“Cuaj Hlis Ntuj 20–26. Lus Qhuab Qhia thiab Kev Khi Lus 106–108: ‘Kom Ntuj Qhib,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Cuaj Hlis Ntuj 20–26. Lus Qhuab Qhia thiab Kev Khi Lus 106–108,” Los, Nrog Kuv Mus—Rau Ib Leeg thiab Tsev Neeg: 2021
Cuaj Hlis Ntuj 20–26
Lus Qhuab Qhia thiab Kev Khi Lus 106–108
“Kom Ntuj Qhib”
Txwj Laug Ulisses Soares qhia hais tias, “Peb yuav tsum muab siab npuab [tus Cawm Seej], nyeem vaj lug kub, zoo siab txog cov vaj lug kub, kawm txog Nws cov lus qhuab qhia, thiab sim ua neej raws li Nws ua.” (“Kuv Yuav Ua Li Cas To Taub?” Ensign los sis Liahona, Tsib Hlis Ntuj 2019, 7). Thaum koj kawm txog Lus Qhuab Qhia thiab Kev Khi Lus 106–8, cia li sau ntawv txog tej yam koj ua tau kom sim ua raws li tej yam tseeb uas koj kawm.
Sau Ntawv txog Koj tej Kev Tshoov Siab
Thawj zaug yus nyeem phau, Lus Qhuab Qhia thiab Kev Khi Lus 107 tej zaum ua rau yus xav tias tshooj no hais txog kev txhim tsa tej luag hauj lwm pov thawj hwj los ua thawj coj hauv tus Tswv lub Koom Txoos xwb. Muaj tseeb tiag, thaum twg tau muab kev tshwm sim no luam tawm, cov mej zeej hauv lub Koom Txoos yeej coob dhau cov thawj coj thiaj tsis muaj peev xwm coj tag nrho. Yog li ntawd qhov uas tau qhia txog tej hauj lwm thiab tej kev lav ris ntawm Thawj Pawg Thawj Tswj Hwm, Pawg Kaum Ob tug Tim Thawj, Pawg Xya Caum, cov npisov, thiab tej pawg thawj tswj hwm los tau pab lawv thiab lawv yeej xav tau. Tiam sis Vajtswv tej lus qhia hauv tshooj 107 los muaj ntau tshaj qhov uas tau qhia txog kev txhim tsa tej luag hauj lwm thiab tej pawg pov thawj hwj. Nyob no tus Tswv qhia peb txog ib tug txheej txheem pov thawj hwj puag thaum ub uas tau “tsim nyob hauv Adas lub caij nyoog” (nqe 41). Txij thaum chiv keeb los lub hom phiaj yog kom Vajtswv cov me nyuam—tsis hais koj los yog—txais tau cov kab ke cawm seej ntawm txoj moo zoo thiab muaj “tag nrho lub koom txoos tej koob hmoov ntawm sab ntsuj plig—kom muaj lub cib fim txais tau tej txuj ci uas neeg tsis paub txog lub nceeg vaj ceeb tsheej, [thiab] kom ntuj qhib rau lawv” (nqe 18–19).
Saib “Restoring the Ancient Order,” Revelations in Context, 208–12.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 106; 108
Tus Tswv qhia, txhawb nqa, thiab pab cov uas Nws hu kom ua hauj lwm rau Nws.
Nyob hauv phau Lus Qhuab Qhia thiab Kev Khi Lus 106 thiab 108, tus Tswv tau hais lus ntuas thiab cog lus rau ob tug mej zeej uas Nws hu kom ua hauj lwm hauv lub Koom Txoos. Tej kev tshwm sim no muaj tej kab lus twg uas txhawb nqa thiab tshoov koj lub siab txog koj txoj kev ua hauj lwm hauv Vajtswv lub nceeg vaj? Nov yog ob kab lus rau koj xav txog:
-
Koj tau txais “hwj chim thiab kev tso siab” li cas kom pab koj “nyob khov kho”? (Lus Qhuab Qhia thiab Kev Khi Lus 106:8).
