“Cuaj Hlis Ntuj 13–19. Lus Qhuab Qhia thiab Kev Khi Lus 102–105: ‘Tom Qab Dhau Kev Txom Nyem Ntau … tej Koob Hmoov Yuav Los,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Cuaj Hlis Ntuj 13–19. Lus Qhuab Qhia thiab Kev Khi Lus 102–105,” Los, Nrog Kuv Mus—Rau Ib Leeg thiab Tsev Neeg: 2021
C. C. A. Christensen (1831–1912), Lub Yeej Xi-oos, c. 1878, kos duab rau ntaub paj, 78 × 114 yas tes. Brigham Young University Museum of Art, C. C. A. Christensen cov me nyuam xeeb ntxwv muab ua khoom plig, 1970
Cuaj Hlis Ntuj 13–19
Lus Qhuab Qhia thiab Kev Khi Lus 102–105
“Tom Qab Dhau Kev Txom Nyem Ntau … tej Koob Hmoov Yuav Los”
Tej ntsiab cai twg los ntawm Lus Qhuab Qhia thiab Kev Khi Lus 102–5 muaj nqis rau koj? Xav seb koj puas sau ntawv txog koj tej kev xav thiab tej kev tshoov siab uas koj txais hais txog tej ntsiab cai no.
Sau Ntawv txog Koj tej Kev Tshoov Siab
Tsoom Haiv Neeg Ntseeg nyob hauv Kirtland nyuaj siab kawg thaum lawv hnov tias lawv cov kwv tij nus muag nyob hauv Ciaj Ciam Av Jackson, Missouri, ruag ntiab tawm ntawm lawv lub tsev. Nyaj lawv txais kev txhawb nqa, thaum uas tus Tswv hais tias “txoj kev txhiv Xi-oos dim” yuav “los ntawm hwj chim” (Lus Qhuab Qhia thiab Kev Khi Lus 103:15). Lawv nco ntsoov txoj kev cog lus no, thiaj li muaj 200 tawm txiv neej, thiab 25 tus poj niam thiab me nyuam, uas los koom lub Yeej Ixayees, tom qab ntawd lawv muab hu ua lub Yeej Xi-oos. Lub Yeej Xi-oos ntiag tug hauj lwm yog mus rau Missouri thiab muab Xi-oos dim.
Cov mej zeej hauv lub yeej ntawd xav hais tias kev txhiv Xi-oos dim txhais hais tias lawv mam li pab Haiv Neeg Ntseeg rov qab mus rau lawv thaj av. Tiam sis ua ntej pab neeg ntawd tuaj txog Ciaj Ciam Av Jackson, tus Tswv hais kom Joseph Smith nres thiab muab lub Yeej Xi-oos tso tseg. Cov mej zeej ntawm lub yeej no xav tsis thoob thiab chim siab txog tej lus qhia tshiab no; lawv xav tias lawv twb swb lawm thiab tsis tau muaj raws li tus Tswv cog lus. Tiam sis lwm tus xav txawv txog qhov no. Haiv Neeg Ntseeg uas raug ntiab tawm yeej tsis tau rov qab mus rau Ciaj Ciam Av Jackson, tiam sis qhov no twb txhiv Xi-oos dim, thiab twb los rau lawv “los ntawm hwj chim.” Cov mej zeej ntawm lub Yeej Xi-oos uas rau siab ntseeg, feem coob uas tau los ua cov thawj coj ntawm lub Koom Txoos, tau ua tim khawv tias lub sij hawm no ua rau lawv txoj kev ntseeg loj tuaj, txoj kev ntseeg Vajtswv lub hwj chim, qhov uas Vajtswv tau hu Joseph Smith, thiab Xi-oos—tsis yog qhov chaw uas hu ua Xi-oos xwb tiam sis lawv kuj ntseeg tias Xi-oos yog Vajtswv cov neeg. Lawv tsis tau ua xyem xyav txog txoj hauj lwm uas txhua tus xav tias lawv tsis tau ua lawm, lawv twb kawm hais tias txoj hauj lwm tiag tiag yog kev coj raws li tus Cawm Seej, tsis hais thaum peb tsis to taub txhua yam los yog. Thaum kawg, ces Xi-oos yuav txais kev txhiv dim li no.
Saib Saints, 1:194–206; “The Acceptable Offering of Zion’s Camp,” Revelations in Context, 213–18.
Lub Yeej Xi-oos tau nyob ntawm ntug Dej Little Fishing, uas nyob hauv daim duab no.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 102:12–23.
Vim li cas muaj tej lus qhia no nyob hauv tej nqe no?
