lub Tsev Kaw Carthage sab nraud

Lub Tsev Kaw Carthage

Kaum Ib Hlis Ntuj 22–28

Lus Qhuab Qhia thiab Kev Khi Lus 135–136

Nws “Tau Ntaus Cim rau Nws Ntiag Tug Hauj Lwm thiab tej Yam Nws Ua Nrog Nws tus Kheej cov Ntshav”

Thaum koj kawm Lus Qhuab Qhia thiab Kev Khi Lus 135–36, tej zaum tus Tswv yuav tshooj koj lub siab kom pab koj ua raws li tej yam uas koj nyeem. Thaum Nws ua li ntawd, cia li sau ntawv txog tej yam uas Nws qhia koj.

Sau Ntawv txog Koj tej Kev Tshoov Siab

Lub Rau Hli Ntuj 27, 1844, thaum tav su, Joseph thiab Hyrum Smith rov qab nyob hauv lub tsev kaw, nrog John Taylor thiab Willard Richards. Nkawd ntseeg tias nkawd tsis tau txhaum cai hlo li, tiam sis lawv twb cia nkawd tus kheej raug ntes, vim cia siab tias Haiv Neeg Ntseeg hauv Nauvoo yuav tsis raug tsim txom. Zaum no tsis yog thawj zaug uas lub Koom Txoos cov yeeb ncuab tau muab tus Yaj Saub Joseph Smith kaw, tiam sis zaum no zoo li nws paub tias nws yuav tsis tawm mus thaum nws tseem ciaj. Nws thiab nws cov phooj ywg tau sim nplij lawv lub siab thaum lawv nyeem los ntawm Phau Ntawv Maumoos thiab hu tej zaj nkauj qhuas Vajtswv. Ces lawv hnov phom nrov, thiab dhau ob peb feeb xwb ces Joseph Smith thiab nws tus tij laug Hyrum lub neej twb tas lawm.

Tiam sis tsis yog qhov kawg ntawm Vajtswv txoj hauj lwm uas nkawd tau ua. Thiab tsis yog qhov kawg ntawm txoj kev muab Yexus Khetos txoj moo zoo Txum Tim Rov Qab Los. Yeej muaj hauj lwm ntxiv ua thiab kev tshwm sim ntxiv uas yuav pab coj lub Koom Txoos mus tom ntej. Kev tua tus Yaj Saub yeej tua tsis taus Vajtswv txoj hauj lwm.

Saib Saints, 1:521–52.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 135; 136:37–39

Joseph thiab Hyrum Smith tau khi lawv ob zaj lus tim khawv nrog lawv cov ntshav.

Xav seb koj yuav xav li cas yog tias koj nyob hauv Nauvoo thaum Joseph thiab Hyrum Smith raug tua tuag (saib Saints, 1:554–55). Koj yuav ua li cas kom to taub xwm txheej nyuaj siab heev no? Lus Qhuab Qhia thiab Kev Khi Lus 135, uas tau muab luam tawm peb lub hlis tom qab Joseph thiab Hyrum raug tua tuag, tej zaum tau pab. Tej zaum koj yuav xav sau lub cim rau tej lus uas ua rau koj to taub zoo thiab nplij koj lub siab. Koj yuav hais dab tsi rau ib tug uas nug hais tias, “Vim li cas Vajtswv yuav cia Nws tus Yaj Saub raug tua tuag?”

Kuj saib Lus Qhuab Qhia thiab Kev Khi Lus 5:21–22; 6:29–30; “Remembering the Martyrdom,” Revelations in Context, 299–306; Teachings of Presidents of the Church: Joseph Smith, 522–23, 529–40.

Lus Qhuab Qhia thiab Kev Khi Lus 135:3

Joseph Smith twb ua ntau tshaj lwm tus, rau tib neeg txoj kev cawm seej nyob hauv ntiaj teb no, tsuas yog Yexus tib leeg nkaus xwb.

Cia li xav txog cov koob hmoov uas tau los rau koj vim koj yog ib tug mej zeej hauv Yexus Khetos lub Koom Txoos. Cov koob hmoov no los muaj pes tsawg vim tus Yaj Saub Joseph Smith tau ua nws ntiag tug hauj lwm tiav lawm? Lus Qhuab Qhia thiab Kev Khi Lus 135:3 hais txog tej yam zoo kawg uas Joseph Smith tau ua nyob hauv 24 xyoos tom qab Thawj Zaug Ua Yog Toog. Tej yam no tau pab koj li cas kom koj paub Leej Txiv Saum Ntuj Ceeb Tsheej thiab Yexus Khetos? Xav seb koj puas sau ntawv txog koj zaj lus tim khawv txog tus Yaj Saub Joseph Smith. Leej twg xav hnov koj zaj lus tim khawv?

Lus Qhuab Qhia thiab Kev Khi Lus 136

Tus Tswv muab lus ntuas rau kuv thaum kuv “tsiv mus” hauv kuv lub neej.

