Agawiden, ni Yongsung Kim

Hulio 12–18

Doktrina ken Katulagan 77–80

“Iturongkayto”

Imbaga ti Apo ken ni Joseph Smith nga Isu ti “mangisao iti lapayag[na] kadagiti nainsiriban a balikas” (Doktrina ken Katulagan 78:2). Ania dagiti nainsiriban a balikas a maawatmo bayat ti panagadalmo iti Doktrina ken Katulagan 77–80.

Isuratmo dagiti Impresionmo

Nakurkurang ngem dua a tawen kalpasan a naisubli ti Simbaan ni Jesucristo, dimmakkel daytoy iti nasurok a 2,000 a miembro ket napardas ti panagsaknapna. Idi Marso 1832 nakipagkita ni Joseph Smith kadagiti dadduma pay a lider ti Simbaan “tapno paglilinnawagan ti pakaseknan ti Simbaan”: ti panagkasapulan a mangipablaak kadagiti paltiing, panaggatang iti daga a paguummongan, ken panangaywan kadagiti nakurapay (kitaen iti Doktrina ken Katulagan 78, paulo a benneg). Tapno maipaay dagitoy a kasapulan, immawag ti Apo iti bassit a bilang dagiti lider ti Simbaan tapno mangbukel iti United Firm, maysa a grupo a mamagkaykaysa kadagiti panagkagumaanda a “mangipatungpal ti gagem” ti Apo (bersikulo 4) kadagitoy a lugar. Ngem uray kadagita kasta a banag nga administratibo, impamaysa ti Apo dagiti banag ti kinaagnanayon. Kamaudiananna, ti panggep ti maysa a pagimalditan wenno maysa a pagidulinan—a kas iti amin a banag iti pagarian ti Dios—ti mangisagana kadagiti annakna nga umawat iti “maysa a lugar iti celestial a lubong” ken “dagiti kinabaknang ti kinaagnanayon” (dagiti bersikulo 7, 18). Ket no narigat a maawatan dagita a bendision ita, iti baet ti adu nga ar-aramiden iti inaldaw a panagbiag, ipanamnamana kadatayo, “Agragsakkayo, ta iturongkayto” (bersikulo 18).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 77

Ipalgak ti Dios dagiti kinadatdatlagna kadagiti agkalikagum a mangammo kadagitoy.

Sangapulo-ket-dua a tawen kalpasan ti Umuna a Parmata, nagtultuloy ti awis iti Santiago 1:5 a “dumawat iti Dios” a mangiwanwan ken ni Joseph Smith idi nagkurang iti kinasirib. Idi adda saludsodda ken ni Sidney Rigdon maipapan iti libro ti Apocalipsis kabayatan ti panangitrabahoda iti naparegta a patarus ti Biblia, gagangay a nagdawat ni Joseph iti sirib manipud iti Dios. Bayat ti panangbasam iti Doktrina ken Katulagan 77, ibilang nga isurat dagiti nalawag a pannakaammo ken pannakaawat kadagiti adda pakainaiganna a kapitulo iti libro ti Apocalipsis.

Mainayon pay, utobem no kasano a masurotmo ti pagwadan ni Propeta Joseph no adalem dagiti nasantuan a kasuratan. Mabalinmo a damagen iti Nailangitan nga Ama, “Ania ti nasken a maawatak?”

Patarus ti Biblia, ni Liz Lemon Swindle

Doktrina ken Katulagan 78

Ania ti United Firm?

Naipasdek ti United Firm a mangasikaso ti pagipablaakan ti Simbaan ken dagiti aramid a pakaseknan iti Ohio ken Missouri. Binukel da Joseph Smith, Newel K. Whitney, ken dadduma pay a dadaulo ti Simbaan a namagtitipon kadagiti pamataudanda tapno maipaay dagiti temporal a kasapulan ti dumakdakkel a Simbaan. Daksanggasat ta, nailumlom iti utang ti United Firm ket nawara idi 1834 idi saanen a mabayadan dagiti utang.

Kitaen met iti “Newel K. Whitney and the United Firm,” Revelations in Context, 142–47; “United Firm,” Church History Topics, ChurchofJesusChrist.org/study/church-history.

Doktrina ken Katulagan 78:1–7

Makatulongak a “mangipatungpal iti gagem” ti Simbaan.

Imbaga ti Apo ken ni Joseph Smith ken dagiti dadduma a lider ti Simbaan a ti panangasikaso iti maysa a pagidulinan ken pagimalditan ket makatulong a “mangipatungpal iti gagem, a nagikumitanyo” (Doktrina ken Katulagan 78:4). Ania koma ti masaom iti “gagem” ti Simbaan? Utobem daytoy bayat ti panangbasam iti Doktrina ken Katulagan 78:1–7. Nalabit a ti panangpampanunot maipapan kadagitoy a bersikulo ket makaimpluensia iti wagas a pangipatungpalam iti takemmo iti Simbaan wenno ti panagserbim iti pamiliam. Kasano a “makaipatungpal iti gagem” ti Apo ti panagserbim? Kasano nga isagsagananaka daytoy para iti “maysa a lugar iti celestial a lubong”? (bersikulo 7).

