev xwm thiab Nws yuav tshwm sim “tej yam txog Vajtswv” (nqe 12) rau koj uas koj yuav tsum pub. Ces cia li sau ntawv txog tej kev tshoov siab uas koj txais thaum koj “tseem muaj tus Ntsuj Plig puv npo” (nqe 28, 80, 113).
Sau Ntawv txog Koj tej Kev Tshoov Siab
“Yuav muaj li cas tom qab kuv tas sim neej?” Yuav luag txhua txoj kev teev ntuj hauv lub ntiaj teb no teb txoj lus nug no. Tau ntev lawm, cov ntseeg Khetos feem coob, siv tej lus qhia hauv phau Npaivnpaum, es lawv qhia txog lub ntuj ceeb tsheej thiab ntuj txiag teb tsaus, txog yeeb tsheej rau cov ncaj ncees thiab kev raug tsim txom rau cov phem. Tiam sis puas yog yus muab tau txhua tus tib neeg faib rau cov uas zoo thiab cov uas phem xwb? Thiab lo lus ntuj ceeb tsheej txhais li cas? Thaum lub Ob Hlis Ntuj 1832, Joseph Smith thiab Sidney Rigdon xav paub seb puas muaj dab tsi ntxiv uas qhia txog qhov no (saib Lus Qhuab Qhia thiab Kev Khi Lus 76, zaj lus piav txog tshooj).
Yeej muaj ntxiv. Thaum nkawd xav txog tej no, tus Tswv “tau chwv [nkawd] qhov muag ntawm [nkawd] txoj kev to taub thiab [nkawd] qhov muag txawm qhib” (nqe 19). Joseph thiab Sidney tau txais kev tshwm sim uas zoo kawg nkaus, ci ntsa iab heev, thiab loj heev, Haiv Neeg Ntseeg thiaj tau hu kev tshwm sim no ua “Kev Ua Yog Toog.” Ua rau lub ntuj ceeb tsheej qhib thiab cia Vajtswv cov me nyuam muaj ib txoj kev pom lub neej uas nyob mus ib txhis. Kev ua yog toog no qhia tias lub ntuj ceeb tsheej yeej loj thiab dav dua li lwm tus tau xav ua ntej. Vajtswv muaj siab hlub thiab Nws ncaj ncees tshaj qhov peb to taub. Thiab Vajtswv cov me nyuam muaj ib txoj hmoov nyob mus ib txhis uas muaj yeeb koob tshaj qhov peb muaj peev xwm xav.
saib Saints, 1:147–50; “The Vision,” Revelations in Context, 148–54.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 76
Kev cawm seej yeej los ntawm Yexus Khetos, Vajtswv Leej Tub.
Thaum Wilford Woodruff nyeem kev ua yog toog uas piav txog hauv tshooj 76, nws hais tias, “Kuv twb hnov tus Tswv txoj kev hlub ntau tshaj kuv ib txwm hnov yav tas los” (saib “Tej lub Suab ntawm Kev Muab txoj Moo Zoo Txum Tim Rov Qab Los” nyob ntawm qhov xaus tus txheej txheem qhia no). Tej zaum koj twb xav li ntawd thaum koj tau nyeem kev tshwm sim no. Vim hais tias yeej yuav tsis muaj cov koob hmoov zoo kawg uas qhia txog hauv tshooj 76 yog tias tsis muaj tus Cawm Seej. Tej zaum koj yuav xav saib txhua nqe hauv tshooj 76 uas hais txog tus Tswv Yexus Khetos. Tej nqe no qhia dab tsi rau koj txog Nws thiab Nws lub luag hauj lwm hauv Vajtswv txoj hau kev? Tej nqe no ua li cas rau koj txoj kev xav txog Nws? Thaum koj nyeem thiab xav txog qhov no, tej zaum koj yuav txais kev tshoov siab txog qhov uas koj yuav ua li cas kom “txais ib zaj lus tim khawv txog Yexus” thiab “rau siab ua raws li” zaj lus tim khawv ntawd (nqe 51, 79).
