“Agosto 2–8. Doktrina ken Katulagan 85–87: ‘Agtakderkayo kadagiti Nasantuan a Lugar,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Agosto 2–8. Doktrina ken Katulagan 85–87,” Umaykayo, Sumurot Kaniak—Para kadagiti Indibidual ken Pamilia: 2021
Agosto 2–8
Doktrina ken Katulagan 85–87
“Agtakderkayo kadagiti Nasantuan a Lugar”
Ti Espiritu ti mangiturong kenka nga agadal kadagiti pagbatayan kadagiti benneg 85–87 a saan naugedan iti daytoy a balabala. Surotem dagiti pariknana.
Isuratmo dagiti Impresionmo
Ti Aldaw ti Paskua ti gagangay a panawen nga agutob kadagiti mensahe kas ti “talna iti rabaw ti daga” ken “naimbag a nakem kadagiti tattao” (kitaen iti Lucas 2:14). Ngem idi Disiembre 25, 1832, simken iti panunot ni Joseph Smith ti pangta ti gubat. Kinarit ti South Carolina ti gobierno ti Estados Unidos ket nagsagsagana para iti gubat. Ket impalgak ti Apo ken ni Joseph a daytoy ti pangrugian laeng: “Ti gubat,” impakdaarna, “ket agsaknapto iti amin a pagilian” (Doktrina ken Katulagan 87:2). Kasla dandanin a maipatungpalton iti mabiit daytoy a padto.
Ngem saan met laeng. Iti uneg laeng ti sumagmamano a lawas, napasamak ti maysa a katulagan ti nagbaetan ti South Carolina ken U.S., ket naliklikan ti gubat. Ngem ti paltiing ket saan a kanayon a maipatungpal iti panawen wenno iti wagas a namnamaentayo. Dumani kalpasan iti 30 a tawen, nabayag kalpasan a napapatay ni Joseph Smith ken immakar a nagpalaud dagiti Santo, immalsa ti South Carolina ket simmaruno ti gubat a sibil. Nanipud idin, ti gubat iti intero a lubong ti nakaigapu ti “panagladingit ti daga” (Doktrina ken Katulagan 87:6). Bayat ti pannakaipatungpal iti kamaudiananna ti padto, nababbaba ti pateg daytoy a paltiing no sumangbay ti kalamidad ket ad-adda iti panangisuro no ania ti aramiden no mapasamak daytoy. Agpapada ti ballaag idi 1831,1861, ken 2021: “Agtakderkayo kadagiti nasantuan a lugar, ket saankayo nga aggaraw” (bersikulo 8).
Dagiti Kapanunotan para iti Bukod a Panagadal iti Nasantuan a Kasuratan
Nasayaat nga “italimeng ti maysa a pakasaritaan.”
Ti “pakasaritaan” a nailadawan iti bersikulo 1 naisurat dagiti nagan no asino ti “immawat kadagiti nainkalintegan a tawid” iti Zion (kitaen met iti Doktrina ken Katulagan 72:24–26). Nupay kasta, daytoy a pakasaritaan ket nalablabes pay ngem administratibo—daytoy pay ti napateg a kasuratan dagiti Santo iti “wagas ti panagbiagda, ti pammatida, ken dagiti aramidda” (bersikulo 2).
Adda kadi italtalimengmo a bukod a pakasaritaan wenno diurnal? Ania ti maisuratmo maipapan iti wagas ti panagbiagmo, ti pammatim, ken dagiti aramidmo a mabalin a maysa a bendision kadagiti sumaruno a kaputotan? Kasano nga agbalin a parabur kenka daytoy a pakasaritaan ?
Kitaen met iti “Journals: ‘Of Far More Worth than Gold,’” Teachings of Presidents of the Church: Wilford Woodruff (2011), 125–33; “Turning Hearts” (video, ChurchofJesusChrist.org).
Agsarita ti Espiritu iti “naalumamay, bassit a timek.”
Utobem dagiti balikas ni Joseph Smith a nausar a mangiladawan iti Espiritu iti Doktrina ken Katulagan 85:6. Kasano a “naalumamay” ken “bassit” ti timek ti Espiritu? Ania dagiti sumagmamano a banag a “sumeksek” iti biagmo?
Bayat ti panangpanunotmo maipapan no kasano a makisarita ti Espiritu kenka, ibilang dagitoy a panangiladawan a naited babaen ken ni Joseph Smith: Doktrina ken Katulagan 6:22–24; 8:2–3; 9:7–9; 11:12–13; 128:1. Ibatay iti no ania ti nabasam, ania iti mariknam a kasapulam nga aramiden tapno nasaysayaat ti pannakadlawmo iti timek ti Espiritu?
Kitaen met iti 1 Ar-ari 19:11–12; Helaman 5:30.
Ti panagadal kadagiti nasantuan a kasuratan makatulong kadatayo a dumngeg iti Espiritu Santo.
Maummongto dagiti nalilinteg kadagiti maudi nga aldaw.
