“Cuaj Hlis Ntuj 27–Kaum Hli Ntuj 3. Lus Qhuab Qhia thiab Kev Khi Lus 88: ‘Yog Koj lub Tsev, Ib qho Chaw rau Koj txoj Kev Dawb Huv,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Cuaj Hlis Ntuj 27–Kaum Hli Ntuj 3. Lus Qhuab Qhia thiab Kev Khi Lus 109–110,” Los, Nrog Kuv Mus—Rau Ib Leeg thiab Tsev Neeg: 2021
Lub Tuam Tsev Kirtland, los ntawm Jon McNaughton
Cuaj Hlis Ntuj 27–Kaum Hli Ntuj 3
Lus Qhuab Qhia thiab Kev Khi Lus 109–110
“Yog Koj lub Tsev, Ib qho Chaw rau Koj txoj Kev Dawb Huv”
Hais txog Lus Qhuab Qhia thiab Kev Khi Lus 109:24–28, Txwj Laug David A. Bednar hais tias, “Kuv caw nej rov qab kawm thiab thov Vajtswv thaum nej xav txog tej nqe vaj lug kub muaj nqis li cas hauv nej lub neej thiab nej tsev neeg” (“Honorably Hold a Name and Standing,” Ensign los sis Liahona, Tsib Hlis Ntuj 2009, 99). Cia li xav txog txoj kev caw no thaum koj kawm.
Sau Ntawv txog Koj tej Kev Tshoov Siab
Cov qhov rooj rau lub Tuam Tsev Kirtland yuav tsis qhib mus txog thaum 8:00 thaum sawv ntxov ntawm Peb Hlis Ntuj 27, 1836. Tiam sis Haiv Neeg Ntseeg uas cia siab tias lawv yuav muaj cib fim koom kev sib ntsib muab fij tseg twb pib tos ntxov li 7:00. Thaum cov uas tuaj teev tiam puv cov rooj zaum thiab tej kev kem rooj zaum lawm, Joseph Smith hais kom siv lwm qhov chaw thiab. Thaum qhov chaw ntawd puv lawm, ces lawv tau npaj lwm lub sij hawm ua thiab. Es tsis yog cov uas tseem ciaj sia uas xav nyob ntawd. Muaj ntau tus neeg uas ua tim khawv tias lawv pom cov tim tswv, nyob hauv lub tuam tsev thiab nyob saum ruv tsev, thaum Yeej zoo li “cov tub txib [saum ntuj]” twb tau los “hu nkauj qhuas Vajtswv” nrog Tsoom Haiv Neeg Ntseeg hauv Hnub Nyoog Kawg (“Vajtswv tus Ntsuj Plig,” Cov Nkauj Qhuas Vajtswv, zaj 2).
Vim li cas muaj kev zoo siab kawg—nyob ob sab ntawm daim ntaub thaiv? Qhov uas tus Tswv tau cog lus tias Haiv Neeg Ntseeg yuav “txais vaj txiaj ntsim hwj chim los saum ntuj los”yog ib qho uas qhia vim li cas lawv tau sib sau ua ke nyob hauv Ohio (Lus Qhuab Qhia thiab Kev Khi Lus 38:32). Thiab tus Tswv twb tau cog lus tias lawv yuav txais tej yam tseem ceeb dua thaum yav tom ntej. Tus Tswv hais tias, “Qhov no yog qhov pib ntawm txoj koob hmoov uas yuav muab nplua mias foom rau saum kuv cov neeg taub hau” (Lus Qhuab Qhia thiab Kev Khi Lus 110:10). Lub caij nyoog uas peb nyob tam sim no—uas yog ib lub caij rau peb ua hauj lwm hauv lub tuam tsev ntau thiab ua kab ke rau cov ciaj thiab cov tuag coob kawg—twb pib hauv Kirtland, thaum daim ntaub thaiv tab tom yuav tawg (“Vajtswv tus Ntsuj Plig”).
Kuj saib Saints, 1:232–41; “A House for Our God,” Revelations in Context, 169–72.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 109
Tus Tswv xav foom koob hmoov rau kuv nyob hauv Nws lub tsev dawb huv.
