Pannakaisubli, ni Liz Lemon Swindle

Hulio 26–Agosto 1

Doktrina ken Katulagan 84

“Ti Bileg ti Kinadios”

Bayat ti panangbasam iti Doktrina ken Katulagan 84, utobem ti balakad nga “agbiagkayonto iti tunggal balikas nga agaon iti ngiwat ti Dios” (bersikulo 44). Kasano nga agbiagkanto babaen kadagiti balikas iti daytoy a paltiing?

Isuratmo dagiti Impresionmo

Manipud pay idi naisubli ti priesthood idi 1829, naparaburan dagiti Santo iti Ud-udina nga Aldaw babaen iti dayta sagrado a bileg. Nabuniagan, nakumpirmaan, ken naawaganda nga agserbi babaen ti turay ti priesthood, kas met laeng kadatayo iti agdama. Ngem ti kaadda ti access iti bileg ti priesthood ket saan a kapadpada ti naan-anay a pannakaawat iti daytoy, ket ad-adu pay ti kayat ti Dios a maawatan dagiti Santona—nangnangruna iti sumangbay a pannakaisubli dagiti ordinansa ti templo. Ti 1832 a paltiing iti priesthood, itan ti Doktrina ken Katulagan 84, nangpadakkel iti pannirigan dagiti Santo maipapan no ania a talaga ti priesthood. Ket maaramidna iti isu met laeng para kadatayo iti agdama. Kalpasan ti amin, adu ti masursuro maipapan iti nadiosan a bileg nga iggemna “ti tulbek ti pannakaammo iti Dios,” a mangipaangarang iti “bileg ti kinadios,” ket tapno mangisagana kadatayo a “makakita iti rupa ti Dios, nga isu ti Ama, ken sibibiag” (dagiti bersikulo 19–22).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 84:1–5, 17–28

Adda access-ko iti bileg ti priesthood ti Dios ken dagiti bendisionna.

No panunotem ti balikas a priesthood, ania ti sumrek iti panunotmo? Kasano ti kasansan a mapanunotmo maipapan iti priesthood ken ti impluensiana iti inaldaw a panagbiagmo? Kalpasan ti panangutobmo kadagitoy a saludsod, adalem ti Doktrina ken Katulagan 84:1–5, 17–28, ket ibilang no ania ti kayat ti Apo a maammuam maipanggep iti bileg ti priesthoodna. Kasano a mausarmo dagitoy a bersikulo a mangiladawan iti priesthood iti maysa a tao ken mangilawlawag kadagiti panggepna.

Mabalinmo pay nga utoben dagiti ordinansa ti priesthood a nakiramanam. Kasano a nakitam “ti bileg ti kinadios” (bersikulo 20) a naiparangarang kadakuada? Ibilang no ania ti kayat ti Apo nga aramidem tapno umawat iti ad-adu pay a bilegna iti panagbiagmo.

Kitaen met ti M. Russell Ballard, “Men and Women and Priesthood Power,” Ensign, Sept. 2014, 28–33; Gospel Topics, “Priesthood,” topics.ChurchofJesusChrist.org.

Doktrina ken Katulagan 84:31–42

No awatek ti Apo ken dagiti katulonganna, maawatkonto amin nga adda iti Ama.

Insuro ni Elder Paul B. Pieper: “Makaay-ayo a ti sapata ken katulagan ti priesthood iti [Doktrina ken Katulagan 84:31–42], usaren ti Apo dagiti verbo a gun-oden ken awaten. Saanna nga usaren ti verbo nga ordenan. Iti templo a gun-oden ken awaten dagiti lallaki ken babbai—nga aggigiddan—dagiti bendision ken bileg ti agpada nga Aaronic ken Melchizedek Priesthood” (“Revealed Realities of Mortality,” Ensign, Ene. 2016, 21).

Bayat ti panangbasam ti Doktrina ken Katulagan 84:31–42, sapulem dagiti balikas a “gun-oden” ken “awaten.” Utobem no ania ti mabalin a kaipapananda iti daytoy a konteksto. Kasano nga “[aw-]awatem” ti Apo ken dagiti katulonganna?

Mabalinmo pay nga isurat dagiti kari kadagitoy a bersikulo nga adda pakainaiganna iti sapata ken katulagan ti priesthood, a ti Dios “dina malabsing” (bersikulo 40). Ania ti masarakam a mangparegta kenka tapno ad-adda nga agbalinka a napudno nga umawat iti Ama ken dagiti katulonganna, ken ti bileg ti priesthoodna?

Kitaen met iti Pangiwanwan iti Nasantuan a Kasuratan, “Katulagan,” “Sapata” scriptures.ChurchofJesusChrist.org.

Doktrina ken Katulagan 84:43–58)

Umasidegak ken ni Cristo no imdengak dagiti balikasna ken dumngeg iti Espirituna.

