“Septiembre 13–19. Doktrina ken Katulagan 102–105: ‘Kalpasan ti Adu a Panagtutuok … Umay ti Bendision,’” Umaykayo, Sumurot Kaniak—Para kadagiti Indibidual ken Pamilia: Doktrina ken Katulagan 2021 (2020)
“Septiembre 13–19. Doktrina ken Katulagan 102–105,” Umaykayo, Sumurot Kaniak—Para kadagiti Indibidual ken Pamilia: 2021
C. C. A. Christensen (1831–1912), Kampo ti Zion, c 1878, tempera iti muslin, 78 × 114 pulgada. Brigham Young University Museum of Art, sagut dagiti appoko ni C. C. A. Christensen, 1970
Septiembre 13–19
Doktrina ken Katulagan 102–105
“Kalpasan ti Adu a Panagtutuok … Umay ti Bendision”
Ania dagiti pagbatayan manipud iti Doktrina ken Katulagan 102–5 ti napnuan kaipapananna kenka? Ibilangmo ti panangisurat kadagiti kapanunotan ken impresion maipapan kadagitoy a pagbatayan.
Isuratmo dagiti Impresionmo
Nakaladladingit dagiti Santo iti Kirtland a nakangngeg a dagiti kakabsatda a lallaki ken babbai iti Jackson County, Missouri, ket napapanawda manipud kadagiti pagtaenganda. Nalabit a makaparegta daytoy, ngarud, idi impakdaar ti Apo a “ti pannakasubbot ti Zion” ket “dumteng babaen ti bileg” (Doktrina ken Katulagan 103:15). Iti dayta a kari iti puspusoda, nasurok a 200 a lallaki, agraman ti agarup 25 a babbai ken ubbing, ti nakitipon iti naawagan iti Kampo ti Israel, nga iti saan a nabayag naam-ammo a kas Kampo ti Zion. Mision daytoy ti agmartsa a mapan iti Missouri ken mangsubbot iti Zion.
Kadagiti miembro iti kampo, ti manangsubbot a Zion kaipapananna ti pannakaisubli dagiti Santo ti dagada. Ngem sakbay ti isasangpet ti kampo iti Jackson County, imbaga ti Apo ken Joseph Smith a pagsardengen ket waraenna ti Kampo ti Zion. Natikaw ken naupay dagiti sumagmamano a miembro ti kampo iti daytoy baro a pangiturong; para kadakuada, saan a nagballigi ti ekspedision ket saan a natungpal dagiti kari ti Apo. Kadagiti dadduma, nupay kasta, sabali ti panangawatda. Idinto a saan a kaano man nakapagsubli dagiti napapanaw a Santo iti Jackson County, nangyeg ti padas iti maysa a “panangsubbot” iti Zion, ket daytoy ti “immay babaen ti bileg.” Dagiti napudno a miembro iti Kampo ti Zion, adu kadakuada iti saan a nabayag ti nagbalin a dadaulo ti Simbaan, a nangpaneknek a dagiti padasda ket nangpapigsa iti pammatida iti bileg ti Dios, iti nadiosan nga awag ni Joseph Smith, ken iti Zion—saan laeng a ti Zion a lugar ngem ti Zion dagiti tao ti Dios. Imbes a salusoden ti pateg daytoy maipagarup a di nagballigi nga aramid, nasursuroda a ti pudno nga aramid ket ti mangsurot iti Mangisalakan, uray no saantayo a maawatan ti amin a bambanag. Kastoy ti pannakasubbotto ti Zion iti udina.
Kitaen iti Saints, 1:194–206; “The Acceptable Offering of Zion’s Camp,” Revelations in Context, 213–18.
Nagtalinaed ti Kampo ti Zion kadagiti igid ti Little Fishing River, a nailadawan ditoy.
Dagiti Kapanunotan para iti Bukod a Panagadal iti Nasantuan a Kasuratan
Doktrina ken Katulagan 102:12–23
Ania ti panggep dagiti pangiturong kadagitoy a bersikulo?
