tsev neeg kev nyeem vaj lug kub

Kaum Ob Hlis Ntuj 28–Ib Hlis Ntuj 3

Lus Qhuab Qhia thiab Kev Khi Lus 1

“Cia Li Mloog, Auj Nej cov Neeg”

Thaum xav txog phau Lus Qhuab Qhia thiab Kev Khi Lus 1 cia li xav tias yog tus Tswv zaj lus piav txog phau ntawv no uas yog Nws tej kev tshwm sim hauv hnub nyoog kawg. Nws xav kom koj paub dab tsi txog phau Lus Qhuab Qhia thiab Kev Khi Lus? Cia li xav txog txoj lus nug no, thiab sau ntawv txog tej kev tshoov siab uas koj txais thaum koj nyeem tshooj 1.

Sau Ntawv txog Koj tej Kev Tshoov Siab

Thaum lub Kaum Ib Hlis Ntuj xyoo 1831, Yexus Khetos lub Koom Txoos uas tau muab txum tim rov qab los tsuas muaj ib xyoos thiab ib nrab xwb. Txawm yog cov ntseeg coob zuj zus tuaj los, cov nyob hauv lub koom txoos tseem yog ib co neeg uas neeg tsis paub txog nyob hauv ib qhov chaw uas tsis tshua muaj neeg nyob, thiab ib tug yaj saub uas muaj nees nkaum tawm xyoo xwb yog tus uas coj lawv. Tiam sis Vajtswv xav tias cov neeg no yog Nws cov tub qhe thiab Nws cov tub xa xov, thiab Nws xav muab tej kev tshwm sim uas Nws tau muab rau lawv tshaj tawm rau lub ntiaj teb.

Lus Qhuab Qhia thiab Kev Khi Lus tshooj 1 yog tus Tswv zaj lus qhia ua ntej rau tej kev tshwm sim uas tau muab sau ua ke, thiab tshooj no qhia meej tias txawm yog cov mej zeej ntawm lub Koom Txoos los muaj tsawg xwb, zaj xov uas Vajtswv xav kom Nws Haiv Neeg Ntseeg qhia los yeej tsis yog ib yam me. Yog “lub suab ceeb toom” rau “cov neeg uas nyob hauv lub ntiaj teb,” uas qhia kom lawv hloov siab lees txim thiab kom lawv tsa Vajtswv “txoj kev khi lus uas kav ib txhis” (nqe 4, 8, 22). Cov tub qhe uas hais zaj xov no yog “cov neeg qaug zog thiab cov neeg dog dig,” tiam sis cov tub qhe uas txo hwj chim yeej yog cov uas Vajtswv xav tau—thaum ntawd thiab tam sim no—kom coj Nws lub Koom Txoos “tawm hauv txoj kev pom tsis tseeb thiab qhov tsaus ntuj los” (nqe 23, 30).

Yog xav kawm zaj keeb kwm ntxiv txog phau Lus Qhuab Qhia thiab Kev Khi Lus 1, saib phau Saints, 1:140–43.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 1

Tus Tswv caw kuv “tshawb xyuas tej lus txib no.”

Ib zaj lus piav yeej qhia yus paub txog ib phau ntawv. Zaj no hais txog ib phau ntawv tej lub ntsiab thiab hom phiaj thiab pab tib neeg npaj nyeem phau ntawv. Thaum koj nyeem tshooj 1—tus Tswv zaj lus rau phau Lus Qhuab Qhia thiab Kev Khi Lus (nqe 6)—cia li nrhiav tej lub ntsiab thiab tej hom phiaj uas tus Tswv qhia yog vim li cas Nws qhia Nws tej kev tshwm sim. Koj kawm dab tsi los ntawm tshooj 1 uas yuav pab koj ntau tshaj thaum koj kawm phau Lus Qhuab Qhia thiab Kev Khi Lus? Piv txwv hais tias, tej zaum koj yuav ua tib zoo xav txog qhov uas kev “mloog tus Tswv lub suab” hauv tej kev tshwm sim no (nqe 14) los yog kev “tshawb nrhiav tej lus txib no” (nqe 37) txhais li cas.

Kuj saib zaj lus piav txog phau Lus Qhuab Qhia thiab Kev Khi Lus.

Lus Qhuab Qhia thiab Kev Khi Lus 1:1–6, 23–24, 37–39

Vajtswv hais lus los ntawm Nws cov tub qhe, thiab yeej yuav muaj raws li Nws tej lus.

Tshooj 1 pib thiab xaus thaum Vajtswv tshaj tawm tias Nws hais lus los ntawm cov tub qhe uas Nws tau xaiv (saib nqe 4–6, 23–24, 38). Cia li sau ntawv txog tej yam uas koj kawm los ntawm kev tshwm sim no txog tus Tswv thiab Nws lub suab. Koj kawm dab tsi txog tus Tswv cov tub qhe? Thaum twg koj tau hnov tus Tswv lub suab los ntawm Nws cov tub qhe? (saib nqe 38).

tuas hauv lub tuam rooj sab laj

Cov yaj saub thiab cov thwj tim qhia peb txog Vajtswv cov lus txib.

Lus Qhuab Qhia thiab Kev Khi Lus 1:3, 24–28, 31–33

Yog tias kuv txo hwj chim, tus Tswv tej lus qhuab ntuas pab tau kuv hloov siab lees txim.

