“Hulio 5–11. Doktrina ken Katulagan 76: ‘Naindaklanto ti Gunggonada ken Agnanayonto ti Dayagda,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Hulio 5–11. “Doktrina ken Katulagan 76,” Umaykayo, Sumurot Kaniak—Para kadagiti Indibidual ken Pamilia: 2021
Pagkamangan, ni Shaelynn Abel
Hulio 5–11
Doktrina ken Katulagan 76
“Naindaklanto ti Gunggonada ken Agnanayonto ti Dayagda”
Iti benneg 76, impeksa ti Apo no kasano ti kadakkel ti tarigagayna a mangipalgak iti kinapudno kadatayo (kitaen kadagiti bersikulo 7–10). Basaem dagiti nasantuan a kasuratan nga addaan iti pammati ken kabaelanna ken ipalgaknanto kenka “dagiti banag ti Dios” (bersikulo 12) a nasken a maammuam. Kalpasanna isuratmo dagiti nalawag a pannakaammo ken pannakaawat nga awatem “bayat ti kaadda[m] pay laeng iti Espiritu” (dagiti bersikulo 28, 80, 113).
Isuratmo dagiti Impresionmo
“Anianto ti mapasamak kaniak kalpasan ti ipapatayko?” Dumani sungbatan ti tunggal relihion iti lubong daytoy a saludsod iti sumagmamano a kita wenno sabali. Iti adu a siglo, naisuro iti adu a kannawidan a Kristiano, nga agpampannuray kadagiti pannursuro ti Biblia maipapan iti langit ken impierno, maipapan iti paraiso para kadagiti nalinteg ken panagrigrigat para kadagiti nadangkes. Ngem talaga kadi a siiiget unay a mabingay ti sibubukel pamilia ti tao iti nasayaat ken dakes? Ken ania ti pudno a kaipapanan ti balikas a langit ? Idi Pebrero 1832, napanunot da Joseph Smith ken Sidney Rigdon no awanen ti ammuen maipanggep iti dayta a pagsasaritaan (kitaen iti Doktrina ken Katulagan 76, paulo a benneg).
Agpayso nga adda. Ket bayat ti panangutobda kadagitoy a banag, ti Apo “sinagid[na] dagiti mata ti panagawat[da] ket nalukatanda” (bersikulo 19). Nakaawat da Joseph ken Sidney iti maysa a paltiing a makailabeg unay, nakawadwada, nakarimrimat, nga inawagan dagiti Santo daytoy iti “ti Parmata.” Linuktanna ti komunikasion iti langit ken inikkanna dagiti annak ti Dios iti maysa a managsukisok a pampanunot a makaimatang iti kinaagnanayon. Impalgak ti parmata a dakdakkel ken nalawlawa ti langit ken ad-adu ti masakupanna ngem iti sigud a panangipapan ti kaaduan a tattao. Naas-asi ken nalinlinteg ti Dios ngem iti matukodtayo. Ket addaan dagiti annak ti Dios iti agnanayon a pagtungpalan a nadaydayag ngem iti maarapaaptayo.
Kitaen iti Saints, 1:147–50; “The Vision,” Revelations in Context, 148–54.
Dagiti Kapanunotan para iti Bukod a Panagadal iti Nasantuan a Kasuratan
Magun-od ti pannakaisalakan babaen ken ni Jesucristo, ti Anak ti Dios.
Idi nabasa ni Wilford Woodruff ti parmata a nailadawan iti benneg 76, kinunana, “nariknak nga ad-adda nga ay-ayatek ti Apo ngem iti sigud iti biagko” (kitaen iti “Timek ti Pannakaisubli” iti ungto daytoy a balabala). Mabalin nga adda dagiti maipada a riknam bayat ti panangbasam iti daytoy a paltiing. Kalpasan ti amin, awan kadagiti nagloriaan a bendision a nailadawan iti benneg 76 ti posible no awan ti Mangisalakan. Nalabit a mailasinmo ti tunggal bersikulo iti benneg 76 a mangdakamat ken ni Apo Jesucristo. Ania ti isuro kenka dagitoy a bersikulo maipapan Kenkuana ken ti akemna iti plano ti Dios? Kasano nga apektuan dagitoy ti wagas a panagriknam maipapan Kenkuana? Kabayatan iti panangbasam ken panangutobmo, makaawatka kadagiti impresion maipapan no kasano a mabalinmo ti “[umawat] iti pammaneknek ni Jesus” ken agbalin nga ad-adda a “natured” iti daytoy (dagiti bersikulo 51, 79).
Doktrina ken Katulagan 76:39–44, 50–112
Tarigagayan ti Dios nga isalakan “dagiti amin nga aramid dagiti imana.”
