“Kaum Hli Ntuj 18–24. Lus Qhuab Qhia thiab Kev Khi Lus 121–123: ‘Auj Vajtswv, Koj Nyob Qhov Twg?’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Kaum Hli Ntuj 18–24. Lus Qhuab Qhia thiab Kev Khi Lus 121–123,” Los, Nrog Kuv Mus—Rau Ib Leeg thiab Tsev Neeg: 2021
Lub Caij Nplooj Ntoo Hlav hauv lub Tsev Kaw Liberty, los ntawm Al Rounds
Kaum Hli Ntuj 18–24
Lus Qhuab Qhia thiab Kev Khi Lus 121–123
“Auj Vajtswv, Koj Nyob Qhov Twg?”
Lub sij hawm uas koj kawm vaj lug kub yuav zoo dua yog tias koj lub hom phiaj yog kev nrhiav qhov tseeb. Pib thov Vajtswv, mloog tus Ntsuj Plig, thiab sau ntawv txog koj tej kev tshoov siab.
Sau Ntawv txog Koj tej Kev Tshoov Siab
Sab hauv qab lub tsev kaw nyob hauv Liberty, Missouri, los cov neeg hu ua qhov taub. Tej phab ntsa tuab heev, pob zeb pua av txias thiab qias heev, cov zaub mov—muaj tsawg heev—yeej lwj tas, thiab tsuas muaj qhov kaj los ntawm ob lub qhov rais me me uas muaj nqaj hlau thaiv ze rau sab saud. Qhov taub no yog qhov chaw uas Joseph Smith thiab nws ob peb tug kwv tij twb raug kaw—plaub lub hlis hauv lub caij no no rau xyoo 1838–39—thaum lawv tseem tos hais plaub vim muaj neeg liam tias lawv tau ntxeev siab rau lub xeev Missouri. Thaum lub sij hawm no, Joseph pheej hnov xov txog Haiv Neeg ntseeg txoj kev raug txom nyem. Kev kaj siab thiab kev thaj yeeb nyob hauv Far West twb nyob ntev li ob peb lub hlis xwb, thiab Haiv Neeg Ntseeg rov qab tsis muaj tsev nyob, lawv raug ntiab tawm mus rau hauv hav zoov kom nrhiav chaw nyob tshiab—zaum no lawv tus Yaj Saub raug kaw.
Yog vim li no Joseph Smith hais tias, “Auj Vajtswv, koj nyob qhov twg?” Tej lus teb uas nws txais, “tej kev txawj ntse … saum ntuj tseem ceeb” uas tau “nchuav” los hauv lub tsev kaw phem ntawd, qhia tias txawm peb xav tias tsis yog li ntawd Tus Yaj Saub tau kawm tias tsis muaj ib lub hwj chim uas “cheem tau ceeb tsheej.” “Vajtswv yuav nrog [Nws Haiv Neeg Ntseeg uas rau siab ntseeg] nyob mus ib txhiab thiab ib txhis li.”” (Lus Qhuab Qhia thiab Kev Khi Lus 121:1, 33; 122:9.)
Saib Saints, 1:323–96; “Within the Walls of Liberty Jail,” Revelations in Context, 256–63.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 121:1–10, 23–33; 122
Tej kev sim siab “yuav zoo rau [kuv].”
Thaum peb los sis cov uas peb hlub raug txom nyem, ces txhua tus xav paub seb Vajtswv puas paub peb yog leej twg. Thaum koj nyeem phau Lus Qhuab Qhia thiab Kev Khi Lus 121:1–6, cia li xav txog tej lub sij hawm thaum koj muaj tej lus nug los sis tej kev xav zoo li Joseph Smith. Koj nrhiav dab tsi hauv tus Tswv tej lus uas yuav pab koj thaum koj muaj tej lus nug los sis tej kev xav zoo li ntawd? Piv txwv hais tias, nyob hauv nqe 7–10, 26–33, cia li kawm txog cov koob hmoov uas Nws cog lus rau cov uas “ua tib zoo nyiaj [kev txom nyem] mus” Thaum koj nyeem tshooj 122, cia li xav seb tus Tswv xav kom koj xav li cas txog koj tej kev txom nyem.
Kuj saib Henry B. Eyring, “Qhov Thaiv Tshav Ntuj Nyob Qhov Twg?” Ensign los sis Liahona, Kaum Ib Hlis Ntuj 2012, 72–75.