-
Koj yuav ua li cas kom “xyuam xim zog ntawm txoj kev ua raws li koj tej kev cog lus” los sis koj tej kev khi lus? (Lus Qhuab Qhia thiab Kev Khi Lus 108:3).
Muaj tej kab lus twg ntxiv los ntawm tshooj 106 thiab 108 uas muaj nqis rau koj?
Kuj saib Russell M. Nelson, “Txhawb Pab nrog Vajtswv lub Hwj Chim thiab txoj Cai,” Ensign los sis Liahona, Tsib Hlis Ntuj 2018, 68–75; “Warren Cowdery,” Revelations in Context, 219–23; “‘Wrought Upon’ to Seek a Revelation,” Revelations in Context, 224–28.
Lus Qhuab Qhia thiab Kev Khi Lus 107
Tus Tswv coj Nws lub Koom Txoos dhau los ntawm txoj cai pov thawj hwj.
Thaum koj kawm txog kev muab txoj moo zoo Txum Tim Rov Qab Los, tej zaum koj tau pom tias tus Tswv tsis piav txog cov lus qhuab qhia tag nrho nyob hauv ib zaj lus tshwm sim. Tiam sis, Nws muab tej ntawd tshwm sim “ib nqe lus ntxiv rau ib nqe lus” (Lus Qhuab Qhia thiab Kev Khi Lus 98:12) thaum twg yuav tsum ua li ntawd. Txawm tus Tswv tau qhia txog lub pov thawj hwj thaum xyoo 1829 the Lord had previously given instruction about the priesthood as early as 1829 (saib, ua piv txwv, tshooj 20 thiab 84), Nws tau qhia Haiv Neeg Ntseeg ntxiv thaum xyoo 1835 txog tej luag hauj lwm pov thawj hwj uas yuav tsum muaj kom tswj hwm thiab coj Nws pab yaj uas tab tom loj tuaj.
Thaum koj nyeem txog tej luag hauj lwm pov thawj hwj no, cia li xav seb koj yuav ua li cas kom txhawb nqa cov uas ua hauj lwm li no los ntawm koj “txoj kev tso siab, kev ntseeg, thiab kev thov Vajtswv” (Lus Qhuab Qhia thiab Kev Khi Lus 107:22).
Lus Qhuab Qhia thiab Kev Khi Lus 107:1–20
Cov kab ke pov thawj hwj muab cov koob hmoov ntawm sab ntsuj plig thiab sab cev nqaij daim tawv rau tag nrho Leej Txiv Saum Ntuj Ceeb Tsheej cov me nyuam.
Txwj Laug Neil L. Andersen qhia hais tias: “Lub pov thawj hwj yog lub hwj chim thiab txoj cai ntawm Vajtswv uas Nws muab kom cawm thiab foom koob hmoov rau txhua tus—txiv neej, poj niam, thiab me nyuam. … Thaum peb tsim nyog, cov kab ke ntawm lub pov thawj hwj txhawb nqa peb lub neej hauv lub ntiaj teb thiab npaj peb txais tau Vajtswv tej kev cog lus hauv lub neej tom ntej” (“Lub Hwj Chim ntawm lub Pov Thawj Hwj,” Ensign los sis Liahona, Nov. 2013, 92). Thaum koj nyeem Lus Qhuab Qhia thiab Kev Khi Lus 107:1–20 (qhov tseem ceeb saib nqe 18–20) thiab Txwj Laug Andersen zaj lus, cia li sau ntawv txog tej kev tshoov siab uas koj txais txog qhov uas Vajtswv lub hwj chim pab koj lub neej hauv lub ntiaj teb no thiab pab koj npaj rau txoj sia nyob mus ib txhis. Koj ua dab tsi kom koj—thiab lwm tus—txais tau cov koob hmoov ntawd?
Kuj saib Lus Qhuab Qhia thiab Kev Khi Lus 84:19–27; Dallin H. Oaks, “Cov Yawm Sij thiab txoj Cai ntawm lub Pov Thawj Hwj,” Ensign los sis Liahona, Tsib Hlis Ntuj 2014, 49–52.
