Joseph Smith qhuab qhia

Kaum Hli Ntuj 4–10

Lus Qhuab Qhia thiab Kev Khi Lus 111–114

“Kuv Yuav Txib Txhua Yam Ua Kom Zoo rau Nej”

Thov Vajtswv kom txais tau tus Ntsuj Plig tej lus qhia thaum koj nyeem Lus Qhuab Qhia thiab Kev Khi Lus 111–14, thiab sau ntawv txog tej kev tshoov siab uas koj txais. Cia li xav txog tej yam uas koj ua tau raws li tej kev tshoov siab ntawd.

Sau Ntawv txog Koj tej Kev Tshoov Siab

Puas tau muaj ib lub sij hawm uas ua rau koj xav tias koj muaj kev tso siab thiab kev ntseeg khov kho—ces thaum koj raug kev txom nyem sim koj txoj kev ntseeg, es ua nyuaj rau koj rov qab muaj kev kaj siab lug uas koj muaj ua ntej? Tsoom Haiv Neeg Ntseeg hauv Kirtland twb raug li no. Ua ntej dhau ib xyoo tom qab tau muaj tus Ntsuj Plig puv npo nyob ntawm kev muab lub Tuam Tsev Kirtland fij tseg, twb muaj teeb meem. Kev ntxhov siab txog nyiaj txiag, kev tsis sib haum hauv Pawg Kaum Ob tug Tim Thawj, thiab lwm yam kev sim siab ua rau ib txhia muaj kev ntseeg tsis khov.

Peb yeej dim tsis tau tej kev sim siab, yog li ntawd peb yuav ua li cas kom peb txoj kev ntseeg thiab zaj lus tim khawv khov kho? Tej zaum muaj ib yam uas pab tau nyob hauv tus Tswv tej lus ntuas hauv Lus Qhuab Qhia thiab Kev Khi Lus 112, uas tus Tswv hais thaum muaj kev tsim txom loj tuaj hauv Kirtland. Tus Tswv hais tias, “Ua kom nej lub siab dawb huv rau kuv pom” (nqe 28), “Tsis txhob ntxeev siab” (nqe 15), “Cia li muab koj tej siv sia rau txoj hauj lwm” (nqe 7), thiab “Cia li txo hwj chim” (nqe 10). Thaum peb ua raws li tej lus ntuas no, tus Tswv “yuav tuav tes coj [peb]” kom dhau kev ntxhov siab thiab ua rau peb muaj kev kaj siab lug (saib nqe 10, 13).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 111

Tus Tswv yuav “txib txhua yam ua kom zoo rau [kuv].”

Txog xyoo 1836, lub Koom Txoos twb tshuav nqi ntau vim lawv ua tus Tswv txoj hauj lwm. Thaum Joseph Smith thiab lwm tus txhawj txog tej nqi no thiab xav txog qhov uas lawv yuav ua li cas kom them tej nqi ntawd, lawv twb mus rau Salem, Massachusetts, tej zaum yog vim twb hnov xov tias muaj ib pob nyiaj uas tib neeg tau tso tseg hauv ib lub tsev nyob ntawd (saib zaj lus piav txog tshooj rau phau Lus Qhuab Qhia thiab Kev Khi Lus 111). Tom qab lawv tuaj txog Salem, tus Tswv hais tias, “Muaj tej kev nplua nuj ntau tshaj ib yam rau nej nyob hauv lub nroog no” (nqe 10)—tej kev nplua nuj xws li cov neeg uas Nws yuav muab sau ua ke uas yuav zoo rau Xi-oos thaum txog lub sij hawm uas tau pom zoo (nqe 2; kuj saib Khiav Dim 19:5). Txawm yog lawv nrhiav tsis tau nyiaj hauv Salem, cov neeg uas hloov siab los ntseeg tom qab ntawd vim cov tub txib tuaj qhia, yog vim lawv thiaj tau muaj raws li tus Tswv cov lus cog tseg.

Thaum koj nyeem tshooj 111, cia li xav txog tej yam uas koj txhawj txog. Cia li xav seb tus Tswv tej lus rau Joseph muaj nqis rau koj. Tus Tswv tau ua li cas kom pab koj nrhiav tau “tej kev nplua nuj” uas koj tsis tau xav txog? (nqe 10). Cia li xav seb Nws tau ua li cas kom “txib txhua yam ua kom zoo rau [koj]” (nqe 11). Tej lus hais tias “sai npaum li uas nej yuav muaj peev xwm txais tau tej ntawd” qhia dab tsi rau koj txog Leej Txiv Saum Ntuj Ceeb Tsheej?

Kuj saib Mathais 6:19–21, 33; “More Treasures Than One,” Revelations in Context, 229–34.

Lus Qhuab Qhia thiab Kev Khi Lus 112:3–15

Tus Tswv yuav coj cov uas txo hwj chim ua raws li Nws lub siab nyiam.

Thaum lub caij sov ntawm xyoo 1837 Pawg Kaum Ob tug Tim Thawj tab tom tsis sib haum. Lawv tsis sib haum txog lawv tej kev lav ris, thiab muaj ib txhia cov mej zeej uas hais lus tawm tsam tus Yaj Saub Joseph Smith. Thomas B. Marsh, uas yog tus Thawj Tswj Hwm ntawm Pawg Kaum Ob tug Tim Thawj thaum ntawd, nws txhawj heev, thiab nws tau los ntawm Missouri los rau Ohio, vim nws xav tau tus Yaj Saub tej lus ntuas. Tij Laug Marsh twb txais tau los ntawm kev tshwm sim uas nyob hauv tshooj 112. Tus Tswv tej lus ntuas tau pab nws thiab nws pawg li cas? Tej lus no qhia dab tsi rau koj thaum koj sim kov yeej tej kev sib cav sib ceg thiab tej kev xav tsis zoo?

