“Kaum Ob Hlis Ntuj 20–26. Christmas: Lub Txiaj Ntsim Zoo Tshaj Plaws uas Yog Vajtswv Leej Tub,” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Kaum Ob Hlis Ntuj 20–26. Christmas,” Los, Nrog Kuv Mus—Rau Ib Leeg thiab Tsev Neeg: 2021
Yexus Hnub Yug ntawm Tooj Liab, los ntawm J. Kirk Richards
Kaum Ob Hlis Ntuj 20–26
Christmas
Lub Txiaj Ntsim Zoo Tshaj Plaws uas Yog Vajtswv Leej Tub
Ib txoj kev kom pab koj tsom ntsoov rau tus Cawm Seej hauv lub caij Christmas no yog kev kawm “Tus Khetos uas Muaj txoj Sia Nyob: Cov Tim Thawj tej Lus Tim Khawv.” Tus txheej txheem no qhia tej yam uas koj ua tau kom kawm koj ib leeg thiab nrog koj tsev neeg txog cov yaj saub zaj lus tim khawv no.
Sau Ntawv txog Koj tej Kev Tshoov Siab
Thaum xyoo 1838, tus Yaj Saub Joseph Smith tau qhia tias, “Tej ntsiab cai uas ua lub hauv paus ntawm peb txoj kev ntseeg teev yog cov lus tim khawv ntawm cov Tim Thawj thiab cov Yaj Saub, hais txog Yexus Khetos, hais tias Nws tau tuag, raug muab faus, thiab tias Nws tau sawv rov los tom qab peb hnub tiav tas, thiab tau nce mus dua saum ntuj ceeb tsheej lawm; thiab tag nrho lwm yam uas hais txog peb txoj kev ntseeg teev ces yog kev txuas ntxiv rau qhov no xwb” (Teachings of Presidents of the Church: Joseph Smith, 49). Ntau xyoo tom qab ntawd, Thawj Tswj Hwm Russell M. Nelson hais tias “tus Yaj Saub zaj lus no yog qhov uas ua rau 15 tug yaj saub, cov pom tau, thiab cov txais kev tshwm sim xav sau thiab sau npe rau lawv zaj lus tim khawv kom nco txog tus Tswv txoj kev yug los 2000 xyoo dhau los. Zaj lus tim khawv tseem ceeb ntawd hu ua ‘Tus Khetos uas Muaj txoj Sia Nyob.’ Ntau tus mej zeej tau cim ntsoov tej lus tseeb uas nyob haud. Lwm tus tsis tshua paub tias muaj zaj lus ntawd. Thaum nej xav kawm ntxiv txog Yexus Khetos, kuv yaum kom nej kawm ‘Tus Khetos uas Muaj txoj Sia Nyob’” (“Txais Tau Yexus Khetos lub Hwj Chim rau Hauv Peb lub Neej,” Ensign los sis Liahona, Tsib Hlis Ntuj 2017, 40).
Vim peb yog Tsoom Haiv Neeg Ntseeg hauv Hnub Nyoog Kawg, peb xyiv fab heev vim peb txais tau txoj koob hmoov uas yog kev tshwm sim dhau los ntawm cov yaj saub thiab cov tim thawj hauv hnub nyoog no. Peb zoo siab rau lawv tej lus ntuas, tej lus ceeb toom, thiab tej lus txhawb nqa. Tiam sis, qhov tseem ceeb, peb tau koob hmoov los ntawm lawv zaj lus tim khawv txog Yexus Khetos—hauv lub caij Christmas thiab txhua xyoo. Tej lus no tsis yog tej lus zoo los ntawm cov kws sau ntawv los sis cov kws txawj hais lus los sis tej lub tswv yim los ntawm cov kws kawm vaj lug kub. Nov yog tej lus los ntawm cov uas Vajtswv tau xaiv, hu thiab tso cai kom ua “cov tim khawv tshwj xeeb rau Khetos lub npe mus thoob plaws lub ntiaj teb” (Lus Qhuab Qhia thiab Kev Khi Lus 107:23).
Tej lub Tswv Yim Kawm Vaj Lug Kub ntawm Yus Ib Leeg
“Tsis tau muaj leej twg uas tau pab cov neeg uas nyob hauv ntiaj teb no npaum li Nws tau pab.”
