“Cuaj Hlis Ntuj 6–12. Lus Qhuab Qhia thiab Kev Khi Lus 98–101: ‘Cia Li Ua Siab Tus thiab Paub tias Kuv Yog Vajtswv,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)

“Cuaj Hlis Ntuj 6–12. Lus Qhuab Qhia thiab Kev Khi Lus 98–101,” Los, Nrog Kuv Mus—Rau Ib Leeg thiab Tsev Neeg: 2021

Daim Duab

Haiv Neeg Ntseeg khiav kom dim ib pab neeg phem

C. C. A. Christensen (1831–1912), Haiv Neeg Ntseeg Raug Ntiab Tawm Ciaj Ciam Av Jackson, Missouri, c. 1878, kos duab rau ntaub paj, 77 ¼ × 113 yas tes. Brigham Young University Museum of Art, C. C. A. Christensen cov me nyuam xeeb ntxwv muab ua khoom plig, 1970

Cuaj Hlis Ntuj 6–12

Lus Qhuab Qhia thiab Kev Khi Lus 98–101

“Cia Li Ua Siab Tus thiab Paub tias Kuv Yog Vajtswv”

Thaum koj nyeem phau Lus Qhuab Qhia thiab Kev Khi Lus 98–101, tsom ntsoov rau tej kev xav thiab tej kev tshoov siab uas los rau koj. Qhov uas koj ua raws li tej ntawd yuav pab koj li cas kom koj hloov los ua neeg zoo li Vajtswv xav kom koj ua?

Sau Ntawv txog Koj tej Kev Tshoov Siab

Thaum tej xyoo 1830, Haiv Neeg Ntseeg yeej xav hais tias Independence, Missouri, yog thaj av uas cog lus cia tiag tiag. Lub zos no yog “qhov chaw hauv plawv” ntawm Xi-oos (saib Lus Qhuab Qhia thiab Kev Khi Lus 57:3)—Vajtswv lub nroog hauv lub ntiaj teb—uas lawv ua kev txi ntau heev kom ua tau. Lawv xav tias qhov uas Tsoom Haiv Neeg Ntseeg tab tom sib sau ua ke nyob ntawd yeej yog ib lub sij hawm zoo kawg nkaus thiab zoo siab heev ua ntej tus Tswv txoj Kev Los Zaum Ob. Tiam sis cov neeg zej zog nyob ntawd twb tsis xav li ntawd. Lawv tsis ntseeg qhov uas Tsoom Haiv Neeg Ntseeg xav tias Vajtswv tau muab thaj av no rau lawv, thiab lawv tsis nyiam tej xwm txheej ntawm tsoom fwv, nyiaj txiag, thiab kev sib raug zoo uas muaj thaum neeg coob los ntawm ib txoj kev teev ntuj tsiv los nyob hauv ib qho chaw sai sai heev. Tsis ntev ces kev txhawj xeeb xwb los pauv ua kev hem, thiab kev hem los pauv ua kev tsim txom thiab kev ua lim hiam. Thaum lub Xya Hli Ntuj 1833, lub Koom Txoos qhov chaw luam ntawv raug puas tsuaj, thiab thaum lub Kaum Ib Hlis Ntuj, Tsoom Haiv Neeg Ntseeg yuav tsum tso lawv tej tsev tseg nyob hauv Ciaj Ciam Av Jackson, Missouri.

Joseph Smith tau nyob deb li 800 tawm mais nyob hauv Kirtland, thiab tsis tau hnov xov xwm no mus txog thaum ob peb lim tiam tom qab ntawd. Tiam sis tus Tswv yeej paub tias lawv raug li cas, thiab Nws tau qhia tej ntsiab cai txog kev kaj siab lug thiab kev txhawb nqa rau Nws tus Yaj Saub uas yuav nplij Haiv Neeg Ntseeg lub siab—tej lub ntsiab cai uas yuav pab peb thiab thaum peb raug kev tsim txom, thaum tsis muaj raws li peb xav ua ncaj ncees, los sis thaum peb yuav tsum nco ntsoov tias tej yam uas peb raug txhua hnub los thaum kawg “yuav koom ua ke los pab [peb]” (Lus Qhuab Qhia thiab Kev Khi Lus 98:3).

