cov neeg nyob hauv lub ntuj ntsuj plig

Joseph pom nws niam, nws txiv, thiab nws tus tij laug nyob hauv lub nceeg vaj xilethi-aus (Joseph Smith txoj Kev Ua Yog Toog Pom lub Nceeg Vaj Xilethi-aus, Robert Barrett).

Kaum Ib Hlis Ntuj 29–Kaum Ob Hlis Ntuj 5

Lus Qhuab Qhia thiab Kev Khi Lus 137–138

“Kev Ua Yog Toog Pom txoj Kev Txhiv cov Neeg Tuag Kom Dim”

Thawj Tswj Hwm M. Russell Ballard qhia hais tias: “Kuv caw nej los ua tib zoo nyeem thiab xav txog [Lus Qhuab Qhia thiab Kev Khi Lus 138]. Thaum nej ua li no, thov kom tus Tswv yuav foom koob hmoov rau nej es pab nej haj yam to taub thiab muaj kev ris txiaj rau Vajtswv txoj kev hlub thiab Nws txoj kev cawm seej thiab kev zoo siab rau Nws cov me nyuam” (“Kev Ua Yog Toog Pom txoj Kev Txhiv cov Neeg Tuag Kom Dim,” Ensign los sis Liahona, Kaum Ib Hlis Ntuj 2018, 73).

Sau Ntawv txog Koj tej Kev Tshoov Siab

Tej kev tshwm sim nyob hauv Lus Qhuab Qhia thiab Kev Khi Lus 137 thiab 138 los ob zaj no sib txawv ntev li 80 xyoo thiab 1,500 mais. Tus Yaj Saub Joseph Smith tau txais Tshooj 137 thaum xyoo 1836 nyob hauv lub Tuam Tsev Kirtland uas tseem tsis tau ua tiav, thiab Joseph F. Smith, lub Koom Txoos tus Thawj Tswj Hwm thib rau, tau txais tshooj 138 thaum xyoo 1918 nyob hauv Salt Lake City. Tiam sis, hais txog cov lus qhuab qhia, tsim nyog uas ob zaj kev tshwm sim no nyob ua ke. Ob zaj no teb tej lus nug txog Vajtswv cov me nyuam txoj hmoov nyob hauv lub neej tom ntej. Thiab ob zaj no yeej muaj nqis ntxiv thaum peb xav txog ob tug yaj saub uas tau txais kev tshwm sim no lub neej.

Joseph Smith txoj kev ua yog toog no tau pab nws to taub txoj hmoov nyob mus ib txhis ntawm nws tus tij laug Alvin, tus uas tau tuag rau xyoo ua ntej tau muab txoj cai ua kev cai raus dej txum tim rov qab los. Tej lus nug txog Alvin txoj kev cawm seej mus ib txhis twb nrog nraim Joseph txij thaum ntawd los. Joseph F. Smith txoj kev ua yog toog twb qhia tej yam tseem zoo kawg nkaus txog lub ntuj ntsuj plig—yeej yog kev tshwm sim nplij siab rau cov uas nyuaj siab vim neeg coob hauv lawv tsev neeg tau tas sim neej lawm. Joseph F. Smith txiv, Hyrum Smith, xiam thaum nws muaj 5 xyoos thiab nws niam , Mary Fielding Smith, xiam thaum Joseph muaj 13 xyoos. Thaum nws ua yog toog hauv xyoo 1918, nws twb tu siab vim nws 13 tug me nyuam tau tas sim neej lawm.

Muaj ntau yam uas tib neeg xav paub txog lub neej tom qab kev tuag nyob hauv ob zaj kev tshwm sim no. Tshooj 137 hais me ntsis txog tej lus nug no, thiab tshooj 138 qhib kev rau peb paub ntxiv. Nyob ua ke, ob zaj no ua tim khawv txog “Leej Txiv thiab Leej Tub txoj kev hlub zoo kawg nkaus tiag tiag” (Lus Qhuab Qhia thiab Kev Khi Lus 138:3).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 137

Txhua tus neeg yuav muaj cib fim xaiv kom txais tau lub yeeb koob xilethi-aus.