Koj xav li cas thaum koj nyeem Lukas 2:10–11 thiab thawj nqe lus ntawm “Tus Khetos uas Muaj txoj Sia Nyob”? Koj yuav hais li cas kom txhawb nqa tej lus no hais tias “Tsis tau muaj leej twg uas tau pab cov neeg uas nyob hauv ntiaj teb no npaum li Nws tau pab”? Cia li nrhiav tej lus tseeb nyob hauv “Tus Khetos uas Muaj txoj Sia Nyob” uas piav txog tus Cawm Seej lub hwj huam loj heev. Nws tau ua li cas kom pab koj thiab coj kev xyiv fab loj heev rau koj? (Lukas 2:10).
“Nws tau sawv hauv lub qhov ntxa los.”
Nyob hauv “Tus Khetos uas Muaj txoj Sia Nyob,” cov Tim Thawj ua tim khawv txog tus Cawm Seej txoj Kev Sawv Rov Los, thiab hais txog peb zaug usa tus Tswv tau tshwm sim rau neeg pom (saib nqe lus tsib). Xav seb koj puas yuav nyeem txog tej lub sij hawm no nyob hauv Yauhas 20–21; 3 Nifais 11–26; thiab Joseph Smith—Keeb Kwm 1:14–20. Koj kawm dab tsi txog tus Cawm Seej los ntawm Nws tej lus thiab tej yam Nws ua thaum Nws tshwm sim rau lawv pom no?
“Nws lub pov thawj hwj thiab Nws lub Koom Txoos muaj rov qab los.”
Thaum koj kawm phau Lus Qhuab Qhia thiab Kev Khi Lus xyoo no, koj tau muaj cib fim kawm ntxov txog qhov uas tus Cawm Seej “lub pov thawj hwj thiab Nws lub Koom Txoos muaj rov qab los.” Tej yam tseeb los sis tej ntsiab cai twg uas tau muab txum tim rov qab los muaj nqis rau koj? Xav seb koj puas yuav nyeem tej nqe vaj lug kub no uas qhia txog Kev Muab Txoj Moo Zoo Txum Tim Rov Qab Los: Lus Qhuab Qhia thiab Kev Khi Lus 1:17–23; 13; 20:1–12; 65; 110; 112:30–32; 124:39–42; 128:19–21. Xav seb tej yam tseeb ntawm txoj moo zoo uas tau muab txum tim rov qab los pab koj paub thiab teev tiam Yexus Khetos (saib Lus Qhuab Qhia thiab Kev Khi Lus 93:19).
“Muaj ib hnub twg uas Nws yuav rov qab los nyob hauv ntiaj teb.”
Christmas yog ib lub caij rau peb nco txog hnub uas Yexus Khetos yug los thiab xav txog hnub uas Nws yuav rov qab los. Koj kawm dab tsi txog Nws txoj kev rov los los ntawm nqe ua ntej nqe kawg hauv “Tus Khetos uas Muaj txoj Sia Nyob”? Tej zaum koj yuav xav nyeem, hu nkauj, los sis mloog tej zaj nkauj qhuas Vajtswv txog Christmas uas qhia txog Nws txoj Kev Los Zaum Ob, xws li “Ntiaj Teb Zoo Siab” los sis “Thaum Ib Tag Hmo Zaj Ntawd Tau Los” (Cov Nkauj Qhuas Vajtswv, zaj 88, 93).
“Nws yog qhov kaj, yog txoj sia, thiab kev cia siab rau lub ntiaj teb.”
Nyob hauv nqe lus kawg ntawm “Tus Khetos uas Muaj txoj Sia Nyob,” cia li kawm txog tej cwj pwm thiab tej lub npe ntawm tus Cawm Seej. Tej nqe vaj lug kub no yuav pab koj xav txog vim li cas Yexus Khetos yog “qhov kaj, yog txoj sia, thiab kev cia siab rau lub ntiaj teb”: Lukas 2:25–32; 1 Kauleethaus 15:19–23; Maulaunais 7:41; Lus Qhuab Qhia thiab Kev Khi Lus 50:24; 84:44–46; 93:7–10. Vim li cas Nws yog koj txoj kev kaj, txoj sia, thiab koj txoj kev cia siab? Muaj tej cwj pwm twg ntxiv los sis lwm lub npe ntxiv ntawm tus Cawm Seej uas muaj nqis rau koj?
