“Kaum Hli Ntuj 11–17. Doctrine and Covenants 115–120: ‘Nws txoj Kev Txi Yuav Dawb Ceev rau Kuv Dua Li Nws tej Kev Vam Meej,’” Come, Follow Me—For Individuals and Families: Doctrine and Covenants 2021 (2020)

“Kaum Hli Ntuj 11–17. Lus Qhuab Qhia thiab Kev Khi Lus 115–120,” Los, Nrog Kuv Mus—Rau Ib Leeg thiab Tsev Neeg: 2021

Daim Duab

Far West

Far West, los ntawm Al Rounds

Kaum Hli Ntuj 11–17

Lus Qhuab Qhia thiab Kev Khi Lus 115–120

“Nws txoj Kev Txi Yuav Dawb Ceev rau Kuv Dua Li Nws tej Kev Vam Meej”

Tus Tswv xav hais lus rau koj. Thaum koj kawm vaj lug kub, cia li thov Vajtswv kom Nws pab koj nrhiav Nws tej lus qhia rau koj.

Sau Ntawv txog Koj tej Kev Tshoov Siab

Yeej tsim nyog uas Haiv Neeg Ntseeg yuav xav zoo txog lawv qhov chaw tshiab sib sau ua ke, Far West, Missouri, thaum lub Xya Hli Ntuj xyoo 1838. Lub nroog no yeej loj tuaj sai sai, thaj av zoo nkauj, thiab nyob sab qaum teb tsis deb yog Adas-oodais-Omas, ib qho chaw uas tseem ceeb heev (saib Lus Qhuab Qhia thiab Kev Khi Lus 107:53–56; 116). Txawm li ntawd los, yeej nyuaj rau Haiv Neeg Ntseeg tsis xav txog tej yam uas lawv xiam lawm. Lawv twb raug ntiab tawm ntawm Independence, uas yog qhov chaw hauv plawv ntawm Xi-oos, thiab ntshe lawv yuav tsum tos ntev ua ntej lawv yuav muaj peev xwm rov qab mus. Tsis tas li ntawd, Haiv Neeg Ntseeg yuav tsum khiav tawm Kirtland, Ohio, es lawv yuav tsum tso lawv lub tuam tsev tseg tom qab ob xyoos xwb. Thiab tsis yog lub Koom Txoos cov yeeb ncuab uas tsim kev kub ntxhov xwb—muaj cov mej zeej muaj koob muaj npe uas ntxeev siab rau Joseph Smith, tsis hais Peb tug Tim Khawv txog Phau Ntawv Maumoos thiab plaub tug ntawm Pawg Kaum Ob tug Tim Thawj. Ib txhia twb xav paub seb, Vajtswv lub nceeg vaj puas muaj zog zuj zus tuaj, los sis tab tom qaug zog zuj zus?

Tiam sis cov uas rau siab ntseeg tsis tau tsum thiab xav txog tej lus nug li ntawd. Lawv tau pib txhim tsa ib qho chaw dawb huv ntxiv, lub sij hawm no yog nyob hauv Far West. Lawv tau npaj ua ib lub tuam tsev tshiab. Twb hu plaub tug Tim Thawj, muaj ob tug—John Taylor thiab Wilford Woodruff—uas yuav los ua tus Thawj Tswj Hwm ntawm lub Koom Txoos (saib Lus Qhuab Qhia thiab Kev Khi Lus 118:6). Haiv Neeg Ntseeg twb kawm tias kev ua Vajtswv txoj hauj lwm tsis txhais hais tias yus mam li yeej txhua lub sij hawm; kev ua Vajtswv txoj hauj lwm txhais hais tias yus “rov qab sawv dua.” Thiab txawm yus yuav tsum tso tej yam tseg los, tej kev txi ntawd los Vajtswv yuav saib ua dawb ceev, yeej “yuav dawb ceev … dua li [koj] tej kev vam meej” (Lus Qhuab Qhia thiab Kev Khi Lus 117:13).