Cov Neeg Ntseeg Khetos hauv xyoo 1836 feem coob to taub tias yog ib tug neeg tuag es nws tsis tau ua kev cai raus dej—xws li Joseph Smith tus tij laug Alvin—ces tus ntawd yuav tsis mus saum ntuj ceeb tsheej. Tiam sis Joseph ua yog toog pom Alvin nyob hauv lub nceeg vaj xilethi-aus. Thaum koj nyeem tshooj 137, cia li xav seb koj kawm dab txog Leej Txiv Saum Ntuj Ceeb Tsheej, Nws txoj hau kev cawm seej, thiab lub nceeg vaj xilethi-aus.

Kuj saib Saints, 1:232–35.

Lus Qhuab Qhia thiab Kev Khi Lus 138:1–11, 25–30

Kev nyeem thiab kev xav txog vaj lug kub npaj kuv txais tau kev tshwm sim.

Tej lub sij hawm peb txais tau kev tshwm sim txawm peb tsis tau nrhiav kev kom txais tau. Tiam sis feem ntau, peb txais kev tshwm sim vim peb rau siab npaj kom txais tau. Thaum koj nyeem Lus Qhuab Qhia thiab Kev Khi Lus 138:1–11, 25–30, nco qab txog tej yam uas Thawj Tswj Hwm Joseph F. Smith tau ua thaum nws “lub qhov muag ntawm [nws] txoj kev to taub qhib” kom to taub tus Cawm Seej ntiag tug hauj lwm cawm tib neeg dim. Ces cia li xav seb koj yuav ua li cas kom coj raws li Thawj Tswj Hwm Smith tus yam ntxwv. Piv txwv hais tias, koj yuav hloov dab tsi thaum koj kawm vaj lug kub kom koj “xav txog vaj lug kub” ntxiv thiab “rov xav txog txoj kev txi theej txhoj tseem ceeb uas Vajtswv Leej Tub tau ua”? (nqe 1–2).

Nyob hauv nws zaj lus hu ua “Kev Ua Yog Toog Pom txoj Kev Txhiv cov Neeg Tuag Kom Dim” (Ensign los sis Liahona, Kaum Ib Hlis Ntuj 2018, 71–74), Thawj Tswj Hwm M. Russell Ballard tau hais lwm txoj kev uas Thawj Tswj Hwm Smith tau npaj txais kev tshwm sim no. Cia li xav seb koj tau npaj li cas kom txais tau tej yam hauv koj lub neej los sis txais tau tej yam thaum yav tom ntej.

Kuj saib “Ministry of Joseph F. Smith: A Vision of the Redemption of the Dead,” video, ChurchofJesusChrist.org.

kev kos duab txog Joseph F. Smith

Joseph F. Smith, los ntawm Albert E. Salzbrenner

Lus Qhuab Qhia thiab Kev Khi Lus 138:25–60

Peb ua hauj lwm cawm seej nyob ob sab ntawm daim ntaub thaiv.

Thawj Tswj Hwm Russell M. Nelson tau qhia hais tias, “Peb zaj lus rau lub ntiaj teb yeej yooj yim thiab ncaj ncees: peb caw tag nrho Vajtswv cov me nyuam nyob ob sab ntawm daim ntaub thaiv kom los cuag lawv tus Cawm Seej, txais cov koob hmoov ntawm lub tuam tsev dawb huv, muaj kev xyiv fab, thiab ua neeg tsim nyog txais txoj sia nyob mus ib txhis” (“Let Us All Press On,” Ensign los sis Liahona, Tsib Hlis Ntuj 2018, 118–19). Cia li xav txog qhov no thaum koj nyeem phau Lus Qhuab Qhia thiab Kev Khi Lus 138:25–60. Tej zaum koj yuav xav txog tej lus nug no:

• Koj kawm dab tsi los ntawm tej nqe no txog txoj kev ua hauj lwm cawm seej nyob hauv lub ntuj ntsuj plig? Vim li cas qhov uas koj paub tias lawv ua txoj hauj lwm no yog ib qho tseem ceeb? Tej nqe no pab ntxiv dag zog li cas rau koj txoj kev ntseeg tus Cawm Seej txoj Kev Theej Txhoj?

