chav uas muaj rooj zaum

Yim Hli Ntuj 9–15

Lus Qhuab Qhia thiab Kev Khi Lus 88

“Tsa … Ib lub Tsev rau Vajtswv”

Thawj Tswj Hwm Russell M. Nelson hais tias, “Kuv cog lus hais tias thaum nej rau siab ntso kho nej lub tsev kom ua lub hauv paus rau txoj kev kawm txoj moo zoo, … dab ntxwg nyoog lub hwj chim hauv nej lub neej thiab nej lub tsev yuav tsawg zuj zus mus” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Ensign los sis Liahona, Kaum Ib Hlis Ntuj 2018, 113).

Sau Ntawv txog Koj tej Kev Tshoov Siab

Muaj tej lub sij hawm uas tus Tswv cia peb saib ib qho me ntsis ntawm Nws “lub yeeb haum thiab lub hwj chim” uas tsis muaj qhov kawg (Lus Qhuab Qhia thiab Kev Khi Lus 88:47) thaum Nws muab kev tshwm sim rau Nws cov yaj saub. Lus Qhuab Qhia thiab Kev Khi Lus 88 yog kev tshwm sim zoo il ntawd—yog ib zaj txog txoj kev kaj thiab lub yeeb koob thiab tej lub nceeg vaj uas ua rau peb xav tias tej yam uas peb txhawj txog lub ntiaj teb no yeej tsis tseem ceeb hlo li. Txawm peb tsis to taub tag nrho tej yam uas tus Tswv qhia peb los, peb txawj paub tias kev nyob mus ib txhis muaj ntau yam uas peb tsis txawj to taub tam sim no. Tus Tswv tsis tau hais txog tej txuj ci uas neeg tsis paub rau peb kom peb ntshai los sis ua rau peb xav tias peb tsis tseem ceeb. Muaj tseeb tiag, Nws tau cog lus tias, “Yuav muaj ib hnub nej yuav thoob tsib to nrog Vajtswv” (nqe 49; ntxiv qhov uas ntawv qaij). Tej zaum yog lub hom phiaj no uas ua rau tus Tswv yaum Nws Haiv Neeg Ntseeg nyob hauv Kirtland kom tsa cov Yaj Saub lub Koom Haum Kawm. Nws hais tias, “Kho nej tus kheej. Npaj txhua yam uas yuav tsum muaj; thiab tsa … ib lub tsev rau Vajtswv” (nqe 119). Vim nyob hauv Vajtswv lub tsev dawb huv—thiab nyob hauv peb tej tsev—Nws yeej txawj pab peb pom deb tshaj li lub ntiaj teb no, “nws yuav tshwm nws lub ntsej muag los rau [peb]” thiab npaj peb “thev taus lub yeeb koob xilethi-aus” (nqe 68, 22).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 88

Tus Tswv muab kev cia siab thiab kev kaj siab lug rau peb.

Ob peb hnub tom qab tus Tswv ceeb toom hais tias yuav muaj kev tsov rog “muaj nplua mias rau txhua haiv neeg” (Lus Qhuab Qhia thiab Kev Khi Lus 87:2), tus Tswv tau muab kev tshwm sim rau Joseph Smith hu ua “‘rev nplooj ntoo txiv roj’ … de ntawm tsob Ntoo cawm neeg txoj sia hauv lub Vaj Edees los, uas yog tus Tswv tsab xov kaj siab los rau peb” (Lus Qhuab Qhia thiab Kev Khi Lus 88, zaj piav txog tshooj). Ua li cas kev tshwm sim no zoo li rev nplooj ntoo txiv roj, uas yog ib lub cim txog kev thaj yeeb? (kuj saib Chiv Keeb 8:11). Tej yam tseeb twg hauv tshooj no pab koj muaj kev cia siab thiab kev kaj siab lug uas los ntawm Khetos?

Lus Qhuab Qhia thiab Kev Khi Lus 88:6–67

Txoj kev kaj thiab kev cai yeej los ntawm Yexus Khetos.

Cov lus txoj kev kaj thiab kev cai los hais ntau zaus nyob hauv tshooj 88. Twb tau siv tej lus no hauv lwm nqe vaj lug kub kom piav txog Yexus Khetos thiab Nws txoj moo zoo (ua piv txwv, saib Yaxayas 60:19; Yauhas 1:1–9; 3 Nifais 15:9). Sau lub cim rau tej nqe uas koj nrhiav tau tej lus no nyob hauv Lus Qhuab Qhia thiab Kev Khi Lus 88:6–67, thiab sau txog tej yam uas koj kawm txog tus Cawm Seej, txoj kev kaj, thiab kev cai. Tej zaum tej nqe no yuav tshoov koj lub siab kom koj hloov koj lub neej koj thiaj li yuav rau siab ntseeg ntxiv txais txoj kev kaj thiab ua raws li “Khetos txoj kev cai” (nqe 21).

Kuj saib Sharon Eubank, “Tus Khetos: Txoj Kev Kaj uas Ci hauv Kev Tsaus Ntuj,” Ensign los sis Liahona, Tsib Hlis Ntuj 2019, 73–76.

tsev neeg kawm vaj lug kub ua ke

Cov vaj lug kub muaj Khetos cov lus.

Lus Qhuab Qhia thiab Kev Khi Lus 88:62–126

Npaj txhua yam uas yuav tsum muaj.

