“Yim Hli Ntuj 23–29. Lus Qhuab Qhia thiab Kev Khi Lus 93: ‘Txais Tag Nrho tej uas Nws Muaj,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Yim Hli Ntuj 23–29. Lus Qhuab Qhia thiab Kev Khi Lus 93,” Los, Nrog Kuv Mus—Rau Ib Leeg thiab Tsev Neeg: 2021
Kuv Pom Neeg Leej Tub Sawv ntawm Vajtswv Sab Xis, los ntawm Walter Rane
Yim Hli Ntuj 23–29
Lus Qhuab Qhia thiab Kev Khi Lus 93
“Txais Tag Nrho tej uas Nws Muaj”
Lus Qhuab Qhia thiab Kev Khi Lus 93 qhia tias “kev tseeb yog kev paub tej yam uas tab tom muaj, thiab tej yam uas tau muaj lawm, thiab tej yam uas tseem yuav muaj los” (nqe 24). Thaum koj kawm tshooj no, cia li nrhiav tej yam tseeb thiab sau ntawv txog tej yam uas koj kawm. Koj kam ua dab tsi kom txais tau qhov tseeb? (saib nqe 27–28).
Sau Ntawv txog Koj tej Kev Tshoov Siab
Joseph Smith tau qhia hais tias, “Thaum nej nce tus ntaiv, nej yeej yuav tsum pib puag hauv taw tuaj, thiab mam nce ib theem dhau ib theem, mus txog rau saum hau; thiab nws los kuj zoo ib yam nkaus nrog tej ntsiab cai ntawm txoj moo zoo—nej yuav tsum pib nrog thawj qho, thiab mam mus ntxiv kom txog thaum nej kawm tau tag nrho cov ntsiab cai ntawm kev tsa nto” (Teachings of Presidents of the Church: Joseph Smith [2007], 268).
Tej lub sij hawm peb xav tias tus ntaiv uas nce mus rau kev tsa nto yeej siab dhau, tiam sis peb twb yug los muaj peev xwm nce tus ntaiv mus saud. Txawm peb xav tias peb tsis muaj peev xwm li cas los, Leej Txiv Saum Ntuj Ceeb Tsheej thiab Nws Leej Tub pom ib yam uas muaj yeeb koob nyob hauv peb, ib yam uas zoo li Vajtswv. Ib yam li Yexus Khetos “nyob thaum chiv keeb nrog Leej Txiv,” es “[koj] nyob thiab” (Lus Qhuab Qhia thiab Kev Khi Lus 93:21, 23). Ib yam li Nws “tau txais lub hwj chim ntxiv rau lub hwj chim, txog thaum nws tau txais tag nrho,” koj kuj “yuav tau txais lub hwj chim ntxiv rau lub hwj chim” (nqe 13, 20). Txoj moo zoo yeej qhia peb tias Vajtswv zoo li cas tiag, thiab txoj moo zoo kuj qhia peb txog peb tus kheej thiab peb muaj peev xwm hloov los ua neeg zoo li cas. Txawm yog “tus niag phem” ua li cas los (nqe 39)—thiab txawm koj xav tias koj tsis muaj peev xwm li cas los—koj yog Vajtswv tus me nyuam tiag uas muaj peev xwm thiaj li “thaum txog sij hawm [koj yuav tau txais tag nrho tej uas nws muaj” (nqe 19).
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 93
Peb teev tiam Vajtswv Leej Txiv thiab Nws Leej Tub, Yexus Khetos.
Hais txog zaj lus tshwm sim nyob hauv Lus Qhuab Qhia thiab Kev Khi Lus 93, tus Tswv piav hais tias “Kuv muab cov lus hais no rau nej kom nej yuav to taub thiab paub teev tiam, thiab paub hais tias nej teev tiam dab tsi, kom nej yuav los cuag Leej Txiv los ntawm kuv lub npe, thiab thaum txog sij hawm yuav tau txais tag nrho tej uas nws muaj” (nqe 19). Thaum koj kawm txog kev tshwm sim no, cia li sau tej lub cim rau tej yam uas koj kawm txog ob tug uas peb teev tiam: Vajtswv Leej Txiv thiab Nws Leej Tub, Yexus Khetos. Koj kawm dab tsi txog qhov uas peb yuav tsum “teev tiam” Nkawd li cas? qhov uas peb yuav ua li cas kom “los cuag Leej Txiv”?
Tus Yaj Saub Joseph Smith qhia hais tias, “Yog tias tib neeg tsis to taub tias Vajtswv tus cwj pwm zoo li cas, lawv yeej tsis to taub lawv tus kheej” (Teachings: Joseph Smith, 40). Thaum koj kawm txog tus Cawm Seej los ntawm Lus Qhuab Qhia thiab Kev Khi Lus 93, cia li nrhiav tej yam uas koj kawm tau txog koj tus kheej thiab. Piv txwv hais tias, koj kawm dab tsi txog Nws los ntawm nqe 3, 12, 21, and 26? Koj kawm tej yam tseeb twg zoo li ntawd txog koj tus kheej nyob hauv nqe 20, 23, and 28–29? (Kuj saib 1 Yauhas 3:2; 3 Nifais 27:27; Dean M. Davies, “Cov Koob Hmoov ntawm Kev Teev Tiam,” Ensign los sis Liahona, Kaum Ib Hlis Ntuj 2016, 93–95.)
Lus Qhuab Qhia thiab Kev Khi Lus 93:1–39
Vajtswv lub yeeb koob yog txoj kev kaj thiab qhov tseeb.
