“Agosto 16–22. Doktrina ken Katulagan 89–92: ‘Pagbatayan nga addaan iti Kari,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Agosto 16–22. Doktrina ken Katulagan 89–92,” Umaykayo, Sumurot Kaniak—Para kadagiti Indibidual ken Pamilia: 2021
Agosto 16–22
Doktrina ken Katulagan 89–92
“Pagbatayan nga addaan iti Kari”
Nainkararagan nga adalem ti Doktrina ken Katulagan 89–92, ket isuratmo dagiti ania man nga impresion a maawatmo. Agbalin a sensitibo no kasano nga “[ipakita] ti espiritu ti kinapudno” kenka bayat iti panagadalmo iti (Doktrina ken Katulagan 91:4).
Isuratmo dagiti Impresionmo
Iti Pagadalan dagiti Propeta, insuro ni Propeta Joseph Smith kadagiti elder ti Israel maipapan iti panangbangon iti pagarian ti Dios iti daga. Napaglilinnawaganda dagiti naespirituan a kinapudno, sangkamaysada a nagkararag, nagayuno, ken nagsagana a mangikasaba iti ebanghelio. Ngem adda maysa a banag maipapan iti aglawlaw a mabalin a kasla di gagangay kadatayo iti agdama, ken kasla saan met a nasayaat para ken ni Emma Smith idi. Kabayatan dagiti miting, nagsigarilio dagiti lallaki ken nagmuskadada iti tabako, a saan a gagangay idi a panawen, ngem namansaanna dagiti suelo a kayo iti nangisit ken naaddaan iti nakaro nga angot iti angin. Imbaga ni Emma dagiti pakaseknanna ken ni Joseph, ket sinaludsod ni Joseph iti Apo. Nasungbatan daytoy iti paltiing a nangnangruna pay ngem iti asuk ken mansa ti tabako. Daytoy ti nangted kadagiti Santo, para kadagiti umay a kaputotan, iti “pagbatayan nga addaan iti kari”—dagiti kari ti pisikal a salun-at, “sirib,” ken “dakkel a kinabaknang iti pannakaammo” (Doktrina ken Katulagan 89:3, 19).
Kitaen met iti Saints, 1:166–68.
Dagiti Kapanunotan para iti Bukod a Panagadal iti Nasantuan a Kasuratan
Ti Word of Wisdom [Nainsiriban a Balikas] ti “maysa a pagbatayan nga addaan iti kari.”
Idi damo a mangngegan dagiti panglakayen ni Joseph Smith a nangbasa iti Nainsiriban a Balikas iti Pagadalan dagiti Propeta, dinagdagusda nga “impatayokda dagiti suakoda ken impuruakda dagiti tulalo a muskada a tabako iti apuy” (Saints 1:168). Iti dayta a kanito, ad-adda nga imbilangda ti Nainsiriban a Balikas [Word of Wisdom] a kas maysa a ballaag ngem kas maysa a bilin, ngem tinarigagayanda nga impakita ti kinatallugodda nga agtulnog. Nalabit napadasamon ti “nangipatayok” manipud iti panagbiagmo kadagiti sustansia a maikontra iti imballaag ti Nainsiriban a Balikas, ngem ania pay ti masursurom manipud iti daytoy a paltiing? Ibilangmo dagitoy a kapanunotan:
-
Sapulem dagiti ragup oti balikas a dimo pay nakita—wenno ti pampanuntem la unay—idi. Ania ti masursurom manipud kadagitoy?
-
Doktrina ken Katulagan 89 mairaman dagiti sumagmamano a kari (kitaen kadagiti bersikulo18–21.) Ania iti panagkunam ti kaipapanan dagitoy a kari?
-
Ania iti isuro kenka daytoy a paltiing maipapan iti Apo?
-
Ania dagiti pagarigan a nakitam kadagiti “dakes ken panggep …iti puspuso dagiti agkukunsabo a tao”? (bersikulo 4).
-
Panunoten ti paltiing a kas “maysa a pagbatayan nga addaan iti kari” (bersikulo 3)—panagibtur kadagiti kinapudno a mangiwanwan iti panagaramid iti pangngeddeng—saan laeng a listaan dagiti rumbeng ken saan nga aramiden. Ania dagiti pagbatayan ti masarakam a mabalin a mangiwanwan kadagiti pangngeddengmo?
Nagballaag met dagiti kabaruanan a propeta kadagiti makadadael a sustansia ken ug-ugali iti labes dagiti nadakamat iti Nainsiriban a Balikas [Word of Wisdom] (kitaen iti “Salun-at iti Bagi ken Rikna,” Para iti Pigsa dagiti Agtutubo, 25–27). Ania ti naiparikna kenka nga aramidem a nasaysayaat a panangaywan iti panunotmo ken bagim?
Kitaen met iti Daniel 1; 1 Taga Corinto 6:19–20; Gospel Topics, “Word of Wisdom,” topics.ChurchofJesusChrist.org; “The Word of Wisdom,” Revelations in Context, 183–91; addictionrecovery. ChurchofJesusChrist.org.
Isuronatayo ti Nainsiriban a Balikas [Word of Wisdom] a mangaywan iti bagbagitayo.
Doktrina ken Katulagan 90:1–17
Ti Umuna a Panguluen ti agiggem “kadagiti tulbek ti pagarian.”