Naglaon ti benneg 102 kadagiti detaliado a linaon iti miting iti Kirtland, Ohio, a nakabuklan ti umuna a nangato a konseho ti Simbaan. Iladawan dagiti bersikulo 12–23 dagiti addang a suroten dagiti nangato a konseho no mangangayda kadagiti konseho iti panagdisiplina kadagiti nakaaramid iti nadagsen a basbasol.
Insuro ni Presidente M. Russell Ballard, “Saludsoden no dadduma dagiti miembro no apay a maangay dagiti konseho ti panagdisiplina iti Simbaan. Nagkatlo ti panggepna: tapno maisalakan ti kararua dagiti makabasol, masaluadan dagiti inosente, ket masalakniban ti nadalus, integridad, ken nasayaat a nagan ti Simbaan” (“A Chance to Start Over: Church Disciplinary Councils and the Restoration of Blessings,“ Ensign, Sept. 1990, 15).
Kitaen met iti Gospel Topics, “Church Disciplinary Councils,” topics.ChurchofJesusChrist.org.
Doktrina ken Katulagan 103:1–12, 36; 105:1–19
Mabalin a maipatakder ti Zion laeng kadagiti pagbatayan ti kinalinteg.
Apay a napukaw dagiti Santo dagiti naikari a dagada iti Missouri? Ken apay a di impalubos ti Apo iti Kampo ti Zion a mangpasubli kadakuada kadagiti dagada? Awan duadua nga adda papel nga akmen dagiti naranggas a tignay dagiti bunggoy a mangriribuk iti Missouri, ket nagkari ti gobernador ti Missouri iti suporta kadagiti Santo ngem dida pulos naited daytoy. Ngem kinuna ti Apo a “no saan la a gapu iti panagsalungasing dagiti taok,” ti Zion “nalabit a nasubbotda koma itan” (Doktrina ken Katulagan 105:2). Bayat ti panangbasam ti Doktrina ken Katulagan 103:1–12, 36; 105:1–19, mabalin a madlawmo ti sumagmamano a banag a mangtubeng iti pannakabangon ti Zion iti Missouri ken ti dadduma pay a mabalin kuma a nakatulong. Ania ti masursurom a makatulong kenka a maaddaan iti Zion iti pusom ken iti pagtaengam?
Doktrina ken Katulagan 103:12–13; 105:1–6, 13–19
Umay dagiti bendision kalpasan ti rigrigat ken pannakasubok iti pammati.
Iti adu a wagas, ti pannakiraman iti Kampo ti Zion ti maysa a pannakasuot ti pammati. Naunday ti panagdaliasat, napudot ti tiempo, ken no dadduma ket nakisang ti taraon ken danum. Ket kalpasan iti amin a panagibturda, saan latta a nakasubli dagiti Santo iti dagada. Ibilangmo no kasano a dagiti pagbatayan iti Doktrina ken Katulagan 103: 12–13 ken 105:1–6,13–19 ti mabalin a nakatulong kadagiti miembro iti Kampo ti Zion a nagsiddaaw no ti bilin a mangbukel ket naggapu a talaga iti Dios idi damo. Kasano a makatulong kenka dagitoy a bersikulo iti bukodmo a pannubok iti pammati?
Mabasam pay ti maipapan kadagiti padas dagiti miembro iti Kampo ti Zion iti “Voices of the Restoration” iti udi daytoy a balabala. Ania ti makaawis iti riknam maipapan kadagiti ugalida? Ania dagiti masursurom manipud kadagiti pagwadanda?
Kitaen met iti David A. Bednar, “On the Lord’s Side: Lessons from Zion’s Camp,” Ensign, Hulio 2017, 26–35.
Doktrina ken Katulagan 104:11–18, 78–83
Siak ti maysa nga “agaywan kadagiti naindagaan a bendision.”
Kas nayon iti pannubok iti Missouri, idi 1834 nakapadas ti Simbaan kadagiti parikut pakaseknan iti kuarta, agraman dagiti nadagsen nga utang ken paggastuan. Iti benneg 104 nangted ti Apo iti balakad maipanggep iti pinansial a situasioni ti Simbaan. Kasano a mayaplikarmo dagiti pagbatayan iti bersikulo 11–18 ken 78–83 kadagiti bukodmo a pangngeddeng a pakaseknan iti pinansial?