Cia li saib tias nyob hauv nqe 3 thiab nqe 24–28, tus Tswv tau hais tias Nws yuav qhia txog cov neeg tej kev txhaum thiab tej lawv ua tsis yog kom txhua tus paub. Ib zaug yog qhov uas ua rau lawv raug kev tu siab thiab kev mob siab, thiab ib zaug yog qhov uas pab qhia lawv xwb. Vim li cas ob lub sij hawm no sib txawv? Cia li xav seb koj ua li cas thaum koj kawm txog koj tej kev txhaum thiab tej kev qaug zog. Koj nrhiav tau tej yam twg nyob hauv nqe 24–28 uas pab tau koj ua qhov yog? Tej nqe no, nrog rau nqe 31–33, qhia dab tsi rau koj txog qhov uas tus Tswv xav li cas txog koj tej kev qaug zog thiab tej kev txhaum?

Kuj saib Paj Lug 3:11–12; Ethaws 12:27; Maulaunais 6:8.

Lus Qhuab Qhia thiab Kev Khi Lus 1:12–30, 35–36

Tus Tswv muab Nws txoj moo zoo txum tim rov qab los kom pab kuv kov yeej tej teeb meem hauv hnub nyoog kawg no.

Txawm yog tshooj 1 ceeb toom txog tej kev kub ntxhov thaum yav tom ntej, tshooj no kuj muaj ib zaj lus uas nplij yus lub siab: “Kuv uas yog tus Tswv, vim kuv paub tej kev puas tsuaj uas yuav los rau cov neeg hauv lub ntiaj teb, kuv thiaj hu kuv tus tub qhe Joseph Smith, tus Hluas, thiab hais lus saum ntuj ceeb tsheej los rau nws” (nqe 17).

Cia li xav txog tej kev puas tsuaj puas ntsoog uas tus Tswv ceeb toom txog (saib, ua piv txwv, nqe 13–16, 35). Koj pom tej kev puas tsuaj puas ntsoog twg ntxiv nyob hauv lub ntiaj teb niaj hnub no—los yog nyob hauv koj lub neej? Nqe 17–30 piav txog tej yam uas tus Tswv tau ua kom pab nej thaum nej tos tej kev puas tsuaj puas ntsoog no. Cia li xav seb puas sau ntawv txog tej yam uas koj nrhiav tau.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 1:1–6, 37–39.Xwv kom pib sib tham txog tus Tswv tej lus ceeb toom, tej zaum nej yuav xav hais txog tej lus ceeb toom uas peb txais hais txog tej xwm txheej uas peb pom tsis taus—xws li kev nplua nplua, cua daj cua dub, los yog ib lub tsheb uas tuaj. Tej lus piv txwv no qhia dab tsi rau peb txog tus Tswv tej lus ceeb toom? Raws li Lus Qhuab Qhia thiab Kev Khi Lus 1:1–6, 37–39 hais, tus Tswv ceeb toom peb li cas? Tsis ntev tas los no Nws tau ceeb toom peb txog dab tsi? Tej zaum nej yuav xav saib los yog nyeem tej zaj los ntawm lub tuam rooj sab laj tsis ntev los no thiab nrhiav tej lus piv txwv txog Vajtswv “lub suab ceeb toom.”

Lus Qhuab Qhia thiab Kev Khi Lus 1:16.Txoj kev “tsa [tus Tswv] txoj kev ncaj ncees” txhais tau li cas? Peb yuav ua li cas kom paub tias peb ua li ntawd, thiab tsis taug “[peb] tus kheej txoj kev xwb”?

Lus Qhuab Qhia thiab Kev Khi Lus 1:30.Qhov uas hais tias lub Koom Txoos “tseeb thiab muaj sia zees” txhais tau li cas? Xwv kom pab nej tsev neeg xav txog txoj lus nug no, tej zaum nej yuav xav muab daim duab txog tej uas ciaj thiab tej uas tsis ciaj rau lawv saib. Tej zaum nej kuj yuav xav sib tham seb nej tsev neeg yuav ua li cas kom pab “coj [lub Koom Txoos] no tawm hauv txoj kev pom tsis tseeb thiab qhov tsaus ntuj los.”

Lus Qhuab Qhia thiab Kev Khi Lus 1:37.Cia li xav seb nej tsev neeg yuav npaj li cas ua ke kom paub tias nej yuav “tshawb xyuas tej lus txib no” hauv phau Lus Qhuab Qhia thiab Kev Khi Lus xyoo no. Nej yuav ua li cas kom kawm vaj lug kub txhua hnub hauv nej tsev neeg? Tej lub tswv yim twg txog kev kawm ntawv yuav pab nej kawm los ntawm cov vaj lug kub? (Saib “Tej lub Tswv Yim rau Tsev Neeg Kev Kawm Vaj Lug Kub” nyob rau ntawm kev pib zaj no.)

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Follow the Prophet,” Children’s Songbook, 110–11, qhov tseem ceeb yog nqe kawg.

Kev Kawm Zoo Dua Ntxiv ntawm Yus Ib Leeg

Nrhiav Yexus Khetos Lub ntsiab ntawm cov vaj lug kub yog kev ua tim khawv txog tus Cawm Seej thiab Nws txoj moo zoo. Thaum koj nyeem phau Lus Qhuab Qhia thiab Kev Khi Lus 1, cia li xav seb puas sau lus cim los sis nco txog tej nqe uas qhia koj tej yam txog Yexus Khetos.

Phau Ntawv Lus Txib

Cov neeg ntseeg tau muab tej kev tshwm sim rau lub Koom Txoos uas txum tim rov qab los los sau rau hauv Book of Commandments (Phau Ntawv Lus Txib).