Kaum Ob Hlis Ntuj 13–19

Tsev Neeg: Ib zaj Lus Tshaj Tawm rau lub Ntiaj Teb

“Tsev Neeg Yog lub Ntsiab ntawm tus Tsim lub Tswv Yim”

Thawj Tswj Hwm Dallin H. Oaks hais tias: “Kuv ntseeg hais tias qhov uas peb xav li cas thiab siv li cas txoj kev tshaj tawm txog tsev neeg yog ib qho kev sim siab rau tiam neeg no. Kuv thov kom tag nrho Tsoom Haiv Neeg Ntseeg hauv Hnub Nyoog Kawg sawv ruaj ruaj thiab xaiv qhov yog” (“Txoj Hau Kev thiab txoj Kev Tshaj Tawm,” Ensign los sis Liahona, Kaum Ib Hlis Ntuj 2017, 31). Cia li xav txog tej lus thaum koj kawm txog zaj lus tshaj tawm txog tsev neeg lub lim tiam no.

Sau Ntawv txog Koj tej Kev Tshoov Siab

Ua ntej peb yug los, peb nyob hauv ib tsev neeg—yog tsev neeg ntawm peb Leej Txiv Leej Niam Saum Ntuj Ceeb Tsheej. Thaum txog lub sij hawm ncaim Nkawd mus, tej zaum peb twb txais kev nplij siab vim peb twb paub tias nyob hauv lub ntiaj teb, yuav muaj tsev neeg nyob hauv Vajtswv txoj hau kev. Tus txheej txheem nyob hauv lub ntiaj teb no yog raws li tus yam ntxwv zoo tag nrho uas muaj nyob saum ntuj ceeb tsheej.

Peb yeej tsis muaj ib tsev neeg hauv lub ntiaj teb uas zoo tag nrho thiab ib txhia tsis muaj ib tsev neeg zoo. Tiam sis zoo li Thawj Tswj Hwm Henry B. Eyring qhia, qhov uas muaj tsev neeg “muab lub cib fim zoo tshaj plaws rau Vajtswv cov me nyuam kom muaj niam muaj txiv hauv lub ntiaj teb no ib yam li lawv muaj saum ntuj ceeb tsheej” (“Coj Vajtswv Tsev Neeg Los Sib Sau Ua Ke,” Ensign los sis Liahona, Tsib Hlis Ntuj 2017, 20). Vim Vajtswv paub tias peb tej tsev neeg hauv lub ntiaj teb yuav tsis zoo tag nrho hiab tus yeeb ncuab mam li tawm tsam peb tsev neeg, Vajtswv thiaj li txib Nws Leej Tub uas Nws hlub kom txhiv peb dim thiab kho peb tsev neeg. Thiab Nws tau xa ib zaj lus tshaj tawm rau cov yaj saub hauv hnub nyoog kawg no kom tiv thaiv thiab txhawb nqa tsev neeg. Yog peb ua raws li cov yaj saub thiab muab siab rau ntseeg tus Cawm Seej, ces txawm yog tej tsev neeg hauv lub ntiaj teb tsis zoo npaum li peb tsev neeg nyob saum ntuj, peb tseem muaj kev cia siab rau peb tsev neeg—tsis hais hauv lub ntiaj teb thiab nyob saum ntuj los yog.

Tej lub Tswv Yim Kawm Vaj Lug Kub ntawm Yus Ib Leeg

“Tsev neeg yog lub ntsiab ntawm tus Tsim lub tswv yim.”

“Tsev Neeg: Ib zaj Lus Tshaj Tawm rau lub Ntiaj Teb” qhia meej txog tej tsev neeg. Tiam sis zaj lus no yeej qhia txog Vajtswv txoj hau kev cawm seej ib yam thiab. Ib txoj kev kawm zaj lus tshaj tawm no yog kev nrhiav tej yam uas zaj lus no qhia txog peb lub neej ua ntej peb yug los, lub neej no, thiab lub neej tom qab peb tuag. Koj kawm dab tsi thaum koj kawm txog zaj lus tshaj tawm li no? Qhov no pab koj li cas kom to taub vim li cas kev sib yuav thiab tsev neeg yeej tseem ceeb rau Vajtswv txoj hau kev?