Zoo li peb nyob hauv ib lub caij nyoog thaum tus Tswv piav txog thaum “txhua yam yuav ntxhov hnyo; thiab muaj tseeb, neeg lub siab yuav poob tag” (Lus Qhuab Qhia thiab Kev Khi Lus 88:91). Thaum koj nyeem nqe 62–126, cia li xav seb tus Tswv tej lus ntuas yuav pab koj li cas kom npaj rau tus Cawm Seej txoj Kev Los Zaum Ob. Nov yog tej lus nug rau koj xav txog:

Nqe 62–76.Thaum koj xav txog tej nqe no, koj txais kev tshoov siab twg kom koj “txav los nyob ze” Vajtswv? (nqe 63). Xav txog tus Tswv txoj kev cai kom “hloov nej tus kheej ua dawb huv” txhais li cas rau koj (nqe 68).

Nqe 77–80, 118–26.Vim li cas “nej yuav tsum to taub” tej ntsiab lus ntawm cov lus qhuab qhia thiab tej yam ntawm lub ntiaj teb no? (nqe 78). Koj ua dab tsi kom ua raws li tej lus ntuas kom “nrhiav kev kawm”? (nqe 118). Koj xav tias kev kawm “los ntawm kev kawm ntawv thiab los ntawm kev ntseeg” txhais li cas?

Nqe 81–116.Cia li xav txog tej lus qhia tej yuav muaj los yav tom ntej txog tus Cawm Seej txoj Kev Los Zaum ob nyob hauv tej nqe no. Koj xav tias yog vim li cas tus Tswv xav kom koj paub txog tej no?

Nqe 117–26.Nyeem tej nqe no thaum koj xav txog lub tuam tsev; koj kawm dab tsi nyob hauv tej nqe no uas yuav pab koj npaj nkag mus hauv tus Tswv lub tsev?

Kuj saib D. Todd Christofferson, “Npaj rau tus Tswv Txoj Kev Rov Qab Los,” Ensign los sis Liahona, Tsib Hlis Ntuj 2019, 81–84; David A. Bednar, “Seek Learning by Faith,” Ensign, Cuaj Hlis Ntuj 2007, 61–68; Saints, 1:164–66; “A School and an Endowment,” Revelations in Context, 174–82.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 88:14–33, 95–101.Peb kawm dab tsi txog txoj Kev Sawv Rov Los los ntawm tej nqe no? Tej yam tseeb no yuav ua li cas hloov tej yam uas peb xaiv?

Lus Qhuab Qhia thiab Kev Khi Lus 88:33.Tej zaum nej yuav pib sib tham txog nqe no yog nej hais nej tsev neeg kom sib tham txog tej txiaj ntsim uas lawv tau txais—tej uas lawv tau txais nrog kev xyiv fab thiab tej uas tsis txais nrog kev xyiv fab. Peb yuav ua li cas kom qhia tus Tswv tias peb zoo siab txais lub txiaj ntsim uas yog lub yeeb koob xilethi-aus uas Nws muab rau peb? Peb yuav ua li cas kom zoo siab rau “tus uas muab lub txiaj ntsim ntawd”?

Lus Qhuab Qhia thiab Kev Khi Lus 88:63, 68.Tej nqe no muaj tej lus uas tej zaum yuav tshoov nej lub siab kom xav txog tej kev uas nej qhia tau tej ntsiab lus hauv tej nqe no rau nej cov me nyuam. Piv txwv hais tias, tej zaum nej yuav xav ua si muab khoom zais cia kom nej sib tham txog cov lus “rau siab ntso nrhiav kuv ces nej yuav ntsib kuv” (nqe 63; ntxhiv qhov uas ntawv qaij).

Lus Qhuab Qhia thiab Kev Khi Lus 88:81.Nrog nej tsev neeg, nrhiav tej daim ceeb toom nyob ze los sis nyob hauv nej lub tsev, xws li tej lus uas tau muab lo rau cov tshuaj los sis tej daim qhia kev rau cov neeg uas tsav tsheb. Tej lus ceeb toom no pab peb li cas? Leej Txiv Saum Ntuj Ceeb Tsheej xav kom peb “ceeb toom [peb] tus neeg zej zog” txog dab tsi?

Lus Qhuab Qhia thiab Kev Khi Lus 88:119.Xwv kom pab nej tsev neeg hloov nej lub tsev kom zoo li nqe 119, ua ib yam dab tsi zoo li no: Sau tej kab lus los ntawm nqe no rau tej daim ntawv, thiab siv tej kab lus no kom npog ib daim duab txog lub tuam tsev. Nyeem Lus Qhuab Qhia thiab Kev Khi Lus 88:119 ua ke, thiab cia nej tsev neeg tshem txhua daim ntawv thaum lawv hnov kab lus ntawd hauv nqe no. Peb yuav ua dab tsi kom hloov peb lub tsev ua “ib lub tsev rau Vajtswv”? (nqe 119).

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Nyob Ze Nrog Koj, Vajtswv,” Cov Nkauj Qhuas Vajtswv, zaj 37.

Kev Qhia Zoo Dua Ntxiv

Cia cov me nyuam siv lawv txoj kev txawj tsim tej yam. Thaum nej caw nej cov me nyuam tsim ib yam uas qhia txog ib lub ntsiab cai ntawm txoj moo zoo, tej zaum nej yuav pab lawv to taub lub ntsiab cai zoo dua ntxiv, thiab nej kuj yuav pab lawv muaj ib yam dab tsi uas ua rau lawv nco ntsoov txog qhov uas lawv tau kawm (saib Teaching in the Savior’s Way, 25).

Yexus nrog cov thwj tim

Yexus Khetos xav muab kev kaj siab lug rau peb. Kuv Muab Kuv txoj Kev Kaj Siab Tso rau Nej, los ntawm Walter Rane