Agosto 9–15

Doktrina ken Katulagan 88

“Mangbangonkayo … iti Balay ti Dios”

Kinuna ni Presidente Russell M. Nelson, “ikarik a bayat ti sipapasnek a panangtrabahom a mangurnos iti pagtaenganyo nga agbalin a maysa a sentro a pagsursuruan ti ebanghelio, … ti impluensia ti kabusor iti biagmo ken iti pagtaengam ket kumapsutto” (“Becoming Exemplary Latter-day Saints” Ensign wenno Liahona, Nob. 2018, 113).

Isuratmo dagiti Impresionmo

Tunggal masansan, ikkannatayo ti Apo iti maysa a bassit a pannakaawat iti awan patinggana a “kinatan-ok ken kinabileg[na]” (Doktrina ken Katulagan 88:47) babaen kadagiti agtultuloy a paltiing kadagiti propetana. Doktrina ken Katulagan 88 ket maysa a paltiing—maysa a maipapan iti silaw ken dayag ken dagiti pagarian a mamagbalin kadagiti naindagaan a pakaseknantayo a kasla awan pategna no idilig. Uray no ditayo maawatan amin no ania ti isursuro ti Apo kadatayo, mariknatayo uray kaskasano nga ad-adu pay iti adda iti kinaagnanayon ngem iti no ania ti matukodtayo ita. Kinaagpaysona, saan a nagsao ti Apo kadagitoy naindaklan a kinadatdatlag tapno mangbutbuteng kadatayo wenno mangiparikna a nakapsuttayo. Kinaagpaysona, inkarina nga, “Umayto ti aldaw inton matukodyo ti Dios” (bersikulo 49; nainayon dagiti nagiray a balikas). Nalabit nga iti dayta ket para iti napateg ken sagrado a panggep a nangparegtaan ti Apo kadagiti Santona iti Kirtland a mangbukel iti Pagadalan dagiti Propeta. “Urnosenyo dagiti bagbagiyo,” kinunana. “Isaganayo amin a kasapulanyo; ken mangbangonkayo … iti balay ti Dios” (bersikulo 119). Ta iti uneg ti nasantuan a balay ti Dios—ken iti pagtaengantayo —a kabaelanna, nga ad-adda ngem iti sadino man a lugar, nga itag-ay ti parmatatayo iti labes ti mortal a lubong, “waknitanna ti rupana [kadatayo]”, ken isagananatayo tapno “maawat iti celestial a gloria” (dagiti bersikulo 68, 22).

Dagiti Kapanunotan para iti Bukod a Panagadal iti Nasantuan a Kasuratan

Doktrina ken Katulagan 88

Idiaya ti Apo kadatayo ti namnama ken talna.

Sumagmamano nga aldaw laeng kalpasan ti ballaag a ti gubat “agsaknapto kadagiti amin a pagilian” (Doktrina ken Katulagan 87:2), inted ti Apo ti maysa a paltiing nga inawagan ni Joseph Smith iti “‘bulong ti olibo’ … naala manipud iti Kayo ti Paraiso, ti mensahe ti Apo iti kappia kadatayo” (Doktrina ken Katulagan 88, paulo a benneg). Kasano a mayarig daytoy a paltiing iti bulong ti olibo, tradisional a simbolo ti kappia? (kitaen met iti Genesis 8:11). Ania dagiti kinapudno iti daytoy a benneg ti mangtulong kenka a mangrikna ti namnama ken kappia ken ni Cristo?

Doktrina ken Katulagan 88:6–67

Aggapu ti silaw ken paglintegan ken ni Jesucristo.

Dagiti balikas a silaw ken paglintegan ket naulit iti namin-adu iti benneg 88. Dagitoy a balikas ket nausar kadagiti dadduma a nasantuan a kasuratan a mangiladawan ken ni Jesucristo ken ti ebangheliona (kas pagarigan, kitaen iti Isaias 60:19; Juan 1:1–9; 3 Nephi 15:9). Markaan wenno isurat dagiti bersikulo a pakasarakam kadagitoy a balikas iti Doktrina ken Katulagan 88:6–67, ket isurat no ania ti masursurom maipapan iti Mangisalakan, silaw, ken paglintegan. Mabalin a maparegtanaka dagitoy a bersikulo nga agaramid kadagiti panagbalbaliw iti biagmo tapno napudpudnoka nga umawat iti lawag ken agbiag iti “paglintegan ni Cristo” (bersikulo 21).

Kitaen met ti Sharon Eubank, “Christ: The Light That Shines in Darkness,” Ensign wenno Liahona, Mayo 2019, 73–76.

Linaon dagiti nasantuan a kasuratan ti paglintegan ni Cristo.

Doktrina ken Katulagan 88:62–126

Isagana amin a banag a kasapulan.