• Tej nqe no qhia dab tsi txog cov uas ua hauj lwm cawm seej nyob hauv lub ntuj ntsuj plig? Vim li cas peb yuav tsum to taub tias peb ua txoj hauj lwm cawm seej nyob hauv ob sab ntawm daim ntaub thaiv?

Kuj saib Dallin H. Oaks, “Tso Siab rau tus Tswv,” Ensign los sis Liahona, Kaum Ib Hlis Ntuj 2019, 26–29; “Susa Young Gates and the Vision of the Redemption of the Dead,” Revelations in Context, 315–22.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 137:1–5.Caw nej tsev neeg kos duab txog qhov uas lawv xav tias lub nceeg vaj xilethi-aus yuav zoo li cas raws li tej nqe no hais. Nej kawm dab tsi hauv tej nqe no uas pab nej xav nyob ntawd? Peb ua dab tsi no tam sim no kom npaj ua neej nyob hauv lub nceeg vaj xilethi-aus nrog Leej Txiv Saum Ntuj Ceeb Tsheej thiab Yexus Khetos?

Lus Qhuab Qhia thiab Kev Khi Lus 137:5–10.Yog nej xav kawm tias Joseph Smith xav li cas thaum nws pom ob peb tug los ntawm nws tsev neeg nyob ua ke nyob hauv lub nceeg vaj xilethi-aus, tej zaum nej tsev neeg yuav xav saib daim video “Ministry of Joseph Smith: Temples” (ChurchofJesusChrist.org). Tej zaum nej kuj yuav xav sib tham txog ib tug nej paub uas tau tas sim neej no ua ntej nws muaj cib fim ua kev cai raus dej. Phau Lus Qhuab Qhia thiab Kev Khi Lus 137:5–10 qhia dab tsi rau peb txog tus ntawd?

Lus Qhuab Qhia thiab Kev Khi Lus 138:12–24.Phau Lus Qhuab Qhia thiab Kev Khi Lus 138:12–24 qhia dab tsi txog cov neeg uas tus Cawm Seej mus xyuas hauv lub ntuj ntsuj plig? Lawv tau txais cov koob hmoov twg? Peb kawm dab tsi los ntawm lawv tus yam ntxwv?

Lus Qhuab Qhia thiab Kev Khi Lus 138:38–55.Tej nqe no piav txog cov uas Thawj Tswj Hwm Joseph F. Smith pom hauv lub ntuj ntsuj plig thiab tej xov xwm txog lawv. Tej zaum nej tsev neeg yuav xav sau ntawv txog nej cov poj koob yawm txwv uas nyob hauv lub ntuj ntsuj plig, thiab tej xov xwm txog lawv lub neej.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Search, Ponder, and Pray,” Children’s Songbook, 109.

Kev Kawm Zoo Dua Ntxiv

Kev xav txog cov vaj lug kub. Thawj Tswj Hwm David O. McKay hais tias kev xav tob yog “ib lub qhov rooj uas dawb ceev tshaj plaws uas cia peb yuav mus cuag tus Tswv kom nyob ntawm Nws” (Teachings of Presidents of the Church: David O. McKay [2003], 32).

Yexus Khetos nyob hauv lub ntuj ntsuj plig

Tus uas Yexus Txib Los, los ntawm Harold I. Hopkinson. Yexus Khetos txib cov ntsuj plig ncaj ncees kom qhia txoj moo zoo hauv lub ntuj ntsuj plig.