Tapno masursuro ti maipapan iti maysa kadagiti wagas nga insagana ti Apo para iti Simbaan tapno mawayawayaan manipud iti pannakaadipen iti utang, buyaen ti “Treasure in Heaven: The John Tanner Story” (video, ChurchofJesusChrist.org).
Tapno masursuro ti ad-adu pay maipapan iti “bukod a wagas” ti Apo (bersikulo 16) tapno mangted iti kasapulan dagiti Santona, mabalinmo nga adalen ti mensahe ni Presidente Dieter F. Uchtdorf iti “Providing in the Lord’s Way” (Ensign wenno Liahona, Nob. 2011, 53–56).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Doktrina ken Katulagan 103:12, 36; 105:9–13.Naidawat kadin iti pamiliam (wenno maysa kadagiti kapuonam) a mangaramid iti maysa a banag a di napasamak iti wagas a ninamnamam? Ania ti nasursurom manipud kadagiti reaksion dagiti miembro ti Kampo ti Zion idi a ti panagdaliasatda saan a nasayaat ti bungana a kas ninamnamada? (kitaen iti “Voices of the Restoration” iti ungto daytoy a balabala).
-
Doktrina ken Katulagan 104:13–18.Ania ti naiteden ti Apo kadatayo? Ania ti namnamaenna kadatayo nga aramiden kadagitoy a banag?
-
Doktrina ken Katulagan 104:23–46.Mabalin a sukisoken ti pamiliam dagitoy a bersikulo a mangsapul no namin-ano nga inkari ti Apo nga “umadu ti parabur” (bersikulo 23) para kadagiti napudno. Nalabit a daytoy koma ti napintas a gundaway tapno “bilangem dagiti bendisionmo” (“Count Your Blessings,” Hymns, no. 241) ket paglilinnawagan no kasano a ti panagaramid iti daytoy ti makatulong kadatayo bayat dagiti narigat a panawen. Mabalin a magustuan dagiti babassit nga ubbing nga idrowing dagiti ladawan dagiti bendision a kangrunaan a pagyamyamananda.
-
Doktrina ken Katulagan 105:38–41.Kasano a “maisingasingtayo ti kappia” (bersikulo 40) no tratuendatayo dagiti dadduma iti saan a nasayaat wenno nagubsang? Ania ti mabalin nga aramidentayo tapno agbalintayo a “wagayway ti kappia” (bersikulo 39) iti pagtaengantayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Count Your Blessings,” Hymns, no. 241.
Dagiti Timek ti Pannakaisubli
Kampo ti Zion
Gapu ta saan a pulos a napasubli ti Kampo ti Zion dagiti Santo kadagiti dagdagada iti Jackson County, adu a tao ti nakarikna a napaay ti gandatda. Nupay kasta, adu kadagiti nakiraman iti Kampo ti Zion ti nanglagip iti naglabas a padasda ket nakitada no kasano nga impatungpal ti Apo ti maysa a nangatngato a panggep kadagiti panagbiagda ken iti Pagarianna. Dagitoy ti sumagmamano a pammaneknekda.
Joseph Smith
Nalabes a 40 a tawen kalpasan ti Kampo ti Zion, ni Joseph Young, a maysa a miembro iti kampo, impadamagna a kinuna ni Joseph Smith dagiti sumaganad:
“Kakabsat, sumagmamano kadakayo ti makaunget kaniakon, gapu ta saankayo a nakiranget iti Missouri; ngem bay-andak a mangibaga kadakayo, a saan a kayat ti Dios a makirangetkayo. Saanna a mabukel ti pagarianna iti sangapulo-ket dua a lallaki a manglukat iti ridaw ti ebanghelio kadagiti pagilian iti daga, ken iti pitopulo a lallaki babaen ti panangiturongda a suroten dagiti pannarabayda, malaksid no innalana manipud iti grupo ti lallaki a nangidaton kadagiti biagda, ken nakaipaay iti naindaklan a sakripisio kas iti inaramid ni Abraham.