Lus Qhuab Qhia thiab Kev Khi Lus 76:39–44, 50–112
Vajtswv xav cawm “tag nrho tej yam nws ob txhais tes tau ua.”
Muaj ib txhia neeg, tsis hais ib co mej zeej ntawm lub Koom Txoos thaum ub, lawv tsis pom zoo rau kev ua yog toog nyob hauv tshooj 76 vim nws qhia tias yuav luag txhua leej txhua tus yuav txais kev cawm seej thiab txais ib theem yeeb koob. Tej zaum lawv tsis pom zoo vim lawv tsis to taub ib yam txog Vajtswv thiab Nws txoj kev txheeb ze rau peb. Thaum koj nyeem kev tshwm sim no, koj kawm dab tsi txog Vajtswv tus cwj pwm thiab Nws txoj hau kev rau Nws cov me nyuam?
Cia li xav txog qhov uas kev cawm seej (kom dim kev tuag ntawm sab cev nqaij daim tawv thiab sab ntsuj plig; saib nqe 39, 43–44) thiab kev tsab nto (kev nyob nrog Vajtswv thiab hloov los ua neeg zoo li Nws; saib nqe 50–70) ob qho no txawv li cas.
Kuj saib Yauhas 3:16–17; Lus Qhuab Qhia thiab Kev Khi Lus 132:20–25.
Lus Qhuab Qhia thiab Kev Khi Lus 76:50–70, 92–95
Kuv Leej Txiv Saum Ntuj Ceeb Tsheej xav kom kuv txais txoj sia nyob mus ib txhis nyob hauv lub ntuj xilethi-aus.
Koj puas tau xav paub—los yog txhawj—txog qhov uas koj puas yuav tsim nyog txais lub nceeg vaj xilethi-aus? Thaum koj nyeem tej lus uas piav txog cov uas txais theem yeeb koob no (saib nqe 50–70, 92–95), tsis txhob saib tias koj yuav tsum ua dab tsi xwb, cia li nrhiav tej yam uas Vajtswv tau ua—thiab ua tam sim no—kom pab koj hloov los ua neeg zoo li Nws. Kev nyeem txoj kev ua yog toog zoo li no puas hloov koj txoj kev xav txog tej yam koj ua?
Tej zaum koj kuj yuav xav txog qhov uas peb paub txog tej yam ntawm lub nceeg vaj xilethi-aus no yog ib txoj koob hmoov zoo kawg. Txoj kev ua yog toog txob lub yeeb koob xilethi-aus puas hloov koj txoj kev xav txog koj lub neej txhua hnub?
Kuj saib Mauxes 1:39; Joy D. Jones, “Muaj Nqis Tshaj Qhov Ntsuas Tau,” Ensign los sis Liahona, Kaum Ib Hlis Ntuj 2017, 13–15; J. Devn Cornish, “Kuv Puas Zoo Txaus? Kuv Puas Ua Tau?” Ensign Los Sis Liahona, Kaum Ib Hlis Ntuj 2016, 32–34.
Joseph Smith ua yog toog pom tej theem yeeb koob hauv chav no.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 76:22–24, 50–52, 78–79, 81–82.Peb kawm dab tsi los ntawm tej nqe no txog qhov uas peb tej zaj lus tim khawv tseem ceeb npaum li cas? Peb zaj lus tim khawv muaj nqis dab tsi rau peb txoj hmoov mus ib txhis li? Tej zaum yuav pab nej nrhiav lub ntsiab ntawm lo lus rau siab kom pab nej sib tham yuav ua li cas thiaj li “rau siab ua raws li tej lus tim khawv txog Yexus” (nqe 79). Tej zaum nej kuj yuav xav hu nkauj “I Will Be Valiant” (Children’s Songbook, 162).
