“Ib Hlis Ntuj 4–10. Joseph Smith—Keeb Kwm 1:1–26: ‘Kuv Pom Ib tug Duab Ci,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Ib Hlis Ntuj 4–10. Joseph Smith—Keeb Kwm 1:1–26,” Los, Nrog Kuv Mus—Rau Ib Leeg thiab Tsev Neeg: 2021
Koog Ntoo Dawb Ceev los ntawm Greg K. Olsen
Ib Hlis Ntuj 4–10
Joseph Smith—Keeb Kwm 1:1–26
“Kuv Pom Ib tug Duab Ci”
Thaum koj nyeem Joseph Smith—Keeb Kwm 1:1–26, koj nrhiav tau tej zaj twg uas pab koj lub neej? Tej yam twg muaj nqis tshaj rau nej thiab nej tsev neeg?
Sau Ntawv txog Koj tej Kev Tshoov Siab
Phau Lus Qhuab Qhia thiab Kev Khi Lus yog ib phau txog Vajtswv txoj kev teb tib neeg tej lus thov: ntau zaj tshwm sim dawb ceev hauv phau no yog los ntawm kev teb tib neeg tej lus nug. Yog li ntawd tsim nyog uas peb pib kawm phau Lus Qhuab Qhia thiab Kev Khi Lus thaum peb xav txog txoj lus nug uas qhib tus Tswv tej kev qhia kev tshwm sim hauv hnub nyoog kawg no—yog txoj lus nug uas Joseph Smith nug hauv ib koog ntoo thaum xyoo 1820. “Txoj kev sib cav sib ceg thiab tej kev xav nrov nroo ntws” (Joseph Smith—Keeb Kwm 1:10) ua rau Joseph tsis paub txog kev teev ntuj thiab Vajtswv xav li cas txog nws lub siab; tej zaum koj yeej paub nws xav li cas. Muaj ntau lub tswv yim uas sib txawv thiab tej lub suab uas txawj ntxias hauv peb hnub nyoog, thiab thaum peb xav paub txog tej zaj no thiab nrhiav qhov tseeb, peb yeej ua tau zoo li Joseph ua. Peb yuav nug tau lus nug, kawm tau vaj lug kub, ua tib zoo xav, thiab thaum kawg thov Vajtswv. Thaum teb Joseph tej lus thov, ib tug duab ci nqis los saum ntuj los; Vajtswv Leej Txiv thiab Yexus Khetos tshwm sim thiab teb nws tej lus nug. Joseph zaj lus tim khawv txog qhov txuj ci tseem ceeb ntawd qhia tias leej twg “uas tsis muaj tswv yim yeej thov tau Vajtswv, thiab txais tau” (Joseph Smith—Keeb Kwm 1:26). Peb txhua tus txais tau, yog tsis txais kev ua yog toog pom saum ntuj, ces peb tseem yuav txais kev pom meej dua, vim qhov kaj los saum ntuj los yuav ci ci rau peb pom kev.
Tej lub Tswv Yim Kawm Vaj Lug Kub ntawm Yus Ib Leeg
Joseph Smith Yog tus Yaj Saub ntawm Kev Muab txoj Moo Zoo Txum Tim Rov Qab Los.
Lub hom phiaj ntawm Joseph Smith zaj keeb kwm yog kom peb “yuav tau tej pov thawj tseeb” vim muaj ntau zaus uas neeg qhia tsis tseeb txog Joseph (Joseph Smith—Keeb Kwm 1:1) Thaum koj nyeem Joseph Smith—Keeb Kwm 1:1–26, muaj dab tsi uas ua rau koj paub tseeb ntxiv txog qhov uas Vajtswv tau hu nws ua? Cia li nco txog tej pov thawj uas koj nrhiav tau uas qhia tias tus Tswv tau npaj Joseph Smith rau nws lub luag hauj lwm ua tus yaj saub. Thaum koj nyeem, tej zaum koj yuav xav sau ntawv txog koj tej kev xav txog Joseph Smith thiab nws zaj lus tim khawv.
