“13–19 Septemba. Doktrin mo Ol Kavenan 102–105: ‘From Afta long Plante Hadtaem … Bae Blesing I Kam,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“13–19 Septemba. Doktrin mo Ol Kavenan 102–105” Kam Folem Mi—Blong Wanwan Man, Woman mo Famli: 2021
C. C. A. Christensen (1831–1912), Saeon Kamp c. 1878, tempera long muslin, 78 × 114 inj. Brigham Yang Yunivesiti Miusiom blong Art, presen we i kam long ol apupikinini blong C. C. A. Christensen, 1970
13–19 Septemba
Doktrin mo Ol Kavenan 102–105
“From Afta long Plante Hadtaem … Bae Blesing I Kam”
?Wanem nao ol prinsipol we oli kamaot long Doktrin mo Ol Kavenan 102-5 we oli gat mining long yu? Tingting blong raetemdaon ol tingting mo ol filing blong yu abaot ol prinsipol ia.
Raetemdaon Ol Filing mo Tingting blong Yu
Ol Sent we oli stap long Ketlan oli bin harem nogud tumas blong harem se oli stap ronemaot ol brata mo ol sista blong olgeta we oli stap long Jakson Kaonti, Misuri, blong oli aot long hom blong olgeta. Ating long tetaem ia, ol toktok blong Lod i leftemap tingting blong olgeta taem Hem i talem se “fasin blong pemaot Saeon i nid blong i mas kam tru long paoa” (Doktrin mo Ol Kavenan 103:15). Wetem promes ia long hat blong olgeta, ova 200 man, plas samples 25 woman mo pikinini, oli joenem wanem we oli singaotem Kamp blong Isrel, we afta oli save long hem olsem Saeon Kamp. Misin blong hem i blong maj i go long Misuri mo sevem Saeon.
Long ol memba blong kamp, blong sevem Saeon i blong putumbak Ol Sent long graon blong olgeta. Be jes bifo kamp ia i kasem Jakson Kaonti, Lod i talem long Josef Smit blong stopem mo seraotem Saeon Kamp. Sam memba blong kamp oli konfius mo oli no glad long niufala instraksen ia; long olgeta, i minim se grup ia i no winim wan samting mo ol promes blong Lod oli no bin kamtru. Be ol narawan oli luk hemia long defren wei. I nomata we Ol Sent we oli ronemaot olgeta oli neva gobak long Jakson Kaonti, eksperiens ia i bin mekem se i “pemaot” Saeon, mo hem i bin kam tru long paoa. Ol fetful memba blong Saeon Kamp, plante long olgeta, we afta oli bin kam ol lida blong Jos, oli bin testifae se eksperiens ia i bin mekem fet blong olgeta long paoa blong God i kam bigwan moa, oli save moa se Kraes i singaotem Josef Smit, mo oli gat moa fet long Saeon—i no jes Saeon we i ples ia, be Saeon we i ol pipol blong God. Oli no bin kwestinim hamas wok ia i no bin wan sakses; be oli bin lanem se ril wok i blong folem Sevya, iven taem yumi no andastanem evri samting. Hemia i hao, long en, bae oli pemaot Saeon.
Luk long Saints, 1:194–206; “The Acceptable Offering of Zion’s Camp,” Revelations in Context, 213–18.
Saeon Kamp i stap long saedsaed blong Little Fishing Reva, we pikja blong hem i stap ia.
Sam Aedia blong Skripja Stadi blong Yuwan
Doktrin mo Ol Kavenan 102:12–23
?Wanem i stamba tingting biaen long ol instraksen insaed long ol ves ia?
Seksen 102 i tekem ol minit blong miting long Ketlan, Ohaeo, ples we fas hae kaonsel blong Jos i bin oganaes. Ol ves 12–23 oli tokbaot ol fasin blong wok blong ol hae kaonsel mo rod blong folem taem oli holem ol disiplin kaonsel blong olgeta we oli bin brekem ol bigfala loa.
Presiden M. Russell Ballard i tijim: “Samtaem ol memba oli askem se from wanem oli stap holem ol Jos disiplin kaonsel. Stamba tingting biaen long hemia, i gat trifala pat long hem: i blong sevem sol blong hem we i brekem loa, blong protektem hem we i no gat rong, mo protektem tru fasin blong Jos, mo gudfala nem blong Jos” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).
Luk tu long Gospel Topics, “Church Disciplinary Councils,” topics.ChurchofJesusChrist.org.
Doktrin mo Ol Kavenan 103:1–12, 36; 105:1–19
Saeon, bae oli save bildim nomo antap long ol prinsipol blong stret mo gud fasin.
?From wanem Ol Sent oli lusum promes graon blong olgeta long Misuri? ?Mo from wanem Lod i no bin letem Saeon Kamp blong i putumbak graon blong olgeta? I tru we ol strong aksen blong ol rabis grup long Misuri i plei wan rol, mo gavna blong Misuri i bin promesem blong givim sapot long Ol Sent, be hem i neva givim. Be Lod i bin talem se “ sapos i no from ol fasin blong ol pipol blong [hem] blong brekem loa,” maet bae “maet [hem i] putumbak olgeta finis” (Doktrin mo Ol Kavenan 105:2). Taem yu stap ridim Doktrin mo Ol Kavenan 103:1–12, 36; 105:1–19, maet bae yu luk sam samting we i stopem wok blong stanemap Saeon long Misuri mo ol narawan we maet oli bin save help. ?Wanem nao yu stap lan we i save helpem yu blong stanemap Saeon insaed long hat mo hom blong yu?