Doktrina ken Katulagan 78:17–22

Iturongnakto ti Apo.

Nariknam kadin a kas iti maysa a bassit nga ubing, nalabit gapu iti maysa a banag a “dimo pay la maawatan” wenno “di kabaelan”? (Doktrina ken Katulagan 78:17–18). Sapulem ti balakad kadagitoy a bersikulo a makatulong kenka nga “agragsak” (bersikulo 18) iti kakasta a panawen. Apay iti panagkunam a no dadduma awagan ti Apo dagiti pasurotna a ”babassit nga ubbing”? (bersikulo 17). Mabalinmo pay nga utoben no kasano ti mabalin a “[panang]iturongna kenka ti Apo (bersikulo 18).

Doktrina ken Katulagan 79–80

Napatpateg ti awag nga agserbi iti Dios ngem iti no sadino ti pagserbiak.

Maipanggep iti Doktrina ken Katulagan 80, insuro ni Elder David A. Bednar, “Nalabit a maysa kadagiti leksion nga isursuro ti Mangisalakan kadatayo iti daytoy a paltiing ti naidutok nga aramiden nga agtrabaho iti maysa a maitudo a lugar a kasapulan ken napateg ngem maikadua laeng iti awag nga agtrabaho” (“Called to the Work,” Ensign wenno Liahona, Mayo 2017, 68). Panunotem ti maipapan kadagiti agdama wenno napalabas nga takemmo iti Simbaan. Ania dagiti padas a nakatulong kenka a makasursuro a pudno dagiti balikas ni Elder Bednar? Ania dagiti nayon nga adalen a masarakanyo iti Doktrina ken Katulagan 79–80 a makatulong iti maysa a tao a kaaw-awatna laeng ti maysa a baro a takem?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 77:2.Kalpasan ti panangbasam iti daytoy a bersikulo, mabalin nga agdrowing dagiti miembro ti pamilia kadagiti ladawan ti paggugustoda nga “ayup, … dagiti banag nga agkarayam, … [wenno] dagiti tumatayab iti tangatang” a pinarsua ti Dios. Ania ti masursurotayo maipapan kadagiti parsua ti Dios manipud itoy a bersikulo? (kitaen met iti Doktrina ken Katulagan 59:16–20). Mabalinyo pay ti agkanta maipapan kadagiti pinarsua ti Dios, kas iti “My Heavenly Father Loves Me” (Children’s Songbook, 228–29), ken i-display ti naipinta a ladawan a naikadua iti daytoy a balabala.

Doktrina ken Katulagan 77:14.Ilawlawag daytoy a bersikulo a kinnan ni Juan ti maysa a libro a nangibagi iti misionna a mangummong iti Israel. Ania ti isingasing ti simbolismo ti pannangan maipapan no kasano ti nasken a panangsangotayo iti akemtayo iti panangummong iti Israel wenno panangaramid iti dadduma pay a banag a kayat ti Apo nga ipaaramid kadatayo? Dagitoy ti sumagmamano a dadduma pay a nasantuan a kasuratan a pakausaran ti pannangan tapno maisuro ti maysa a naespirituan a kinapudno: Juan 6:48–51; 2 Nephi 32:3; Moroni 4. Nalabit a mabalinmo ti agaramid iti maysa a paggugusto a potahe ti pamilia nga aggigiddan a kanen kabayatan daytoy a panaglilinnawag.

Doktrina ken Katulagan 78:17–19.Mabalin nga agdrowing dagiti miembro ti pamilia kadagiti ladawan dagiti parabur manipud iti Dios a pagyamyamananda. Ania ti ar-aramidentayo a mangyebkas iti panagyamantayo para kadagitoy a parabur? Mabalinyo pay a paglilinnawagan no kasano a tungtungpalen ti pamiliayo ti sumaganad a balakad nga umawat iti “amin a banag a siyayaman” (bersikulo 19). Ania ti kari ti Apo kadagiti agaramid iti daytoy?

Doktrina ken Katulagan 79:1Ibinglaymo ti pammaneknekmo maipapan “ti bileg” a naawatmo idi naordenanka wenno na-set apartka kadagiti takem [calling] iti Simbaan. Ania dagiti naipangruna a sagut ken pammaregta nga imbendision ti Apo kenka bayat ti panagserbim?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Count Your Blessings,” Hymns, no. 241.

Panangpadur-as iti Panangisurotayo

Agdrowing iti maysa a ladawan. Kas maysa a pamilia, mabalinyo a basaen ti sumagmamano a bersikulo ket kalpasanna mangilatang iti oras a panangdrowing dagiti miembro ti pamilia iti maysa a banag a mainaig iti no ania ti nabasada. I-display dagiti ladawan iti lawlaw ti pagtaenganyo a mangipalagip iti pamiliayo maipapan kadagiti pagbatayan a nasursuroyo.

Minuyongan ti Dios, ni Sam Lawlor