“Kaum Hli Ntuj 25–31. Lus Qhuab Qhia thiab Kev Khi Lus 124–125: ‘Txhim Tsa Ib lub Tsev Los rau Kuv lub Npe,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Kaum Hli Ntuj 25–31. Lus Qhuab Qhia thiab Kev Khi Lus 124–125,” Los, Nrog Kuv Mus—Rau Ib Leeg thiab Tsev Neeg: 2021
Nauvoo uas Zoo Nkauj, los ntawm Larry Winborg
Kaum Hli Ntuj 25–31
Lus Qhuab Qhia thiab Kev Khi Lus 124–125
“Txhim Tsa Ib lub Tsev Los rau Kuv lub Npe”
Thaum koj nyeem phau Lus Qhuab Qhia thiab Kev Khi Lus 124–25, cia li xav txog tej koob hmoov uas tus Tswv caw Haiv Neeg Ntseeg hauv Nauvoo txais thiab cov koob hmoov uas Nws foom pub rau koj.
Sau Ntawv txog Koj tej Kev Tshoov Siab
Txawm rau xyoo dhau los nyuaj heev rau Haiv Neeg Ntseg los, thaum lub caij nplooj ntoo hlav rau xyoo 1839 twb pib rov qab zoo: Cov pej xeem nyob hauv Quincy, Illinois tau hlub Haiv Neeg Ntseeg uas tawg rog ntawd. Cov neeg zov tau cia tus Yaj Saub Joseph Smith thiab lwm tus thawj coj ntawm lub Koom Txoos dim txim nyob hauv Missouri. Thiab lub Koom Txoos tau yuav thaj av nyob hauv Illinois rau Haiv Neeg Ntseeg rov qab sib sau ua ke. Thaj av ntawd yog hav iav uas muaj yoov tshaj cum ntau, tiam sis piv rau tej teeb meem uas Haiv Neeg Ntseeg twb raug lawm, ntshe qhov no lawv ua taus. Yog li ntawd lawv tso dej tawm mus hav iav thiab sau ib daim ntawv tsa kev cai rau lub nroog tshiab, uas lawv hu ua Nauvoo. Nauvoo yog lus Henplais uas txhais tias “zoo nkauj,” tiam sis yog kev qhia tias lawv muaj kev ntseeg li cas thiab tsis yog kev piav tias thaj av ntawd zoo li cas, thaum xub thawj. Thaum lub sij hawm ntawd, tus Tswv tau tshoov Nws tus Yaj Saub lub siab kom nws ua sai sai. Twb tau muaj tej yam tseeb thiab tej kab ke uas yuav tsum muab txum tim rov qab los thiab Nws yuav tsum muaj ib lub tuam tsev dawb huv kom Haiv Neeg Ntseeg txais tau. Ib yam li ntawd, tej kev xav txog kev ntseeg thiab kev ua sai sai no yog tej yam tseem ceeb rau tus Tswv txoj hauj lwm hnub no.
Nauvoo twb los ua ib lub nroog zoo nkauj uas muaj ib lub tuam tsev zoo nkauj, tiam sis lub nroog thiab lub tuam tsev ntawd los lawv twb tso tseg tom qab ntawd. Tiam sis tus Tswv tej hauj lwm zoo nkauj yeej ib txwm yog kom “muab meej mom sam xeeb, kev tsis txawj tuag, thiab txoj sia nyob mus ib txhis rau [koj] ntoo” (Lus Qhuab Qhia thiab Kev Khi Lus 124:55), thiab tej hauj lwm ntawd yeej yuav tsis tiav.
Saib Saints, 1:399–427; “Organizing the Church in Nauvoo,” Revelations in Context, 264–71.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 124:12–21
Kuv ua tau ib tug thwj tim uas tus Tswv tso siab rau.
Txawm yog muaj ob peb tug thawj coj uas muaj npe tawm lub Koom Txoos mus hauv tej xyoo 1830, cov mej zeej feem coob tseem rau siab ntseeg. Tsoom Haiv Neeg Ntseeg uas rau siab ntseeg no yog cov uas twb nyiaj tau tej kev sim siab hauv Missouri thiab cov uas nyuam qhuav koom lub Koom Txoos lawm. Nyob hauv Lus Qhuab Qhia thiab Kev Khi Lus 124:12–21, tus Tswv tau hais zoo txog lawv ob peb tug. Koj kawm dab tsi txog kev ua thwj tim nyob hauv Nws tej lus? Hais txog cov Neeg Ntseeg rau siab ntseeg no puas muaj dab tsi uas tshoov koj lub siab kom ua li lawv? Tej zaum koj yuav xav txog tej yam uas tus Tswv tau ua kom qhia koj tias Nws hlub koj.