Tshooj 102 muaj tej ntaub ntawv uas sau txog kev sib ntsib nyob hauv Kirtland, Ohio, thaum tau tsa thawj pawg sab laj hlob ntawm lub Koom Txoos. Nqe 12–23 piav txog tej txheej txheem uas tej pawg sab laj hlob ua thaum ua txub sib hais txog kev qhuab ntuas cov uas tau ua txhaum loj heev.
Thawj Tswj Hwm M. Russell Ballard tau qhia hais tias, “Tej lub sij hawm cov mej zeej nug vim li cas muaj lub Koom Txoos tej pawg sab laj txog kev qhuab ntuas. Muaj peb lub hom phiaj: cawm tus neeg txhaum dim, pov hwm cov uas tsis tau ua txhaum, thiab saib xyuas lub Koom Txoos txoj kev huv, txoj kev tseeb, thiab lub npe zoo” (“A Chance to Start Over: Church Disciplinary Councils and the Restoration of Blessings,” Ensign, Cuaj Hlis Ntuj 1990, 15).
Kuj saib Gospel Topics, “Church Disciplinary Councils,” topics.ChurchofJesusChrist.org.
Lus Qhuab Qhia thiab Kev Khi Lus 103:1–12, 36; 105:1–19
Yuav tsa Xi-oos raws li tej ntsiab cai ncaj ncees xwb.
Vim li cas Haiv Neeg Ntseeg tau poob lawv thaj av uas cog lus cia nyob hauv Missouri? Thiab vim li cas tus Tswv tsis tau cia lub Yeej Xi-oos muab lawv rov qab los nyob hauv lawv thaj av? Muaj tseeb tiag tej pawg neeg phem hauv Missouri txoj kev ua lim hiam yeej tab kaum lawv, thiab tus tswv xeev Missouri tau hais tias nws yuav txhawb nqa Tsoom Haiv Neeg Ntseeg tiam sis nws tsis tau ua li ntawd. Tiam sis tus Tswv hais tias “yog tsis muaj kuv cov neeg tej kev ua txhaum,” ces “tej zaum [Xi-oos] twb tau kev txhiv dim ziag no lawm” (Lus Qhuab Qhia thiab Kev Khi Lus 105:2). Thaum koj nyeem Lus Qhuab Qhia thiab Kev Khi Lus 103:1–12, 36; 105:1–19, tej zaum koj yuav kawm txog tej yam uas tab kaum kev txhim tsa Xi-oos nyob hauv Missouri thiab lwm yam uas tau pab. Koj kawm dab tsi uas yuav pab koj txhim tsa Xi-oos nyob hauv koj lub siab thiab koj tsev neeg?
Lus Qhuab Qhia thiab Kev Khi Lus 103:12–13; 105:1–6, 13–19
Cov koob hmoov los tom qab raug kev txom nyem thiab tej kev sim txoj kev ntseeg.
Kev koom nrog lub Yeej Xi-oos yeej yog ib txoj kev sim lawv txoj kev ntseeg. Lawv twb taug kev ntev, huab cua kub kub heev, thiab tej lub sij hawm tsis tshua muaj zaub mov noj thiab dej haus. Thiab tom qab lawv nyiaj tau txhua yam ntawd, Haiv Neeg Ntseeg tseem tsis tau rov qab mus rau hauv lawv thaj av. Cia li xav seb tej ntsiab cai nyob hauv Lus Qhuab Qhia thiab Kev Khi Lus 103:12–13 thiab 105:1–6, 13–19 tau pab cov mej zeej hauv lub Yeej Xi-oos cov uas xav paub seb txoj lus txib kom lawv mus ua ke puas yog los ntawm Vajtswv tiag tiag. Tej ntsiab cai no ua li cas yuav pab koj thaum koj raug kev sim koj txoj kev ntseeg?
Tej zaum koj yuav xav nyeem txog cov mej zeej hauv lub Yeej Xi-oos tej zaj nyob hauv “Voices of the Restoration” uas nyob qhov kawg ntawm tus txheej txheem qhia no. Lawv tej kev xav tshoov koj lub siab li cas? Koj kawm tau dab tsi los ntawm lawv tus yam ntxwv?
Kuj saib David A. Bednar, “On the Lord’s Side: Lessons from Zion’s Camp,” Ensign, Xya Hli Ntuj 2017, 26–35.
Lus Qhuab Qhia thiab Kev Khi Lus 104:11–18, 78–83
Kuv yog “ib tug saib xyuas tej koob hmoov hauv ntiaj teb.”
Ntxiv rau tej kev sim siab nyob hauv Missouri, xyoo 1834 lub Koom Txoos muaj teeb meem ntawm cov nyiaj txiag, tsis hais kev tshuav nqi ntau thiab tej nqi yuav tsum them. Nyob hauv tshooj 104 tus Tswv hais lus ntuas txog lub Koom Txoos cov nyiaj txiag. Koj yuav ua li cas kom ua raws li tej ntsiab cai nyob hauv nqe 11–18 thiab 78–83 thaum nej txiav txim txog nej cov nyiaj txiag?