Kuj saib Saints, 1:3–19.
Yog kuv muaj kev ntseeg thov, Vajtswv yuav teb.
Puas tau muaj sij hawm thaum koj “tsis [tau] muaj tswv yim” los sis koj tsis paub koj yuav tsum txiav txim li cas? (Joseph Smith—Keeb Kwm 1:13). Koj kawm dab tsi los ntawm Joseph Smith lub neej nyob hauv nqe 5–20? Cia li xav txog qhov uas koj xav tau laj lim tswv yim thiab xav to taub ntxiv, thiab xav txog qhov uas koj yuav ua li cas kom nrhiav qhov tseeb.
Kuj saib 1 Nifais 10:17–19; 15:6–11; Russell M. Nelson, “Tshwm Sim rau lub Koom Txoos, Tshwm Sim rau Peb lub Neej,” Ensign los sis Liahona, Tsib Hlis Ntuj 2018, 93–96.
Peb muaj peev xwm thov Vajtswv kom teb peb tej lus nug.
Vim li cas muaj ob peb zaj lus uas hais txog Thawj Zaug Ua Yog Toog Pom?
Nyob hauv nws lub neej, Joseph Smith tau sau ntawv txog lub sij hawm thaum nws nyob hauv Koog Ntoo Dawb Huv plaub zaug, feem ntau nws siv ib tug teev ntawv sau rau nws. Tsis tas li ntawd, ob peb zaj yog cov neeg uas sau ntawv thaum lawv hnov Joseph hais lus txog nws txoj kev ua yog toog. Txawm yog tej zaj no nyias txawv nyias me ntsis, nyob ntawm seb nws sau rau leej twg thiab thaum twg, tej zaj no feem ntau hais zoo ib yam. Thiab txhua zaj ntxiv tej yam me me uas pab peb to taub tej yam uas muaj los rau Joseph Smith, zoo ib yam li plaub phau Txoj Moo Zoo pab peb to taub tus Cawm Seej txoj kev qhuab qhia ntxiv.
Yog xav nyeem Joseph lwm zaj lus, saib “First Vision Accounts” (Gospel Topics, topics.ChurchofJesusChrist.org). Koj kawm dab tsi thaum koj nyeem tag nrho tej zaj lus no?
Txhawj Zaj Ua Yog Toog Pom yog lub sij hawm uas pib muab Yexus Khetos txoj moo zoo Txum Tim Rov Qab Los.
Joseph Smith ntseeg tias Vajtswv yuav teb nws tej lus thov, tiam sis nws yeej tsis tau paub tias qhov uas Vajtswv teb yuav hloov nws lub neej npaum li cas—thiab hloov lub ntiaj teb. Thaum koj nyeem txog Joseph zaj lus, cia li xav txog qhov uas Thawj Zaug Ua Yog Toog tau hloov koj lub neej li cas. Piv txwv hais tias, tej zaum koj yuav xav hais tej yam kom xaus kab lus no: “Vim tau muaj Thawj Zaug Ua Yog Toog, kuv paub tias …” Koj tau koob hmoov twg vim tau muaj Thawj Zaj Ua Yog Toog?
Kuj saib “Ask of God: Joseph Smith’s First Vision,” video, ChurchofJesusChrist.org; Saints, 1:14–19; Russell M. Nelson, “Mloog Nws Hais,” Ensign los sis Liahona, Tsib Hlis Ntuj 2020, 88–92.
Kuv muaj peev xwm ua raws nraim li tej yam uas kuv paub, txawm lwm tus xyeej kuv los yog.