Lus Qhuab Qhia thiab Kev Khi Lus 121:34–46
Peb txais tau “lub hwj chim saum ntuj ceeb tsheej.”
Nyob hauv ib qho chaw uas zoo li nws tsis muaj hwj chim hlo li nyob hauv lub Tsev Kaw Liberty, Joseph twb txais kev tshwm sim txog lub hwj chim—tsis yog lub hwj chim tsoom fwv los sis hwj chim ua tub rog uas twb raug Haiv Neeg Ntseeg tiam sis yog “lub hwj chim saum ntuj ceeb tsheej.” Thaum koj nyeem Lus Qhuab Qhia thiab Kev Khi Lus 121:34–46, koj kawm dab tsi txog Vajtswv lub hwj chim? Lub hwj chim no thiab lub hwj chim ntawm neeg ntiaj teb txawv li cas? Piv txwv hais tias, saib tus Tswv siv tej lus twg nyob hauv nqe 41–43 kom piav txog “hwj chim los yog hwj huam.” Tej nqe no qhia dab tsi txog qhov uas Vajtswv siv Nws “lub hwj chim los yog hwj huam” li cas? Tej zaum tej nqe no yuav tshoov koj lub siab kom xav txog koj lub neej thiab koj yuav ua li cas kom pab lwm tus ua zoo.
Lus Qhuab Qhia thiab Kev Khi Lus 122
Yexus Khetos twb nqis mus tshaj tag nrho txhua yam.
Joseph Smith twb raug kaw tsis yog raws li kev cai tau plaub lub hlis lawm thaum nws cov phooj ywg thiab tsev neeg raug ntiab tawm ntam lawv tej tsev. Zoo li txoj hauj lwm uas nws twb siv tas nws lub neej ua tau raug puas tsuaj lawm. Koj kawm dab tsi txog Yexus Khetos los ntawm Nws cov lus rau Joseph nyob hauv tshooj 122? Koj kawm dab tsi txog Joseph? Koj kawm dab tsi txog koj tus kheej?
Kuj saib Amas 7:11–13; 36:3; Lus Qhuab Qhia thiab Kev Khi Lus 88:6.
Tsis Txhob Ua Raws Li Kuv lub Siab Nyiam, los ntawm Walter Rane.
Lus Qhuab Qhia thiab Kev Khi Lus 123
“Cia peb zoo siab hlo ua txhua yam uas peb muaj hwj chim ua tau.”
Thaum lub Peb Hlis Ntuj 1839, tej zaum Haiv Neeg Ntseeg tau xav tias tsis muaj dab tsi uas lawv ua tau kom hloov lawv tej xwm txheej. Tiam sis nyob hauv nws tej tsab ntawv uas nws sau los ntawm lub Tsev Kaw Liberty, Joseph tau qhia lawv tias lawv muaj peev xwm ua dab tsi: “khaws tej kev paub tag nrho tej yam uas muaj tseeb” thiab “sawv twj ywm, nrog txoj kev tso siab hlo, los paub Vajtswv txoj kev cawm seej” (Lus Qhuab Qhia thiab Kev Khi Lus 123:1, 17). Thaum koj xav txog tej kev dag thiab “tib neeg txoj kev txawj ntxias” nyob hauv lub ntiaj teb no, cia li xav seb muaj dab tsi uas “[koj] muaj hwj chim ua tau” (nqe 12, 17). Vim li cas peb yuav tsum “zoo siab hlo” ua tej no? (nqe 17). Koj paub leej twg uas “tsis paub qhov tseeb” (nqe 12), thiab koj yuav ua li cas kom pab tus ntawd nrhiav tau qhov tseeb?
