Maulaunais tshwm sim rau Joseph Smith pom

Nws Hais Kuv lub Npe, los ntawm Michael Malm

Ib Hlis Ntuj 11–17

Lus Qhuab Qhia thiab Kev Khi Lus 2; Joseph Smith—Keeb Kwm 1:27–65

“Cov Me Nyuam lub Siab Yuav Tig Mus rau Lawv Txiv Yawg”

Tus Vaj Ntsuj Plig Dawb Huv muaj peev xwm qhia koj txhua lub sij hawm koj nyeem vaj lug kub—tsis hais tej nqe vaj lug kub uas koj twb tau nyeem ntau zaus tas los lawm. Yog li ntawd cia li qhib siab rau tej tswv yim thiab tej kev tshoov siab tshiab.

Sau Ntawv txog Koj tej Kev Tshoov Siab

Twb yog peb xyoos tom qab Vajtswv Leej Txiv thiab Nws Leej Tub, Yexus Khetos, tau tshwm sim rau Joseph Smith nyob hauv koog ntoo, tiam sis txij thaum ntawd los Joseph tsis tau txais tej kev tshwm sim ntxiv. Nws pib xav paub tus Tswv xav li cas txog nws lawm. Ib yam li peb txhua tus, nws twb tau ua yuam kev, thiab nws xav tias nws raug txim vim nws ua li ntawd. Tiam sis Vajtswv tseem muaj ib txoj hauj lwm rau nws ua. Thiab txoj hauj lwm uas Vajtswv hu Joseph ua yeej txuas rau qhov uas Vajtswv hais kom peb txhua tus ua. Joseph yuav ua rau Phau Ntawv Maumoos tawm los; es Vajtswv hais kom peb ua dab tsi nrog Phau Ntawv Maumoos? Joseph yuav txais cov yawm sij pov thawj hwj kom muab cov me nyuam lub siab tig mus rau lawv cov txiv yawg; peb ua li cas kom muab peb lub siab tig mus rau peb cov poj koob yawm txwv? Tus Tswv tau qhia Joseph txog qhov uas tsis ntev yuav muaj raws li cov yaj saub tau qhia txog tej uas yuav muaj los yav tom ntej; yog li ntawd peb yuav tsum ua li cas kom pab muaj raws li tej ntawd? Thaum peb koom tes ua Vajtswv txoj hauj lwm, peb yeej yuav raug kev tawm tsam thiab kev tsim txom, ib yam li tus Yaj Saub raug. Tiam sis peb muaj tau kev ntseeg hais tias tus Tswv yuav muab peb ua cuab yeej hauv Nws txhais tes, ib yam li Nws tau ua rau Joseph.

Kuj saib Saints, 1:20–48.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Joseph Smith—Keeb Kwm 1:27–33

Vajtswv muaj ib txoj hauj lwm rau kuv ua.

Thaum koj nyeem Joseph Smith—Keeb Kwm 1:27–33, cia li xav txog qhov uas Vajtswv muaj ib txoj hauj lwm rau koj ua, ib yam li Nws muaj rau Joseph Smith. Cia li xav txog Thawj Tswj Hwm Russell M. Nelson tej lus no: “Thov nej Leej Txiv Saum Ntuj Ceeb Tsheej, los ntawm Yexus Khetos lub npe, hais tias Nws xav li cas txog nej thiab nej lub luag hauj lwm hauv lub ntiaj teb no. Yog tias nej thov tiag tiag, ces thaum sij hawm dhau mus tus Ntsuj Plig yuav ntxhi lus rau nej txog qhov tseeb uas yuav hloov nej lub neej. … Kuv cog lus rau nej tias thaum nej pom me ntsis tias nej Leej Txiv Saum Ntuj Ceeb Tsheej saib nej li cas thiab Nws tso siab rau nej ua li cas rau Nws, nej lub neej yeej yuav hloov kiag!” (“Becoming True Millennials” [kev hawm Vajtswv uas tshaj tawm rau cov neeg hluas thoob ntiaj teb, Ib Hlis Ntuj 10, 2016], broadcasts.ChurchofJesusChrist.org).

Tej zaum koj yuav xav zoo ib yam li Joseph xav nyob hauv nqe 28–29. Koj kawm dab tsi los ntawm Joseph tus yam ntxwv yog koj ua tej yam tsis tsim nyog ua thaum Vajtswv tau hu koj ua ib txoj hauj lwm?

Joseph Smith—Keeb Kwm 1:34–65

Phau Ntawv Maumoos muaj “txhij txhua ntawm Txoj Moo Zoo uas kav ib txhis.”

Thaum koj nyeem Joseph Smith—Keeb Kwm 1:34–65, cia li xav txog tej yam hauv tej nqe no uas tseem ceeb rau koj yog tias koj tsis tau hnov txog Phau Ntawv Maumoos ua ntej. Vim koj yog ib tug ntseeg, vim li cas zaj no yog ib zaj tseem ceeb rau koj zaj lus tim khawv txog Phau Ntawv Maumoos?

Cia li xav txog qhov uas Phau Ntawv Maumoos ua li cas kom muaj raws li tej uas yuav muaj los yav tom ntej nyob hauv Yaxayas 29:4, 11–18.

Joseph Smith—Keeb Kwm 1:36–41

Qhov uas tau muab txoj moo zoo Txum Tim Rov Qab Los yeej yog raws li tej lus qhia puag thaum ub txog tej uas yuav muaj los yav tom ntej.