Ib txoj koob hmoov uas los ntawm cov vaj lug kub yog qhov uas cov vaj lug kub hais txog cov txiv neej thiab cov poj niam uas coj yam ntxwv ntseeg Yexus Khetos thaum lawv raug teeb meem. Thaum Joseph Smith raug kev tsim txom vim yog nws txoj kev ua yog toog, nws xav tias nws zoo li tus Tim Thawj Povlauj, tus uas raug tsim txom vim nws kuj hais tias nws tau ua yog toog. Thaum koj nyeem Joseph zaj, muaj dab tsi uas txhawb nqa koj kom ua raws nraim li koj zaj lus tim khawv? Muaj leej twg ntxiv uas coj yam ntxwv—los ntawm cov vaj lug kub los sis cov neeg uas koj paub—uas txhawb koj lub siab kom ua raws nraim li tej yam uas muaj los ntawm sab ntsuj plig uas koj tau txais lawm?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Joseph Smith—Keeb Kwm 1:6.Peb yuav ua li cas thaum muaj kev tsis sib haum kom tsis txhob sib cav sib ceg zoo li cov neeg uas nqe no piav txog?
-
Joseph Smith—Keeb Kwm 1:11–13.Tej zaum qhov uas nej nyeem tej nqe no yuav ua rau nej tsev neeg xav qhia thaum twg ib nqe vaj lug kub tau tshoov lawv lub siab thiab ua rau lawv xav ua ib yam dab tsi.
-
Joseph Smith—Keeb Kwm 1:16–20.Thaum nej tsev neeg nyeem tej nqe no, xav seb puas muab daim duab uas txuas rau tus txheej txheem qhia no los yog ib daim duab ntxiv txog Thawj Zaug Ua Yog Toog (tej zaum nej tsev neeg yuav nyiam kos duab txog qhov no). Nej kuj saib tau daim video “Ask of God: Joseph Smith’s First Vision” (ChurchofJesusChrist.org). Tej zaum nej puav leej yuav xav sau ntawv txog tej yam tseeb uas nej kawm los ntawm kev ua yog toog no, ces ib leeg qhia rau ib leeg tias nej tau sau dab tsi. Tej zaum nov yog ib lub sij hawm zoo rau nej tsev neeg qhia tias lawv tau ua li cas kom paub tias Joseph Smith Thawj Zaug Ua Yog Toog muaj tseeb.
-
Joseph Smith—Keeb Kwm 1:17.Thaum Vajtswv tshwm sim rau Joseph Smith pom, Nws hu Joseph lub npe. Thaum twg es nej tsev neeg tau xav tias Leej Txiv Saum Ntuj Ceeb Tsheej paub lawv?
-
Joseph Smith—Keeb Kwm 1:21–26.Peb yuav ua li cas thaum tib neeg tsis ntseeg peb zaj lus tim khawv?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Joseph Smith Thawj zaj Thov Vajtswv,” Phau Nkauj Qhuas Vajtswv, zaj 11.
Tej lub Suab ntawm Kev Muab txoj Moo Zoo Txum Tim Rov Qab Los
Joseph Smith Tsev Neeg
Peb txhua tus tsev neeg yeej hloov peb lub neej, thiab hais txog qhov no los Joseph Smith yeej tsis txawv. Nws niam nws txiv tej kev ntseeg ntuj thiab tej yam lawv ua twb cog lub noob ntawm kev ntseeg uas qhib kev rau txoj Kev Muab txoj Moo Zoo Txum Tim Rov Qab Los. Nyob hauv Joseph phau ceev xwm txheej nws sau ntawv qhuas nkawd: “Tsis muaj lus piav tau kom qhia tias kuv ris Vajtswv txiaj npaum li cas vim nws muab niam thiab txiv zoo npaum li no.”1
Tej lus los ntawm nws niam, Lucy Mack Smith; nws tus kwv William Smith; thiab tus Yaj Saub nws tus kheej qhia peb me ntsis txog txoj kev teev ntuj nyob hauv tsev neeg Smith lub tsev.