Saib Saints, 1:296–99; “Far West and Adam-ondi-Ahman,” Revelations in Context, 235–41.

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 115:4–6

Tus Tswv yog tus uas pom zoo rau lub Koom Txoos lub npe.

Thawj Tswj Hwm Russell M. Nelson tau hais tias lub Koom Txoos lub npe yeej yog “ib yam uas tseem ceeb heev” (“Lub Koom Txoos lub Npe uas Raug Lawm,” Ensign los sis Liahona, Kaum Ib Hlis Ntuj 2018, 87). Cia li xav txog qhov uas vim li cas qhov no muaj tseeb thaum koj nyeem phau Lus Qhuab Qhia thiab Kev Khi Lus 115:4–6. Ua cas lub Koom Txoos lub npe yog ib qho tseem ceeb rau lub Koom Txoos ntiag tug hauj lwm?

Kuj saib 3 Nifais 27:1–11.

Lus Qhuab Qhia thiab Kev Khi Lus 115:5–6

Xi-oos thiab nws tej ceg txheem ntseeg muab “ib qho chaw nkaum ntawm kob cua daj cua dub.”

Txawm yog Tsoom Haiv Neeg Ntseeg tau raug kev txom nyem thaum xyoo 1838, tus Tswv tseem xav kom lawv ua tej yam tseem ceeb heev. Nrhiav tej lus nyob hauv Lus Qhuab Qhia thiab Kev Khi Lus 115:5–6 uas hais txog txoj hauj lwm uas tus Tswv xav kom Nws lub Koom Txoos thiab cov mej zeej ua hauv lub ntiaj teb no. Ua piv txwv hais tias, koj xav tias koj yuav tsum ua li cas kom “cia li sawv thiab ci mus”? (nqe 5). Koj pom tej kob cua daj cua dub twg ntawm sab ntsuj plig nyob ib puag ncig koj, thiab peb ua li cas nrhiav tau ib “qho chaw nkaum” thaum peb sib sau ua ke? (nqe 6).

Kuj saib 3 Nifais 18:24.

Lus Qhuab Qhia thiab Kev Khi Lus 117

Tus Tswv saib kuv tej kev txi dawb huv.

Tej zaum kev ncaim Kirtland mus yog ib qho nyuaj rau tib neeg zoo li Newel K. Whitney, uas twb tsim ib lub neej vam meej rau nws tsev neeg nyob ntawd. Koj nrhiav dab tsi nyob hauv Lus Qhuab Qhia thiab Kev Khi Lus 117:1–11 uas tej zaum tau pab lawv ua kev txi li no? Tej nqe no pab koj li cas kom hloov koj txoj kev saib tej yam twg tseem ceeb tiag?

Qhov uas tus Tswv hais kom Oliver Granger txi yeej txawv: tus Tswv txib kom nws nyob hauv Kirtland thiab pab tej teeb meem ntawm lub Koom Txoos cov nyiaj txiag. Yeej yog ib txoj hauj lwm nyuaj heev, thiab txawm nws ua siab ncaj sawv cev rau lub Koom Txoos, nws tsis tau khaws cov nyiaj txiag ntau. Cia li xav seb tus Tswv tej lus nyob hauv nqe 12–15 yuav pab koj li cas hais txog tej yam uas tus Tswv thov kom nej ua.

Kuj saib Mathais 6:25–33; Boyd K. Packer, “The Least of These,” Ensign los sis Liahona, Kaum Ib Hlis Ntuj 2004, 86–88; “Far West and Adam-ondi-Ahman,” Revelations in Context, 239–40.

Tus Tswv txib Newel K. Whitney tsiv tsev mus rau Adas-oodais-Omas, uas nyob hauv daim duab no.

Lus Qhuab Qhia thiab Kev Khi Lus 119–20

Thaum kuv them ib feem kaum, kuv pab txhim tsa thiab “muab thaj av Xi-oos hloov ua dawb huv.”

