Joseph Smith qhia hauv Nauvoo

Joseph Smith qhia hauv Nauvoo, 1840, los ntawm Theodore Gorka

Kaum Ib Hlis Ntuj 8–14

Lus Qhuab Qhia thiab Kev Khi Lus 129–132

“Thaum Peb Tau Ib txoj Koob Hmoov Twg Los ntawm Vajtswv Los, Twb Yog Los ntawm Qhov uas Peb Ua Raws Li txoj Kev Cai”

Tshooj 129–32 qhia txog ntau lub ntsiab cai uas muaj nqis, tsuas muaj ob peb lub uas tus txheej txheem no qhia txog. Koj nrhiav tau tej yam tseeb twg ntxiv?

Sau Ntawv txog Koj tej Kev Tshoov Siab

Muaj ib zaug Brigham Young hais txog Joseph Smith hais tias, “Nws txawj piav txog tej yam saum ntuj ceeb tsheej kom cov neeg hauv ntiaj teb to taub” (nyob hauv Teachings of Presidents of the Church: Joseph Smith, 499–500). Qhov nws hais no yeej muaj tseeb thaum xav txog tus Yaj Saub tej lus qhia hauv Nauvoo thaum tej xyoo 1840, muaj ib txhia uas tau sau cia hauv Lus Qhuab Qhia thiab Kev Khi Lus 129–32. Tus Cawm Seej zoo li cas? “Nws yog ib tug neeg zoo li peb.” Lub ntuj ceeb tsheej zoo li cas? “Tib txoj kev sib raug zoo uas muaj nyob nrog peb nim no kuj yuav muaj nyob nrog peb thaum ntawd” (Lus Qhuab Qhia thiab Kev Khi Lus 130:1–2), thiab peb txoj kev sib raug zoo tshaj plaws nrog peb tsev neeg nyob hauv lub ntiaj teb no, yog tias txoj cai yog muab khi ua ke, ces “yuav tij lim tag nrho ” nyob hauv lub neej tom ntej (Lus Qhuab Qhia thiab Kev Khi Lus 132:19). Tej yam tseeb zoo li no ua rau peb xav tias lub ntuj tseem ceeb nyob ze me ntsis—tseem muaj yeeb koob, tiam sis peb ncav tau.

Tiam sis tej lub sij hawm Vajtswv yuav hais kom peb ua tej yam uas nyuaj rau peb kawg nkaus peb thiaj xav tias peb ua tsis taus. Rau Haiv Neeg Ntseeg thaum ub, kev yuav ntau tus poj niam yog ib txoj lus txib zoo li ntawd. Kev txib kom yuav poj niam ntxiv yog ib txoj kev sim siab nyuaj heev rau Joseph Smith, nws tus poj niam Emma, thiab yuav luag txhua tus uas tau txais txoj lus txib no. Xwv kom lawv yuav nyiaj dhau kev sim siab no, tsis yog lawv yuav tsum muaj tej kev xav zoo txog txoj moo zoo xwb; lawv yuav tsum muaj kev ntseeg Vajtswv uas muaj zog tshaj lawv tej kev xav los sis lawv lub siab nyiam. Txoj kev txib no los tsis tsis tas ua hnub no, tiam sis tus yam ntxwv rau siab ntseeg ntawm cov uas tau ua raws li txoj lus txib no tseem muaj nqis. Thiab tus yam ntxwv ntawd tshoov peb lub siab thaum peb yuav tsum ua “tej kev txi los ntawm kev mloog lus” (Lus Qhuab Qhia thiab Kev Khi Lus 132:50).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 130–31

Joseph Smith tau qhia tej yam tseeb txog Pawg Vajtswv thiab “lub neej yuav los.”

