“Kaum Ib Hlis Ntuj 15–21. Lus Qhuab Qhia thiab Kev Khi Lus 133–134: ‘Nej Yuav Tsum Npaj rau tus Nraug Vauv txoj Kev Los,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)

“Kaum Ib Hlis Ntuj 15–21. Lus Qhuab Qhia thiab Kev Khi Lus 133–134,” Los, Nrog Kuv Mus—Rau Ib Leeg thiab Tsev Neeg: 2021

Daim Duab

tsib tug hluas nkauj muaj tswv yim

Tus Nraug Vauv Los, los ntawm Elizabeth Gibbons

Kaum Ib Hlis Ntuj 15–21

Lus Qhuab Qhia thiab Kev Khi Lus 133–134

“Nej Yuav Tsum Npaj rau tus Nraug Vauv txoj Kev Los”

Thawj Tswj Hwm Henry B. Eyring tau qhia hais tias: “Txoj kev Txum Tim txoj moo zoo rov qab los pib thaum ib tug tub hluas nug ib los lus nug, thiab txoj kev txum tim yuav muaj tom ntej mus” (“Ib lub Tsev uas tus Tswv tus Ntsuj Plig Nyob Haud,” Ensign los sis Liahona, Tsib Hlis Ntuj 2019, 25).

Sau Ntawv txog Koj tej Kev Tshoov Siab

Thaum lub Koom Txoos tsuas muaj 19 lub hlis xwb, tus Yaj Saub Joseph Smith thiab lwm tus thawj coj hauv lub Koom Txoos twb npaj muab Vajtswv tej kev tshwm sim hauv hnub nyoog kawg no sau los ua ke hauv ib phau ntawv thiab luam 10,000 phau—yog ob npaug tej phau ntawv uas tau luam tawm rau Phau Ntawv Maumoos. Tiam sis, tej nqi kim heev ua rau lawv luam tsis tau npaum li no, thiab tej pawg neeg phem tawm tsam lub Koom Txoos lub tshuab luam ntawv thaum lawv tseem tab tom luam ntawv. Lawv twb muab tej phab ntawv tawg ya mus rau ub rau no, thiab txawm yog ib co Neeg Ntseeg tau khaws ib txhia, tsis muaj ib Phau Ntawv Lus Txib tag nrho uas tau dim.

Tshooj uas niaj hnub no peb hu ua tshooj 133 ntawm phau Lus Qhuab Qhia thiab Kev Khi Lus thaum xub thawj yog cov ntawv ntxiv tom kawg rau Phau Ntawv Lus Txib, yeej zoo li ib lub cim hais nthe tom qab tau luam tag nrho cov ntawv uas muaj tus Tswv tej kev tshwm sim. Tshooj no hais txog ib hnub uas yuav txiav txim thiab rov qab hais txog tej kev hu uas muaj hauv tag nrho tej kev tshwm sim hauv hnub nyoog kawg no: tso kev ua li neeg ntiaj teb tseg, lub cim txog qhov ntawd yog Npanpiloos; txhim tsa Xi-oos; npaj rau txoj Kev Los Zaum Ob; thiab tshaj tawm zaj lus no “rau txhua haiv neeg, txhua xeem neeg, txhua yam lus, thiab txhua yam neeg” (nqe 37). Txawm yog tsis tau muaj raws li tau npaj rau Phau Ntawv Lus Txib thaum xub thawj, kev tshwm sim no yog txoj kev nco txog thiab yog lus tim khawv hais tias yuav tsis muaj dab tsi uas yuav tab kaum tus Tswv txoj hauj lwm, “vim nws yuav thws nws txhais npab dawb huv … , thiab tag nrho cov neeg nyob thoob plaws lub ntiaj teb yuav pom lawv tus Vajtswv txoj kev cawm seej” (nqe 3).

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 133

Tej lus tseeb nyob hauv the Lus Qhuab Qhia thiab Kev Khi Lus yuav npaj kuv ua Vajtswv txoj hauj lwm.