Saib Saints, 1:171–93; “Waiting for the Word of the Lord,” Revelations in Context, 196–201.

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 98:1–3, 11–14; 101:1–16

Tej yam uas sim kuv lub siab yuav koom ua ke los pab kuv.

Muaj tej kev txom nyem hauv lub neej no uas peb raug vim peb tau xaiv tsis yog lawm. Muaj tej kev txom nyem uas twb yog vim lwm tus xaiv tsis yog. Thiab tej lub sij hawm peb liam tsis tau leej twg—muaj tej xwm txheej phem xwb. Txawm yog li cas los, kev nyuaj siab los pab tau peb ua raws li Vajtswv tej lub hom phiaj. Thaum koj nyeem tej yam uas tus Tswv hais txog Tsoom Haiv Neeg Ntseeg tej kev txom nyem nyob hauv Lus Qhuab Qhia thiab Kev Khi Lus 98:1–3, 11–14 thiab 101:1–16, koj kawm dab tsi uas yuav pab koj thaum koj raug kev sim siab? Tej nqe no yuav pab koj li cas thaum koj xav txog koj tej teeb meem? Cia li xav seb koj tej kev sim siab tau koom ua ke pab koj li cas thiab tau pab koj ua raws li Vajtswv tej lub hom phiaj hauv koj lub neej.

Kuj saib 2 Nifais 2:2; Lus Qhuab Qhia thiab Kev Khi Lus 90:24.

Lus Qhuab Qhia thiab Kev Khi Lus 98:23–48

Tus Tswv xav kom kuv nrhiav kev thaj yeeb raws li Nws txoj kev.

Tsis yog txhua yam nyob hauv phau Lus Qhuab Qhia thiab Kev Khi Lus 98:23–48 yuav hais txog koj txoj kev sib raug zoo nrog lwm tus, tiam sis koj kawm tej ntsiab cai twg uas pab tau koj thaum lwm tus ua phem rau koj? Tej zaum yuav pab koj yog koj sau lub cim rau tej lus los sis tej kab lus uas piav txog qhov uas tus Tswv xav kom Haiv Neeg Ntseeg ua li cas thaum lawv raug tsim txom nyob hauv Missouri.

Kuj saib Jeffrey R. Holland, “Txhawb Pab Los ntawm Kev Rov Qab Sib Raug Zoo,” Ensign los sis Liahona, Kaum Ib Hlis Ntuj 2018, 77–79.

Tej qhov los ntawm Khetos thiab tus Nom Tswv Hluas, los ntawm Heinrich Hofmann

Lus Qhuab Qhia thiab Kev Khi Lus 100

Tus Tswv saib xyuas cov uas ua hauj lwm rau Nws.

Ob peb lim tiam tom qab Joseph kawm txog kev tsim txom uas Haiv Neeg Ntseeg raug hauv Missouri, ib tug neeg uas tau hloov siab los ntseeg tsis ntev tas los thov kom Joseph nrog nws mus pem Canada kom qhia txoj moo zoo rau nws cov tub. Joseph pom zoo ua li ntawd, tiam sis nws txhawj txog nws tsev neeg, qhov tseem ceeb yog vim nws tsev neeg thiab lub Koom Txoos raug tsim txom thiab muaj neeg hem lawv. Thaum Joseph thiab nws tus khub, Sidney Rigdon, mus pem Canada, nkawd tau thov Vajtswv kom nplij nkawd lub siab thiab tshooj 100 yog tus Tswv tej lus teb nkawd. Koj kawm dab tsi nyob hauv tus Tswv tej lus uas tej zaum tau nplij nkawd lub siab thiab tau pab nkawd?

Tej zaum koj kuj muaj tej lub sij hawm thaum koj txhawj txog koj tej hauj lwm hauv lub Koom Txoos thiab koj txhawj txog koj tsev neeg. Tus Tswv tej lus nyob hauv tshooj 100 yuav pab koj li cas thaum koj raug xwm txheej li no?

Kuj saib “A Mission to Canada,” Revelations in Context, 202–7.

Lus Qhuab Qhia thiab Kev Khi Lus 101:43–65

Kev ua raws li Vajtswv cov lus ntuas yuav pab kuv muaj kev nyab xeeb.