Dallin H. Oaks, “Txoj Hau Kev thiab txoj Kev Tshaj Tawm,” Ensign los sis Liahona, Kaum Ib Hlis Ntuj 2017, 28–31.

“Ib tse neeg twg haj yam yuav ncav tau kev zoo siab hauv lawv lub neej no thaum tus Tswv Yexus Khetos cov lus qhuab qhia ua lawv lub hauv paus.”

Cia li xav txog nqe lus rau thiab xya ntawm zaj lus tshaj tawm txog tsev neeg hais tias ob nqe no yog tus txheej txheem rau ib tsev neeg txoj kev zoo siab. Thaum koj nyeem ob nqe no, cia li kawm txog tej lub ntsiab cai ntawm “tej kev sib yuav thiab tej tsev neeg uas kav ntev.” Ces xav txog ib tug hauv koj tsev neeg uas koj xav haj yam sib raug zoo. Koj txais kev tshoov siab ua dab tsi? Koj yuav ua li cas kom cia tus Cawm Seej pab koj?

Kuj saib Richard J. Maynes, “Establishing a Christ-Centered Home,” Ensign los sis Liahona, Tsib Hlis Ntuj 2011, 37–39; “What Matters Most,” video, ChurchofJesusChrist.org.

Kuv “yuav lav ris txog [qhov uas kuv ua li cas rau kuv tsev neeg] rau ntawm Vajtswv lub xub ntiag.”

Zaj lus tshaj tawm txog tsev neeg muaj tej koob hmoov zoo kawg uas Leej Txiv Saum Ntuj Ceeb Tsheej cog lus tias cov uas ua raws li Nws tej lus mam li txais. Thiab zaj lus no ceeb toom cov uas tsis ua raws li tej ntawd. Xav seb koj puas sau ntawv txog cov koob hmoov thiab cov lus ceeb toom uas koj nrhiav tau.

Koj ua li cas kom ua raws li Vajtswv tej lus ntuas hauv zaj lus tshaj tawm? Yog tias koj sawv ntawm Vajtswv lub xub ntiag hnub no, koj puas ntseeg tias koj yuav tsim nyog hais txog koj txoj kev sib raug zoo nrog koj tsev neeg? Koj yuav tsum ua dab tsi zoo dua ntxiv?

Kuj saib Amas 5:15–22; Lus Qhuab Qhia thiab Kev Khi Lus 42:22–25; 93:39–44.

Niam txiv yuav tsum cob nkawd cov me nyuam raws li kev hlub thiab kev ncaj ncees.

Kuv puas txais tau cov koob hmoov uas Vajtswv cog lus tias kuv mam txais yog tias kuv tsev neeg tsis zoo npaum li lwm tus li?

Txwj Laug D. Todd Christofferson qhia hais tias: “Qhov uas kuv hais qhov tseeb uas tseem ceeb txog kev sib yuav thiab tsev neeg tsis txhais hais tias kuv tsis pom tej kev txi thiab kev vam meej ntawm cov uas tsis muaj tsev neeg zoo li lwm tus. … Txhua leej txhua tus muaj txiaj ntsim; txhua tus muaj txuj ci; txhua tus pab tau kom muaj raws li Vajtswv txoj hau kev hauv txhua tiam neeg. Muaj ntau yam zoo, ntau yam uas tseem ceeb—tej lub sij hawm txhua yam uas yuav tsum ua tam sim no—uas yus ua tau txawm tsis muaj lub neej zoo li lwm tus. … Peb paub tseeb thiab ua tim khawv hais tias thaum kawg Yexus Khetos txoj Kev Theej Txhoj kov yeej txhua yam kev txom nyem thiab kev poob rau cov uas coj raws li Nws. Tsis muaj leej twg uas yuav txais tsawg dua li tej uas Vajtswv tau npaj rau Nws cov me nyuam.” (“Vim Li Cas Muaj Kev Sib Yuav, Vim Li Cas Muaj Tsev Neeg,”Ensign los sis Liahona, Tsib Hlis Ntuj 2015, 52).