Tom qab lawv raug ntiab tawm mus Nauvoo, Haiv Neeg Ntseeg yuav tsum taug kev mus ntev rau lub Hav Salt Lake, thiab ob peb puas mais thaum xub thawj los lawv maj mam mus thiab nyuaj siab kawg. Brigham Young, uas coj lub Koom Txoos vim nws yog tus Thawj Tswj Hwm ntawm Pawg Kaum Ob tug Tim Thawj, nws txhawj tsis paub tias Haiv Neeg Ntseeg puas muaj peev xwm taug kev ntxiv. Nws twb tsa ib qho chaw nyob tau ib ntus hu ua Winter Quarters thiab thov Vajtswv pab coj lawv. Tus Tswv tau muab kev tshwm sim teb nws, uas nyob hauv tshooj 136. Ntxiv rau lwm yam, kev tshwm sim no tau pab Haiv Neeg Ntseeg nco qab tias “lawv txoj kev coj zoo thaum lawv taug kev mus yeej tseem ceeb npaum li qhov chaw uas lawv xav mus” thiab “tau pab muab lawv txoj kev mus rau sab hnub poob hloov los ua ib lub sij hawm tseem ceeb rau lawv txhua tus sab ntsuj plig” (“This Shall Be Our Covenant,” Revelations in Context, 308).

Cia li xav txog qhov no thaum koj kawm tshooj 136. Koj nrhiav tau tej lus ntuas twg uas yuav pab koj muab ib txoj kev sim siab nyuaj heev hauv koj lub neej hloov los ua “ib lub sij hawm tseem ceeb rau … [koj] sab ntsuj plig”? Tej zaum koj kuj yuav xav seb tej lus ntuas ntawd yuav pab koj ua raws li tus Tswv lub siab nyiam hauv koj lub neej, ib yam li tej lus ntawd tau pab Haiv Neeg Ntseeg thaum ub taug txoj kev nyuaj mus rau Sab Hnub Poob.

Kuj saib “This Shall Be Our Covenant,” Revelations in Context, 307–14; Church History Topics, “Succession of Church Leadership,” ChurchofJesusChrist.org/study/history/topics.

Winter Quarters

Winter Quarters, los ntawm Greg Olsen

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 135:1, 3.Xwv kom pab nej tsev neeg to taub tias qhov uas Joseph Smith tau “ntaus cim rau nws ntiag tug hauj lwm thiab tej yam nws ua nrog nws tus kheej cov ntshav” txhais li cas, nej tsev neeg saib tau daim video “Testimony of the Book of Mormon” (ChurchofJesusChrist.org; kuj saib Jeffrey R. Holland, “Safety for the Soul,” Ensign los sis Liahona, Kaum Ib Hlis Ntuj 2009, 88–90). Muaj dab tsi hauv tej nqe no uas tshoov peb lub siab? Peb yuav ua li cas kom rau siab ntseeg ua raws li peb tej zaj lus tim khawv, txawm peb tsis tas txo peb txoj sia tseg.

Lus Qhuab Qhia thiab Kev Khi Lus 135:3.Xwv kom pab nej sib tham txog tej lus uas hais tias Joseph Smith “twb ua ntau tshaj lwm tus, rau tib neeg txoj kev cawm seej nyob hauv ntiaj teb no, tsuas yog Yexus tib leeg nkaus xwb,” xav seb nej puas yuav rov qab xav txog tej yam uas nej tsev neeg tau kawm txog Joseph Smith xyoo no. Tej zaum nej yuav xav siv tej daim duab los ntawm phau no kom pab lawv nco qab txog tej yam uas lawv tau kawm thiab caw lawv qhia tias lawv nyiam tej zaj dab neeg los sis tej lus qhia twg zoo tshaj. Vim li cas peb ris tus Yaj Saub Joseph Smith txiaj thiab ua tus Tswv tsaug rau tej yam uas tus Tswv ua dhau los ntawm nws? Tej zaum nej yuav xav saib daim video “Joseph Smith: The Prophet of the Restoration” (ChurchofJesusChrist.org).

Lus Qhuab Qhia thiab Kev Khi Lus 136.Thaum tus Tswv muab tshooj 136 tshwm sim, Haiv Neeg Ntseeg tab tom yuav taug ib txoj kev ntev uas nyuaj heev, raws li Brigham Young yuav coj lawv mus (saib tshooj 58, 60, thiab 62 nyob hauv Cov Dab Neeg Hauv Phau Lus Qhuab Qhia thiab Kev Khi Lus, 206–8, 211–16, 222–24). Thaum nej nyeem tshooj 136 ua ke, cia li xav txog tej yam nyuaj uas nej tsev neeg yuav raug. Peb nrhiav tej lus ntuas twg nyob hauv kev tshwm sim uas yuav pab peb txais tau tus Tswv txoj kev pab thiab lub hwj chim?

Lus Qhuab Qhia thiab Kev Khi Lus 136:4.Cov lus “taug kev ua raws li tag nrho tej kab ke ntawm tus Tswv” txhais li cas? Cov kab ke uas peb tau txais pab peb lub neej niaj hnub li cas?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Qhuas tus Txiv Neej,” Cov Nkauj Qhuas Vajtswv, zaj 13.

Kev Kawm Zoo Dua Ntxiv ntawm Yus Ib Leeg

Nrhiav tau Vajtswv txoj kev hlub. Thawj Tswj Hwm M. Russell Ballard tau qhia hais tias, “Txoj moo zoo yog ib txoj moo zoo ntawm kev hlub—kev hlub Vajtswv thiab kev hlub lwm tus” (“God’s Love for His Children,” Ensign, Tsib Hlis Ntuj 1988, 59). Thaum koj nyeem cov vaj lug kub, cia li xav seb koj puas sau ntawv los sau lub cim txog tej yam uas qhia tias Vajtswv hlub koj.

cov neeg phem hauv lub Tsev Kaw Carthage tawm tsam Joseph Smith thiab lwm tus

Tus uas Muaj Kev Hlub Loj Tshaj Plaws, los ntawm Casey Childs