Qhov tseem ceeb, tej zaum koj yuav xav txog nqe 10. Qhov uas tus Tswv “tuav tes” coj koj txhais li cas? Vim li cas koj yuav tsum txo hwj chim kom Nws thiaj coj tau koj li no?

Kuj saib Ulisses Soares, “Cia Li Txo Hwj Chim thiab Muaj Siab Mos Siab Muag,” Ensign los sis Liahona, Kaum Ib Hlis Ntuj 2013, 9–11; “The Faith and Fall of Thomas Marsh,” Revelations in Context, 54–60.

ob tug neeg thov Vajtswv

Yog peb txo hwj chim, tus Tswv yuav coj peb thiab teb peb tej lus thov.

Lus Qhuab Qhia thiab Kev Khi Lus 113

Joseph Smith yog “ib tug tub qhe nyob hauv Khetos txhais tes.”

Yaxayas hais txog Yexais ib tug xeeb ntxwv hais tias nws yog ib “tsob ntoo” thiab ib “cag” (Yaxayas 11:1, 10). Nyob hauv tshooj 113, tus Tswv piav hais tias tus xeeb ntxwv no, Khetos ib tug tub qhe, yuav ua ib tug tseem ceeb kom pab muab tus Tswv cov neeg sau los ua ke hauv hnub nyoog kawg (saib Lus Qhuab Qhia thiab Kev Khi Lus 113:4, 6)—yog ib zaj lus qhia tej uas yuav muaj los yav tom ntej uas piav txog tus Yaj Saub Joseph Smith. Qhov tseeb no thiab lwm yam tseeb nyob hauv tshooj 113 tau pab Haiv Neeg Ntseeg li cas thaum muaj kev kub ntxhov nyob hauv Kirtland? Koj nrhiav dab tsi hauv kev tshwm sim no uas tshoov koj lub siab kom koom tes pab ua tus Tswv txoj hauj lwm hnub no?

Kuj saib Phau Qhia txog Vaj Lug Kub, “Yexais,” scriptures.ChurchofJesusChrist.org; 2 Nifais 21:10–12; Joseph Smith—Keeb Kwm 1:40.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 111:2, 9–11.Tej nqe no los tej zaum yuav pab nej tsev neeg sib tham txog tej uas nej tsev neeg saib yog tej kev nplua nuj uas nyob mus ib txhis. Tej zaum nej yuav xav tsim kev nrhiav tej uas muaj nqis hauv nej tsev thaum nej muab tej yam zais cia kom sawv cev rau tej yam uas tus Tswv saib rau nqi. Thaum nej tsev neeg nrhiav ib yam khoom, cia li sib tham seb nej yuav ua li cas kom qhia tias nej saib yam ntawd rau nqi ib yam thiab.

Lus Qhuab Qhia thiab Kev Khi Lus 112:10.Txwj Laug Ulisses Soares piav txog cov neeg uas txo hwj chim li no: “Cov uas muaj siab mos siab muag nyiam kawm, paub tias lawv cia siab rau Vajtswv heev thiab xav ua raws li Nws lub siab nyiam. Cov uas muaj siab mos siab muag txo hwj chim thiab txawj yaum lwm tus kom lawv ua zoo ib yam li ntawd” (“Cia Li Txo Hwj Chim thiab Muaj Siab Mos Siab Muag,” Ensign los sis Liahona, Ib Hlis Ntuj 2013, 10) Xav txog tej yam uas nej ua tau kom pab nej tsev neeg to taub tias kev txo hwj chim txhais li cas. Tej zaum nej yuav xav hu ib zaj nkauj txog kev txo hwj chim xws li “Txo lub Hwj Chim” (Cov Nkauj Qhuas Vajtswv, zaj 48), es cia li ib tug hauv nej tsev neeg tuav lwm tus tes thiab coj lawv mus ncig nej lub tsev. Los sis qhia txog tej lub sij hawm thaum tus Tswv tau “tuav [lawv] tes” coj lawv mus thiab tau “teb [lawv] tej lus thov.”

Lus Qhuab Qhia thiab Kev Khi Lus 112:11–14, 26.Qhov uas yus paub ib tug neeg lub npe thiab qhov uas yus paub ib tug neeg txawv li cas? Peb kawm dab tsi los ntawm nqe 11–14 txog kev paub tus Tswv?

Lus Qhuab Qhia thiab Kev Khi Lus 112:15.Qhov uas yus “ntxeev siab” rau tus yaj saub txhais li cas? Peb kawm dab tsi los ntawm nqe no uas pab peb xav txhawb nqa tus yaj saub?

Lus Qhuab Qhia thiab Kev Khi Lus 113:7–8.Peb kawm dab tsi los ntawm nqe 8 uas yuav pab peb “txhim tsa Xi-oos dua” thiab txhiv Ixayees dim?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Txo lub Hwj Chim,” Cov Nkauj Qhuas Vajtswv, zaj 48.

Kev Qhia Zoo Dua Ntxiv

Ua raws li koj zaj lus tim khawv. Txwj Laug Neal A. Maxwell tau qhia hais tias, “‘Yus yeej qhia raws li yus yog neeg zoo li cas. Qhov uas koj zoo li cas yog qhov uas lawv yuav nco ntsoov … nco dua li ib yam tseeb uas koj qhia hauv ib zaj lus qhia’” (Teaching in the Savior’s Way, 13).

Thomas B. Marsh thiab Joseph Smith

Thomas B. Marsh sau kev tshwm sim uas tus Tswv qhia rau nws dhau los ntawm Joseph Smith. Txo lub Hwj Chim, los ntawm Julie Rogers.