Tej zaum koj yuav pom tias muaj tej lus yeeb koob, txoj kev kaj, thiab qhov tseeb ntau zaus hauv kev tshwm sim no. Thaum koj kawm nqe 21–39, cia li sau tej yam tseeb uas koj kawm txog yeeb koob, txoj kev kaj, thiab qhov tseeb. Tej yam tseeb no ua li cas tshoov koj lub siab kom koj xav nrhiav txoj kev kaj thiab qhov tseeb ntxiv? Tej yam tseeb no yuav pab koj li cas thaum koj ua neej txhua hnub?
Peb txais txoj kev kaj thiab qhov tseeb thaum peb ua raws li Vajtswv cov lus txib.
Lus Qhuab Qhia thiab Kev Khi Lus 93:40–50
“Kho koj tsev neeg kom muaj kab muaj kev.”
Pib ntawm nqe 40, phau Lus Qhuab Qhia thiab Kev Khi Lus 93 hloov los ntawm kev qhia txog Vajtswv lub yeeb koob thiab peb txoj kev muaj peev xwm hloov los ua neeg zoo li Vajtswv mus los qhia txog kev ua niam tsev txiv tsev thiab kev kho peb tej tsev kom muaj kab muaj kev. Tus Tswv tej lus qhia txog txoj kev kaj, qhov tseeb, thiab yeeb koob nyob hauv nqe 1–39 pab koj li cas kom to taub thiab ua raws li tej lus ntuas uas nyob hauv nqe 40–50?
Kuj saib David A. Bednar, “Rau Siab thiab Mob Siab Dua rau hauv Tsev,” Ensign los sis Liahona, Kaum Ib Hlis Ntuj 2009, 17–20.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 93:2.Yexus Khetos tau ua li cas kom ua “txoj kev kaj tseeb” nyob hauv peb lub neej? Peb puas tau pom Nws txoj Kev Kaj nyob hauv lwm tus nyob ib puag ncig peb?
-
Lus Qhuab Qhia thiab Kev Khi Lus 93:3–29.Kom pab nej tsev neeg sib tham txog tej yam uas lawv kawm txog tus Cawm Seej thiab lawv tus kheej los ntawm tshooj 93 tej zaum nej yuav xav ua si kev sib txuas. Piv txwv hais tias, tej zaum nej yuav xav npaj ib co phaib uas muaj tej nqe los ntawm tshooj 93 uas qhia tej yam tseeb txog tus Cawm Seej (saib nqe 3, 12, 21, 26) thiab ua ib co phaib ntxiv uas qhia tej yam zoo li ntawd txog peb tus kheej (saib nqe 20, 23, 28–29). Nej tsev neeg ib leeg zuj zus yuav xaiv ob daim los ntawm ob pawg, nyeem ob nqe uas sau rau, thiab sim nrhiav tej yam tseeb uas sib txuas ua ke. Tej yam tseeb no ua rau peb xav li cas txog tus Cawm Seej thiab peb tus kheej?
-
Lus Qhuab Qhia thiab Kev Khi Lus 93:12–13, 20.Qhov uas hais tias yus “txais lub hwj chim ntxiv rau lub hwj chim” txhais li cas? (nqe 12–13). Tej nqe no qhia dab tsi txog peb txoj kev vam meej thiab txoj kev kawm? Qhov uas peb paub qhov no ua rau peb coj zoo li cas rau lwm tus—thiab rau peb tus kheej?
-
Lus Qhuab Qhia thiab Kev Khi Lus 93:24.Cia li nyeem lub ntsiab ntawm qhov tseeb los ntawm nqe no, thiab caw nej tsev neeg hais ib yam los ntawm tshooj 93 uas lawv xav tias yog ib yam tseeb uas muaj nqis tshaj plaws. Peb kawm dab tsi ntxiv txog qhov tseeb los ntawm Yauhas 14:6; Yakhauj 4:13; los sis ib zaj nkauj qhuas Vajtswv txog qhov tseeb, xws li “Kev Tseeb Yog Dab Tsi?” (Cov Nkauj Qhuas Vajtswv, zaj 126).
-
Lus Qhuab Qhia thiab Kev Khi Lus 93:40.Tej zaum thaum nej nyeem nqe no, nej tsev neeg yuav xav hu ib zaj nkauj txog kev kawm hauv tsev, xws li “Qhia Kuv Los Ua Raws Li Vajtswv Txoj Lus” (Cov Nkauj Qhuas Vajtswv, 140). Tej zaum cov me nyuam yaus yuav nyiam piav tes thaum lawv hu nkauj tej lus ntawd. Nej xav ua dab tsi kom muaj “txoj kev kaj thiab qhov tseeb” ntxiv nyob hauv nej lub tsev?
-
Lus Qhuab Qhia thiab Kev Khi Lus 93:41–50.Sib tham ua ke nrog nej tsev neeg txog tej yam uas “tsis yog nyob hauv [nej] tsev neeg.” Peb yuav ua dab tsi kom “kho [peb] tsev neeg kom muaj kab muaj kev”? (nqe 43–44).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Kuv Yog Vajtswv Me Nyuam,” Children’s Songbook, 2–3.
Kev Kawm Zoo Dua Ntxiv
Nyeem tshaj ib zaug xwb. Tej zaum koj yuav xav nyeem Lus Qhuab Qhia thiab Kev Khi Lus 93 ntau tshaj ib zaug lub lim tiam no. Txhua zaus koj nyeem, tej zaum koj yuav kawm tej yam tseeb ntxiv uas koj xav tias muaj nqis los sis tshoov koj lub siab ua ib yam tshiab. Qhov uas koj nyeem ob peb zaug kuj yuav ua rau koj muaj cib fim xav hauv koj lub siab ntxiv.
Txoj Kev Kaj thiab Qhov Tseeb, los ntawm Simon Dewey