Iti benneg 90, inted ti Apo dagiti pangiturong maipapan “ti panagserbi ken panguluen” (bersikulo 12) da Joseph Smith, Sidney Rigdon, ken Frederick G. Williams—dagiti miembro nga awagantayo ita iti Umuna a Panguluen. Ania ti masursurom maipapan iti Umuna a Panguluen manipud kadagiti bersikulo 1–17? Irebyum dagiti kallabes a mensahe manipud kadagiti miembro ti Umuna a Panguluen. Kasano a dagiti balikasda ti “manglukat kadagiti kinadatdatlag ti pagarian” kenka? (bersikulo 14). Kasano nga isuda ti “mangurnos kadagiti amin nga aramid daytoy a simbaan ken pagarian”? (bersikulo 16).
Kitaen met iti Henry B, Eyring “The Power of Sustaining Faith,” Ensign wenno Liahona, Mayo 2019, 58–60.
“Agkaykaysa ti amin a banag para iti pagimbaga[k].”
Utobem ti ania man kadagiti padasmo nga agpaneknek iti kari ti Apo iti Doktrina ken Katulagan 90:24 Ibilangmo ti panangisurat kadagiti padasmo ken ibinglay ida iti maysa a miembro ti pamilia wenno maysa nga ipatpateg—mabalin maysa nga agkasapulan iti kinatalged wenno pammaregta. No adda dagiti bendision nga ur-urayem pay laeng, utobem no ania ti maaramidmo tapno agtalinaed a napudno bayat ti panagur-uraymo a makita no kasano nga “agkaykaysa ti amin a banag para iti pagimbagam.”
Doktrina ken Katulagan 90:28–31
Asino ni Vienna Jaques?
Nayanak ni Vienna Jaques idi Hunio 10, 1787, iti Massachusetts. Maysa a babai nga addaan iti pammati nga aduan iti pamataudan iti kuarta, immuna a naam-ammo ni Vienna dagiti misionario idi 1831. Kalpasan a nagun-odna ti maysa a naespirituan a saksi a pudno ti mensahe, nagbaniaga tapno makipagkita iti Propeta iti Kirtland, Ohio, a nagbuniaganna.
Nagtulnog ni Vienna iti balakad ti Apo kenkuana iti Doktrina ken Katulagan 90:28–31. Ti pannangted-pategna iti Apo, agraman dagititi immun-una a donasion nga intedna iti Kirtland, ket dimteng iti napateg a panawen iti Simbaan, idi ikarkarigatan a gumatang dagiti lider iti daga a pakabangonanto ti Templo ti Kirtland. Ni Vienna ket “napudno, ken saan a … sadut” iti unos ti panagbiagna ken agingga a kinabaelanna ti “agbiag a sitatalna” (bersikulo 31) iti Salt Lake Valley, a nakatayanna iti edad a 96.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Doktrina ken Katulagan 89.Mabalin a magustuan dagiti miembro ti pamiliam ti agdrowing wenno agsapul kadagiti ladawan ti taraon ken dadduma pay a sustansia a nadakamat iti Doktrina ken Katulagan 89. Kalpasanna mabalinyo ti agay-ayam iti maysa nga ay-ayam—agsusublat dagiti miembro ti pamilia a mangpili kadagiti ladawan nga agsasaruno, panangipan kadagiti banag a nasken a ditayo usaren iti basura ken dagiti banag a nasken nga usarentayo iti pinggan. Kasano a naipatungpalen dagiti kari ikadagiti bersikulo 18–21 iti biagtayo?
Ti panangbasa iti “Salun-at iti Bagi ken Rikna” iti Para iti Pigsa dagiti Agtutubo (25–27) ket mabalin a mangparegta iti panaglilinnawag maipapan kadagiti dadduma pay a wagas a pangaywanan iti salun-at ken maipapan kadagiti bendision nga ikari ti Dios.
-
Doktrina ken Katulagan 90:5.Pagsaritaan ti maipapan no kasano nga “umawat[ka] kadagiti padles [dagiti paltiing wenno propeta] ti Dios.” Kasano a maipakitatayo a saan a “tagtagilag-anen a banag” dagita kadatayo?
-
Doktrina ken Katulagan 91.Mabalinyo a paglilinnawagan no kasano a ti balakad ti Apo maipanggep iti Apocrypha (kitaen dagiti bersikulo 1–2) ket mayaplikar iti media nga adda iti pamiliayo ita (kitaen met iti Pangiwanwan iti Nasantuan a Kasuratan, “Apocrypha,” scriptures.ChurchofJesusChrist.org.). Mabalinmo pay nga ibinglay dagiti bukodmo a padas idi “nilawlawagan[naka] ti Espiritu” (bersikulo 5) nakatulong kenka a mangilasin iti pudno ken biddut.
-
Doktrina ken Katulagan 92:2.Ania ti kaipapanan ti agbalin a “naragsak a kameng” ti Simbaan?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “The Lord Gave Me a Temple,” Children’s Songbook, 153.
Panangpadur-as iti Panangisurotayo
Agusar iti nadumaduma. Sapulem dagiti nadumaduma a wagas a mangiraman ti pamiliam iti sangapamiliaan a panagadal kadagiti nasantuan a kasuratan. Kas pagarigan, mabalin a kantaen dagiti miembro ti pamilia dagiti himno wenno kanta dagiti ubbing a mainaig iti maysa a bersikulo, agdrowing kadagiti ladawan no ania nabasada, wenno manggupgop iti maysa a bersikulo iti bukodda a balikas.
“Amin dagiti santo … a mangaramid kadagitoy a sao, situtudio a mangtungpal kadagiti bilin, mapasalun-atto ti pusegda ken pata dagiti tulangda” (Doktrina ken Katulagan 89:18).