Doktrin mo Ol Kavenan 103:12–13; 105:1–6, 13–19
Ol blesing oli kam afta long hadtaem mo ol tes blong fet.
Long plante wei, blong stap tekpat long Saeon Kamp i wan tes blong fet. Wokbaot ia i wan longfalawan, ples i hot tumas, mo i no gat tumas kaekae mo wota. Mo afta evri samting we oli bin go tru mo stap strong long hem, Ol Sent oli no bin save gobak long graon blong olgeta. Tingting long hao nao ol prinsipol insaed long Doktrin mo Ol Kavenan 103:12–13 mo 105:1–6, 13–19 oli maet helpem ol memba blong Saeon Kamp, we oli bin stap askem olgetawan sapos komanmen ia blong oli oganaesem olgeta, i rili kam long God long fas ples. ?Olsem wanem ol prinsipol ia oli helpem yu long ol tes blong fet blong yuwan?
Yu save ridim abaot ol eksperiens blong ol memba blong Saeon Kamp insaed long “Ol Voes blong Restoresen” we i stap long en blong aotlaen ia. ?Wanem nao i tajem tingting mo filing blong yu abaot ol fasin blong olgeta? ?Wanem nao yu lanem aot long ol eksampol blong olgeta?
Luk tu long David A. Bednar, “On the Lord’s Side: Lessons from Zion’s Camp,” Ensign, July 2017, 26–35.
Doktrin mo Ol Kavenan 104:11–18, 78–83
Mi mi wan “man blong lukaot long ol blesing we mi givim long wol ia.”
Antap long ol tes long Misuri, long 1834, Jos i bin fesem sam hadtaem long saed blong mane, mo Jos i gat ol bigfala kaon mo samting blong pem. Long seksen 104, Lod i bin givim kaonsel long saed blong faenens situesen blong Jos. ?Olsem wanem yumi save praktisim ol prinsipol we i stap long ol ves 11–18 mo 78–83 long ol faenens desisen blong yuwan?
Blong lanem abaot wan wei we Lod i bin stap rere blong Jos i kam fri long fasin blong stap slef long kaon, wajem “Treasure in Heaven: The John Tanner Story” (video, ChurchofJesusChrist.org).
Blong lanem moa abaot “wei blong [Lod]” (ves 16) blong lukluk long Ol Sent blong Hem, maet yufala i save stadi long mesej blong Presiden Dieter F. Uchtdorf “Providing in the Lord’s Way” (Ensign o Liahona, Nov. 2011, 53–56).
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 103:12, 36; 105:9–13.?I gat famli blong yu, (o wan long ol bubu blong yu) we oli bin askem hem blong mekem wan samting we i no bin kamaot long wei we yu bin wantem? ?Wanem nao yu save lanem aot long wanem ol memba blong Saeon Kamp oli mekem taem we wokbaot blong olgeta i no bin go stret olsem we oli bin tingting long hem? (luk long “Ol Voes blong Restoresen” long en blong aotlaen ia).
-
Doktrin mo Ol Kavenan 104:13–18.?Wanem nao Lod i bin givim long yumi? ?Wanem nao Hem i wantem luk yumi blong mekem wetem olgeta samting ia?
-
Doktrin mo Ol Kavenan 104:23–46.Famli blong yu i save lukluk long ol ves ia blong faenem hamas taem Lod i bin promesem blong “mekem ol blesing oli kam plante mo plante” (ves 23) long olgeta we oli stap fetful. Mebi hemia bae i wan gudfala taem blong “kaontem ol blesing blong yu” (“Yu Gat Blesing, Kaontem Evriwan,” STSP, pej 8) mo toktok raon long poen ia se, taem yumi stap mekem olsem, i save helpem yumi long ol hadtaem. Maet bae ol smol pikinini oli glad blong droem ol pikja blong ol blesing we oli wantem talem tangkyu from.
-
Doktrin mo Ol Kavenan 105:38–41.?Olsem wanem nao yumi save “toktok blong askem pis” (ves 40) taem ol narawan oli stap tritim yumi long wan fasin we i no kaen, o i no stret? ?Wanem nao yumi save mekem blong stap olsem “flag blong pis” (ves 39) insaed long hom blong yumi?
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Yu Gat Blesing Kaontem Evriwan” STSP, pej 8.
Ol Voes blong Restoresen
Saeon Kamp
From se Saeon Kamp i neva putumbak Ol Sent long graon blong olgeta long Jakson Kaonti, plante pipol oli bin filim se hadwok blong olgeta, i no bin gotru. Be, plante we oli bin tekpat long Saeon Kamp oli luklukbak long eksperiens blong olgeta mo oli bin luk olsem wanem Lod i bin mekem wan stamba tingting we i moa hae, long laef blong olgeta mo long kingdom blong Hem, i bin hapen. Hemia samfala testemoni blong olgeta.