Tej lub sij hawm ib phau ntawv muaj lus xaus uas rov qab hais ntsiab lus txog phau ntawd tej lub ntsiab tseem ceeb. Thaum xub thawj Tshooj 133 yog Phau Ntawv Lus Txib zaj lus xaus, thiab tej zaum yuav muaj nqis rau koj yog koj xav txog qhov no thaum koj nyeem tshooj no. Tus Tswv qhia tias tej ntsiab lus twg txog Nws txoj hauj lwm yog tej yam tseem ceeb? Nqe 57–62 qhia dab tsi rau koj txog tej yam uas tus Tswv xav kom nej ua hauv Nws txoj hauj lwm?

Lus Qhuab Qhia thiab Kev Khi Lus 133:1–19

Tus Tswv xav kom kuv npaj rau Nws txoj Kev Los Zaum Ob.

Tshooj 1, uas yog tus Tswv zaj lus piav txog Lus Qhuab Qhia thiab Kev Khi Lus, thiab tshooj 133, uas yog cov ntawv ntxiv tom kawg hauv phau luam thib ib, ob tshooj no yeej pib zoo ib yam vim muaj tus Tswv tej lus thov kom: “Cia li mloog, auj nej uas yog cov neeg ntawm kuv lub koom txoos” (Lus Qhuab Qhia thiab Kev Khi Lus 1:1; 133:1). Kev mloog txhais li cas? (Saib Phau Qhia txog Vaj Lug Kub, “Mloog,” scriptures.ChurchofJesusChrist.org). Tus Tswv xav kom koj mloog tej lus caw los sis tej kev txib twg nyob hauv Lus Qhuab Qhia thiab Kev Khi Lus 133:1–19? Koj txais kev tshoov siab ua dab tsi zoo dua ntxiv kom npaj rau Nws txoj kev los? Koj yuav ua li cas kom pab txhua tus nyob ib puag ncig koj kom npaj zoo?

Kuj saib Mathais 25:1–13; D. Todd Christofferson, “Npaj rau tus Tswv Txoj Kev Rov Qab Los,” Ensign los sis Liahona, Tsib Hlis Ntuj 2019, 81–84.

Lus Qhuab Qhia thiab Kev Khi Lus 133:19–56

Txoj Kev Los Zaum Ob yog ib lub sij hawm xyiv fab rau cov neeg ncaj ncees.

Thaum koj nyeem nyob hauv Lus Qhuab Qhia thiab Kev Khi Lus 133:19–32 txog tej xwm txheej uas yuav thaum muaj tus Cawm Seej txoj Kev Los Zaum Ob, tej zaum koj yuav xav txog tej yam uas tej xwm txheej no qhia rau koj txog tus Cawm Seej thiab Nws txoj hauj lwm. Koj kawm dab tsi hauv tej lus piav no uas yuav pab koj sab ntsuj plig?

Thaum koj nyeem tej lus piav txog tus Cawm Seej txoj kev rov qab los nyob hauv nqe 32–56, muaj dab tsi uas ua rau koj tos ntsoov hnub zoo kawg nkaus ntawd? Tej lus twg piav txog tus Tswv txoj kev hlub Nws cov neeg? Xav seb koj puas sau ntawv txog koj lub neej hais txog “tus Tswv txoj kev muaj siab zoo siab hlub, thiab tag nrho tej uas nws tau foom pub rau [koj] raws li nws txoj kev zoo” (nqe 52).

Lus Qhuab Qhia thiab Kev Khi Lus 134

“Vajtswv tau tsim tej tsoom fwv los pab tib neeg.”

Haiv Neeg Ntseeg thaum ub tej kev xav txog lub tsoom fwv los tsis yooj yim. Thaum Haiv Neeg Ntseeg raug yuam tawm ntawm Ciaj Ciam Av Jackson, Missouri, thaum xyoo 1833, lub tsoom fwv hauv zej zog los sis lub teb chaws tsis tau muab kev txhawb nqa los sis nyiaj them nqi rau lawv txawm lawv twb thov kev pab. Thiab thaum ntawd, ib txhia neeg uas tsis nyob hauv lub Koom Txoos twb xav tias tej lus qhia txog Xi-oos txhais tias Haiv Neeg Ntseeg tau xyeej txoj cai ntawm tej tsoom fwv hauv lub ntiaj teb no. Lus Qhuab Qhia thiab Kev Khi Lus 134 los tau muab sau vim xav piav meej txog lub Koom Txoos txoj kev xav txog lub tsoom fwv.