Sumagmamano a tao, agraman ti sumagmamano a nagkauna a miembro ti Simbaan, ti nangsupiat iti parmata iti benneg 76 gapu ta insuro daytoy a maisalakan ken umawatto ti dumani amin iti maysa a tukad ti gloria. Mabalin nga adda dagiti suppiat, iti paset, manipud iti saan a pagkikinnaawatan maipapan iti Dios ken iti relasionna kadatayo. Bayat ti panangbasam iti daytoy a paltiing, ania ti masursurom maipapan iti kababalin ti Dios ken ti planona para kadagiti annakna?
Ibilang ti paggidiatan ti pannakaisalakan (manipud iti pisikal ken naespirituan nga ipapatay; kitaen kadagiti bersikulo 39, 43–44) ken pannakaitan-ok (panagnaed iti denna ti Dios ken panagbalin a kas Kenkuana; kitaen kadagiti bersikulo 50–70).
Kitaen met iti Juan 3:16–17; Doktrina ken Katulagan 132:20–25.
Doktrina ken Katulagan 76:50–70, 92–95
Kayat ti Nailangitan nga Amak nga umawatak iti agnanayon a biag iti celestial a pagarian.
Nasdaawka kadin—wenno nariribukan—maipapan no maikarikanto wenno saan para iti celestial a pagarian? No basaem ti pannakailadawan no siasino ti umawat itoy a dayag (kitaen kadagiti bersikulo 50–70, 92–95), imbes a panangsapul laeng iti listaan dagiti banag a nasken nga aramiden, sapulem no ania ti inaramiden ti Dios—ken ar-aramidenna—a mangtulong kenka nga agbalin a kas Kenkuana. Ti kadi panangbasa iti parmata iti kastoy a wagas apektuanna no kasano ti riknam maipapan kadagiti bukodmo a panagkagumaan?
Mabalinmo met a panunoten maipapan iti naindaklan a bendision tapno maammuan dagitoy a detalye maipapan ti celestial a pagarian. Kasano nga apektuan daytoy a parmata ti dayag ti celestial iti panagkitam ken panagtarigagaymo nga agbiag iti inaldaw?
Kitaen met iti Moises 1:39; Joy D. Jones, “Value beyond Measure,” Ensign wenno Liahona, Nob. 2017, 13–15; J. Devn Cornish, “Am I Good Enough? Will I make It?” Ensign wenno Liahona, Nob. 2016, 32–34.
Nakita ni Joseph Smith ti parmata dagiti tukad ti dayag ditoy a siled.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Doktrina ken Katulagan 76:22–24, 50–52, 78–79, 81–82.Ania ti masursurotayo manipud kadagitoy a bersikulo maipapan iti kinapateg dagiti pammaneknektayo? Ania ti papel nga akmen dagiti pammaneknektayo iti agnanayon a pagtungpalantayo? Mabalin a makatulong a sapulen ti kaipapanan ti natured tapno paglilinnawagan no kasano ti agbalin a “natured iti pammaneknek ni Jesus” (bersikulo 79). Mabalinyo a kantaen ti “I Will Be Valiant” (Children’s Songbook, 162).
-
Doktrina ken Katulagan 76:24.Mabalin a madlaw ti pamiliam dagiti pakainaigan dagiti kinapudno iti benneg 76 ken dagiti naisuro iti “I Am a Child of God” (Children’s Songbook, 2–3); masarakan ti maysa kadagitoy a kinapudno iti Doktrina ken Katulagan 76:24. Kasano a mabalin a maigiddiat ti lubong no naawatan ti tunggal maysa nga annaknatayo amin ti Dios? Kasano nga apektuan daytoy a kinapudno ti wagas a panangtratotayo kadagiti dadduma? Nalabit a ti panangkita kadagiti ladawan dagiti agduduma a lallaki ken babbai nga annak ti Dios ditoy daga ket makatulong iti pamiliam a mangutob iti daytoy a saludsod. (Kitaen met ti “Video Presentation: I Am a Child of God,” ChurchofJesusChrist.org.)
Ibilang ti aggigiddan a panangkanta iti “I Am a Child of God” ken panangsapul kadagiti dadduma pay nga adda pakainaiganda kadagiti pagbatayan iti benneg 76 (kitaen, kas pagarigan, kadagiti bersikulo 12, 62, 96).
-
Doktrina ken Katulagan 76:40–41.No gupgopentayo dagiti “naragsak a damag” (bersikulo 40), wenno naimbag a damag, kadagitoy a bersikulo iti ababa a headline ti pagiwarnak wenno tweet, ania koma ti sawentayo? Ania dagiti dadduma pay a naragsak a damag ti masarakantayo iti benneg 76?
-
Doktrina ken Katulagan 76:50–70.Kasano a matulongamto ti pamiliam a mangnamnama ken agsagana para iti agnanayon a biag iti celestial a pagarian? Mabalin nga agtitinnulongkayo a mangsapul kadagiti ladawan, nasantuan a kasuratan, ken napadtuan a pannursuro a maibagay kadagiti ragup ti balikas iti Doktrina ken Katulagan 76:50–70. Mabalinmo a sapulen dagitoy a banag kadagiti magasin iti Simbaan, iti ChurchofJesusChrist.org, wenno kadagiti footnote dagiti nasantuan a kasuratan. Kalpasanna mabalinmo nga ummongen dagitoy a ladawan, nasantuan a kasuratan, ken pannursuro iti maysa a poster a mabalin a mangipalagip iti pamiliam kadagiti agnanayon a panggep a tun-oyen.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “I Know That My Redeemer Lives,” Hymns no. 136.