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

“Qhov uas yus yog ib tug poj niam los yog ib tug txiv neej yog ib yam tseem ceeb ntawm ib tug neeg tus xeeb ceem thiab lub ntsiab, txawm hais tias nyob lub qub neej los yog, lub neej no los yog, lub neej nyob mus ib txhis li log yog.”Yog tias yuav pab nej tsev neeg sib tham txog cov lus qhuab qhia txog kev ua poj niam los txiv neej thiab kev poj niam nyiam poj niam thiab txiv neej nyiam txiv neej, ces tej yam no yuav pab: Dallin H. Oaks, “Qhov Tseeb thiab Txoj Hau Kev,” Ensign los sis Liahona, Kaum Ib Hlis Ntuj 2018, 25–28; Gospel Topics, “Same-Sex Attraction,” topics.ChurchofJesusChrist.org.

“Txoj kev zoo siab los saum ntuj los.”Xwv kom pab nej tsev nteeg pom tias tsev neeg tseem ceeb npaum li cas rau Leej Txiv Saum Ntuj Ceeb Tsheej txoj hau kev, tej zaum nej yuav xav sau lub neej ua ntej yug los hauv lub ntiaj teb, lub neej hauv lub ntiaj teb no, thiab lub neej tom qab tuag rau peb feem ntawm ib daim ntawv. Nrhiav hauv zaj lus tshaj tawm ua ke, thiab sau rau daim ntawv txog tej yam uas nej kawm txog peb feem ntawm Vajtswv txoj hau kev no. Vim li cas Vajtswv saib tsev neeg tseem ceeb heev?

“Tsev neeg nyob tau ua ke mus ib txhis li.”Tej zaum nej yuav xav saib daim video “Plan of Salvation—We’re Still a Family” (ChurchofJesusChrist.org). Nrhiav hauv zaj lus tshaj tawm txog tsev neeg kom kawm tej yam tseeb uas tus tub hluas hauv daim video to taub thiab tau pab nws muaj kev ntseeg.

“Ib tse neeg … yuav ncav tau kev zoo siab.”Yog xav sib tham txog qhov uas nej yuav ua li cas kom nej “tsev neeg … ncav tau kev zoo siab” tej zaum nej yuav xav hu ib zaj nkauj txog tsev neeg, xws li “Lub Tsev Zoo Li Ntuj Ceeb Tsheej” (Cov Nkauj Qhuas Vajtswv, zaj 139). Peb kawm dab tsi los ntawm zaj nkauj no thiab los ntawm zaj lus tshaj tawm txog tsev neeg uas ua rau peb tsev neeg tau kev zoo siab ntxiv? Peb yuav ua li cas kom ua tib zoo pab kom “tus Tswv Yexus Khetos cov lus qhuab qhia ua [peb tsev neeg] lub hauv paus”? Xav seb nej puas xaiv ib lub ntsiab uas nej xav ua zoo dua lub lim tiam no.

“Ntxiv dag zog rau tsev neeg kom thiaj ua tau lub xam khoo pawg neeg tseem ceeb tshaj plaws.”Dab Ntxwg Nyoog ua dab tsi kom tsev neeg hauv lub ntiaj teb qaug zog ntxiv? Peb yuav ua li cas kom ntxiv dag zog rau tej tsev neeg? Yog xav tau tswv yim, cia li saib Muam Bonnie L. Oscarson zaj lus “Cov uas Tiv Thaiv Kev Tshaj Tawm txog Tsev Neeg” (Ensign los sis Liahona, Tsib Hlis Ntuj 2015, 14–17).

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Lub Tsev Zoo Li Ntuj Ceeb Tsheej,” Cov Nkauj Qhuas Vajtswv, zaj 139.

Kev Kawm Zoo Dua Ntxiv ntawm Yus Ib Leeg

Nrhiav tau Vajtswv txoj kev hlub. Thawj Tswj Hwm M. Russell Ballard tau qhia hais tias, “Txoj moo zoo yog ib txoj moo zoo ntawm kev hlub—kev hlub Vajtswv thiab kev hlub lwm tus” (“God’s Love for His Children,” Ensign, Tsib Hlis Ntuj 1988, 59). Thaum koj nyeem zaj lus tshaj tawm txog tsev neeg, cia li xav seb koj puas sau ntawv los sau lub cim txog tej yam uas qhia tias Vajtswv hlub koj uas muaj nqis heev rau koj.