Khetos thiab tus nom tswv hluas

Khetos thiab tus Nom Tswv Hluas, los ntawm Heinrich Hofmann

Xya Hli Ntuj 19–25

Lus Qhuab Qhia thiab Kev Khi Lus 81–83

“Tus uas Tau Ntau tus Ntawd Yuav Tsum Pauj Ntau”

Thaum koj kawm phau Lus Qhuab Qhia thiab Kev Khi Lus 81–83, sau txog tej lub ntsiab cai uas yuav pab koj ua zoo rau koj tsev neeg, koj cov phooj ywg, thiab lwm tus.

Sau Ntawv txog Koj tej Kev Tshoov Siab

Thaum lub Peb Hlis Ntuj xyoo 1832, tus Tswv tau hu Jesse Gause ua ib tug pab cuam rau Joseph Smith hauv Pawg Thawj Tswj Hwm ntawm Pov Thawj Hlob (uas tam sim no hu ua Thawj Pawg Thawj Tswj Hwm). Lus Qhuab Qhia thiab Kev Khi Lus 81 yog kev tshwm sim rau Tij Laug Gause, uas qhia nws txog nws txoj kev hu tshiab thiab cog lus rau nws tias nws yuav tau koob hmoov yog nws rau siab ntseeg ua hauj lwm. Tiam sis Jesse Gause tsis tau rau siab ua hauj lwm. Yog li ntawd tus Tswv tau hu Frederick G. Williams pauv nws chaw, thiab Tij Laug Gause lub npe raug tshem tawm ntawm kev tshwm sim no thiab ntxig Tij Laug William lub npe haud.

Tej zaum qhov no yog ib qho me heev, tiam sis qhov no qhia txog ib yam tseeb uas tseem ceeb heev: Tej kev tshwm sim feem ntau hauv phau Lus Qhuab Qhia thiab Kev Khi Lus yog hais rau tib neeg, tiam sis peb muaj peev xwm xav tias tej ntawd hais li cas rau peb tus kheej (saib 1 Nifais 19:23). Tus Tswv tej lus qhia rau Frederick G. Williams kom nws “txheem tej hauv caug uas qaug zog” ua rau peb xav txog cov neeg uas peb muaj peev xwm txhawb nqa lawv (Lus Qhuab Qhia thiab Kev Khi Lus 81:5). Tus Tswv tej lus ntuas rau cov mej zeej hauv lub Koom Haum Ua Lag Luam Koom Siab kom “muab txoj kev khi lus no khi nej tus kheej ua ke” xwv kom pab cov Ntseeg tej kev xav tau ntawm sab cev nqaij daim tawv pab tau peb xav txog peb tus kheej tej kev khi lus. Thiab tus Tswv txoj kev cog lus tias Nws “yuav tsum ua raws li kuv cog lus thaum nej ua raws li kuv hais” ua rau peb nco txog Nws tej lus cog tseg thaum peb ua raws li Nws hais (Lus Qhuab Qhia thiab Kev Khi Lus 82:10, 15). Yeej yog li ntawd, vim tus Tswv kuj hais tias, “Kuv hais dab tsi rau ib tug ces kuv hais rau sawv daws” (nqe 5).

Saib “Newel K. Whitney and the United Firm,” “Jesse Gause: Counselor to the Prophet,” Revelations in Context, 142–47, 155–57.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 81

Kuv muaj peev xwm rau siab ua tej yam uas tus Tswv hais kom kuv ua.

Tej lub sij hawm koj puas xav tias koj yuav ua li cas kom ua raws li tej kev lav ris tseem ceeb hauv koj lub neej? Thaum nws yog ib tug pab cuam rau tus Yaj Saub Joseph Smith, Frederick G. Williams yeej muaj tej kev lav ris tseem ceeb. Nyob hauv tshooj 81, tus Tswv tau qhia rau nws paub ua tej ntawd. Muaj dab tsi uas koj kawm hauv tshooj no uas pab tau koj ua raws li tej kev lav ris uas tus Tswv tau muab rau koj?

Nov yog tej lus nug uas yuav pab koj xav txog nqe 5:

• Muaj tej yam twg uas ua rau ib tug neeg “qaug zog”? Qhov uas yus “txhawb pab” cov qaug zog txhais li cas?

• Muaj dab tsi uas ua rau ib tug neeg tej tes “qaug dai ncuv”? Peb yuav ua li cas kom muab tej tes ntawd “tsa”?

• Cov lus “tej hauv caug uas qaug zog” txhais li cas? Peb yuav ua li cas kom “txheem” cov uas muaj hauv caug uas qaug zog?

Tej zaum koj txoj kev kawm nqe no ua rau koj xav txog ib tug neeg uas koj txawj “txhawb pab,” “tsa,” los sis “txheem.” Koj yuav ua li cas kom txhawb pab tus ntawd?

Sidney Rigdon, Joseph Smith, Frederick G. Williams

Thawj Pawg Thawj Tswj Hwm: Sidney Rigdon, Joseph Smith, Frederick G. Williams

Lus Qhuab Qhia thiab Kev Khi Lus 82:1–7

Tus Tswv caw kuv hloov siab lees txim thiab tso kuv tej kev txhaum tseg.

Thaum koj nyeem Lus Qhuab Qhia thiab Kev Khi Lus 82:1–7, cia li xav seb koj puas sau ob yam txog tej yam uas koj tau kawm: tej lus ceeb toom txog kev txhaum thiab tej yam tseeb txog kev zam txim. Tej yam tseeb no yuav pab koj li cas kom tiv tau tus yeeb ncuab tej kev ntxias?

Lus Qhuab Qhia thiab Kev Khi Lus 82:8–10

Vajtswv muab tej lus txib kom cawm kuv dim thiab pov hwm kuv.

