Lub Tuam Tsev Kirtland

Lub Tuam Tsev Kirtland, los ntawm Al Rounds

Yim Hli Ntuj 30–Cuaj Hlis Ntuj 5

Lus Qhuab Qhia thiab Kev Khi Lus 94–97

“Rau txoj Kev Cawm Seej ntawm Xi-oos”

Ua rau koj xav txog tej ntsiab cai thiab cov lus qhuab qhia twg thaum koj kawm phau Lus Qhuab Qhia thiab Kev Khi Lus 94–97? Ua tib zoo sau ntawv txog koj tej kev tshoov siab.

Sau Ntawv txog Koj tej Kev Tshoov Siab

Thaum tus Tswv txib Mauxes ua ib lub tuam tsev ntaub, Nws qhia Mauxes tias nws “yuav tsum ua txhua yam raws li tej qauv uas [tus Tswv] qhia rau [nws] saum roob” (Henplais 8:5; kuj saib Khiav Dim 25:8–9). Lub tuam tsev ntaub nyob hauv plawv ntawm Ixayees lub yeej hauv roob moj sab qhua (saib Teev Npe 2:1–2). Tom qab ntawd, Vajtswv tau txib Xalumoos thiab nws cov neeg ua ib lub tuam tsev raws li tus qauv uas Nws tau qhia rau lawv (saib 1 Xwm Txheej Vaj Ntxwv 28:12, 19).

Thaum tus Tswv muab Nws txoj moo zoo txum tim rov qab los, Nws tau txib Joseph Smith ua tej lub tuam tsev raws li tus qauv uas Nws tau tshwm sim. Tus Tswv hais tias, “Cia li ua lub tsev, tsis yog raws li neeg ntiaj teb ua. Cia li ua lub tsev raws li tus qauv uas kuv yuav muab qhia los rau nej” (Lus Qhuab Qhia thiab Kev Khi Lus 95:13–14; kuj saib 97:10). Ib yam li lub tuam tsev ntaub nyob hauv roob moj sab qhua, lub tuam tsev yeej yog ib qhov chaw tseem ceeb nyob hauv Kirtland lub plawv (saib Lus Qhuab Qhia thiab Kev Khi Lus 94:1).

Niaj hnub no tus Tswv tej tsev nyob thoob plaws lub ntiaj teb. Txawm yog tej lub tuam tsev no tsis nyob hauv plawv ntawm peb tej nroog los, tej lub tuam tsev yeej nyob tau hauv plawv ntawm peb lub neej. Txawm yog txhua lub tuam tsev nyias txawv nyias, nyob haud peb kawm txog Vajtswv tus txheej txheem—ib tug txheej txheem uas pab peb rov qab mus nyob ntawm Vajtswv lub xub ntiag. Cov kab ke uas dawb ceev thiab nyob mus ib txhis pab peb txhawb nqa peb lub neej thiab ntxiv dag zog rau peb tsev neeg “tsis yog raws li neeg ntiaj teb ua” tiam sis yog raws li tus txheej txheem uas Vajtswv qhia rau peb.

Saib Saints, 1:169–70; “A House for Our God,” Revelations in Context, 165–73.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 94; 97:15–17

Tus Tswv nyob tau nrog kuv hauv kuv lub neej txhua hnub.

Tej lus qhia uas nyob hauv Lus Qhuab Qhia thiab Kev Khi Lus 94 thiab tshooj 97 los twb muab thaum tib hnub—Yim Hli Ntuj 2, 1833. Tshooj 97 los ib feem hais txog ib lub tuam tsev uas tau npaj ua hauv Ciaj Ciam Av Jackson, lub xeev Missouri, es tshooj 94 hais txog tej tsev tuav hauj lwm nyob hauv Kirtland, Ohio. Tej zaum koj yuav pom tias muaj tej yam zoo sib xws uas tus Tswv tau hais txog tej lub tsev no (saib Lus Qhuab Qhia thiab Kev Khi Lus 94:2–12; 97:10–17). Thaum koj xav txog tej lus qhia no, cia li xav seb koj yuav ua li cas kom muaj tus Tswv lub yeeb koob thiab nyob ntawm Nws lub xub ntiag ntxiv, nyob hauv lub Koom Txoos tej tsev thiab nyob hauv koj lub neej niaj hnub.

