“Hulio 19–25. Doktrina ken Katulagan 81–83: No ‘Adu ti Maited Adu Met ti Kasapulan’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Hulio 19–25. Doktrina ken Katulagan 81–83,” Umaykayo, Sumurot Kaniak—Para kadagiti Indibidual ken Pamilia: 2021
Ni Cristo ken ti Nabaknang nga Agtutubo nga Agturay, ni Heinrich Hofmann
Hulio 19–25
Doktrina ken Katulagan 81–83
No “Adu ti Maited Adu Met ti Kasapulan”
Bayat ti panagbasam iti Doktrina ken Katulagan 81–83, isuratmo dagiti pagbatayan a makatulong kenka nga agaramid iti nasayaat para iti pamiliam, dagiti gagayyemmo, ken dagiti dadduma.
Isuratmo dagiti Impresionmo
Idi Marso 1832, tinudingan ti Apo ni Jesse Gause nga agbalin a mamagbaga ni Joseph Smith iti Panguluen ti Nangato a Kinasaserdote (nga ita maaw-awagan iti Umuna a Panguluen). Doktrina ken Katulagan 81 ket maysa a paltiing ken ni Brother Gause, a mangbilbilin kenkuana iti baro a takemna ken naikari kenkuana dagiti bendision para iti panagserbina a sipupudno. Ngem saan a nagserbi a sipupudno ni Jesse Gause. Isu a ni Frederick G. Williams ket naawagan a nangsukat kenkuana, ket ti nagan ni Brother Gause nasukatan iti nagan ni Brother Williams iti paltiing.
Mabalin a kasla maysa nga awan kaes-eskanna dayta, ngem iparangarangna ti maysa a napateg a kinapudno: Kaaduan a maiturong dagiti paltiing iti Doktrina ken Katulagan kadagiti maitudo a tattao, ngem kanayon a mabalintayo ti agsapul kadagiti wagas a pangyaplikarantayo kadagitoy iti bagbagitayo (kitaen iti 1 Nephi 19:23). Ti balakad ti Apo ken ni Frederick G. Williams a “patibkerem dagiti nalupoy a tumeng” ti makaiturong iti panunottayo kadagiti tao a mabalintayo a patibkeren (Doktrina ken Katulagan 81:5). Ti balakad ti Apo para kadagiti miembro iti United Firm a “paiturayan ti bagbagiyo iti daytoy a katulagan” tapno mangipaay iti Simbaan kadagiti temporal a kasapulan ket iturongna dagiti panunottayo kadagiti bukodtayo a katulagan. Ket ti kari ti Apo nga Isu ti “aramidek no agtungpalkayo ti sawek” ti mangipalagip kadatayo kadagiti karina no agtungpaltayo (Doktrina ken Katulagan 82:10, 15). Dayta ti nasken a pagbalinanna, ta impakdaar met ti Apo, “Ania man ti sawek iti maysa sawek iti amin” (bersikulo 5).
Kitaen iti “Newel K. Whitney and the United Firm,” “Jesse Gause: Counselor to the Prophet,” Revelation in Context, 142–47, 155–57.
Dagiti Kapanunotan para iti Bukod a Panagadal iti Nasantuan a Kasuratan
Makapagbalinak a napudno a mangaramid ti ania man nga idawat ti Apo kaniak.
Mapanunotmo kadi no dadduma no kasano a maipatungpalmo dagiti napateg a pagrebbengan iti biagmo? Kas maysa a mammagbaga ken ni Propeta Joseph Smith, awan duadua nga adu dagiti napateg a pagrebbengan ni Frederick G. Williams. Iti benneg 81, inted ti Apo kenkuana ti balakad no kasano nga ipatungpalna dagitoy. Ania ti masarakam iti daytoy a benneg a makatulong kenka a mangipatungpal kadagiti pagrebbengan nga inted kenka ti Apo?
Dagitoy dagiti sumagmamano a saludsod a makatulong kenka a mangutob iti bersikulo 5:
-
Ania dagiti sumagmamano a wagas pakapagbalinan ti maysa a tao a “nakapsut”? Ania ti kaipapanan ti “saranayen” dagiti nakapsut?
-
Ania ti makaigapu kadagiti ima ti maysa a tao a maipasimudaag a “maidasay”? Kasano a mabalintayo nga “itag-ay”dagita nga ima?
-
Ania ti mabalin a kaipapanan ti ragup ti balikas a “nalupoy a tumeng”? Kasano a mabalintayo a “patibkeren” dagiti addaan iti nalupoy a tumeng?
Nalabit a ti panagadal iti daytoy a bersikulo ti mangipalagip iti panunottayo ti maysa a tao a mabalintayo a “saranayen,” “itag-ay,” wenno “patibkeren.” Ania ti aramidemto tapno makapagserbika iti dayta a tao?
Ti Umuna a Panguluen: Sidney Rigdon, Joseph Smith, Frederick G. Williams
Awisennak ti Apo nga agbabawi ken manglipat kadagiti basolko.
Bayat ti panangbasam ti Doktrina ken Katulagan 82:1–7, ibilangmo ti panangaramid iti dua a listaan dagiti banag a sursuruem: dagiti ballaag maipapan iti basol ken dagiti kinapudno maipapan iti pammakawan. Kasano a matulongannaka dagitoy a kinapudno nga agkedked kadagiti pannulisog ti kabusor?