Tej lus qhia nyob hauv tshooj 119 thiab 120 yeej zoo li txoj kev uas peb them nqi rau txoj kev ua tus Tswv txoj hauj lwm hauv peb lub caij nyoog. Niaj hnub no, Haiv Neeg Ntseeg “muab ib feem kaum ntawm tag nrho lawv tej paj laum [tam sim no yog cov nyiaj txiag uas khwv tau] thawm xyoo los them” (Lus Qhuab Qhia thiab Kev Khi Lus 119:4), thiab cov nyiaj no los muaj ib pawg sab laj saib xyuas uas yog Thawj Pawg Thawj Tswj Hwm, Pawg Kaum Ob tug Tim Thawj, thiab Pawg Thawj Npisov. Cia li xav txog tej lus nug no thaum koj kawm tej tshooj no:

Qhov uas koj ua raws li txoj kev cai them ib feem kaum “muab thaj av Xi-oos hloov ua dawb huv”? Txoj kev cai no yuav pab qhov chaw ua koj nyob tam sim no hloov ua “ua ib thaj av Xi-oos rau [koj]”? (Lus Qhuab Qhia thiab Kev Khi Lus 119:6).
Tej lus “los ntawm kuv tus kheej lub suab rau lawv” nyob hauv Lus Qhuab Qhia thiab Kev Khi Lus 120 muaj nqis li cas?

Kuj saib Malakis 3:8–12; David A. Bednar, “Tej Rooj Ntug,” Ensign los sis Liahona, Kaum Ib Hlis Ntuj 2013, 17–20; “The Tithing of My People,” Revelations in Context, 250–55.

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 115:4–6.Puas tsim nyog nej tsev neeg yuav nyeem tej nqe no thaum nej saib hnub tuaj? Tej zaum yuav pab nej yog nej sib tham txog qhov uas “cia li sawv thiab ci mus” (nqe 5) txhais li cas. Los sis tej zaum nej yuav xav sib tham txog qhov uas kev nrhiav chaw tiv thaiv thaum huab cua phem zoo li cas. Lub sij hawm ntawd zoo li kev nrhiav “qhov chaw nkaum” hauv lub Koom Txoos? (nqe 6). Ces tej zaum nej tsev neeg yuav xav sib tham txog qhov uas nej yuav ua li cas kom pab lwm tus txais tau qhov chaw nkaum hauv lub Koom Txoos.

Lus Qhuab Qhia thiab Kev Khi Lus 117:1–11.Tej zaum nej tsev neeg yuav xav muab “tej uas tsim tsim nqi” piv rau ib yam uas “raug nqi” ntau tshaj (nqe 8) xws li ib hub dej. Yog nej ua li no tej zaum nej yuav xav sib tham txog tej yam uas tsis tshua tseem ceeb hauv peb lub neej uas tab kaum peb kom peb tsis txhob txais Vajtswv cov koob hmoov ntau.

Lus Qhuab Qhia thiab Kev Khi Lus 119.Tej zaum nej yuav xav hu ib zaj nkauj xws li “I Want to Give the Lord My Tenth” (Children’s Songbook, 150). Zaj nkauj no thiab tshooj 119 qhia dab tsi rau peb txog qhov uas vim li cas peb them ib feem kaum? Tej zaum cov me nyuam yuav nyiam yog nej siv ib yam khoom qhia: tej zaum nej yuav xav muab tej khoom me me rau lawv, pab lawv ntsuas ib feem kaum, thiab qhia lawv tias vim li cas nej them ib feem kaum. (Kuj saib True to the Faith, 180–82.)

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “I Want to Give the Lord My Tenth,” Children’s Songbook, 150.

Kev Qhia Zoo Dua Ntxiv

Txhawb nqa kom lawv vam tau lawv tus kheej. “Thaum [peb tsev neeg] muaj lus nug, tej zaum yuav zoo dua yog peb qhia lawv kom paub nrhiav lus teb lawv tus kheej, es tsis txhob teb tam sim ntawd” (Teaching in the Savior’s Way, 28).