Zaj paj lug nyob hauv Lus Qhuab Qhia thiab Kev Khi Lus 101:43–62 los tus Tswv tau qhia kom piav vim li cas Nws tau cia Haiv Neeg Ntseeg raug ntiab tawm ntawm Xi-oos. Thaum koj nyeem tej nqe no, koj puas pom tias koj tus kheej thiab cov tub qhe hauv zaj paj lug no zoo sib xws? Tej zaum koj yuav xav nug koj tus kheej: Puas muaj sij hawm thaum kuv tsis ntseeg Vajtswv tej lus txib? Qhov uas kuv tsis ntseeg los sis tsis txaus siab ua yuav ua li cas kom “tus yeeb ncuab” muaj hwj chim hauv kuv lub neej? Kuv yuav ua li cas kom qhia Vajtswv tias kuv “txaus siab cia tus Tswv coj [kuv] ua ib txoj kev yog thiab ncaj rau [kuv] txoj kev cawm seej”? (saib nqe 63–65).

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 98:16, 39–40.Muaj dab tsi nyob hauv tej nqe no uas yuav pab peb nyob kaj siab lug nrog peb tsev neeg? Tej zaum nej yuav xav hu ib zaj nkauj txog kev kaj saib lug los sis kev zam txim, xws li “Truth Reflects upon Our Senses” (Hymns, zaj 273). Tej zaum cov me nyuam yaus yuav nyiam ua yeeb yam txog kev zam txim.

Lus Qhuab Qhia thiab Kev Khi Lus 99.Thaum Vajtswv tau hu John Murdock ncaim nws tsev neeg mus “plov meej … txoj moo zoo uas kav ib txhis” (nqe 1), nws twb tau mus ua tub txib tau ib xyoo rau ib qho chaw nyuaj heev hauv Missouri lawm es nyuam qhuav rov qab los (saib “John Murdock’s Missions to Missouri,” Revelations in Context, 87–89). Peb kawm dab tsi nyob hauv tshooj 99 uas tej zaum tau pab los yog tau txhawb nqa Tij Laug Murdock? Tus Tswv xav qhia dab tsi rau peb los ntawm kev tshwm sim no?

Lus Qhuab Qhia thiab Kev Khi Lus 100:16; 101:3–5, 18.Tom qab nej nyeem tej nqe no, tej zaum nej yuav xav sib tham txog qhov uas cov kws ntaus hlau yuav tsum ua rau cov hlau kub kub heev thiaj li lim tau tej yam tsis huv ces muab kho thaum lawv ntaus ntau zaus (saib video “The Refiner’s Fire” nyob ntawm ChurchofJesusChrist.org). Tej zaum nej yuav xav kawm ua ke txog tej yam, xws li dej los sis ntsev, uas ua rau lwm yam dawb huv. Tej zaum nej tsev neeg yuav xav muab ib yam dab tsi ntxuav kom dawb huv. Vim li cas peb xav ua neeg siab dawb? Tej zaj no qhia dab tsi rau peb txog qhov uas peb tej kev sim siab yuav pab peb hloov los ua “ib haiv neeg siab dawb”?

Lus Qhuab Qhia thiab Kev Khi Lus 101:22–36.Nej xav tias tej nqe no tau pab Haiv Neeg Ntseeg li cas thaum lawv raug kev tsim txom? Tej nqe no yuav pab li cas thaum tib neeg ntshai txog tej xwm txheej uas nyob hauv peb lub ntiaj teb niaj hnub no?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Help Me, Dear Father,” Children’s Songbook, 99.

Kev Kawm Zoo Dua Ntxiv ntawm Yus Ib Leeg

Nrhiav kom paub tej ntsiab cai. Txwj Laug Richard G. Scott qhia hais tias: “Thaum koj nrhiav kev txawj ntse ntawm sab ntsuj plig, cia li nrhiav tej ntsiab cai. … Tej ntsiab cai yog qhov tseeb tiag, uas yus siv rau ntau yam xwm txheej los tau” (“Acquiring Spiritual Knowledge,” Ensign, Kaum Ib Hlis Ntuj 1993, 86).