Ti kanayon a panagbasa kadagiti nasantuan a kasuratan ken balikas dagiti propeta ket napatpateg ngem iti maysa a banag nga ekisan iti listaan dagiti naespirituan nga aramiden. Ania dagiti kinapudno a masarakam iti Doktrina ken Katulagan 84:43–58 a mangtulong kenka a mangawat no apay a kasapulam ti agtultuloy a panagadal iti balikas ti Dios? Kitaem ti panaggidiat ti lawag ken sipnget kadagitoy a bersikulo; kasano ti “panangipasnekmo a dumngeg kadagiti balikas ti agnanayon a biag” nangyeg iti silaw, kinapudno, ken “ti Espiritu ni Jesucristo” iti biagmo? (dagiti bersikulo 43, 45).

Kitaen met iti 2 Nephi 32:3; “The Book of Mormon—Keystone of Our Religion,” Teachings of Presidents of the Church: Ezra Taft Benson (2014), 125–35.

Matulongannak ti panagadal kadagiti nasantuan a kasuratan a mangrikna iti impluensia ti Espiritu.

Doktrina ken Katulagan 84:62–91

Addanto ti Apo kaniak no agserbiak Kenkuana.

Bayat ti panagbasam kadagitoy a bersikulo, mabalinmo nga ilasin dagiti wagas a nagkunaan ti Apo a suportaranna dagiti Apostol ken misionariona. Kasano a mayaplikar dagitoy a kari iti aramid nga indawatna nga aramidem? Kas pagarigan, kasano a naipatungpal dagiti kari iti bersikulo 88 iti biagmo?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 84:6–18.Kalpasan ti panagbasam maipapan iti no kasano nga inawat ni Moises iti turay ti priesthood, maysa a priesthood holder iti pamiliam wenno maysa a ministering brother ti mabalin a mangibinglay iti padasna iti pannakaorden iti saad ti priesthood. No mabalin, mabalinna nga ibinglay ken ilawlawag ti linia ti turay ti priesthoodna. Apay a napateg ita a matuntontayo ti turay ti priesthood iti Simbaan nga agsubli iti turay ni Jesucristo? Tapno agkiddaw iti maysa a linia ti turay ti priesthood, mangipatulod iti email iti [e-mail].

Doktrina ken Katulagan 84:20–21.Kaano a napadasan ti pamiliam “ti bileg ti kinadios” a maiparparangarang babaen ti maysa nga ordinansa a kas iti panagbuniag wenno sakramento? Nalabit a mabalinmo nga isarita ti maipapan no kasano nga isangbay dagitoy nga ordinansa ti bileg ti Dios iti biagtayo. Mabalinmo pay nga i-display ti ladawan ti maysa a templo ket paglilinnawagan no kasano a mangisangbay kadatayo iti nayon a bileg dagiti ordinansa ti templo tapno agbalin a kas iti Mangisalakan. Mabalinyo pay ti agkansion iti maysa a kanta maipapan iti priesthood, kas iti “The Priesthood Is Restored” (Children’s Songbook, 89), ket paglilinnawagan no ania ti isuro ti kanta maipapan iti priesthood.

Doktrina ken Katulagan 84:43–44.Mabalinyo ti mangisagana iti makan wenno merienda a sangsangkamaysa ket suratanyo ti tunggal ingrediente iti maysa a balikas wenno ragup dagiti balikas manipud iti bersikulo 44. Apay a napateg nga iramantayo amin nga ingrediente? Apay a napateg ti agbiag babaen ti tunggal balikas ti Dios?

Doktrina ken Katulagan 84:98–102.Ania ti masursurotayo maipapan ken ni Jesucristo manipud iti “baro a kanta” (bersikulo 98) kadagitoy a bersikulo? Ania ti maaramidtayo iti panawentayo a mangtulong a mapasamak dagiti kasasaad a nailadawan ditoy a kanta?

Doktrina ken Katulagan 84:106–10.Kasano a “sangkamaysa a maparegta” ti pamiliatayo babaen dagiti sagut ken panagkagumaan ti “tunggal miembro”? (bersikulo 110).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “The Priesthood is Restored,” Childrens Songbook, 89; kitaen met iti “Dagiti Kapanunotan a Mangpadur-as ti Sangapamiliaan a Panagadal iti Nasantuan a Kasuratan.”

Panangpadur-as iti Panangisurotayo

Idanon ken surnadan dagiti awis nga agtignay. No awisem ti pamiliam nga agtignay iti no ania ti nasursuroda, ipakitam kadakuada a ti ebanghelio ket maysa a banag nga ibiag, a saan a pagsasaritaan laeng. Ania ti mayawismo kadakuada nga agtignay manipud iti panagadalmo iti Doktrina ken Katulagan 84?

Templo iti Rome Italy