Lus Qhuab Qhia thiab Kev Khi Lus 95

Tus Tswv qhuab ntuas cov uas Nws hlub.

Twb dhau tsib lub hlis tom qab lub Ib Hlis Ntuj xyoo 1833, thaum tus Tswv tau txib Tsoom Haiv Neeg Ntseeg nyob hauv Kirtland ua Vajtswv ib lub tsev thiab ua ib lub rooj txoos ua kev cai (saib Lus Qhuab Qhia thiab Kev Khi Lus 88:117–19). Thaum lawv tau txais kev tshwm sim uas nyob hauv tshooj 95 lawm thaum lub Rau Hli Ntuj 1833, lawv tseem tsis tau ua raws li txoj lus txib ntawd. Koj kawm dab tsi los ntawm tus Tswv txoj kev qhuab ntuas Tsoom Haiv Neeg Ntseeg nyob hauv kev tshwm sim no? Puas muaj tej lus txib los sis tej lus ntuas uas koj tseem tsis tau ua? Koj txais kev tshoov siab ua dab tsi?

Kuj saib D. Todd Christofferson, “Kuv Yeej Qhuab Ntuas thiab Cem Txhua Tus uas Kuv Hlub,” Ensign los sis Liahona, Tsib Hlis Ntuj 2011, 97–100.

Lus Qhuab Qhia thiab Kev Khi Lus 95:8, 11–17; 97:10–17

Nyob hauv lub tuam tsev Vajtswv foom koob hmoov rau Nws cov neeg.

Tom qab lawv raug qhuab ntuas vim lawv tseem tsis tau ua tus Tswv lub tsev nyob hauv Kirtland, lub Koom Txoos cov thawj coj tau xaiv ib qho chaw nyob hauv ib thaj teb txhuv rau lawv ua lub tuam tsev ntawd. Hyrum Smith, tus Yaj Saub tus tij laug, tau khiav tam sim ntawd mus nqa ib rab liag thiab pib luaj teb. Nws hais tias, “Peb npaj ua tus Tswv lub tsev, thiab kuv mob siab xav ua thawj thawj tug uas yuav pib ua txoj hauj lwm ntawd” (nyob hauv Teachings of Presidents of the Church: Joseph Smith [2007], 271, 273). Cia li xav txog Hyrum txoj kev mob siab thaum koj nyeem phau Lus Qhuab Qhia thiab Kev Khi Lus 95:8, 11–17; 97:10–17. Koj kawm dab tsi uas tshoov koj lub siab kom koj xav txais cov koob hmoov los ntawm lub tuam tsev?

Hyrum Smith tuav ib rab liag

Hyrum Smith Luaj Teb, los ntawm Joseph Brickey

Lus Qhuab Qhia thiab Kev Khi Lus 97:18–28

Xi-oos yog cov uas “muaj lub siab dawb.”

Tus Yaj Saub Joseph Smith hais tias, “Peb lub hom phiaj tseem ceeb tshaj yog kev txhim tsa Xi-oos” (Teachings: Joseph Smith, 186). Tsoom Haiv Neeg Ntseeg hauv tej xyoo 1830 xav tias Xi-oos yog ib qho chaw, yog “Vajtswv lub nroog” tiag tiag (Lus Qhuab Qhia thiab Kev Khi Lus 97:19). Tiam sis nyob hauv kev tshwm sim hauv tshooj 97, tus Tswv tau ua rau lawv xav loj zog. Xi-oos kuj piav txog ib co neeg—“cov muaj lub siab dawb” (nqe 21). Thaum koj nyeem nqe 18–28, cia li xav txog lub ntsiab no thaum koj nyeem lo lus “Xi-oos.” Koj xav tias kev muaj lub siab dawb txhais li cas? Lub tuam tsev pab peb li cas kom muaj “txoj kev cawm seej ntawm Xi-oos”? (nqe 12).

