“Kaum Ib Hlis Ntuj 1–7. Lus Qhuab Qhia thiab Kev Khi Lus 125–128: ‘Ib lub Suab ntawm Kev Zoo Siab rau cov Ciaj thiab cov Tuag,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Kaum Ib Hlis Ntuj 1–7. Lus Qhuab Qhia thiab Kev Khi Lus 125–128,” Los, Nrog Kuv Mus—Rau Ib Leeg thiab Tsev Neeg: 2021
Peb nrog Lawv thiab Lawv nrog Peb, los ntawm Caitlin Connolly
Kaum Ib Hlis Ntuj 1–7
Lus Qhuab Qhia thiab Kev Khi Lus 125–128
“Ib lub Suab ntawm Kev Zoo Siab rau cov Ciaj thiab cov Tuag”
Cia li nco qab kom sau ntawv txog koj tej kev xav thaum koj kawm Lus Qhuab Qhia thiab Kev Khi Lus 125–28 koj thiab li yuav xav txog tej lus uas koj sau thiab qhia tej lus ntawd rau lwm tus.
Sau Ntawv txog Koj tej Kev Tshoov Siab
Thaum lub Yim Hli Ntuj xyoo 1840, ib tug poj niam hu ua Jane Neyman uas tu siab heev mloog tus Yaj Saub Joseph hais lus hauv lub ntees tuag ntawm nws tus phooj ywg Seymour Brunson. Jane tus tub hluas Cyrus nyuam qhuav tas sim neej thiab. Qhov uas ua rau nws tu siab ntxiv yog qhov uas Cyrus tsis tau ua kev cai raus dej, thiab Jane txhawj tias nws tus ntsuj plig yuav poob mus ib txhis. Joseph paub nws xav li cas; nws tau xav txog qhov no thaum nws tus tij laug Alvin tuag ua ntej nws tau ua kev cai raus dej. Yog li ntawd tus Yaj Saub txiav txim siab hais rau Jane, thiab txhua tus nyob hauv lub ntees tuag, txog qhov uas tus Tswv tau muab tshwm sim rau nws txog cov uas tau tuag lawm ua ntej lawv tau txais cov kab ke ntawm txoj moo zoo—thiab peb yuav ua li cas kom pab lawv.
Cov lus qhuab qhia txog kev cai raus dej rau cov tuag ua rau Haiv Neeg Ntseeg zoo siab kawg; lawv xav txog lawv cov niam cov txiv, cov pog yawg, thiab lwm tus txheeb ze. Lawv muaj kev cia siab lawm! Joseph yeej nrog lawv zoo siab, thiab nws hais lus xyiv fab kom piav txog tej yam uas tus Tswv tau qhia nws txog kev cawm cov tuag dim: “Cia cov roob qw rau txoj kev xyiv fab, thiab tag nrho tej vos hav qw nrov nrov; thiab tag nrho tej hiav txwv thiab tej teb nqhuab qhia tej txuj ci uas xav tsis thoob ntawm nej tus Vaj Ntxwv Ib Txhis!” (Lus Qhuab Qhia thiab Kev Khi Lus 128:23).
Saib Saints, 1:415–27; “Letters on Baptism for the Dead,” Revelations in Context, 272–76.
Tej lub Tswv Yim Kawm Vaj Lug Kub ntawm Yus Ib Leeg
Lus Qhuab Qhia thiab Kev Khi Lus 126
Tus Tswv xav kom kuv saib xyuas kuv tsev neeg.