Muaj tej yam uas lub Tuam Tsev Kirtland txawv ntawm lwm lub tuam tsev uas peb paub niaj hnub nim no. Tsis muaj lub thaj thiab lub dab ua kev cai raus dej, thiab tseem tsis tau muab cov kab ke txum tim rov qab los xws li kev cai raus dej rau cov neeg tuag thiab kev sib khi. Tiam sis cov koob hmoov uas tshooj 109 hais txog, zaj lus thov Vajtswv muab lub Tuam Tsev fij tseg, yog cov koob hmoov uas peb txais nyob hauv tus Tswv lub tsev niaj hnub no. Cia li nyeem tej nqe no kom nrhiav tau ib feem ntawm cov koob hmoov no. Thaum koj nyeem txog cov koob hmoov no, cia li xav seb vim li cas cov koob hmoov no tseem ceeb rau koj thiab koj tsev neeg.
Nqe 5, 12–13 (kuj saib Lus Qhuab Qhia thiab Kev Khi Lus 110:6–8): Nyob hauv lub tuam tsev tus Tswv yuav muab Nws tus kheej tshwm sim thiab peb hnov tau Nws lub hwj chim.
Nqe 9, 17–19, 26, 78–79: Nyob hauv lub tuam tsev peb ris tus Tswv lub npe rau peb tus kheej.
Nqe 22–23: Thaum peb ua raws li peb tej kev khi lus hauv lub tuam tsev, tus Tswv muab hwj chim rau peb ua Nws txoj hauj lwm.
Nqe 24–33: Thaum peb tsim nyog mus rau lub tuam tsev, peb txais tau tus Tswv txoj kev pov hwm.
Lwm cov koob hmoov:
Tus Ntsuj Plig tshoov koj lub siab ua dab tsi kom thiaj txais tau cov koob hmoov no?
Lus Qhuab Qhia thiab Kev Khi Lus 109
Zaj lus thov Vajtswv muab lub Tuam Tsev Kirtland fij tseg yuav qhia kuv txog kev thov Vajtswv.
Tshooj 109 yog ib zaj lus thov Vajtswv muab lub tuam tsev fij tseg uas tus Tswv tau muab tshwm sim rau Joseph Smith (saib zaj lus piav txog tshooj). Koj kawm dab tsi txog kev thov Vajtswv los ntawm tshooj no? Thaum koj nyeem tshooj no, tej zaum koj yuav xav txog koj tej kev thov Vajtswv. Koj txais kev tshoov siab twg kom pab koj txawj sib txuas lus nrog koj Leej Txiv Saum Ntuj Ceeb Tsheej zoo dua ntxiv? Piv txwv hais tias, tus Yaj Saub tau thov txog dab tsi thaum nws thov Vajtswv li no?
Lus Qhuab Qhia thiab Kev Khi Lus 110:1–10
Tus Tswv muaj peev xwm qhia txog Nws tus kheej nyob hauv lub tuam tsev.
Koj xav li cas txog tus Cawm Seej tom qab koj nyeem Lus Qhuab Qhia thiab Kev Khi Lus 110:1–10? Nws tau ua li cas kom qhia txog Nws tus kheej rau koj nyob hauv lub tuam tsev? Nws ua li cas kom pab koj paub tias Nws pom zoo rau koj tej hauj lwm thiab koj tej kev txi?
Txhua sab ntawm lub Tuam Tsev Kirtland muaj lub sam thiaj rau cov thawj coj pov thawj hwj.
Lus Qhuab Qhia thiab Kev Khi Lus 110:11–16
Cov yawm sij uas yuav tsum muaj kom ua tau Vajtswv txoj hauj lwm los muaj hauv lub Koom Txoos niaj hnub no.
Xwv kom to taub tej yawm sij uas Mauxes, Eli-as, thiab Eliyas muab rau Joseph Smith thiab Oliver Cowdery nyob hauv lub Tuam Tsev Kirtland, tej zaum koj yuav xav nyeem Txwj Laug Quentin L. Cook’s zaj lus “Npaj Mus Ntsib Vajtswv” (Ensign los sis Liahona, Tsib Hlis Ntuj 2018, 114–17). Txwj Laug Cook piav tias tej yawm sij no nyias qhib nyias txoj hauj lwm hauv lub Koom Txoos hnub no. Tej zaum koj yuav xav kawm txog cov yaj saub puag thaum ub no thaum koj kawm “Mauxes,” “Eli-as,” thiab “Eliyas” nyob hauv Phau Qhia txog Vaj Lug Kub (scriptures.ChurchofJesusChrist.org). Cia li xav seb koj yuav ua li cas kom pab ua tej hauj lwm raws li tej yawm sij no.