Doktrina ken Katulagan 86:1–7 naglaon iti palawag ti Apo iti pangngarig iti trigo ken ruruot, nga addaan iti bassit a pakaigiddiatan a panangyunay-unay ngem ti intedna iti Mateo 13:24–30, 37–43. No pagdasigem dagiti dua, ania dagiti paggidiatan a madlawmo? Ibilang no apay daytoy a pangngarig —kadagitoy a paggigidiatan—ket napateg nga ulit-uliten “iti maudi nga al-aldaw, uray pay ita” (Doktrina ken Katulagan 86:4). Ania ti masursurom manipud iti daytoy a pangngarig ken ti kaipapananna iti ud-udina nga aldaw?
Kas naisurat kadagiti bersikulo 8–11, insarita ti Apo maipanggep iti priesthood, pannakaisubli, ken ti pannakaisalakan dagiti taona. Ania dagiti koneksion a makitam kadagitoy a bersikulo ken ti pangngarig maipapan iti trigo ken ruruot? Kasano nga agbalinka a kas “maysa a mangisalakan kadagiti tao [ti Apo]”? (bersikulo 11).
Kitaen met iti Gospel Topics, “Apostasy,” “Restoration of the Priesthood,” topics.ChurchofJesusChrist.org.
Masarakan ti talna kadagiti “nasantuan a lugar.”
Mainayon pay kadagiti pisikal a pagpeggadan ti “panagsayasay iti dara … [ken] bisin, ken angol, ken ginggined” (Doktrina ken Katulagan 87:6), mayaplikar pay ti balakad iti daytoy a paltiing kadagiti naespirituan a pagpeggadan a pakaipasanguantayo amin kadagiti maudi nga aldaw. Ania dagiti “nasantuan a lugar[mo]” (bersikulo 8) a pakasarakam iti talna ken talged? Ania ti mamagbalin a nasantuan ti maysa a lugar? Mainayon kadagiti pisikal a lokasion, nalabit adda dagiti nasantuan a panawen, nasantuan a kannawidan, wenno nasantuan a kapanunotan a makaipaay iti talna. Ania ti kaipapanan ti “saan nga aggaraw” manipud kadagitoy a lugar?
Kitaen met iti Henry B. Eyring, Henry B. Eyring, “A Home Where the Spirit of the Lord Dwells,” Ensign wenno Liahona, Mayo 2019, 22–25; Saints, 1:163–64; “Peace and War,” Revelations in Context, 158–64.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Doktrina ken Katulagan 85:6.Kasano a masuruam ti pamiliam a mangbigbig iti naalumamay, bassit a timek ti Espiritu? Nalabit a mabalinyo ti agay-ayam iti maysa nga ay-ayam a yarasaas ti maysa a tao dagiti napateg a pangiturong iti baet dagiti mangsingsinga nga arimbangaw. Ania ti mabalin a mangsingsinga kadatayo manipud iti idedengngeg iti Espiritu Santo? Nalabit a mabalin nga ibinglay dagiti miembro ti pamilia no ania ti aramidenda a dumngeg iti timek ti Espiritu.
-
Dokrina ken Katulagan 86.Ti panagdrowing wenno panangkita kadagiti ladawan ti makatulong iti pamiliam a makaawat iti pangngarig maipapan iti trigo ken ruruot. Mabalin a kayatmo nga irugi kadagiti ladawan ti bambanag a nailadawan iti Mateo 13:24–30. Kalpasanna mabalin nga inaganan ti pamiliam dagiti ladawan nga addaan iti panangilawlawag manipud iti Doktrina ken Katulagan 86:1–7. Kasano a mayarigtayo iti trigo? Kasano a makapagbalintayo a kas kadagiti anghel nga agum-ummong iti trigo?
-
Doktrina ken Katulagan 87:8.Tapno mayam-ammo ti maysa a panaglilinnawag maipapan no kasano a pagbalinen a nasansantuan a lugar ti pagtaenganyo, mabalinmo nga awisen dagiti miembro ti pamilia a mangdisenio iti maysa a pagtaengan para iti maysa a tao a mangipatpateg iti Mangisalakan. Daytoy ket mabalin a mangiturong kadagiti kapanunotan no kasano ti “mangdisenio manen” ti pagtaenganyo a pagbalinen daytoy a lugar ti talna iti baet ti naespirituan a pagpeggadan iti lubong. Dagiti kanta a kas iti “Love at Home,” “Home Can Be a Heaven on Earth” (Hymns, nos. 294, 298), wenno “Where Love Is” (Children’s Songbook, 138–39) mabalin a mangted kenka kadagiti kapanunotan.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Where Love Is,” Children’s Songbook, 138–39.
Panangpadur-as iti Panangisurotayo
Usarem ti kinamanagpartuatmo. No suruam ti pamiliam manipud kadagiti nasantuan a kasuratan, saanmo a limitaran ti bagim kadagiti saludsod ken kapanunotan para iti aktibidad a naisingasing iti daytoy a balabala. Bay-an dagitoy a kapanunotan ti mangparegget iti bukodmo a kinamanagpartuat. Panunotem no anianto ti magustuan ti pamiliam ken no anianto ti makatulong kadakuada a mangsapul kadagiti koneksion iti nasantuan a kasuratan ken biagda.
Inusar ti Apo ti pangngarig maipapan iti trigo ken ruruot a mangiladawan no kasano a maummongto dagiti taona kadagiti maudi nga aldaw.