Josef Smit
Afta ova 40 yia, afta long Saeon Kamp, Josef Yang, i bin wan memba blong kamp ia, i bin ripotem se Josef Smit i bin talem hemia:
“Ol brata. Sam long yufala i kros wetem mi, from se yufala i no bin faet long Misuri; be bae mi talem long yufala, God i no bin wantem blong yufala i faet. Bae Hem i no save oganaesem kingdom blong Hem wetem twelef man blong openem doa blong gospel long ol nesen blong wol ia, mo wetem seventi man anda long daereksen blong olgeta blong folem wokbaot blong olgeta, sapos Hem i no tekemaot olgeta long wan grup blong ol man we oli bin givim laef blong olgeta, we oli bin mekem wan bigfala sakrifaes olsem we Ebraham i bin mekem.
“Naoia, Lod i gat Olgeta Twelef blong Hem, mo Olgeta Seventi blong Hem, mo bambae i gat ol nara kworom blong Olgeta Seventi we bae oli mekem sakrifaes; mo olgeta we oli no bin mekem ol sakrifaes blong olgeta, mo ol ofring blong olgeta naoia, bae oli jes mekem olgeta afta.”1
Brigham Yang
“Taem yumi bin kasem Misuri, Lod i bin toktok long wokman blong Hem, Josef, mo i talem: ‘Mi bin akseptem ofring blong yu,’ mo mifala i bin gat janis ia blong gobak bakegen. Long rod i gobak, plante fren oli bin askem mi se, wanem yus blong singaotem ol man blong oli lego wok blong olgeta blong go long Misuri, mo afta kambak, mo i luk se oli no mekem eni samting i hapen. ‘?Hu i win aot long hemia?’ oli bin askem. ‘Sapos Lod i no bin givim komanmen ia blong mekem hemia, wanem tingting i stap long hem blong mekem olsem?’ … Mi bin talem long ol brata ia se oli stap pem gud mi—we oli pem wetem hevi intres—yes, mekem se mak blong mi i fulap tumas wetem save we mi bin kasem taem mi bin stap travel wetem Profet.”2
Wilfod Wudrof
“Mi bin stap long Saeon Kamp wetem Profet blong God. Mi bin luk ol samting we God i bin mekem wetem hem. Mi bin luk paoa blong God we i stap wetem hem. Mi bin luk se hem i bin wan Profet. ?Wanem i bin kamaot long hem tru long paoa blong God long misin ia, i bigwan tumas long mi mo long evriwan we i bin kasem ol instraksen ia blong hem.”3
“Taem oli bin singaotem ol memba blong Saeon Kamp, plante long mifala i neva bin luk fes blong ol narawan; mifala i bin ol strenja long wanwan long mifala, mo plante oli neva bin luk profet. Mifala i bin stap long ol nara ples olbaot, semmak olsem kon we oli sevem long net, mifala i stap olbaot long ol nara ples truaot long nesen. Mifala i bin ol yang man, we oli bin singaotem mifala blong go mo pemaot Saeon, mo wanem samting we mifala i bin gat blong mekem, mifala i mas mekem wetem fet. Mifala i aot long ol defren Stet mo kam tugeta long Ketlan, mo mifala i go blong sevem Saeon, blong mekem komanmen ia we God i bin givim long mifala. God i bin akseptem ol wok blong mifala, semmak olsem we Hem i bin akseptem ol wok blong Ebraham. Mifala i bin mekem plante samting, i nomata we olgeta we oli mekem apostasi mo olgeta we oli no biliv oli bin askem plante taem semfala kwestin ia: ‘?Yufala i bin mekem wanem?’ Mifala i bin kasem wan eksperiens we bae mifala i neva save kasem, sapos i no bin long wei ia nomo. Mifala i bin gat spesel janis blong luk fes blong profet, mo mifala i bin gat spesel janis blong travel plante kilometa wetem hem, mo luk ol wok blong Spirit blong God wetem hem, mo luk ol revelesen blong Jisas Kraes oli kam long hem, mo luk we ol revelesen ia oli kamtru. Mo hem i pulum tugeta kolosap tu handred elda truaot long nesen long eli dei ia, mo hem i bin sendem mifala blong talemaot long wol blong oli prijim gospel blong Jisas Kraes. Sapos mi no bin go long Saeon Kamp, bae mi no save stap ia tedei [long Sol Lek Siti, mo stap insaed long Kworom blong Olgeta Twelef]. … Taem mifala i bin go longwe, oli sakem mifala i go long plantesen ia blong prijim gospel, mo Lod i bin akseptem ol wok blong mifala. Wetem evri wok blong mifala, ol samting we oli kam agens long mifala, laef blong mifala we i stap long denja plante taem, mifala i bin mas wok mo laef wetem fet.”
“Eksperiens we mifala i bin kasem taem mifala i bin travel i go long Saeon Kamp, i moa impoten, o i moa sas bitim gol.”
Saeon Kamp (Saeon Kamp long Fising Reva), i kam long Judith A. Mehr