Tom qab nws mus ua tub txib hauv Akiv Teb ob peb zaug thiab rov qab los tsev, Brigham Young twb tau txais tus Tswv txoj kev hu—kom “ua tib zoo saib xyuas [nws] tsev neeg” (nqe 3), cov uas raug txom nyem thaum nws tsis nyob. Thaum koj xav txog qhov uas tej lus no thiab tej lus ntuas ntxiv nyob hauv tshooj 126 muaj nqis rau koj, cia li xav txog tej lus los ntawm Thawj Tswj Hwm Bonnie L. Oscarson, Koom Haum Ntxhais Hluas tus Tuam Thawj Tswj Hwm dhau los:
“Cia li nco ntsoov tias tej yam uas tib neeg xav tau ntau tshaj plaws tej zaum nyob kiag ntawm nej xwb. Cia li pib nej txoj kev pab nyob hauv nej tsev neeg. Kev txheeb ze no yeej nyob tau mus ib txhis. Yog tias nej zwj ceeb hauv nej tsev neeg tsis zoo tag nrho, nej yeej nrhiav tau tej yam nej ua tau kom pab, txhawb nqa, thiab ntxiv dag zog. Txawm nej nyob qhov twg los cia li pib, txawm lawv zoo li cas los cia li hlub, thiab npaj rau tsev neeg ua nej xav muaj thaum yav tom ntej” (“Tej uas Neeg Xav Tau Nyob ntawm Peb,” Ensign los sis Liahona, Kaum Ib Hlis Ntuj 2017, 27).
Kuj saib “Take Special Care of Your Family,” Revelations in Context, 242–49.
Lus Qhuab Qhia thiab Kev Khi Lus 127:2–4
Tus Tswv paub kuv tej kev xyiv fab thiab tej kev tu siab.
Qhov uas tib neeg liam Joseph Smith thiab lawv mam li coj nws mus kaw ua rau Joseph Smith yuav tsum nkaum mus lwm qhov chaw thaum lub Yim Hli Ntuj xyoo 1842. Tiam sis tej lus uas nws tau sau rau Haiv Neeg Ntseeg thaum lub sij hawm no (tam sim no nyob hauv Lus Qhuab Qhia thiab Kev Khi Lus 127) yeej hais lus zoo thiab muaj kev xyiv fab. Nqe 2–4 qhia dab tsi rau koj txog Vajtswv? txog qhov uas koj yuav ua li cas thaum koj raug tej kev sim siab?
Cia li xav seb tus Tswv ua dab tsi kom txhawb nqa koj thaum koj nyob hauv “tej dej tob” ntawm koj lub neej.
Lus Qhuab Qhia thiab Kev Khi Lus 127:5–8; 128:1–8
“Txhua yam uas nej muab sau cia nyob hauv ntiaj teb ces yuav muab sau cia nyob saum ntuj ceeb tsheej.”
Thaum koj nyeem Lus Qhuab Qhia thiab Kev Khi Lus 127:5–8; 128:1–8, nrhiav tej yam uas qhia tias vim li cas tus Tswv muab tej lus qhia rau Joseph Smith txog kev muab tej kev cai raus dej rau cov tuag sau cia. Qhov no qhia dab tsi rau koj txog tus Tswv thiab Nws txoj hauj lwm?
Kev ua hauj lwm hauv lub tuam tsev rau peb cov poj koob yawm txwv khi peb lub siab rau lawv.
Lus Qhuab Qhia thiab Kev Khi Lus 128:5–25
Yuav tsum muaj kuv cov poj koob yawm txwv txoj kev cawm seej thiaj li muaj kuv txoj kev cawm seej.
Qhov uas Vajtswv qhia Joseph Smith vim li cas peb cov poj koob yawm txwv uas tsis tau ua kev cai raus dej hauv lub neej xav tau peb txoj kev pab kom tau kev cawm seej yeej yog ib qho meej heev. Tiam sis koj xav li cas yog vim li cas “yuav tsum muaj [peb cov poj koob yawm txwv] txoj kev cawm seej thiaj li muaj peb txoj kev cawm seej” (saib Lus Qhuab Qhia thiab Kev Khi Lus 128:15–18; ntxiv qhov uas ntawv qaij).