Joseph Smith Tsev Neeg, los ntawm Dan Baxter
Lucy Mack Smith
“[Thaum xyoo 1802], kuv mob heev. … Kuv hais rau kuv tus kheej, kuv tsis tau npaj siab tuag vim kuv tsis paub Khetos tej kev, thiab zoo li kuv xav, muaj ib lub kwj ha tsaus ntuj thiab kho siab heev uas nyob nruab nrab kuv thiab Khetos uas kuv tsis muaj cuab kav sim hla. …
“Kuv ntsia ntsoov tus Tswv thiab tau taij thiab thov tus Tswv kom nws cawm kuv txoj sia kuv thiaj li tu tau kuv cov me nyuam thiab nplij kuv tus txiv lub siab; es kuv pw li ntawd tas ib hmo. … Kuv tau khi lus rau Vajtswv [tias] yog nws cia kuv ciaj sia ntxiv kuv yuav sim nrhiav kev teev ntuj uas yuav pab kuv ua hauj lwm rau nws zoo, txawm yog kuv nrhiav tau hauv phau Npaivnpaum los sis qhov twg los xij, txawm kuv yuav tsum nrhiav tau los ntawm ntuj ceeb tsheej los ntawm kev thov Vajtswv thiab kev ntseeg los yog. Thaum kawg ib lub suab tau hais lus rau kuv hais tias, ‘Nrhiav thiab koj yuav nrhiav tau, khob ces yuav qhib rau koj. Cia li txais kev nplij siab. Koj ntseeg Vajtswv; cia li ntseeg kuv ib yam thiab.’ …
“Txij thaum ntawd los kuv twb muaj zog zuj zus tuaj. Kuv tsis tau hais ntau txog kev teev ntuj txawm yog kuv xav txog qhov no tas li, thiab kuv xav tias kuv yuav tsum rau siab heev thaum twg kuv nrhiav tau ib tug neeg ntseeg Vajtswv heev uas paub Vajtswv tej kev kom qhia kuv txog tej yam ntawm lub Ntuj Ceeb Tsheej.”2
William Smith
“Kuv niam, uas yog ib tug poj niam ntseeg Vajtswv heev thiab xav paub zoo tias nws cov me nyuam tau zoo, nyob no thiab hauv lub neej tom qab lub neej no, twb siv txhua yam nws siv tau los ntawm nws txoj kev hlub, ua rau peb nrhiav kev cawm seej rau peb sab ntsuj plig, los yog (zoo li hais thaum ntawd) ‘txais tau kev teev ntuj.’ Nws yeej hais kom peb mus koom kev sib ntsib, thiab yuav luag tab nrho peb tsev neeg xav paub txog qhov no, thiab xav nrhiav qhov tseeb.”3
“Txij li kuv nco tau los peb tsev neeg yeej tau thov Vajtswv ua ke. Kuv nco qab ntsoov tias txiv tau khaws nws tsom iav hauv nws hnab tsho, … thiab thaum peb cov tub pom nws nrhiav nws tsom iav ntawd, peb paub tias twb txog sij hawm rau peb thov Vajtswv, thiab yog tias peb tsis pom ces niam yuav hais tias, ‘William,’ los sis tus twg uas tsis pom, ‘cia li npaj los thov Vajtswv.’ Tom qab thov Vajtswv tas peb tau hu ib zaj nkauj.”4
Joseph tus Laus thiab Lucy Smith twb qhia nkawd tsev neeg kom kawm vaj lug kub.
Joseph Smith
“Kuv hais tias, raws li kuv paub, nyob hauv nws lub neej [kuv txiv] yeej tsis tau ua ib yam dab tsi uas ua rau lwm tus hais tau tias nws tsis muaj lub siab dawb. Kuv hlub kuv txiv thiab nco txog nws; thiab txoj kev nco txog tej yam zoo nws ua, los ua rau kuv xav mus xav los; thiab nws tej lus siab zoo rau kuv los zoo li kuv twb sau cia rau hauv kuv lub siab lawm. Kuv txoj kev xav txog nws lub neej los kuv saib yog tej yam dawb huv, tej kev xav uas yeej nyob nraim hauv kuv lub siab, vim kuv twb pom txij thaum kuv yug los txog tam sim no. … Kuv niam kuj yog ib tug zoo kawg, thiab tus zoo tshaj los ntawm tag nrho cov poj niam.”5
Thawj Zaug Ua Yog Toog Qhib Kev Muab txoj Moo Zoo Txum Tim Rov Qab Los, los ntawm Michael Bedard