“Ita, addaanen ti Apo iti Sangapulo-ket-duana ken ti Pitopulona, ken addanto pay dagiti dadduma a korum dagiti Pitopulo a maawagan, a mangipaay kadagiti sakripisio, ken dagiti saan pay a nakaipaay kadagiti sakripisioda ken dagiti datonda ita, ket ipaaydanto kalpasanna.”1
Brigham Young
“Idi simmangpetkami iti Missouri nagsarita ti Apo iti katulonganna a ni Joseph ket kinunana, ‘Inawatko ti datonmo,’ ket naaddaankami iti gundaway nga agsubli manen. Iti panagsublik adu a gagayyem ti nagdamag kaniak no ania a pagimbagan ti mangawag kadagiti tao manipud kadagiti trabahoda a mapan iti Missouri ket kalpasanna agsubli, nga awan iti ania man a nalawag a banag a nagapuananda. ‘Asino ti nairanud iti daytoy?’ dinamagda. ‘No imbilin ti Apo a rumbeng nga aramiden, ania a panggep a tun-oyen ti naparmatana iti pannakaaramid daytoy?’ … Imbagak kadagita a kakabsat a nagunggonaannak—nagunggonaan iti sobra-sobra—wen ta naindaklan ti pagsayaatan a naawatko nga addaan iti pannakaammo babaen ti panagdaliasatko a kaduak ti Propeta.”2
Wilford Woodruff
“Addaak idi iti Kampo ti Zion a kaduak ti Propeta ti Dios. Nakitak ti pannakilangen ti Dios kenkuana. Nakitak ti bileg ti Dios kenkuana. Nakitak nga isu ti Propeta. No ania ti naipakita kenkuana babaen ti bileg ti Dios iti dayta a mision ket naindaklan ti pategna kaniak ken iti amin nga immawat kadagiti pangiturongna.”3
“Idi naawagan dagiti miembro ti Kampo ti Zion adu kadakami ti di pay nakakita kadagiti rupa ti maysa ken maysa; estrangherokami iti maysa ken maysa ken adu ti di pay pulos nakakita iti propeta. Nagnaedkami iti saba-sabali a lugar, kas mais a nasagat iti maysa a pagsagatan, iti intero a pagilian . Agtutubokami a lallaki, ket naawagan iti dayta nasapa nga aldaw a mapan mangsubbot iti Zion, ket nasken nga aramidenmi dagiti bambanag nga inkami aramiden babaen ti pammati. Sangkamaysakami a naummong manipud iti nadumaduma nga Estado iti Kirtland ket napankami tapno mangsubbot iti Zion, iti pannakatungpal ti bilin ti Dios kadakami. Inawat ti Dios dagiti trabahomi a kas iti inaramidna kadagiti trabaho ni Abraham. Naipatungpalmi ti adu a bambanag, nupay dagiti kimmalilis ken di mamatpati dinamagda iti namin-adu ti saludsod nga ‘ania ti naaramidanyon?’ Nagun-odmi ti padas a saanmi pulos a magun-od [iti] sabali a wagas. Naaddaankami iti pribilehio a nakakita iti rupa ti propeta, ket naaddaankami iti gundaway a nagdaldaliasat iti rinibu a milia a kaduami isuna, ket nakitkitami dagiti aramid ti espiritu ti Dios kenkuana, ken dagiti paltiing ni Jesucristo kenkuana ken ti pannakatungpal dagita a paltiing. Ket inummongna ti agarup dua gasut nga elders manipud iti amin a pagilian iti dayta immun-una a panawen iti Simbaan ket impatulodnakami iti aglawlaw iti lubong a mangikasaba iti ebanghelio ni Jesucristo. No saanak a napan iti Kampo ti Zion, awanak koma ditoy ita [iti Salt Lake City, agserserbi iti Korum dagiti Sangapulo-ket-Dua]. … Babaen ti papanmi sadiay naipakatkami iti bangkag a mangikasaba iti ebanghelio, ket inawat ti Apo ti trabahomi. Ken kadagiti amin a trabaho ken pannakaidadanesmi, ken ti biagmi a masansan a mairisgo, nasken nga agtrabaho ken agbiagkami iti pammati.”4
“Ti padas a nagun-od[mi] iti panagbiahe iti Kampo ti Zion ket napatpateg pay ngem iti balitok.”5
Kampo ti Zion (Kampo ti Zion iti Karayan ti Fishing), ni Judith A. Mehr