Cov mej zeej ntawm lub Koom Txoos yuav tsum xav li cas txog lawv tej tsoom fwv? Thaum koj kawm tshooj 134, xav seb koj puas sau ob daim: ib daim koj yuav sau txog tej lub ntsiab cai uas koj kawm txog lub tsoom fwv, thiab ib daim koj yuav sau ntawv txog cov pej xeem tej kev lav ris. Tej tswv yim no tau pab Haiv Neeg Ntseeg thaum ub li cas? Tej tswv yim no los yuav siv li cas hauv qhov chaw uas koj nyob?

Kuj saib Tej Nqe Kev Ntseeg 1:11–12; Gospel Topics, “Religious Freedom,” topics.ChurchofJesusChrist.org.

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 133:4–14.Qhov fab ntxeev rau Xi-oos yog Npanpiloos—ib lub nroog puag thaum ub uas nyob hauv cov vaj lug kub yog ib lub cim txog kev ua phem thiab kev ua qhev ntawm sab ntsuj plig (saib D. Todd Christofferson, “Come to Zion,” Ensign los sis Liahona, Kaum Ib Hlis Ntuj 2008, 37; Phau Qhia txog Vaj Lug Kub, “Npanpees, Npanpiloos,” scriptures.ChurchofJesusChrist.org). Puas muaj dab tsi uas nej tsev neeg yuav tsum ua, ntawm nej sab ntsuj plig, kom “tawm ntawm Npanpiloos mus” (nqe 5) thiab “cia li mus … tim thaj av Xi-oos”? (nqe 9).

Lus Qhuab Qhia thiab Kev Khi Lus 133:20–33.Thaum nej nyeem tej nqe no ua ke, tej zaum nej tsev neeg yuav xav kos duab txog tej yam uas lawv xav tias txoj Kev Los Zaum Ob yuav zoo li cas. Tej zaum nej yuav xav ntaus nkauj los sis hu ib zaj nkauj txog txoj Kev Los Zaum Ob, xws li “When He Comes Again” (Children’s Songbook, 82–83), thiab sib tham seb nej tsev neeg yuav ua li cas kom npaj rau Nws txoj Kev Los.

Lus Qhuab Qhia thiab Kev Khi Lus 133:37–39.Nej tsev neeg puas yuav nyiam nyeem tej nqe no “ua ib lub suab hais nrov nrov”? (nqe 38). Kev tshaj tawm txoj moo zoo nrog ib lub suab hais nrov nrov txhais li cas? Peb yuav qhia tej yam tseeb twg?

Lus Qhuab Qhia thiab Kev Khi Lus 134:1–2.Xwv kom pab nej tsev neeg to taub lub tsoom fwv tseem ceeb npaum li cas, tej zaum nej yuav xav sib tham txog tej lus nug zoo li no: Peb tsev neeg tau koob hmoov twg vim peb muaj tej kev cai? Peb lub teb chaws tau koob hmoov twg vim peb muaj tej kev cai? Tej zaum nej yuav xav kos duab txog nej lub teb chaws daim chij los sis cim ntsoov nqe kev ntseeg thib kaum ib thiab kaum ob.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Cia Vajtswv cov Me Nyuam Los,” Cov Nkauj Qhuas Vajtswv, zaj 17.

Kev Kawm Zoo Dua Ntxiv ntawm Yus Ib Leeg

Qhia cov lus qhuab qhia uas meej thiab yooj yim. Tus Tswv piav txog Nws txoj moo zoo thaum nws hais tej lus xws li “meej” thiab “yooj yim” (Lus Qhuab Qhia thiab Kev Khi Lus 133:57). Tej lus no qhia dab tsi rau koj txog koj txoj kev qhia txoj moo zoo rau koj tsev neeg?