Lus Qhuab Qhia thiab Kev Khi Lus 107:41–57
Lub pov thawj hwj ua rau txhua tsev neeg tau koob hmoov.
Adas twb xav kom nws cov xeeb leej xeeb ntxwv tau koob hmoov los ntawm lub pov thawj hwj. Nws tau txais tej kev cog lus twg? (saib nqe 42, 55). Thaum koj nyeem txog tej yam uas Adas tau ua, cia li xav seb koj xav kom koj tsev neeg muaj los ntawm lub pov thawj hwj cov koob hmoov. Koj txais kev tshoov siab twg kom pab koj tsev neeg txais cov koob hmoov no?
Adas Foom Koob Hmoov rau Nws cov Xeeb Ntxwv, los ntawm Clark Kelley Price
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 106:6.Peb tsev neeg yuav ua li cas kom muaj “kev xyiv fab nyob saum ntuj ceeb tsheej”?
-
Lus Qhuab Qhia thiab Kev Khi Lus 107:22.Peb yuav ua li cas kom txhawb nqa peb cov thawj coj “los ntawm txoj kev tso siab, kev ntseeg, thiab kev thov Vajtswv”?
-
Lus Qhuab Qhia thiab Kev Khi Lus 107:27–31, 85.Tej ntsiab cai uas coj lub Koom Txoos tej pawg sab laj kuj pab tau peb thaum peb sab laj ua ke hauv peb tsev neeg. Peb yuav siv tej ntsiab cai twg hauv tej nqe no thaum peb muaj tsev neeg kev sab laj? (Saib M. Russell Ballard, “Tsev Neeg Kev Sab Laj,” Ensign los sis Liahona, Tsib Hlis Ntuj 2016, 63–65.)
-
Lus Qhuab Qhia thiab Kev Khi Lus 107:99–100.Muab ib tug hauv nej tsev neeg ib daim ntawv uas qhia kom ua ib txoj hauj lwm hauv tsev, thiab hais kom nws xaiv seb nws yuav ua txoj hauj lwm ntawd li cas: rau siab ua, tub nkeeg ua, los sis tsis txhob nyeem tej lus qhia. Cia nej tsev neeg saib nws ua txoj hauj lwm ntawd thiab twv seb nws twb xaiv ua txoj hauj lwm ntawd li cas. Ces cia lwm tus hauv nej tsev neeg ua ib yam thiab. Vim li cas tus Tswv xav kom peb kawm peb tej hauj lwm thiab rau siab ntsoov ua tej ntawd? (Saib Becky Craven, “Ua Tib Zoo los sis Lam Tau Lam Ua,” Ensign los sis Liahona, Tsib Hlis Ntuj 2019, 9–11.)
-
Lus Qhuab Qhia thiab Kev Khi Lus 108:7.Peb yuav ua li cas kom ib leeg txhawb nqa ib leeg nyob hauv tag nrho peb tej kev sib tham? thaum peb thov Vajtswv? nyob hauv tag nrho peb tej kev qhuab ntuas? nyob hauv txhua yam uas peb ua? Tej zaum nej tsev neeg yuav xav xaiv ib yam rau nej ua tau zoo dua.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Los, Mloog Ib tug Yaj Saub lub Suab,” Cov Nkauj Qhuas Vajtswv, zaj 9.
Kev Kawm Zoo Dua Ntxiv ntawm Yus Ib Leeg
Sau ntawv txog koj tej kev tshoov siab. Thaum twg koj txais kev tshoov siab los ntawm sab ntsuj plig, cia li sau ntawv txog tej ntawd. Thaum koj ua li ntawd, koj qhia tus Tswv tias koj saib Nws tej lus qhia rau nqi. (Saib Teaching in the Savior’s Way, 12, 30.)
Mekhixedes Foom Koob Hmoov rau Anplas, los ntawm Walter Rane