tsev neeg taug kev mus rau lub tuam tsev

Yim Hli Ntuj 2–8

Lus Qhuab Qhia thiab Kev Khi Lus 85–87

“Sawv hauv tej Chaw Dawb Huv”

Tej zaum tus Ntsuj Plig yuav coj koj kom kawm tej lub ntsiab cai nyob hauv tshooj 85–87 uas tsis nyob hauv tus txheej txheem qhia no. Ua raws li Nws tej kev tshoov siab.

Sau Ntawv txog Koj tej Kev Tshoov Siab

Hnub Christmas Day yog ib hnub zoo xav txog tej lus xws li “kaj siab lug” thiab “thov kom tib neeg tau zoo” (saib Lukas 2:14). Tiam sis thaum lub Kaum Ob Hlis Ntuj 25, 1832, Joseph Smith lub siab xav txog qhov uas yuav muaj kev tsov kev rog. South Carolina twb tsis yeem ua raws li lub Teb Chaws Amelikas lub tseem fwv thiab tab tom npaj ua rog. Thiab tus Tswv qhia Joseph hais tias nov yog qhov chiv keeb xwb. Nws hais tias, “Kev ua rog yuav muaj nplua mias rau txhua haiv neeg” (Lus Qhuab Qhia thiab Kev Khi Lus 87:2). Yeej zoo li tsis ntev tom ntej yuav muaj raws tej lus no.

Tiam sis tsis tau muaj li ntawd. Ob peb lim tiam tom qab ntawd, South Caroline thiab lub Teb Chaws Amelikas lub tseem fwv twb tau hais kom haum ob tog, thiab tsis muaj kev tsov kev rog. Tiam sis yeej tsis muaj raws li kev tshwm sim thaum lub sij hawm peb xav los sis txoj kev uas peb xav. Yuav luag 30 xyoo tom qab ntawd, ntev heev tom qab Joseph Smith raug tua thiab Haiv Neeg Ntseeg tau mus rau sab hnub poob, South Carolina twb ntxeev siab thiab muaj kev tsov kev rog tom qab ntawd. Txij thaum ntawd, tej kev tsov kev rog nyob thoob plaws lub ntiaj teb twb ua rau “lub ntiaj teb … quaj ntsuag” (Lus Qhuab Qhia thiab Kev Khi Lus 87:6). Thaum tau muaj raws li tej uas qhia yuav muaj los yav tom ntej, qhov uas kev tshwm sim no qhia thaum twg yuav muaj kev puas tsuaj no yuav los mas tsis tshuaj muaj nqis npaum li qhov uas kev tshwm sim no qhia tias peb yuav tsum ua li cas thaum raug li ntawd. Tej lus ntuas yeej zoo ib yam nyob hauv xyoo 1831, 1861, thiab 2021: “Sawv hauv tej chaw dawb huv, thiab tsis txhob txav mus” (nqe 8).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 85:1–2

“Ceev ib zaj keeb kwm” yog ib yam zoo.

“Keeb kwm” uas piav txog nyob hauv nqe 1 twb ceev tej npe ntawm cov uas tau “txais qub txeeg qub teg raws cai” nyob hauv Xi-oos (kuj saib Lus Qhuab Qhia thiab Kev Khi Lus 72:24–26). Tiam sis, zaj keeb kwm no tsis yog rau cov teev ntawv xwb—zaj no kuj yog cov ceev xwm txheej txog Haiv Neeg Ntseeg “lawv tus yam ntxwv ua neej, lawv txoj kev ntseeg, thiab tej yam lawv ua” (nqe 2).

Koj puas sau ib zaj keeb kwm los sis ceev xwm txheej txog koj tus kheej? Koj yuav sau dab tsi txog koj tus yam ntxwv ua neej, koj txoj kev ntseeg, thiab tej yam koj ua uas yuav foom koob hmoov rau tej tiam neeg tom ntej? Zaj keeb kwm no yuav ua li cas kom foom koob hmoov rau koj?