Koj txoj kev kawm “Tus Khetos uas Muaj txoj Sia Nyob” tau pab txhawb nqa koj txoj kev ntseeg thiab kev hlub tus Cawm Seej li cas?
Txoj Kev Kaj ntawm lub Ntiaj Teb, los ntawm Howard Lyon
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
“Tus Khetos uas Muaj txoj Sia Nyob.”Yog xav pab nej tsev neeg to taub tej lus tseeb uas qhia txog tus Cawm Seej nyob hauv “Tus Khetos uas Muaj txoj Sia Nyob,” tej zaum nej yuav xav xaiv tej kab lus tseem ceeb thiab ua hauj lwm ua ke kom nrhiav los yog kos duab uas piav txog tej kab lus ntawd. Ces nej tso tau cov duab thiab tej kab lus rau hauv ib phau ntawv.
-
“Peb hais peb tej lus tim khawv.”Peb kawm dab tsi los ntawm “Tus Khetos uas Muaj txoj Sia Nyob” txog kev hais lus tim khawv? Tej zaum nej yuav xav sau nej zaj lus tim khawv txog Khetos kom nco txog tus Cawm Seej txoj kev yug los.
-
“Nws mus thoob plaws qhov txhia qhov chaw thiab ua hauj lwm zoo”Nej tsev neeg yuav ua li cas kom coj raws li tus Cawm Seej tus yam ntxwv pab lwm tus hauv lub caij Christmas no? Nej yuav ua li cas kom kev kaj siab lug thiab kev ua siab zoo nchav mus hauv nej tsev neeg thiab zej zog? Nej yuav ua li cas kom pab “kho cov neeg mob”? Tej zaum nej yuav nrhiav tswv yim nyob hauv tej daim video Christmas nyob hauv qhov app Txoj Moo Zoo cov Ntawv (medialibrary.ChurchofJesusChrist.org).
-
“Peb ua Vajtswv tsaug rau Nws lub txiaj ntsim zoo tshaj plaws uas yog Nws Leej Tub.”Peb tau txais tej txiaj ntsim twg vim peb muaj Yexus Khetos? Tej zaum nej tsev neeg yuav xav nrhiav tej lus teb nyob hauv “Tus Khetos uas Muaj txoj Sia Nyob” ces muab khoom plig qhwv uas yog lub cim txog tej txiaj ntsim los ntawm tus Cawm Seej. Tej zaum nej tsev neeg yuav xav qhib tej khoom plig ntawd thaum hnub Christmas los sis hauv ib lub lim tiam thiab nyeem vaj lug kub uas hais txog tej khoom plig ntawd. Nov yog tej nqe vaj lug kub uas nej nyeem tau, tiam sis nej tsev neeg tej zaum yuav nrhiav lwm nqe vaj lug kub ntau thiab: Lukas 2:10–14; 1 Petus 2:21; Mauxiyas 3:8; Amas 11:42–43; Lus Qhuab Qhia thiab Kev Khi Lus 18:10–12. Tej zaum nej yuav xav hu ib zaj nkauj txog tus Cawm Seej, xws li “He Sent His Son” (Children’s Songbook, 34–35), kom nrhiav tej lub txiaj ntsim uas los ntawm Nws.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Hark! The Herald Angels Sing,” Hymns, zaj 209.
Kev Kawm Zoo Dua Ntxiv ntawm Yus Ib Leeg
Tsom ntsoov rau tus Cawm Seej Qhov uas nej thov Vajtswv thiab nyeem ‘Tus Khetos uas Muaj txoj Sia Nyob’ yeej zoo ib yam li nej nyeem Mathais, Malakaus, Lukas, Yauhas, thiab cov yaj saub hauv Phau Ntawv Maumoos tej lus tim khawv. Qhov no yuav ua rau nej txoj kev ntseeg tus Cawm Seej loj tuaj thiab pab nej tsom ntsoov rau Nws” (M. Russell Ballard, “Rov Qab Los thiab Txais Tau,” Ensign los sis Liahona, Tsib Hlis Ntuj 2017, 65).