-
Lus Qhuab Qhia thiab Kev Khi Lus 76:24.Tej zaum nej tsev neeg yuav pom tej yam uas sib txuas ua ke ntawm tej yam tseeb hauv tshooj 76 thiab tej lus qhia nyob hauv “I Am a Child of God” (Children’s Songbook, 2–3); ib yam tseeb no los muaj nyob hauv Lus Qhuab Qhia thiab Kev Khi Lus 76:24. Lub ntiaj teb no yuav txawv li cas yog tias txhua leej txhua tus to taub tias peb yog Vajtswv cov me nyuam? Qhov tseeb no ua rau peb coj zoo li cas rau lwm tus? Tej zaum nej yuav xav saib tej daim duab txog Vajtswv cov tub thiab cov ntxhais hauv lub ntiaj teb no uas sib txawv kom nej tsev neeg xav txog cov lus nug no. (Kuj saib “Video Presentation: I Am a Child of God,” ChurchofJesusChrist.org.)
Xav seb nej puas hu nkauj zaj “Kuv Yog Vajtswv Me Nyuam” thiab nrhiav tej yam uas txuas rau tej ntsiab cai uas nyob hauv tshooj 76 (saib, ua piv txwv, nqe 12, 62, 96).
-
Lus Qhuab Qhia thiab Kev Khi Lus 76:40–41.Yog tias peb hais lub ntsiab ntawm “tej moo zoo siab” (nqe 40), los sis txoj moo zoo, uas nyob hauv tej nqe no sau hauv ntawv xov xwm los sis tso online, ces peb yuav hais li cas? Peb nrhiav tau tej moo zoo siab ntxiv nyob hauv tshooj 76?
-
Lus Qhuab Qhia thiab Kev Khi Lus 76:50–70.Nej yuav pab nej tsev neeg tos ntsoov thiab npaj rau txoj sia nyob mus ib txhis nyob hauv lub nceeg vaj xilethi-aus li cas? Tej zaum nej yuav xav ua hauj lwm ua ke nrhiav daim duab, tej nqe vaj lug kub, thiab cov yaj saub tej lus qhia uas muaj lub ntsiab zoo li tej lus nyob hauv Lus Qhuab Qhia thiab Kev Khi Lus 76:50–70. Tej zaum nej yuav nrhiav tau tej yam no nyob hauv lub Koom Txoos cov ntaub ntawv, nyob ntawm ChurchofJesusChrist.org, los sis nyob hauv tej cim nram qab hauv cov vaj lug kub. Ces nej muab tau tej duab, cov vaj lug kub, thiab tej lus qhia tso rau ib daim loj uas ua rau nej tsev neeg nco qab txog tej hom phiaj mus ib txhis no.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “I Know That My Redeemer Lives,” Cov Nkauj Qhuas Vajtswv, zaj 53.
Tej lub Suab ntawm Kev Muab txoj Moo Zoo Txum Tim Rov Qab Los: Tej zaj Lus Tim Khawv txog “Kev Ua Yog Toog”
Wilford Woodruff
Wilford Woodruff tau koom lub Koom Txoos thaum lub Kaum Ob Hlis Ntuj 1833, yuav luag ob xyoos tom qab Joseph Smith thiab Sidney Rigdon tau ua yog toog pom zaj uas muaj hauv Lus Qhuab Qhia thiab Kev Khi Lus 76. Nws nyob hauv New York thaum ntawd thiab kawm txog “txoj Kev Ua Yog Toog” los ntawm cov tub txib uas ua hauj lwm hauv cheeb tsam no. Ntau xyoo tom qab ntawd nws hais txog nws txoj kev xav txog kev tshwm sim no:
“Txij thaum kuv yog ib tug me nyuam yaus los kuv kawm tias muaj ib lub Ntuj Ceeb Tsheej thiab ib lub Ntuj Txias Teb Tsaus thiab kuv kawm tias txhua tus phem raug txim ib yam thiab txhua tus ncaj ncees tau yeeb koob zoo ib yam. …