Nqe 5 qhia tias txoj kab ke ua kev cai raus dej rau cov tuag yeej tau “npaj ua ntej ntuj tsim teb raug.” Qhov tseeb no qhia dab tsi rau koj txog Vajtswv thiab Nws txoj hau kev? Thawj Tswj Hwm Henry B. Eyring’s zaj lus “Coj Vajtswv Tsev Neeg Los Sib Sau Ua Ke” qhia dab tsi ntxiv rau koj? (Ensign los sis Liahona, Tsib Hlis Ntuj 2017, 19–22).
Joseph Smith tau siv tej lus xws li “lub hwj chim muab txis ua ke,” “ham sib txuas,” thiab “kev sib txuas zoo tag nrho” thaum nws qhia txog cov kab ke pov thawj hwj thiab kev cai raus dej rau cov tuag. Nrhiav tej lus no thiab tej lus zoo li no thaum koj nyeem Lus Qhuab Qhia thiab Kev Khi Lus 128:5–25. Muaj tej yam twg uas, dhau los ntawm Yexus Khetos, yuav sib txuas ua ke vim muaj cov kab ke pov thawj hwj rau cov tuag? Vim li cas “tawv heev” yog tej lus zoo kom piav txog cov lus qhuab qhia ntawm kev cawm seej rau cov tuag? (saib nqe 9–11).
Koj txais kev tshoov siab dab tsi txog Joseph Smith tej lus nyob hauv nqe 19–25? Tej nqe no ua rau koj xav li cas txog kev ua hauj lwm hauv lub tuam tsev rau koj cov poj koob yawm txwv? txog Yexus Khetos? Koj txais kev tshoov siab ua dab tsi? (saib FamilySearch.org/discovery kom muaj tswv yim).
Kuj saib 1 Kauleethaus 15:29; Dale G. Renlund, “Kev Nrhiav Tsev Neeg Zaj Keeb Kwm thiab tej Hauj Lwm hauv lub Tuam Tsev: Kev Khi thiab Kev Kho Mob,” Ensign los sis Liahona, Tsib Hlis Ntuj 2018, 46–49; ob daim video “A Sacrifice of Time” thiab “Their Hearts Are Bound to You,” ChurchofJesusChrist.org.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Lus Qhuab Qhia thiab Kev Khi Lus 126.Tej zaum tej lus ntuas rau Brigham Young yuav tshoov nej tsev neeg lub siab kom nej xav sib tham txog qhov uas nej yuav ua li cas kom siv sij hawm ntxiv “ua tib zoo saib xyuas” (nqe 3) nej tsev neeg.
-
Lus Qhuab Qhia thiab Kev Khi Lus 128:15–18.Muaj tej koob hmoov twg los ntawm kev nrhiav tsev neeg zaj keeb kwm uas cawm nej thiab pab nej ua neeg zoo tag nrho? Tej zaum nej yuav nrhiav tau tej lub tswv yim nyob hauv daim video “The Promised Blessings of Family History” (ChurchofJesusChrist.org) los sis nyob hauv ib zaj nkauj txog tsev neeg zaj keeb kwm, xws li “Family History—I Am Doing It” (Children’s Songbook, 94).
-
Lus Qhuab Qhia thiab Kev Khi Lus 128:18.Xav seb nej puas xav ua ib txoj xov ntawv nrog tej npe ntawm ntej tsev neeg thiab cov poj koob yawm txuas uas sau rau txhua qhov sib txuas kom qhia tias tsev neeg zaj keeb kwm thiab kev ua hauj lwm hauv lub tuam tsev tsim “ib txoj kev … los ham sib txuas” peb rau peb cov poj koob yawm txwv. Tej zaum nej yuav xav ua kev tshawb fawb nyob hauv FamilySearch.org kom nrhiav tau tib neeg hauv nej tsev neeg thiab sim seb nej txoj xov ntawv yuav ntev li cas.