Tej zaum koj yuav pom tias kev nyeem tshooj 130–31 yeej txawv ntawm kev nyeem lwm tshooj hauv phau Lus Qhuab Qhia thiab Kev Khi Lus. Nov yog vim tau sau tshooj 130–31 raws li cov ntawv uas William Clayton, Joseph Smith ib tug teev ntawv, sau txog tej yam uas nws hnov tus Yaj Saub qhia. Yog li ntawd, ob tshooj no yeej zoo li tej yam tseeb uas tau muab sau ua ke thiab tsis yog ob zaj kev tshwm sim uas tau hais thiab sau ntawv txog. Txawm li ntawd los, muaj tej lub ntsiab uas zoo ib yam nyob hauv tej yam tseeb no. Piv txwv hais tias, tej zaum koj yuav xav nyeem tshooj 130–131 thiab nug tej yam zoo li no hauv koj lub siab: Kuv kawm dab tsi txog Vajtswv? Kuv kawm dab tsi txog lub neej tom qab lub neej hauv lub ntiaj teb no? Kev txawj ntse no ua rau kuv lub neej hloov li cas?

Kuj saib “Our Hearts Rejoiced to Hear Him Speak,” Revelations in Context, 277–80.

Lus Qhuab Qhia thiab Kev Khi Lus 131:1–4; 132:7, 13–25

Leej Txiv Saum Ntuj Ceeb Tsheej tau qhib kev rau tsev neeg yuav nyob ua ke mus ib txhis li.

Ib yam tseeb uas nplij peb lub siab heev uas tus Yaj Saub Joseph Smith tau muab txum tim rov qab los yog qhov uas kev sib yuav thiab peb tsev neeg txoj kev sib raug zoo nyob tau mus ib txhis li. Dhau los ntawm Joseph Smith, tus Tswv tau muab cov kab ke thiab txoj cai kom muab kev sib raug zoo no nyob mus ib txhis txum tim rov qab los (saib Lus Qhuab Qhia thiab Kev Khi Lus 132:7, 18–19). Cia li xav txog tej kev sib raug zoo hauv koj tsev neeg uas koj muaj tam sim no los sis xav muaj thaum yav tom ntej thaum koj nyeem Lus Qhuab Qhia thiab Kev Khi Lus 131:1–4; 132:7, 13–15. Tej nqe no hloov koj txoj kev xav li cas thaum koj xav txog tej kev sib raug zoo no?

Tej lub sij hawm, lub ntsiab cai txog qhov uas peb tsev neeg yuav nyob mus ib txhis tsis nplij peb lub siab—ua rau peb txhawj, los sis tu siab, thaum peb tsev neeg tam sim no tsis yog raws li ib tsev neeg xilethi-aus. Thaum Thawj Tswj Hwm Henry B. Eyring txhawj txog ib qho xwm txheej nyob hauv nws tsev neeg, nws tau txais tej lus ntuas zoo los ntawm ib tug hauv Pawg Kaum Ob tug Tim Thawj: “Koj yuav tsum ua neej tsim nyog txais lub nceeg vaj xilethi-aus, koj thiaj yuav muaj ib tsev neeg uas zoo tshaj qhov koj xav” (nyob hauv “Ib lub Tsev uas tus Tswv tus Ntsuj Plig Nyob Haud,” Ensign los sis Liahona, Tsib Hlis Ntuj 2019, 25). Tej lus ntuas no yuav pab koj li cas nyob hauv koj tsev neeg?

Kuj saib Kristen M. Oaks, “To the Singles of the Church” (Church Educational System kev hawm Vajtswv rau cov tub hluas ntxhais hluas, Cuaj Hlis Ntuj 11, 2011), broadcasts.ChurchofJesusChrist.org.

ib tug txiv neej thiab ib tug poj niam nyob nraum lub Tuam Tsev Accra Ghana

Tej kev sib raug zoo hauv tsev neeg yuav nyob mus ib txhis dhau los ntawm cov kab ke hauv lub tuam tsev.

Lus Qhuab Qhia thiab Kev Khi Lus 132:1–2, 29–40

Kev yuav ntau tus poj niam los Vajtswv pom zoo tsuas yog thaum Nws txib ua li ntawd.

Leej twg uas tau nyeem Phau Qub tau xav txog qhov uas Anplaham, Ixaj, Yakhauj, Mauxes, thiab lwm tus txoj kev yuav ntau tus poj niam. Cov txiv neej zoo no puas deev luag poj? Los sis Vajtswv puas tau pom zoo rau tej yam lawv ua? Nrhiav tej lus teb nyob hauv Lus Qhuab Qhia thiab Kev Khi Lus 132:1–2, 29–40.