“… Thaum kuv nyeem zaj ua yog toog ntawd … , ua rau kuv lub siab kaj thiab ua rau kuv muaj kev xyiv fab heev, zoo li kuv to taub tias Vajtswv tus uas tau qhia lub ntsiab cai no rau neeg yeej muaj tswv yim thiab nws ncaj ncees, Nws muaj tej cwj pwm zoo tshaj plaws uas yog kev ncaj thiab kev txawj ntse. Kuv xav tias Nws yeej muaj kev hlub, kev hlub tshua, kev ncaj ncees, thiab kev txim lij, thiab kuv xav tias kuv yeej hlub tus Tswv tshaj yav tas los.”1
“‘Kev Ua Yog Toog’ [yog] ib txoj kev tshwm sim uas ua rau peb muaj qhov kaj, qhov tseeb thiab tej lub ntsiab cai ntau tshaj lwm txoj kev tshwm sim uas tau muaj hauv txhua phau ntawv. Ua rau peb to taub meej txog peb lub neej no, peb tuaj qhov twg tuaj, vim li cas peb nyob no, thiab peb yuav mus qhov twg. Txhua tus neeg paub tau los ntawm kev tshwm sim ntawd tias nws txoj hauj lwm thiab nws lub neej yuav zoo li cas.”2
“Ua ntej kuv pom Jospeh kuv hais tias kuv tsis xav li cas yog nws laus, los yog nws hluas; kuv tsis xav li cas yog nws muaj ntsis zoo li cas—nws muaj plaub hau ntev los sis plaub hau luv; tus txiv neej uas tau txais kev tshwm sim ntawd yog Vajtswv ib tug yaj saub tiag. Kuv twb paub li ntawd ntawm kuv tus kheej.”3
Phebe Crosby Peck
Thaum Phebe Peck hnov Joseph thiab Sidney qhia txog “txoj Kev Ua Yog Toog,” nws nyob hauv Missouri thiab tu tsib tug me nyuam thaum nws yog ib tug niam tsev uas tsis muaj tus txiv. Kev ua yog toog no tau tshoov nws lub siab heev nws thiaj li sau ntawv li no kom qhia txog tej yam nws kawm tau rau nws cov txheeb ze:
“Tus Tswv yeej qhia tej txuj ci uas neeg tsis paub txog lub Nceeg Vaj saum ntuj ceeb tsheej rau nws cov Me Nyuam. … Joseph Smith thiab Sidney Rigdon tau tuaj xyuas peb thaum lub caij nplooj ntoo hlav tas los, thiab peb tau muaj kev sib ntsib ntau thaum nkawd nyob no, thiab ua rau peb to taub tej txuj ci uas neeg tsis paub ntau txog, ua rau kuv txais kev nplij siab heev. Peb twb kawm txog Vajtswv txoj kev hlub vim Nws npaj chaw rau nws cov me nyuam txais kev kaj siab lug. Thiab cov uas tsis kam txais tag nrho txoj moo zoo thiab rau siab ua Khetos txoj hauj lwm nyob tsis taus nrog Leej Txiv thiab Nws Leej Tub. Tiam sis muaj ib qhov chaw uas tau npaj rau cov uas tsis kam txais, tiam sis yog ib theem yeeb koob tsawg dua li kev nyob hauv lub nceeg vaj Xilethi-aus. Kuv yuav tsis hais ntxiv txog tej yam no vim tam sim no lawv tab tom muab luam ntawv thiab xa mus rau thoob lub ntiaj teb no. Thiab tej zaum nej yuav muaj cib fim nyeem tej no, thiab yog nej nyeem, kuv cia siab tias nej yuav ua tib zoo thov Vajtswv txog tej ntawd, vim tej ntawd yeej tsim nyog nej xav txog. Thiab kuv xav kom nej yuav ua tib zoo nrhiav hauv tej ntawd, vim tej ntawd yuav ua rau peb muaj kev zoo siab hauv lub neej no thiab hauv lub neej tom ntej.”4
Tej Theem Yeeb Koob, los ntawm Annie Henrie Nader