Lus Qhuab Qhia thiab Kev Khi Lus 124:22–24, 60–61
Tus Tswv xav kom kuv tos txais thiab lees yuav lwm tus.
Thaum xav txog tej kev txom nyem uas Haiv Neeg Ntseeg tau raug nyob hauv Nissouri, tej zaum lawv raug ntxias kom nyob lawv tus kheej thiab tsis txhob cia neeg tuaj xyuas Nauvoo. Cia li xav txog qhov ntawd thaum koj nyeem Lus Qhuab Qhia thiab Kev Khi Lus 124:22–24, 60–61. Koj xav li cas txog tus Tswv tej lus qhia kom ua “ib lub tsev so”? (nqe 23). Nws tej lus qhia dab tsi rau koj txog Nws lub Koom Txoos ntiag tug hauj lwm? Cia li xav seb tej lus qhia muaj nqis dab tsi rau koj thiab koj tsev neeg.
Kuj saib qhov video “A Friend to All,” ChurchofJesusChrist.org.
Lus Qhuab Qhia thiab Kev Khi Lus 124:25–45, 55
Tus Tswv txib peb ua tej tuam tsev peb thiaj txais tau cov kab ke dawb ceev.
Thaum Tsoom Haiv Neeg Ntseeg hauv Hnub Nyoog Kawg tau tsiv mus nyob hauv Nauvoo lawm, lawv yeej xav tias tus Tswv yuav qhia lawv ua ib lub tuam tsev—ib yam li Nws tau ua hauv Ohio thiab Missouri. Koj kawm dab tsi nyob hauv Lus Qhuab Qhia thiab Kev Khi Lus 124:25–45, 55 uas pab koj to taub vim li cas tus Tswv hais tias, “Tus Tswv yeej ib txwm txib kuv cov neeg kom txhim tsa [tej lub tuam tsev] rau kuv lub npe dawb huv”? (nqe 39).
Txij thaum tau ua lub Tuam Tsev Nauvoo los, twb tau ua lawm los sis tau tshaj tawm tias yuav ua 200 tawm lub tuam tsev. Thawj Tswj Hwm Russell M. Nelson qhia hais tias: “Peb paub hais tias peb txoj kev siv sij hawm hauv lub tuam tsev yeej tseem ceeb kawg nkaus rau peb txoj kev txhiv dim thiab kev tsa nto thiab yeej tseem ceeb rau peb tsev neeg thiab. … Tus yeeb ncuab tej kev tsim txom tsuas ua heev tuaj xwb, nws sib zog thiab muab ntau yam los tsim txom peb. Tsis tau muaj dua lwm lub sij hawm uas tib neeg yuav tsum ib sij mus hauv lub tuam tsev npaum li lub caij no” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Ensign los sis Liahona, Kaum Ib Hlis Ntuj 2018, 114) Lub tuam tsev tau pab koj li cas kom tiv taus “tus yeeb ncuab tej kev tsim txom”? Koj tau txais kev tshoov siab li cas kom ua raws li Thawj Tswj Hwm Nelson tej lus ntuas?
Kuj saib Church History Topics, “Nauvoo Temple,” ChurchofJesusChrist.org/study/church-history.
Joseph Smith Nyob ntawm lub Tuam Tsev Nauvoo, los ntawm Gary E. Smith
Lus Qhuab Qhia thiab Kev Khi Lus 124:84–118
Tus Tswv xav ntuas kuv txog kuv lub neej.
Nqe 84–118 muaj tej lus ntuas txog ib txhia neeg, thiab muaj ib feem uas tej zaum koj xav tias tsis tseem ceeb rau koj tus kheej. Tiam sis tej zaum koj yuav nrhiav tau ib yam uas koj yuav tsum kawm. Seb koj puas xav nug tus Tswv seb Nws xav qhia dab tsi rau koj hauv tej nqe no, thiab thov kom tus Ntsuj Plig coj koj nrhiav tau. Ces txiav txim siab tias koj yuav ua li cas. Piv txwv hais tias, qhov uas koj haj yam txo hwj chim yuav pab koj li cas kom txais tau tus Ntsuj Plig? (saib nqe 97).