Kev sib yuav ntawm ib tug txiv neej thiab ib tug poj niam yeej yog Vajtswv txoj kev cai txog kev sib yuav (saib zaj lus piav txog tshooj rau Zaj Lus Tshaj Tawm Raug Cai 1; kuj saib Yakhauj 2:27, 30). Txawm li ntawd los, twb muaj tej lub sij hawm hauv keeb kwm thaum Vajtswv tau txib Nws cov me nyuam yuav ntau tus poj niam.

Tej xyoo thaum nyuam qhuav muab lub Koom Txoos txum tim rov qab los yeej yog ib lub sij hawm zoo li ntawd. Tom qab lawv txais txoj lus txib no, Joseph Smith thiab lwm tus Haiv Neeg Ntseeg hauv Hnub Nyoog Kawg tau yuav ntau tus poj niam. Yog koj xav kawm txog Tsoom Haiv Neeg Ntseeg hauv Hnub Nyoog Kawg thaum ub txoj kev yuav ntau tus poj niam, saib “Mercy Thompson and the Revelation on Marriage” (Revelations in Context, 281–93); Saints, 1:290–92, 432–35, 482–92, 502–4; “Plural Marriage in The Church of Jesus Christ of Latter-day Saints” (Gospel Topics, topics.ChurchofJesusChrist.org); “Why Was It Necessary for Joseph Smith and Others to Practice Polygamy?” (video, ChurchofJesusChrist.org).

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 130:2, 18–19; 132:13, 19.Nej yuav ua li cas kom siv tej nqe no pab nej tsev neeg tsom ntsoov rau tej yam uas yuav nyob ntev mus ib txhis li? Tej zaum nej yuav xav tso khoom hauv ib lub thawv los sis lub hnab ua ke, tso khoom uas sawv cev rau tej yam uas peb yuav muaj hauv lub neej tom ntej, raws li qhia hauv Lus Qhuab Qhia thiab Kev Khi Lus 130:2, 18–19; 132:19, xws li tej daim duab txog peb tsev neeg los sis cov vaj lug kub. Phau Lus Qhuab Qhia thiab Kev Khi Lus 132:13 qhia dab tsi rau peb txog tej yam ntawm lub ntiaj teb? Tej zaum qhov no yuav pab nej sib tham txog kev tsom ntsoov rau tej yam uas muaj nqis mus ib txhis li.

Lus Qhuab Qhia thiab Kev Khi Lus 130:20–21.Tej zaum nej yuav xav hu ib zaj nkauj txog kev ris txiaj, xws li “Suav Nej cov Koob Hmoov Ntau” (Cov Nkauj Qhuas Vajtswv, zaj 112), thiab sau ntawv txog cov koob hmoov uas nej tsev neeg tau txais vim nej ua raws li Vajtswv tej kev cai. Peb xav txais cov koob hmoov twg? Peb yuav ua li cas kom txais tau cov koob hmoov ntawd?

Lus Qhuab Qhia thiab Kev Khi Lus 131:1–4; 132:15–19.Daim video “Marriage Is Sacred” (ChurchofJesusChrist.org) tej zaum yuav pab nej tsev neeg sib tham txog tej yam tseeb no hauv tej nqe no. Tus Tswv xav li cas txog kev sib yuav? Txawm peb twb sib yuav los sis tsis tau yuav los—peb yuav ua li cas kom npaj sib yuav mus ib txhis li?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Families Can Be Together Forever,” Cov Nkauj Qhuas Vajtswv, 141.

Kev Kawm Zoo Dua Ntxiv ntawm Yus Ib Leeg

Nrhiav tej yam tseeb ntawm txoj moo zoo. Tej lub sij hawm tej yam tseeb ntawm txoj moo zoo los Vajtswv hais ncaj; tej lub sij hawm tej yam tseeb ntawd yog qhia los ntawm ib tug neeg tus yam ntxwv los sis ib zaj dab neeg. Thaum koj nyeem, cia li nug koj tus kheej hais tias, “Lawv qhia tej yam tseeb twg uas nyob mus ib txhis hauv tej nqe no?”

chav ua kev cai khi hauv lub Tuam Tsev Paris France

Ib chav ua kev cai khi hauv lub Tuam Tsev Paris France