Dagiti Timek ti Pannakaisubli: Dagiti Pammaneknek iti “ti Parmata”
Wilford Woodruff
Nagkameng ni Wilford Woodruff iti Simbaan idi Disiembre 1833, dumani dua a tawen kalpasan a naawat da Joseph Smith ken Sidney Rigdon ti parmata a naisurat iti Doktrina ken Katulagan 76. Agnanaed isuna idi iti Nueva York iti daydi a tiempo ket naammuanna maipapan iti “ti Parmata” manipud kadagiti misionario nga agserserbi iti lugar. Kalpasan ti sumagmamano a tawen naisaritana maipapan kadagiti impresion iti daytoy a paltiing:
“Naisuro kaniak manipud iti kinaubingko nga adda maysa a Langit ken maysa nga Impierno, ket naibaga kaniak nga adda maysa a pannusa iti amin a nadangkes ken adda maysa a gloria kadagiti nalinteg. …
“… Idi basaek ti parmata … , daytoy ti nanglawlawag iti panunotko ken nangted kaniak iti naindaklan a rag-o, a naipakita kaniak a ti Dios a nangipalgak iti dayta a pagbatayan iti tao ket masirib, nalinteg ken pudno, addaan iti agpada a kasayaatan a kababalin ken nasayaat a rikna ken pannakaammo, nariknak a naipamaysana iti agpada nga ayat, kaasi, hustisia ken panangeddeng, ket nariknak nga ad-adda nga ay-ayatek ti Apo ngem idi iti biagko.”1
“Ti ‘Parmata’ [ti] maysa a paltiing a mangted iti ad-adu pay a lawag, ad-adu pay a kinapudno ken ad-adu pay a pagbatayan ngem iti ania man a paltiing a linaon iti ania man a libro a mabasatayo. Tulongannatayo a mangawat iti agdama a kasasaadtayo, no sadino ti naggappuantayo, no apay nga addatayo ditoy, ken no sadino ti papanantayo. Maammuan ti asino man a tao babaen iti dayta a paltiing no ania ti akem ken kasasaadnanto.”2
“Sakbay a nakitak ni Joseph kinunak nga awan bibiangko no kasano ti kalakayna, wenno kasano ti kaubingna; awan bibiangko no kasano ti langana—no atiddog man ti buokna wenno ababa; ti tao a nakaawat iti dayta a paltiing ket maysa a propeta ti Dios. Ammok daytoy para iti bagik.”3
Febe Crosby Peck
Idi nangngeg ni Febe Peck da Joseph ken Sidney a mangisuro iti “ti Parmata,” agnanaed isuna iti Missouri ket bibiagenna ti lima nga annakna a kas agmaymaysa nga ina. Nakaawis unay ti parmata iti imatangna ket naparegta isuna tapno insuratna ti sumaganad tapno ibinglayna no ania ti nasursurona kadagiti kabagyan ti pamiliana:
“Ipalpalgak ti Apo dagiti kinadatdatlag ti nailangitan a Pagarian kadagiti Annakna. … Sinarungkarandakami da Joseph Smith ken Sidney Rigdon iti napalabas a panagtutubo, ken adu dagiti naragsak a panagkikitami bayat ti kaaddada ditoy, ket naaddaankami iti adu a kinadatdatlag a naimatanganmi, a nangted kaniak iti dakkel a a liwliwa. Naimatanganmi ti ibababa ti Dios a mangisagsagana kadagiti mansion ti kappia para kadagiti annakna. Ket asino man a dinto umawat iti pakabuklan ti ebanghelio ken agtakder a kas natured a soldado iti panggep ni Cristo ket saanto a makapagindeg iti sidong ti Ama ken ti Anak. Ngem adda maysa a lugar a naisagana para iti amin a di umawat, ngem addaan daytoy a lugar ti nababbaba a gloria ngem iti agindeg iti Celestial a pagarian. Diakto panggepen ti agsao iti ad-adu pay maipanggep kadagitoy a banag ta naimalditda itan ket agsaknapdanton iti lubong. Ket nalabit a maaddaankanto iti gundaway nga agbasa para iti bagim, ket no aramidem, namnamaek a basaemto nga addaan ti naannad ken naimpusuan a kararag, agsipud ta maikari dagitoy a banag a maammuan. Ket tarigagayak a mabalinmo a basaen ken adalen dagitoy, agsipud ta dayta ti mangted iti pagragsakantayo ditoy lubong ken iti lubong nga umay.”4
Dayag babaen dagiti Tukad, ni Annie Henrie Nader