Kuj saib “Journals: ‘Of Far More Worth than Gold,’” Teachings of Presidents of the Church: Wilford Woodruff (2011), 125–33; “Turning Hearts” (video, ChurchofJesusChrist.org).

Lus Qhuab Qhia thiab Kev Khi Lus 85:6

Tus Ntsuj Plig hais lus nrog “ib lub suab yau yau.”

Cia li xav txog cov lus uas Joseph Smith siv kom piav txog tus Ntsuj Plig nyob hauv Lus Qhuab Qhia thiab Kev Khi Lus 85:6. Yog vim li cas tus Ntsuj Plig lub suab “yau yau”? Tus Ntsuj Plig “tshab” tej yam twg hauv koj lub neej?

Thaum koj xav txog qhov uas tus Ntsuj Plig ua li cas kom hais lus rau koj, cia li xav txog tej lus uas tus Tswv piav rau lwm tus los ntawm Joseph Smith: Lus Qhuab Qhia thiab Kev Khi Lus 6:22–24; 8:2–3; 9:7–9; 11:12–13; 128:1. Raws li tej yam uas koj tau nyeem, koj xav tias koj yuav tsum ua li cas kom txawj hnov tus Ntsuj Plig lub suab ntxiv?

Kuj saib 1 Vaj Ntxwv 19:11–12; Hilamas 5:30.

tus poj niam kawm vaj lug kub

Kev kawm vaj lug kub pab peb hnov tus Vaj Ntsuj Plig Dawb Huv.

Lus Qhuab Qhia thiab Kev Khi Lus 86

Tus Tswv muab cov ncaj ncees sau los ua ke hauv hnub nyoog kawg.

Lus Qhuab Qhia thiab Kev Khi Lus 86:1–7 muaj tus Tswv tej lus piav txog zaj lus piv txwv ntawm cov nplej thiab cov txhauv, tiam sis hais txog ib qho txawv uas nws hais nyob hauv Mathais 13:24–30, 37–43. Thaum koj muab ib zaj piv rau ib zaj, koj pom tej yam twg uas sib txawv? Cia li xav seb vim li cas kev hais zaj lus piv txwv no—uas muaj tej lus txawv no—muaj nqis hais “hnub nyoog kawg, uas twb yog lub sij hawm no” (Lus Qhuab Qhia thiab Kev Khi Lus 86:4). Koj kawm dab tsi los ntawm zaj lus piv txwv no thiab kev txhais zaj no hauv hnub nyoog kawg no?

Raws li sau hauv nqe 8–11, tus Tswv hais txog lub pov thawj hwj, kev muab txoj moo zoo txum tim rov qab los, thiab Nws cov neeg txoj kev cawm seej. Koj pom tias tej nqe no thiab zaj lus piv txwv txog cov nplej thiab cov txhauv muaj dab tsi zoo ib yam? Koj yuav ua li cas kom ua “ib tug cawm seej rau [tus Tswv] haiv neeg”? (nqe 11).

Kuj saib Gospel Topics, “Apostasy,” “Restoration of the Priesthood,” topics.ChurchofJesusChrist.org.

Lus Qhuab Qhia thiab Kev Khi Lus 87

Muaj kev kaj siab lug hauv “tej chaw dawb huv.”

Nrog rau tej xwm txheej xws li “nqaij ntuag ntshav … [thiab] kev tshaib kev nqhis, thiab kev mob nkeeg, thiab av qeeg” (Lus Qhuab Qhia thiab Kev Khi Lus 87:6), tej lus ntuas hauv kev tshwm sim no yeej yog hais txog tej xwm txheej ntawm sab ntsuj plig uas peb txhua tus yuav raug hauv hnub nyoog kawg. Koj “tej chaw dawb huv” (nqe 8) uas koj nrhiav tau kev kaj siab lug thiab kev nyab xeeb nyob qhov twg? Muaj dab tsi uas ua rau ib qho chaw dawb huv? Ntxiv rau tej qhov chaw, tej zaum muaj tej lub sij hawm dawb huv, tej kev yus ua uas dawb huv, los sis tej kev xav dawb huv uas ua rau koj txais tau kev kaj siab lug. Qhov hais tias “tsis txav li” hauv tej chaw no txhais li cas?