Iti sumagmamano a wagas, agbibiagtayo iti panawen nga inladawan ti Apo no “agarimbangawto amin a banag; ket awan duadua, aglulokto ti puspuso dagiti tao” (Doktrina ken Katulagan 88: 91). Bayat ti panangbasam kadagiti bersikulo 62–126, ibilang no kasano a matulongannaka ti balakad ti Apo nga agsagana para iti Maikadua a Yaay ti Mangisalakan. Adtoy ti sumagmamano a saludsod nga ibilang:

Dagiti bersikulo 62–76.Bayat ti panangutobmo kadagitoy a bersikulo, ania ti makaparegta kenka nga aramidem nga “umasideg” iti Dios? (bersikulo 63). Ibilangmo no ania ti bilin ti Apo a “pasantuenyo ti bagbagiyo” ti mabalin a kaipapananna para kenka (bersikulo 68).

Dagiti bersikulo 77–80, 118–26.Apay a mabalin a “nasken a maawatanyo” nga agpada dagiti topiko a mainaig iti doktrina ken temporal? (bersikulo 78). Kasano a tungtungpalem ti balakad nga “agadalkayo”? (bersikulo 118). Ania iti panagkunam a kaipapanan ti agsursuro babaen “iti panagadal ken kasta met iti pammati”?

Dagiti bersikulo 81–116.Ibilangmo ti panangisurat kadagiti padto maipanggep iti Maikadua a Yaay ti Mangisalakan kadagitoy a bersikulo. Apay iti panagkunam a kayat ti Apo a maamuam maipapan kadagitoy a banag?

Dagiti bersikulo 117–26.Ibilang ti panangbasam kadagitoy a bersikulo a pampanunotem ti templo; ania ti masarakam ditoy a makatulong kenka nga agsagana a sumrek iti balay ti Apo?

Kitaen met iti D. Todd Christofferson, “Preparing for the Lord’s Return,” Ensign wenno Liahona, Mayo 2019, 81–84; David A. Bednar, “Seek Learning by Faith,” Ensign, Sept. 2007, 61–68; Saints, 1:164–66; “A School and an Endowment,” Revelations in Context, 174–82.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Doktrina ken Katulagan 88:14–33, 95–101.Ania ti masursurotayo maipapan iti Panagungar manipud kadagitoy a bersikulo? Kasano a maimpluensiaan dagitoy a kinapudno dagiti pilitayo?

Doktrina ken Katulagan 88:33.Mabalinmo a rugian ti maysa a panaglilinnawag iti daytoy a bersikulo babaen iti panangidawat kadagiti miembro ti pamilia nga agsarita maipapan kadagiti sagut a naited kadakuada—agpada kadagiti immawat a siraragsak ken dagiti dadduma a saan nga immawat. Kasano a maipakitatayo iti Apo nga agrag-otayo iti sagut a celestial a dayag nga idiayana kadatayo? Kasano nga agrag-otayo iti “nangted iti sagut”?

Doktrina ken Katulagan 88:63, 68.Naglaon dagitoy a bersikulo iti sumagmamano a maitignay a balikas [action words] a mabalin a mangparegta kenka a mangpanunot kadagiti managpartuat a wagas a pangisuruam kadagiti mensahe kadagitoy a bersikulo kadagiti annakyo. Kas pagarigan, mabalinyo ti agay-ayam iti maysa nga ay-ayam a linnemengan a mangilawlawag iti ragup ti balikas a “sapulen[dak] a sireregta ket masarakandakto ” (bersikulo 63; nainayon dagiti nagiray a balikas).

Doktrina ken Katulagan 88:81.Kas maysa a pamilia, ilasin ti sumagmamano a tanda iti uneg ken lawlaw ti pagtaenganyo, kas kadagiti label a pangballaag kadagiti agas wenno tanda ti trapiko kadagiti drayber. Kasano a makatulong kadatayo dagitoy a ballaag? Ania ti kayat ti Nailangitan nga Ama nga “iballaag [tayo] iti kaarruba[tayo]”?

Doktrina ken Katulagan 88:119.Tapno maparegta ti pamiliam a mangaramid iti pagtaenganyo a kas iti panangiladawan iti bersikulo 119, padasen ti maysa a banag a kastoy: Agsurat kadagiti ragup ti balikas manipud itoy a bersikulo kadagiti papel, ket usarem dagitoy a mangabbong iti maysa a ladawan ti templo. Basaen nga aggigiddan ti Doktrina ken Katulagan 88:119 , ket paikkat kadagiti miembro ti pamilia ti tunggal papel bayat ti pannakangngegda iti umisu a ragup ti balikas iti bersikulo. Ania ti maaramidtayo tapno mapagbalin ti pagtaengantayo a “balay ti Dios”? (bersikulo 119).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Nearer, My God, to Thee,” Hymns, no. 100.

Panangpadur-as iti Panangisurotayo

Palugodam dagiti ubbing a mangipakita iti kinamanagpartuatda. No awisem dagiti ubbingmo nga agpartuat iti maysa a banag nga adda pakainaiganna iti maysa a pagbatayan ti ebanghelio, saanmo laeng a tultulongan ida a makaawat a nasaysayaat tii pagbatayan, ngem ik-ikam pay ida iti maiggaman a palagip iti no ania ti nasursuroda (kitaen iti Panangisuro iti Wagas ti Mangisalakan, 25).

Idiaya ni Jesucristo kadatayo ti kappia. Ibatik Kadakayo ti Kappia, ni Walter Rane