Ntau zaj uas Joseph hais kom muaj nyob hauv tsab ntawv no los twb xav rau lub tsoom fwv thiab luam tawm hauv 11 feem nyob hauv Nauvoo ntawv xov xwm hu ua Times and Seasons (saib “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 121:1–10.“Qhov taub” hauv lub Tsev Kaw Liberty loj li 14 ntev 14.5 fiv dav (4.2 ntev 4.4 mev dav). Nej yuav ua li cas kom pab nej tsev neeg xav txog qhov uas yuav zoo li cas yog tias yus nyob hauv ib qho chaw me me npaum li ntawd tau plaub lub hlis thaum huab cua no no. Nej kawm tau lwm yam txog qhov uas lub Tsev Kaw Liberty zoo li cas nyob hauv “Chapter 46: Joseph Smith in Liberty Jail” (Cov Dab Neeg Hauv Phau Lus Qhuab Qhia thiab Kev Khi Lus, 172–74). Tej zaum nej yuav xav nyeem “Voices of the Restoration: Liberty Jail” nyob ntawm tus txheej txheem qhia no qhov kawg los sis saib video txog lub sij hawm uas Joseph nyob hauv lub Tsev Kaw Liberty nyob hauv qhov video Joseph Smith: Prophet of the Restoration (ChurchofJesusChrist.org, pib ntawm 43:00). Tej lus qhia no ua rau peb xav li cas txog tej lub ntsiab cai nyob hauv Lus Qhuab Qhia thiab Kev Khi Lus 121:1–10?
-
Lus Qhuab Qhia thiab Kev Khi Lus 121:34–36, 41–45.Tej zaum ib zaj lus piv txwv yuav pab nej tsev neeg to taub “lub hwj chim saum ntuj ceeb tsheej.” Piv txwv hais tias, tej zaum nej yuav xav muab Vajtswv lub hwj chim piv rau hluav taw xob; yuav muaj dab tsi uas thaiv kom ib lub tshuab uas siv hluav taws xob kom tsis txhob txais tau? Zaj lus piv txwv no, nrog rau nqe 34–36, 41–45, qhia dab tsi rau peb txog peb txoj kev muaj lub hwj chim ntawm sab ntsuj plig ntxiv? Tej zaum nej tsev neeg yuav xav hais dab neeg txog tus Cawm Seej lub neej thaum Nws coj yam ntxwv txog tej yam no.
-
Lus Qhuab Qhia thiab Kev Khi Lus 122:7–9.Tej zaum nej tsev neeg yuav nyiam ua tej daim me me uas muaj tej kab lus los ntawm tej nqe no kom tshoov lawv lub siab. Tej zaum nej yuav xav muab tej daim no lo rau ub rau no hauv nej tsev. Vim li cas yog ib qho tseem ceeb rau peb paub tias “Neeg Leej Tub tau nqis mus qis tshaj tag nrho” txhua yam?
-
Lus Qhuab Qhia thiab Kev Khi Lus 123:12.Peb yuav ua li cas kom pab tib neeg “mus nrhiav qhov tseeb nyob rau qhov twg?”
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Kev Kaj Siab Nyob Qhov Twg?” Cov Nkauj Qhuas Vajtswv, zaj 47.
Tej lub Suab ntawm Kev Muab txoj Moo Zoo Txum Tim Rov Qab Los
Lub Tsev Kaw Liberty
Thaum nws raug kaw hauv Liberty, Missouri, Joseph Smith tau txais tej tsab ntawv txog Tsoom Haiv Neeg Ntseeg hauv Hnub Nyoog Kawg tej xwm txheej ceev cov uas raug ntiab tawm ntawm lub xeev raws li tus tswv xeev txib. Muaj ib tsab ntawv uas nws tus poj niam Emma xa los. Nws tej lus, thiab Joseph tej tsab ntawv uas nws sau teb Emma, yeej qhia tias lawv raug txom nyem li cas thiab muaj kev ntseeg li cas nyob hauv lub Koom Txoos zaj liv xwm no.
Tsab ntawv los ntawm Emma Smith sau rau Joseph Smith, Peb Hlis Ntuj 7, 1839
“Kuv tus txiv
“Kuv yuav sim sau ntawv rau koj, vim muaj cib fim uas ib tug phooj ywg yuav xa mus, tiam sis kuv yuav tsis sau txog tag nrho kuv tej kev xav, vim xwm txheej uas koj raug tam sim no, tej phab ntsa, nqaj hlau, thiab tej lub ntsia, tej dej loj thiab me, hauv toj hauv pes, tej roob tej hav thiab tiaj lias uas ua rau wb sib cais, thiab kev txhaum cai uas ua rau koj raug kaw thiab koj tseem raug kaw haud, thiab lwm yam ntxiv, ntshe tsis muaj dab tsi piav tau txog kuv tej kev xav.
“Yog kuv tsis tau paub tias koj tsis muaj txim hlo li, thiab muaj Vajtswv txoj kev hlub uas txhawb nqa, ntshe kuv yeej yuav tsis muaj peev xwm nyiaj tau tej kev txom nyem uas kuv twb raug lawm … ; tiam sis kuv tseem ciaj thiab kuv kam raug txom nyem ntxiv yog tias yog Ntuj lub siab nyiam kuv raug kom koj tau zoo.