Tej zaum koj yuav xav txog lwm yam uas tus Tswv tau ntuas koj lawm. Koj ua dab tsi kom ua raws li tej ntawd?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 124:2–11.Yog tus Tswv tau qhia nej tsev neeg kom lawv “ua tib zoo plov meej kuv txoj moo zoo” rau “txhua tus vaj ntxwv nyob hauv lub ntiaj teb” (nqe 2–3), ces nej yuav pov meej hais dab tsi? Xav seb nej puas xav tsim kev plov meej ua ke, thiab caw nej tsev neeg qhia hais tias lawv xav sau txoj moo zoo tej lus tseeb twg.
-
Lus Qhuab Qhia thiab Kev Khi Lus 124:15.Kev coj zoo txhais li cas? Vim li cas tus Tswv saib kev coj zoo rau nqi? Nej tsev neeg tau pom leej twg uas coj yam ntxwv zoo? (Kuj saib Ntxiv Dag Zog rau cov Tub Hluas Ntxhais Hluas, 19.)
-
Lus Qhuab Qhia thiab Kev Khi Lus 124:28–29, 40–41, 55.Peb kawm dab tsi los ntawm tej nqe no uas qhia vim li cas tus Tswv txib peb ua tej lub tuam tsev? Tej zaum nej tsev neeg yuav nyiam kos duab txog ib lub tuam tsev los sis siv tej nplov los sis lwm yam khoom ua ib lub tuam tsev. Thaum nej ua li no, tej zaum nej yuav xav sib tham txog qhov uas nej ua Vajtswv tsaug vim nej muaj tej lub tuam tsev niaj hnub no thiab vim li cas peb yuav tsum mus haud ntau zaus kom teev tiam Vajtswv.
-
Lus Qhuab Qhia thiab Kev Khi Lus 124:91–92.Puas zoo rau nej tsev neeg sib tham txog yawg suab tej koob hmoov? Tej zaum nej tsev neeg uas tau txais yawg suab txoj koob hmoov yuav xav qhia tias zoo li cas thaum lawv txais thiab txoj koob hmoov ntawd tau pab lawv li cas. Tej zaum nej kuj yuav xav nyeem “Patriarchal Blessings” (Gospel Topics, topics.ChurchofJesusChrist.org).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “I Love to See the Temple,” Children’s Songbook, 95.
Tej lub Suab ntawm Kev Muab txoj Moo Zoo Txum Tim Rov Qab Los
Lub Koom Haum Niam Tsev
Kos duab txog kev txhim tsa lub Koom Haum Niam Tsev los ntawm Paul Mann
Thaum xyoo 1842, tom tau muab lub Koom Haum Niam Tsev txhim tsa hauv Nauvoo, Illinois, tus Yaj Saub Joseph Smith hais tias, “Lub Koom Txoos tseem tsis tau txhim tsa tas zoo tag nrho mus txog thaum txhim tsa lub koom haum niam tsev.”1 Ib yam li ntawd, yus yeej yuav tsis to taub kev muab tus Tswv lub Koom Txoos thiab Nws lub pov thawj hwj txum tim rov qab los tag nrho (saib Lus Qhuab Qhia thiab Kev Khi Lus 107) mus txog thaum yus kawm txog lub Koom Haum Niam Tsev, uas yog “kev muab ib tug txheej txheem puag thaum ub [ntawm Yexus Khetos cov thwj tim uas yog poj niam] txum tim rov qab los”.2
Eliza R. Snow twb ua ib txoj hauj lwm tseem ceeb hauv txoj kev muab tej no txum tim rov qab los. Nws twb nyob thaum lub sij hawm uas tau txhim tsa thawj lub Koom Haum Niam Tsev, thiab vim nws yog lub koom haum no tus teev ntawv, nws tau sau ntawv thaum lawv muaj kev sib ntsib. Nws twb pom hais tias lub Koom Haum Niam Tsev tau raug txhim tsa “raws li lub pov thawj hwj tus txheej txheem.”3 Nram qab no yog nws tej lus, uas nws sau thaum nws yog tus Tuam Thawj Tswj Hwm ntawm lub Koom Haum Niam Tsev, kom pab nws cov viv ncaus to taub txog Vajtswv txoj hauj lwm uas Nws muab tso rau nws cov ntxhais khi lus.