Yog koj—los sis ib tug uas koj paub—xav paub vim li cas tus Tswv muab tej lus txib ntau rau peb, tej zaum phau Lus Qhuab Qhia thiab Kev Khi Lus 82:8–10 pab tau. Muaj tej lus qhia twg hauv tej nqe no uas yuav pab koj piav vim li cas koj xav ua raws li tus Tswv tej lus txib? Tej zaum koj kuj yuav xav seb Nws tej lus txib tau hloov koj lub neej li cas. Koj kawm dab tsi txog tus Tswv thaum koj nyeem nqe 10?

Kuj saib Lus Qhuab Qhia thiab Kev Khi Lus 130:20–21; Carole M. Stephens, “Yog Nej Hlub Kuv, Ua Raws Li Kuv tej Lus Txib,” Ensign los sis Liahona, Kaum Ib Hlis Ntuj 2015, 118–20.

Lus Qhuab Qhia thiab Kev Khi Lus 83

“Yuav tsum muab khoom pab cov poj ntsuam thiab cov me nyuam ntsuag.”

Thaum lub Plaub Hlis Ntuj 1832, raws li tus Tswv qhia, Joseph Smith tau mus deb li 800 mais mus xyuas cov Neeg Ntseeg uas tau sau los ua ke hauv Missouri (saib Lus Qhuab Qhia thiab Kev Khi Lus 78:9). Nws tuaj xyuas ib lub zos uas muaj cov poj ntsuam uas tu lawv cov me nyuam lawv ib leeg xwb. Phebe Peck thiab Anna Rogers nyob ntawd thiab, es tus Yaj Saub paub nkawd zoo. Nyob hauv Missouri thaum tej xyoo 1830, tej kev cai hauv lub xeeb tsis tau muab txoj cai ntau rau cov poj ntsuam txais tau lawv tus txiv tej teej tug. Koj kawm dab tsi los ntawm tshooj 83 txog qhov uas tus Tswv xav li cas txog cov poj ntsuam thiab me nyuam ntsuag? Koj puas paub leej twg uas zoo li no uas yuav xav txais tau koj txoj kev hlub los sis kev saib xyuas?

Kuj saib Yaxayas 1:17; Yakaunpaus 1:27.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 81:3.Tej zaum nej yuav xav muab tej lub huam cais ntawv rau nej tsev neeg thiab caw lawv kos duab los sis sau ntawv txog tej yam uas lawv xav thov Vajtswv txog. Cia li sib tham txog qhov uas “hais lus thov thiab thov nyob hauv koj lub siab” txhais li cas.

Lus Qhuab Qhia thiab Kev Khi Lus 81:5.Kom pab nej kawm txog tej lub ntsiab cai hauv nqe no, tej zaum nej tsev neeg yuav xav hais txog tej lub sij hawm thaum lawv “qaug zog” thiab ib tug neeg tau txhawb pab los sis txheem lawv. Tej zaum nej yuav xav saib video txog kev pab lwm tus neeg “Works of God” los sis “The Miracle of the Roof” (ChurchofJesusChrist.org). Cia li sib tham seb nej tsev neeg yuav ua li cas kom ib leeg pab ib leeg.

Lus Qhuab Qhia thiab Kev Khi Lus 82:8–10.Tej zaum ib txoj kev ua si yuav pab nej tsev neeg ua Vajtswv tsaug rau Nws tej lus txib. Cia ib tug hauv nej tsev neeg hais lus qhia kom pab ib tug uas muab daim ntaub npog qhov muag ua ib daim sandiwch los sis mus hauv ib txoj kev uas muaj tej yam uas tav kev. Xav txog ib yam zoo uas yuav lom zem heev! Ces sib tham seb Vajtswv tej lus txib yeej zoo li tej lus qhia uas tau hais thaum ua si li ntawd.

Lus Qhuab Qhia thiab Kev Khi Lus 82:18–19.Nej tsev neeg muaj peev xwm ua dab tsi kom “txhua tus neeg yuav ua rau nws choj nyiaj muaj ntau ntxiv” thiab “kom txhua tus neeg yuav ntsu lwm choj nyiaj”? Tej zaum yuav lom zem yog nej tsev neeg ua yeeb yam ua ke. Cia li xav txog tej kev uas nej qhia tau tej txuj ci uas tsis tshua yooj yim pom tau (xws li tej txiaj ntsim ntawm sab ntsuj plig; saib Lus Qhuab Qhia thiab Kev Khi Lus 46:11–26). Peb yuav ua li cas kom siv peb tej txuj ci thiab qhia txog tej yam uas peb muaj kom foom koob hmoov rau peb tsev neeg thiab cov neeg zej zog? Qhov uas peb yuav tsum siv peb tej txuj ci “nrog lub qhov muag ntsia ntsoov rau Vajtswv lub yeeb koob” txhais li cas?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Kuv Puas Tau Ua Zoo Hnub No?” ( Cov Nkauj Qhuas Vajtswv, zaj 101; kuj saib “Tej lub Tswv Yim rau Tsev Neeg Kev Kawm Vaj Lug Kub.”

Kev Qhia Zoo Dua Ntxiv

Nug tej yam uas ua rau nej tsev neeg xav ua tej yam. Cia li xav txog tej lus nug uas tshoov nej tsev neeg lub siab kom lawv thiaj li yuav paub ua neej raws li txoj moo zoo ntxiv. “Tej lus nug no tsis yog kom nej sib tham; yog tej lus nug kom nej txawj xav ntawm nej tus kheej” (Teaching in the Savior’s Way, 31).

Yexus kho ib tug txiv neej

Daim duab txog Yexus kho ib tug txiv neej los ntawm Dan Burr