-
Lus Qhuab Qhia thiab Kev Khi Lus 128:19–23.Tej zaum nej tsev neeg yuav xav nrhiav tej nqe no seb puas muaj tej lus uas qhia txog Joseph Smith txoj kev zoo siab txog Yexus Khetos txoj moo zoo thiab kev cawm cov tuag dim. Tej zaum nej tsev neeg yuav xav hais tej zaj uas ua rau lawv zoo siab txog txoj hauj lwm no thiab—los sis nej nrhiav tau tej zaj ua ke nyob hauv FamilySearch.org/discovery.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Family History—I Am Doing It,” Children’s Songbook, 94.
Tej lub Suab ntawm Kev Muab txoj Moo Zoo Txum Tim Rov Qab Los
Kev Cai Raus Dej rau cov Tuag, “Ib Yam Tshiab thiab Zoo Kawg”
Kev kos duab no yog lub dab ua kev cai raus dej nyob hauv lub Tuam Tsev es lub dab nyob saum kaum ob tug twm nrob qaum.
Phebe thiab Wilford Woodruff
Phebe Woodruff nyob ze Nauvoo thaum Joseph Smith pib qhia txog kev cai raus dej rau cov tuag. Nws sau ntawv txog qhov no rau nws tus txiv Wilford uas ua tub txib nyob hauv Akiv teb:
“Tij laug Joseph … tau kawm los ntawm kev tshwm sim hais tias cov nyob hauv lub koom txoos no ua kev cai raus dej rau cov txheeb ze uas tas sim neej lawm thiab tsis tau muaj cib fim hnov txog txoj moo zoo, tsis hais lawv cov me nyuam, lawv niam lawv txiv, cov kwv cov tij, cov muam cov viv ncaus, cov pog yawg, cov niam tais yawm txiv, dab laug, thiab cov phauj. … Thaum twg lawv ua kev cai raus dej rau lawv cov phooj ywg ces cov phooj ywg ntawd raug tso tawm ntawm lub nkuaj thiab yuav coj lawv sawv rov los thiab coj lawv mus rau hauv lub ntuj ceeb tsheej xilethi-aus—cov lus qhuab qhia no los cov ntseeg yeej tau txais thiab lawv feem coob mus, es ib txhia ua kev cai raus dej tau 16 zaus … ib hnub xwb.”1
Wilford Woodruff tau hais txog lub ntsiab cai no hais tias: “Tib lub sij hawm thaum kuv hnov lub ntsiab cai no kuv lub siab xyiv fab heev. … Kuv twb mus tom ntej thiab tau ua kev cai raus dej rau tag nrho cov txheeb ze uas tau tas sim neej uas kuv muaj peev xwm xav txog. … Kuv xav hais haleluyas thaum kev tshwm sim no tau los qhia kom peb ua kev cai raus dej rau cov tuag. Kuv tau xav tias tsim nyog uas peb yuav xyiv fab txog Ntuj cov koob hmoov.”2
Vilate Kimball
Ib yam li Muam Woodruff, Vilate Kimball tau hnov txog kev cai raus dej rau cov tuag thaum nws tus txiv, Heber, nyob deb mus tshaj tawm txoj moo zoo. Nws sau ntawv rau Heber hais tias:
“Thawj Tswj Hwm Smith twb qhia ib yam tshiab thiab zoo kawg … uas ua rau cov ntseeg rov qab muaj siab ntseeg. Hais txog ua kev cai raus dej sawv cov tuag cev. Povlauj hais txog qhov no nyob hauv phau Ib Kauleethaus tshooj 15 nqe 29. Joseph tau txais kev tshwm sim uas piav ntxiv txog qhov no. … Cov ntseeg muaj cib fim ua kev cai raus dej sawv cev rau lawv cov txheeb ze uas tau tuag ua ntej txoj moo zoo tau tawm los; tsis hais lawv pog koob yawg koob los yog. … Thaum peb ua li ntawd peb sawv lawv cev; thiab muab cib fim rau lawv sawv rov los nyob