Kuj saib “Priesthood Keys,” True to the Faith, 126–27.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 109.Nrog nej tsev neeg, nrhiav tej nqe nyob hauv tshooj 109 uas tshoov nej lub siab kom siv sij hawm ntxiv hauv lub tuam tsev (ua piv txwv, saib tej nqe uas sau rau ntawm “Tej lub Tswv Yim Kawm Vaj Lug Kub ntawm Yus Ib Leeg”). Sib tham seb nej yuav ua li cas kom ua raws li Thawj Tswj Hwm Russell M. Nelson hais: “[Cia li] teem caij ib sij mus ntsib tus Tswv—mus nyob hauv Nws lub tsev dawb huv—ces muaj kev zoo siab mus raws li teem tseg txhua lub sij hawm.” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Ensign los sis Liahona, Kaum Ib Hlis Ntuj 2018, 114). Yog nej los sis nej tsev neeg tseem tsis tau mus rau lub tuam tsev, tej zaum nej yuav xav saib temples.ChurchofJesusChrist.org kom pab nej tus kheej npaj mus.
-
Lus Qhuab Qhia thiab Kev Khi Lus 109:78–80.Zaj nkauj qhuas Vajtswv hu ua “Vajtswv tus Ntsuj Plig” (Cov Nkauj Qhuas Vajtswv, zaj 2) los twb sau rau txoj kev muab lub Tuam Tsev Kirtland fij tseg—thiab txij lub sij hawm ntawd los peb hu zaj nkauj no thaum muab txhua lub tuam tsev fij tseg. Tej zaum nej yuav xav hu zaj nkauj no ua ke thiab nrhiav tej lus uas ua rau nej xav ua Vajtswv tsaug rau tej lub tuam tsev hauv hnub nyoog kawg no. Zaj nkauj qhuas Vajtswv no hais dab tsi txog zaj lus uas nyob hauv Lus Qhuab Qhia thiab Kev Khi Lus 109:78–80?
Nej nrhiav tau zaj lus thov Vajtswv muab lub tuam tsev nyob ze nej fij tseg nyob ntawm temples.ChurchofJesusChrist.org.
-
Lus Qhuab Qhia thiab Kev Khi Lus 110.Thaum nej tsev neeg nyeem tshooj 110 thiab saib daim duab uas nyob ntawm tus txheej txheem qhia qhov kawg, caw lawv xav seb lawv yuav xav li cas yog tias lawv nyob nrog Joseph Smith thiab Oliver Cowdery nyob hauv lub Tuam Tsev Kirtland. Muab sij hawm rau nej tsev neeg hais tias lawv xav li cas txog tus Cawm Seej.
-
Lus Qhuab Qhia thiab Kev Khi Lus 110:15.Muaj dab tsi uas yuav pab nej cov me nyuam “lub siab tig mus” rau lawv poj koob yawm txwv? Tej zaum nej nrhiav tau tej lub tswv yim lom zem nyob ntawm FamilySearch.org/discovery. Tej zaum nej yuav xav ua hauj lwm ua ke kom paub txog cov poj koob yawm txwv uas xav tau cov kab ke thiab npaj ua cov kab ke ntawd nyob hauv lub tuam tsev. Tej zaum nej yuav xav sib tham txog seb vim li cas Eliyas txoj kev muab txoj hauj lwm no txum tim rov qab los nyob hauv lub Tuam Tsev Kirtland ua rau nej hlub nej cov poj koob yawm txwv.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Vajtswv tus Ntsuj Plig,” Cov Nkauj Qhuas Vajtswv, zaj 2.
Tej lub Suab ntawm Kev Muab txoj Moo Zoo Txum Tim Rov Qab Los
Tej Kev Tshwm Sim ntawm Sab Ntsuj Plig thiab lub Tuam Tsev Kirtland
Yam Li Nplaim Hluav Taws, los ntawm Glen S. Hopkinson
Nram qab no yog tej lus ntawm Tsoom Haiv Neeg Ntseeg hauv Hnub Nyoog Kawg uas nyob hauv lub Tuam Tsev Kirtland thaum lawv muab fij tseg thiab lwm txoj kev sib ntsib tom qab ntawd. Neeg coob twb muab lub sij hawm ntawd piv rau qhov uas Haiv Neeg Ntseeg puag thaum ub muaj thaum lawv “tau lub hwj chim uas yuav los saum ntuj los” thaum txog hnub Peetekos (Lukas 24:49; kuj saib Tes Hauj Lwm 2:1–4; Lus Qhuab Qhia thiab Kev Khi Lus 109:36–37).