Xwv kom kawm txog ib txoj kev uas tus Tswv tau npaj rau lub Koom Txoos dim kev ua qhev ntawm kev tshuav nqi, cia li saib “Treasure in Heaven: The John Tanner Story” (video, ChurchofJesusChrist.org).
Yog xav kawm txog tus Tswv “tus kheej txoj kev” (nqe 16) muab rau Nws Haiv Neeg Ntseeg, tej zaum nej yuav xav kawm txog Thawj Tswj Hwm Dieter F. Uchtdorf’s zaj lus “Pab Raws li tus Tswv Ua” (Ensign los sis Liahona, Kaum Ib Hlis Ntuj 2011, 53–56).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 103:12, 36; 105:9–13.Nej tsev neeg (los sis nej ib tug poj koob yawm txwv) puas tau muaj dab tsi uas tus Tswv hais kom lawv ua es tsis tau muaj raws li lawv xav? Nej kawm dab tsi los ntawm qhov uas cov mej zeej hauv lub Yeej Xi-oos ua li cas thaum tsis tau muaj raws li lawv xav? (saib “Voices of the Restoration” nyob qhov kawg ntawm tus txheej txheem qhia no).
-
Lus Qhuab Qhia thiab Kev Khi Lus 104:13–18.Tus Tswv tau muab dab tsi rau peb? Nws xav kom peb ua li cas nrog tej no?
-
Lus Qhuab Qhia thiab Kev Khi Lus 104:23–46.Tej zaum nej tsev neeg yuav xav nrhiav hauv tej nqe no seb pes tsawg zaus tus Tswv cog lus tias Nws yuav “ntxiv tej koob hmoov” (nqe 23) rau cov uas rau siab ntseeg. Tej zaum lub sij hawm no yog lub sij hawm zoo “suav nej cov koob hmoov” (“Suav Nej cov Koob Hmoov Ntau,” Cov Nkauj Qhuas Vajtswv, zaj 112) thiab sib tham seb qhov uas peb ua li no yuav pab peb thaum peb raug teeb meem. Cov me nyuam yaus tej zaum yuav nyiam kos duab txog cov koob hmoov uas lawv ris Vajtswv txiaj.
-
Lus Qhuab Qhia thiab Kev Khi Lus 105:38–41.Peb yuav ua li cas muab “tswv yim kev thaj yeeb” (nqe 40) thaum lwm tus tsis ua siab zoo los sis ua tsis ncaj rau peb? Peb yuav ua li cas kom ua tau “ib tug chij ntawm kev thaj yeeb” (nqe 39) nyob hauv peb lub tsev?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Suav Nej cov Koob Hmoov Ntau,” Cov Nkauj Qhuas Vajtswv, zaj 112.
Tej lub Suab ntawm Kev Muab txoj Moo Zoo Txum Tim Rov Qab Los
Lub Yeej Xi-oos
Vim lub Yeej Xi-oos tsis tau pab Haiv Neeg Ntseeg rov qab mus nyob hauv lawv thaj av nyob hauv Ciaj Ciam Av Jackson, neeg coob xav tias lawv twb tsis tau ua dab tsi lawm. Tiam sis, cov nyob hauv lub Yeej Xi-oos ntau tus tau xav txog lub sij hawm ntawd thiab pom tias tus Tswv tau pab kom muaj raws li ib lub hom phiaj tseem ceeb nyob hauv lawv lub neej thiab nyob hauv Nws lub nceeg vaj. Nov yog lawv ib txhia zaj lus tim khawv.
Joseph Smith
40 tawm xyoo tom qab lub Yeej Xi-oos, Joseph Young, uas yog ib tug mej zeej hauv lub yeej ntawd, hais tias Joseph Smith tau hais li no:
“Cov kwv tij, nej ib txhia npau taws rau kuv, vim nej tsis tau sib ntaus sib tua hauv Missouri; tiam sis cia kuv qhia nej li no tias, Vajtswv tsis tau xav kom nej sib ntaus. Vim nws txhim tsa tsis tau Nws lub nceeg vaj uas muaj kaum ob leej uas yuav coj txoj moo zoo rau lub ntiaj teb, thiab xya caum tus txiv neej uas yuav raws lawv qab, tsuas yog nws tau xaiv ib co txiv neej uas tau txi lawv lub neej, thiab cov uas tau txi ntau npaum li Anplaham tau txi.