hauv kev sawv rov los zaum thib ib. Nws hais tias yuav qhia txoj moo zoo rau lawv … tiam sis tsis muaj cov ntsuj plig uas muaj peev xwm ua kev cai raus dej. … Yog vim tau qhia tus txheej txheem no, cov dej los pheej muaj neeg nyob haud. Nyob hauv lub rooj sab laj no tej lub sij hawm muaj yim mus txog kaum tus Txwj Laug nyob hauv tus dej muab neeg ua kev cai raus dej. … Kuv xav sawv kuv Niam cev ua kev cai raus dej. Kuv twb xav tias kuv yuav tos koj los tsev ua ntej, tiam sis zaum kawg uas Joseph hais lus txog qhov no, nws ntuas kom txhua tus sawv thiab ua li no, thiab tso lawv cov phooj ywg dim kev ua qhev sai li sai tau. Yog li ntawd kuv xav tias lub lim tiam no kuv mam li ua, vim muaj cov neeg zej zog uas ua thiab. Tej tug neeg twb tau ua kev cai raus dej ntau zaus. … Yog li ntawd koj pom tias txhua tus yeej yuav muaj cib fim. Qhov no yog lus qhuab qhia zoo kawg puas yog?”3
Phebe Chase
Tom qab lawv ua lub dab ua kev cai raus dej tiav nyob hauv lub Tuam Tsev Nauvoo, lawv twb ua kev cai raus dej rau cov tuag nyob no thiab tsis ua hauv tus dej ntxiv. Phebe Chase, ib tug nyob hauv Nauvoo, sau ntawv rau nws niam txog lub tuam tsev, piav txog lub dab ua kev cai raus dej hais tias yog qhov chaw uas “peb yuav ua kev cai raus dej rau peb cov tuag thiab los ua neeg cawm seej nyob saum lub Roob Xi-oos.” Nws twb piav tias nyob hauv lub dab no, “Kuv tau ua kev cai raus dej sawv cev rau kuv txiv thiab tag nrho kuv cov phooj ywg uas tas sim neej lawm. … Tam sim no kuv xav paub seb koj txiv thiab koj niam lub npe hu li cas kuv thiaj tso tau lawv dim, vim kuv xav nplij cov Tuag lub siab. … Tus Tswv twb rov qab hais lus thiab muab ib tug txheej txheem puag thaum ub txum tim rov qab los.”4
Sally Randall
Thaum nws sau ntawv rau nws cov phooj ywg thiab tsev neeg txog kev cai raus dej rau cov tuag, Sally Randall tau xav txog nws tus tub George uas tau tso lub ntiaj teb no tseg lawm:
“Yeej yog ib lub sij hawm uas sim kuv lub siab heev thiab yeej zoo li kuv ntseeg tsis tau hais tias yuav muaj li no lawm, tiam sis … nws txiv twb tau ua kev cai raus dej rau nws thiab yog ib qho zoo kawg nkaus uas peb ntseeg thiab tau txais txoj moo zoo tag nrho raws li lawv qhia tam sim no thiab peb muaj cai ua kev cai raus dej sawv cev rau peb cov phooj ywg uas tuag lawm thiab cawm lawv dim txhua tus uas peb nrhiav tau tej xov xwm txog lawv.
“Kuv xav kom nej sau ntawv tuaj rau kuv txog tej lub npe ntawm txhua tus uas tas sim neej no lawm mus txog nej pog yawg thiab niam tais yawm txwv. Kuv xav ua tej yam kuv ua tau kom cawm kuv cov phooj ywg thiab kuv yuav zoo siab heev yog nej yuav los pab kuv vim yog ib txoj hauj lwm loj heev rau ib tug neeg ua xwb. … Nyaj nej yuav xav tias yog cov lus qhuab qhia txawv heev tiam sis nej yuav paub tias qhov no muaj tseeb.”5
Lub dab ua kev cai raus dej nyob hauv lub Tuam Tsev Ogden Utah nyob saum kaum ob tug twm nrob qaum.