Doktrina ken Katulagan 82:8–10
Dagiti bilin ket para iti pannakaisalakan ken saluadko.
No nasdaawka—wenno ti maysa a tao nga am-ammom—no apay a nangted ti Apo iti nakaad-adu a bilin, ti Doktrina ken Katulagan 82:8–10 ti makatulong. Ania dagiti nalawag a pannakaawat ken pannakaammo kadagitoy a bersikulo ti makatulong kenka a mangilawlawag iti maysa a tao no apay a piliem a tungpalen dagiti bilin ti Apo? Mabalin pay nga ibilangmo no kasano a binaliwan dagiti bilinna ti biagmo. Ania ti masursurom maipanggep iti Apo bayat ti panangbasam iti bersikulo 10?
Kitaen met iti Doktrina ken Katulagan 130:20–21; Carole M. Stephens, “If Ye Love Me, Keep My Commandments,” Ensign wenno Liahona, Nob. 2015, 118–20.
“Masaranayto dagiti balo ken ulila.”
Idi Abril 1832, kas imbilin ti Apo, nagdaliasat ni Joseph Smith iti dumani 800 a milia a sumarungkar kadagiti Santo a naguummong iti Missouri (kitaen iti Doktrina ken Katulagan 78:9). Iti maysa a komunidad a sinarungkaranna nairaman dagiti balo nga agmaymaysa nga agpatpatanor kadagiti annakda. Maibilang kadakuada da Phebe Peck ken Anna Rogers, a personal nga am-ammo ti Propeta. Iti Missouri idi 1830, nangted dagiti paglintegan ti estado kadagiti balo iti limitado a kalintegan kadagiti sanikua dagiti pimmusayen nga assawada. Ania ti masursurom manipud iti benneg 83 maipapan no kasano ti marikna ti Apo maipapan kadagiti balo ken ulila? Adda kadi maysa nga am-ammom iti kastoy a situasion a mairanud iti ayat ken pammategmo?
Kitaen met iti Isaias 1:17; Santiago 1:27.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Doktrina ken Katulagan 81:3.Mabalinmo ti mangted kadagiti sinanpuso a papel kadagiti miembro ti pamilia ket awisem ida nga agdrowing wenno agsurat iti maysa a banag a kayatda nga ikararagan. Saritaem ti maipapan iti no ania ti kayat a sawen ti agkararag a “kanayon, napigsa ken naimpusuan.”
-
Doktrina ken Katulagan 81:5.Tapno masursuro ti maipapan kadagiti pagbatayan iti daytoy a bersikulo, nalabit a mabalin nga ibinglay dagiti miembro ti pamilia dagiti pagarigan idi nariknada a “nakapsut” wenno “nalupoyda” ket maysa a tao ti nangtulong wenno nangpapigsa kadakuada. Mabalinyo pay a buyaen dagiti video maipapan iti panagserbi kadagiti dadduma, a kas iti “Works of God” wenno “The Miracle of the Roof” (ChurchofJesusChrist.org). Paglilinnawagan no kasano a makapagserbi a masansan ti pamiliam iti tunggal maysa kadagiti simple a wagas.
-
Doktrina ken Katulagan 82:8–10.Nalabit makatulong ti simple nga ay-ayam ti pamilia a makarikna iti panagyaman para kadagiti bilin ti Dios. Mabalin a mangted ti maysa a miembro ti pamilia kadagiti pangiturong a mangtulong iti maysa a miembro ti pamilia a nakapiring dagiti matana nga agaramid iti maysa a sandwich wenno magna iti maysa nga obstacle course. Mangpanunot iti maysa a banag a naragsak ken managpartuat! Kalpasanna pagsasaritaan no kasano a mayarig dagiti bilin ti Dios kadagiti pangiturong iti daytoy nga ay-ayam.
-
Doktrina ken Katulagan 82:18–19.Ania ti aramiden ti tunggal miembro ti pamilia a “mapasayaat ti gamengna” ken “makagun-od iti sabali a gameng”? Mabalin a naragsak a mangipakita iti maysa a pabuya ti talento ti pamilia. Mangpanunot kadagiti wagas a pakairamanan dagiti talento a saan a nalaka a maipakita (kas kadagiti naespirituan a sagut; kitaen iti Doktrina ken Katulagan 46:11–26). Kasano a mausartayo dagiti talentotayo ken maibinglay dagiti banag nga adda kadatayo a mangbendision iti pamilia ken dagiti kaarrubatayo? Ania ti kayat a sawen ti panangusar kadagiti talentotayo a “naitalimudok dagiti mata iti dayag ti Dios”?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Have I Done Any Good?” Hymns, no. 223; kitaen met iti “Dagiti Kapanunotan a Mangpadur-as ti Sangapamiliaan a Panagadalyo iti Nasantuan a Kasuratan.”
Panangpadur-as iti Panangisurotayo
Agdamag kadagiti saludsod a mangiturong iti panagtignay. Ibilangmo dagiti saludsod a mangiparikna kadagiti miembro ti pamiliam a mangutob no kasano a naan-anay a makapagibiagda iti ebanghelio. “Gagangay a dagitoy dagiti saludsod a saan a pagsasaritaan; para iti bukod a panagutob dagitoy” (Panangisuro iti Wagas ti Mangisalakan, 31
Ladawan ni Jesus a mangag-agas iti maysa a lalaki ni Dan Burr