Xwv kom paub ntxiv txog kev txhim tsa lub Koom Haum Niam Tsev no, cia li saib Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Eliza R. Snow
“Txawm hais tias lub npe [Koom Haum Niam Tsev] yog tsim tsis ntev tas los no los, lub koom haum no muaj puag thaum ub thiab. [Joseph Smith] tau qhia peb tias, lub koom haum no twb muaj hauv lub koom txoos puag thaum ub, muaj tej lus uas piav me ntsis txog qhov no nyob hauv tej tsab ntawv hauv Phau Tshiab, uas siv lub npe, ‘tus poj niam uas tau xaiv tseg’ [saib 2 Yauhas 1:1; Lus Qhuab Qhia thiab Kev Khi Lus 25:3].
“Nov yog ib lub koom haum uas tsis muaj cai yog tias tsis muaj lub Pov Thawj Hwj, yog vim txhua txoj cai thiab lub hwj huam yog los ntawm lub hauv paus ntawd. Thaum lub Pov Thawj Hwj raug rho tawm lub ntiaj teb mus, lub koom haum no thiab txhua lub koom haum ntawm tus txheej txheem tseeb ntawm Yexus Khetos lub koom txoos hauv lub ntiaj teb no, twb tuag lawm. …
“Yog vim kuv nyob thaum lub sij hawm uas muab ‘Nauvoo lub Koom Haum Niam Tsev,’ … thiab kuj tau ua hauj lwm hauv lub koom haum ntawd tau ntev, tej zaum kuv yuav hais ob peb yam uas yuav pab Xi-oos cov ntxhais kom lawv rau siab ua tej hauj lwm tseem ceeb no, uas muaj ntau yam kev lav ris tshiab. Yog tias haiv neeg Ixayees ib tug ntxhais los sis niam xav tias lawv ua tsis taus lawv txoj hauj lwm, ces nim no lawv yuav nrhiav tau txhua lub hwj chim thiab txoj kev txawj ua kom lawv thiaj ua tau zoo npaum lawv muaj cuab kav ua. …
Twb tau txhim tsa lub Koom Haum Niam Tsev hauv ib chav tsev theem saud nyob hauv lub Tsev Muag Khoom uas Yog Thwv Cib Liab.
“Yog leej twg yuav nug seb, lub hom phiaj ntawm lub Koom Haum Niam Tsev yog dab tsi? Kuv yuav teb hais tias—ua zoo—ua txhua yam peb muaj peev xwm ua kom ua zoo, tsis yog kom pab cov neeg pluag xwb tiam sis kom cawm tib neeg thiab. Kev koom siab ua hauj lwm yuav pab ntau dua li tej yam peb ua tau yog tias peb nyias ua nyias xwb. …
“Hais txog kev pab cov pluag, lub Koom Haum Niam Tsev muaj tej luag hauj lwm ntau dua li kev txhawb nqa tib neeg tej kev xav tau ntawm lub cev nqaij daim tawv. Kev txom nyem thiab kev mob hauv tib neeg lub siab los kuj yuav tsum saib xyuas; thiab ntau zaus yuav tsum ua siab zoo—hais ob peb yam lus ntuas, los sis kev mob siab tuav tes yuav zoo dua thiab tib neeg yuav nyiam zoo dua li ib hnab uas puv nyiaj kub. …
“Thaum Tsoom Haiv Neeg Ntseeg tuaj lwm lub teb chaws tuaj sib sau ua ke, es tsis muaj leej twg paub lawv, thiab muaj neeg tos kom dag ntxias lawv, lub Koom Haum Niam Tsev yuav tsum saib xyuas lawv sai sai, thiab muab lawv los sau ua ke hauv lub koom haum uas yuav txhawb nqa thiab pab lawv, thiab qhov tseem ceeb ntxiv dag zog rau lawv txoj kev ntseeg Txoj Moo Zoo, thiab yog lawv ua li ntawd, tej zaum lawv yuav pab cawm neeg coob tiag.
“Yeej yuav tsum sau ntau phau ntawv kom qhia tias yus muaj tej tes hauj lwm, tej cib fim thiab tej kev lav ris nyob hauv lub Koom Haum no. … Cia li txhob txwm mus (raws li tus npisov qhia) nrog dag zog, koom siab thiab thov Vajtswv, ces Vajtswv yuav foom koob hmoov rau nej tej hauj lwm muab kev vam meej rau nej.”4
Lub Tuam Tsev Nauvoo los ntawm George D. Durrant