Kuj saib Henry B. Eyring, “Ib lub Tsev uas tus Tswv tus Ntsuj Plig Nyob Haud,” Ensign los sis Liahona, Tsib Hlis Ntuj 2019, 22–25; Saints, 1:163–64; “Peace and War,” Revelations in Context, 158–64.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 85:6.Nej yuav ua li cas qhia nej tsev neeg kom paub tus Ntsuj Plig lub suab yau yau? Tej zaum nej yuav xav ua si li no hais tias ib tug ntxhi lus tej lus qhia tseem ceeb thaum ib lub suab ntxiv nrov nrov. Tej yam twg ua rau peb tsis hnov tus Vaj Ntsuj Plig Dawb Huv? Tej zaum nej tsev neeg yuav xav qhia tias nej ua li cas kom hnov tau tus Ntsuj Plig lub suab.

Lus Qhuab Qhia thiab Kev Khi Lus 86.Kev kos duab los sis saib duab tej zaum yuav pab nej tsev neeg to taub zaj lus piv txwv txog cov nplej thiab cov txhauv. Tej zaum nej yuav xav pib saib daim duab txog tej yam uas tau piav txog nyob hauv Mathais 13:24–30. Ces nej tsev neeg sau tej lus rau tej daim duab ntawv piav txog tej yam los ntawm Lus Qhuab Qhia thiab Kev Khi Lus 86:1–7. Peb zoo li cov nplej li cas? Peb yuav ua li cas kom ua zoo li cov tim tswv uas muab cov nplej sau los ua ke.

Lus Qhuab Qhia thiab Kev Khi Lus 87:8.Xwv kom pib sib tham txog txoj kev ua kom nej lub tsev ua ib qho chaw dawb huv ntxiv, tej zaum nej yuav xav caw nej tsev neeg ua ib daim qauv rau ib lub tsev rau ib tug neeg uas hlub tus Cawm Seej. Tej zaum ua li no yuav ua rau nej tawm tswv yim txog qhov uas nej yuav “kho” nej lub tsev zoo li cas kom muaj kev kaj siab lug thaum raug xwm txheej ceev ntawm sab ntsuj plig hauv lub ntiaj teb no. Tej zaj nkauj zoo li “Hlub hauv Tsev,” “Lub Tsev Zoo Li Ntuj Ceeb Tsheej” (Cov Nkauj Qhuas Vajtswv, zaj 137, 139), los sis “Where Love Is” (Children’s Songbook, 138–39) tej zaum yuav pab nej tawm tswv yim.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Where Love Is,” Children’s Songbook, 138–39.

Kev Qhia Zoo Dua Ntxiv

Siv nej txoj kev muaj tswv yim tsim tej yam. Thaum nej qhia nej tsev neeg los ntawm cov vaj lug kub, tsis txhob xav tias nej yuav tsum siv tej lus nug thiab tej yam ntxim saib ntxim ua uas nyob hauv tus txheej txheem qhia no. Cia tej lub tswv yim no pab nej tsim tej yam tshiab. Cia li xav seb nej tsev neeg yuav nyiam dab tsi thiab yuav muaj dab tsi pab tau lawv txuas cov vaj lug kub thiab lawv lub neej.

daim teb nplej

Tus Tswv tau siv zaj piv txwv txog cov nplej thiab cov txhauv kom qhia tias yuav zoo li cas thaum Nws muab Nws cov neeg sau los ua ke hauv hnub nyoog kawg.