“Tam sim no, tus Tswv muaj nws pawg Kaum Ob thiab nws pawg Xya Caum, thiab yeej yuav hu lwm pawg Xya Caum, cov uas yuav ua kev txi, thiab cov uas tseem tsis tau ua kev txi thiab muab lawv tej khoom tiam los, lawv yuav muab thaum yav tom ntej.”1
Brigham Young
“Thaum peb tuaj txog Missouri tus Tswv tau hais lus rau nws tus tub qhe Joseph thiab hais tias, ‘Kuv twb txais qhov uas nej muab rau kuv,’ thiab peb twb muaj cib fim rov qab mus tsev. Thaum peb tab tom rov qab mus tsev ntau tus phooj ywg nug kuv seb qhov uas tau hu cov txiv neej no kom mus rau lub xeev Missouri ces cia li rov qab mus xwb yuav muaj nqis dab tsi, vim tsis tau ua dab tsi hlo li? ‘Leej twg tau zoo?’ lawv nug kuv. ‘Yog tus Tswv tau txib li no, ces nws lub hom phiaj yog dab tsi?’ … Kuv twb hais rau cov kwv tij ntawd hais tias twb them kuv lawm—them nrog tej paj laum ntau—ua rau kuv txais tshaj qhov kuv txais tau vim kuv txais kev txawj ntse thaum kuv taug kev nrog tus Yaj Saub.”2
Wilford Woodruff
“Kuv twb nyob hauv lub Yeej Xi-oos nrog Vajtswv tus Yaj Saub. Kuv twb pom thaum Vajtswv hais lus rau nws. Kuv twb pom Vajtswv lub hwj chim nrog nws. Kuv pom tias nws yog ib tug Yaj Saub. Tej yam uas Vajtswv lub hwj chim tshwm sim rau nws txog ntiag tug hauj lwm ntawd yeej muaj nqis rau kuv thiab tag nrho txhua tus uas tau txais nws tej lus qhia.”3
“Thaum tau hu cov mej zeej ntawm lub Yeej Xi-oos peb feem coob nyias tsis tau pom nyias lub ntsej muag; peb tsis sib paub thiab peb feem coob tsis tau pom tus yaj saub. Peb twb raug tawg mus nyob ri sua, ib yam li pob kws uas tshau hauv lub yab tshaus, nyob thoob plaws lub teb chaws no. Peb yog txiv neej hluas, thiab Vajtswv tau hu peb thaum ntawd mus muab Xi-oos txhiv dim, thiab tej yam uas peb ua los peb yuav tsum ua raws li kev ntseeg. Peb tau sib sau ua ke los ntawm tej Xeev nyob hauv Kirtland thiab tau mus muab Xi-oos txhiv dim, kom muaj raws li Vajtswv tau txib peb. Vajtswv tau txais peb tej hauj lwm ib yam li Nws tau txais Anplaham tej hauj lwm. Peb twb tau ua ntau yam, txawm yog cov neeg uas tsis ntseeg thiab cov uas tso kev ntseeg tseg tau nug ntau zaus hais tias ‘nej tau ua dab tsi?’ Peb twb kawm tej yam uas peb yeej kawm tsis taus yog tias ua lwm txoj kev. Peb tau muaj lub cib fim saib tus yaj saub lub ntsej muag, thiab peb muaj lub cib fim nrog nws taug kev ib txhiab mais, thiab pom Vajtswv tus ntsuj plig tshoov nws lub siab, thiab pom Yexus Khetos tej kev tshwm sim uas tshwm sim los rau nws thiab pom qhov uas tej kev tshwm sim ntawd muaj lawm raws li nws hais. Thiab nws tau muab ob puas tus txwj laug uas nyob thoob plaws lub teb chaws sib sau ua ke thaum lub sij hawm ntawd ces xa peb mus tshaj tawm Yexus Khetos txoj moo zoo nyob thoob plaws lub ntiaj teb. Yog tias kuv tsis tau koom lub Yeej Xi-oos ces kuv yeej yuav tsis nyob no hnub no [nyob hauv Salt Lake City, ua hauj lwm hauv Pawg Kaum Ob tug Tim Thawj]. … Vim peb mus li ntawd peb twb nkag mus rau hauv lub vaj txiv hmab mus qhia txoj moo zoo, thiab tus Tswv tau txais peb txoj kev ua hauj lwm. Thiab txhua zaus peb ua hauj lwm thiab raug kev tsim txom, feem ntau muaj kev ntshai txog peb lub neej, peb yuav tsum ua hauj lwm thiab ua neej raws li kev ntseeg.”
“Tej yam uas [peb] tau kawm thaum peb taug kev nrog lub Yeej Xi-oos yeej muaj nqis tshaj kub.”
Lub Yeej Xi-oos (lub Yeej Xi-oos Nyob ntawm tus Dej Fishing), los ntawm Judith A. Mehr