Kuj saib Mauxes 7:18; Gospel Topics, “Zion,” topics.ChurchofJesusChrist.org.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 95:8.Qhov uas peb tau ua raws li tej kev khi lus hauv lub tuam tsev ua li cas ua rau peb muaj “lub hwj chim saum ntuj” nyob hauv peb lub neej? Tej zaum nej tsev neeg yuav xav qhia tias lawv xav li cas txog lub tuam tsev los sis qhia txog tej lub sij hawm thaum twg lawv tau koob hmoov txais “lub hwj chim saum ntuj” thaum lawv teev tiam hauv lub tuam tsev.

Xwv kom pab cov uas npaj nkag hauv lub tuam tsev, tej zaum nej yuav xav saib video, cov duab, thiab tej lus qhia uas nyob ntawm temples.ChurchofJesusChrist.org. Xwv kom pab cov me nyuam kawm txog lub tuam tsev, tej zaum nej yuav xav siv “Your Path to the Temple” (nyob hauv Temples of The Church of Jesus Christ of Latter-day Saints [phau xov xwm tshwj xeeb ntawm Ensign los sis Liahona, Kaum Hli Ntuj 2010], 72–75).

Lus Qhuab Qhia thiab Kev Khi Lus 95:1–11.Peb kawm dab tsi txog kev qhuab ntuas los ntawm tej nqe no? Peb kawm dab tsi txog tus Tswv? Tej yam uas peb kawm no ua rau peb hloov li cas thaum peb txais kev qhuab ntuas los yog peb yuav tsum qhuab ntuas lwm tus?

Lus Qhuab Qhia thiab Kev Khi Lus 97:8.Raws li nqe no hais, peb yuav ua li cas kom tus Tswv “txais yuav” peb? Qhov uas tus Tswv txais yuav peb txawv ntawm qhov uas neeg ntiaj teb txais yuav peb li cas? Qhov uas peb “coj raws li [peb] tej kev khi lus los ntawm kev txi” txhais li cas? Peb tau ua li cas kom ua li no?

Lus Qhuab Qhia thiab Kev Khi Lus 97:10–21.Tus Yaj Saub Joseph Smith qhia hais tias, “Ib qho chaw twg uas ib Tsoom Haiv Neeg Ntseeg los sib sau ua ke thiaj yog Xi-oos, nyob ntawd txhua tus txiv neej [thiab poj niam] ncaj ncees yuav txhim tsa ib qho chaw uas tsis muaj xwm txheej rau nws cov me nyuam” (Teachings: Joseph Smith, 186). Peb yuav ua li cas kom tsa Xi-oos nyob hauv peb tej tsev? Peb nrhiav tau tej ntsiab cai twg hauv phau Lus Qhuab Qhia thiab Kev Khi Lus 97:10–21? Nrog nej tsev neeg ua ke, xaiv ib lub ntsiab cai rau nej tsom ntsoov lub lim tiam no.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “I Love to See the Temple,” Children’s Songbook, 95.

Kev Kawm Zoo Dua Ntxiv ntawm Yus Ib Leeg

Sau ntawv txog koj lub neej. Sau ntawv txog koj lub neej thaum koj tau ua raws li tej ntsiab cai thiab cov lus qhuab qhia uas koj kawm txog. Tej yam uas koj sau no yuav koom nrog koj zaj lus liv xwm thiab foom koob hmoov rau tej tiam neeg thaum yav tom ntej.

kev ua lub Tuam Tsev Kirtland

Kev Ua lub Tuam Tsev Kirtland, los ntawm Walter Rane