Eliza R. Snow
“Yus rov qab qhia tau txog txoj kev muab fij tseg ntawd, tiam sis tsis muaj ib tug neeg twg uas piav tau seb hnub ntawd tau muaj tej kev tshwm sim los saum ntuj ceeb tsheej los zoo li cas. Ib txhia neeg tau pom cov tim tswv, es sawv daws twb hnov tej yam uas los saum ntuj los, thiab txhua tus lub siab muaj ‘kev xyiv fab uas yus piav tsis tau txog thiab tau muaj yeeb koob puv npo.’”1
Sylvia Cutler Webb
“Ib lub sij hawm uas kuv nco ntsoov yog thaum lawv muab lub Tuam Tsev fij tseg. Kuv txiv cia wb zaum ntawm nws xub ntiag thiab qhia wb vim li cas peb mus thiab qhov uas yus muab Vajtswv lub tsev fij tseg tseem ceeb npaum li cas. Thiab txawm yog kuv hluas heev thaum ntawd, kuv yeej nco ntsoov lub sij hawm ntawd. Kuv yeej xav txog yav tas los thiab hnub no kuv pom tau meej ib yam li kuv pom hnub ntawd thaum Joseph, tus Yaj Saub, nws sawv thiab tsa tes rau saum ntuj, nws lub ntsej muag dawb heev, es nws los kua muag thaum nws hais lus rau peb hnub ntawd. Zoo li txhua tus tau los kua muag lawm. Neeg coob ti ti hauv lub tsev heev, cov me nyuam feem ntau zaum ntawm cov laus xub ntiag; kuv tus viv ncaus zaum ntawm kuv txiv xub ntiag, es kuv zaum ntawm kuv niam xub ntiag. Kuv yeej nco qab ob daim tiab uas wb hnav. Thaum lub sij hawm ntawd kuv hluas dhau kuv thiaj tsis tau paub tias lub sij hawm ntawd tseem ceeb npaum li cas, tiam sis thaum sij hawm dhau mus ces ua rau kuv haj yam paub ntxiv, thiab kuv zoo siab tias kuv tau muaj cib fim nyob ntawd.2
Oliver Cowdery
“Thaum tsaus ntuj kuv tau nrog cov thawj coj ntawm lub koom txoos sib ntsib hauv tus Tswv lub tsev. Twb muaj tus Ntsuj Plig puv npo—kuv tau pom Vajtswv lub yeeb koob, zoo li ib lub huab loj, los roos lub tsev ntawd, thiab puv lub tsev zoo li yog cua hlob heev. Kuv twb pom ntau tus zoo li tus nplaim taws los faib pes rhe liab pes vog … thaum lawv hais tej yam lus txawv thiab qhia txog tej uas yuav muaj los yav tom ntej.”3
Benjamin Brown
“Neeg coob twb ua yog toog. Ib tug tau pom ib lub huab los roos lub tsev, ci npaum li thaum lub hnub ci rau ib lub huab kom pom tau zoo li kub. Ob tug ntxiv tau pom peb tus neeg ya hauv chav ntawd muaj cov yawm sij hauv lawv txhais tes, thiab ib txoj saw hlau hauv lawv txhais tes.”4
Orson Pratt
“Vajtswv nyob ntawd, nws cov tim tswv nyob ntawd, tus Vaj Ntsuj Plig Dawb Huv yeej nyob nrog cov neeg … thiab txij lub taub hau mus txog txhais ko taw los lawv muaj tus Vaj Ntsuj Plig Dawb Huv lub hwj chim thiab lub yeeb haum puv npo.”5
Nancy Naomi Alexander Tracy
“[Thaum] lawv ua lub Tuam Tsev tas thiab muab fij tseg … ces yog ob hnub zoo siab tshaj hauv kuv lub neej. Zaj nkauj tsim nyog hu uas twb sau rau lub sij hawm ntawd yog ‘Vajtswv tus Ntsuj Plig kub lug zoo yam li nplaim hluav taws.’ Yeej muaj li ntawd vim Vajtswv lub Yeeb Haum twb los rau lub tsev ntawd. … Kuv xav tias zoo li lub ntuj ceeb tsheej twb los rau hauv lub ntiaj teb lawm.”6
Mauxes, Eli-as, thiab Eliyas tshwm sim hauv lub Tuam Tsev Kirtland, los ntawm Gary E. Smith