“Tam sim no peb txhua tus nyob zoo, tsuas yog Fredrick uas mob heev.
“Tus me Alexander uas kuv puag tam sim no yog ib tug me nyuam tub zoo tshaj yus pom tau hauv yus lub neej. Nws muaj zog heev yog li ntawd yog nws tuav ib lub rooj zaum nws khiav rau ub rau no hauv chav no. …
“Vajtswv tib leeg xwb paub, dua li ces, tsis muaj leej twg paub kuv tej kev xav hauv paj hlwb thiab hauv nruab siab thaum kuv tau khiav ntawm peb lub tsev thiab chaw nyob thiab tau tso txhua yam uas yog peb li tseg tsuas yog peb cov Me Nyuam xwb, ces tau taug kev khiav ntawm lub Xeev Missouri mus, es tso koj tseg nyob twj ywm hauv lub tsev kaw nphos xuab ntawd. Qhov kuv xav li ntawd los tib neeg yeej tsis muaj peev xwm nyiaj tau. …
“… Kuv cia siab hais tias wb yuav muaj tej hnub zoo dua thaum yav tom ntej. … Kuv yeej yog koj tus me nplooj siab.
“Emma Smith”1
Tsab ntawv los ntawm Joseph Smith rau Emma Smith, Plaub Hlis Ntuj 4, 1839
“Kuv tus me poj niam uas kuv hlub.
“Hmo plaub, kuv zaum thaum lub hnub tab tom yuav poob, ntsia ntawm lub qhov rais uas lawv tso tej pas hlau thaiv hauv lub qhov taub kho siab kawg no, xav sau ntawv rau koj, xwv kom kuv thiaj paub tias koj los nyob li cas lawm. Tam li kuv suav, kuv twb mag kaw li no tau tsib hlis thiab rau hnub lawm2 muaj cov tub zov peb thaum nruab hnub thiab hmo ntuj tib si, nyob sab hauv tej phab ntsa, cov pas hlau, thiab lub qhov rooj hlau, hauv ib qho chaw uas tsaus ntuj thiab qias neeg tas. Vajtswv tib leeg xwb thiaj paub kuv xav li cas thaum kuv sau tsab ntawv no. Yus sau tsis tau los sis piav tsis tau los sis cov Tim Tswv piav tsis tau rau tib neeg uas tsis tau raug muab kaw li no hais tias yus muaj tej kev xav zoo li cas. … Peb tsuas vam tau Yehauvas txhais caj npab thiab tsis muaj lwm tus neeg uas yuav pab tau peb khiav dim, thiab yog nws tsis ua, ces yee yuav tsis muaj leej twg ua tau, koj yuav paub tiag, vim muaj neeg nqhis peb cov ntshav hauv lub xeev no; tsis yog vim peb muaj txim hlo li. … Kuv tus me nplooj siab Emma kuv xav txog koj thiab cov me nyuam tas mus li. … kuv xav pom me Frederick, Joseph, Julia, thiab Alexander, Joana, thiab Major [uas yog yim neeg ntawd tus dev]. … Kuv los yeej zoo siab sawv kev ntawm no mus ko taw liab qab thiab tsis hnav khaub ncaws li yog tias yuav pom tau koj thiab yuav muaj kev zoo siab thiab xav tias yeej tsis yog ib yam nyuaj li. … Kuv ua siab ntev nyiaj kuv tej kev txom nyem, thiab cov uas nrog kuv nyob ua li ntawd thiab; tsis tau muaj leej twg uas thim lawm. Kuv xav kom koj tsis txhob cia [wb cov me nyuam] hnov qab kuv. Qhia lawv tias Leej Txiv hlub lawv kawg nkaus, thiab nws tab tom ua txhua yam tsav nws muaj cuab kav ua thiaj dim tau pab laib yuav los cuag lawv. … Qhia lawv tias Leej Txiv hais tias lawv yuav tsum ua me nyuam tsim txiaj thiab mloog lawv niam hais.
“Koj me nplooj siab,
“Joseph Smith tus Hluas”3
Thaum Joseph Smith raug txom nyem hauv lub Tsev Kaw Liberty, tus Tswv nplij nws lub siab thiab qhia tej yam tseeb rau nws.