Maulaunais tau hais rau Joseph txog ob peb zaj qhia tej uas yuav muaj los yav tom ntej nyob hauv Phau Qub thiab Phau Tshiab, xws li Yaxayas 11; Tes Hauj Lwm 3:22–23; thiab Yau-ees 2:28–32. Vim li cas cov lus uas qhia txog tej uas yuav muaj los yav tom ntej yog cov lus tseem ceeb rau Joseph paub? Vim li cas cov lus no tseem ceeb rau koj paub?

Lus Qhuab Qhia thiab Kev Khi Lus 2

Eliyas tau muab dab tsi txum tim rov qab los?

Thawj Tswj Hwm Henry B. Eyring hais tias: “Yog ib qho tseem ceeb paub vim li cas tus Tswv tau cog lus hais tias Nws yuav txib Eliyas los. Eliyas yog ib tug yaj saub tseem ceeb es Vajtswv tau muab hwj chim loj rau nws. Nws tuav lub hwj chim tseem ceeb tshaj plaws uas Vajtswv muab rau Nws cov me nyuam: Eliyas muaj lub hwj chim sib khi, lub hwj chim uas yog muab ib yam twg khi ua ke hauv lub ntiaj teb ces yam ntawd yuav muab khi ua ke nyob saum ntuj ceeb tsheej” (“Hearts Bound Together,” Ensign los sis Liahona, Tsib Hlis Ntuj 2005, 78).

Kuj saib Lus Qhuab Qhia thiab Kev Khi Lus 110:13–16; David A. Bednar, “Cia Li Txhim Tsa lub Tsev No Los rau Kuv lub Npe,” Ensign los sis Liahona, Tsib Hlis Ntuj 2020, 84–87.

Lub Tuam Tsev Palmyra New York thaum lub caij nplooj ntoos zeeg

Lub Tuam Tsev Palmyra New York. Tsev neeg ua kev cai sib khi hauv lub tuam tsev los ntawm lub hwj chim uas Eliyas tau muab txum tim rov qab los.

Lus Qhuab Qhia thiab Kev Khi Lus 2

Eliyas los muab kuv lub siab tig mus rau kuv cov poj koob yawm txwv.

Tej lus xws li “cog,” “lub siab,” thiab “tig” hauv tshooj no qhia dab tsi rau koj txog Eliyas ntiag tug hauj lwm thiab cov koob hmoov ntawm cov yawm sij pov thawj hwj uas nws muab txum tim rov qab los? Thaum twg koj tau hnov koj lub siab tig mus rau koj cov poj koob yawm txwv? Cia li xav txog tej yam uas koj ua tau kom muaj tej kev xav li ntawd ntau ntxiv. Tej zaum koj yuav xav thov ib tug kwv tij neej tsa hais ib zaj rau koj txog koj ib tug poj koob yawm txwv—qhov zoo dua los koj muab tau cov lus ntawd sau tseg. Tej zaum koj yuav xav nrhiav ib tug poj koob yawm txwv uas tas sim neej no lawm ib tug uas tsis tau txais cov kab ke ntawm txoj moo zoo ces ua hauj lwm rau nws hauv lub tuam tsev.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Joseph Smith—Keeb Kwm 1:28–29.Joseph Smith tau xav li cas txog tej yam nws ua yuam kev? Nws tau ua li cas vim nws xav li ntawd? Peb kawm dab tsi los ntawm nws txog qhov uas peb yuav tsum ua li cas thaum peb ua yuam kev?

Joseph Smith—Keeb Kwm 1:33–54.Tej zaum nej yuav xav hais kom ib tug hauv nej tsev neeg nyeem nrov ib feem los sis tag nrho Maulaunais zaj nyob hauv Joseph Smith—Keeb Kwm 1:33–42 plaub zaug (vim Maulaunais tau rov qab hais zaj no plaub zaug). Tom qab txhua zaus nws nyeem, cia li thov lwm tus hauv nej tsev neeg kom qhia tias lawv nco qab tej yam twg los ntawm nws zaj lus, thaum tsis saib hauv cov vaj lug kub. Vim li cas tus Tswv rov qab hais tej zaj tseem ceeb ob peb zaug? Tus Tswv ua dab tsi ntxiv kom qhia peb los ntawm kev rov qab hais li qub?

Lus Qhuab Qhia thiab Kev Khi Lus 2:2.Xwv kom pab cov me nyuam to taub “tej lus cog tseg uas tau muab cog rau cov txiv yawg lawm,” tej zaum nej yuav xav nyeem Anplaham 2:9–11 ua ke los sis saib daim video “Special Witnesses of Christ—President Russell M. Nelson” (ChurchofJesusChrist.org). Cia li qhia txog tej lus cog tseg uas Vajtswv cog thaum Nws khi lus nrog Anplaham. Peb yuav tsum ua li cas kom “cog” tej lus cog tseg hauv peb lub siab?

Lus Qhuab Qhia thiab Kev Khi Lus 2:2–3.Xwv kom pab nej tsev neeg muab lawv lub siab tig mus rau cov txiv yawg (los sis cov poj koob yawm txwv), tej zaum nej yuav xav caw lawv kawm txog ib tug poj koob yawm txwv thiab qhia tias lawv tau kawm dab tsi rau nej tsev neeg. Vim li cas tus Tswv xav kom peb kawm txog peb cov poj koob yawm txwv thiab sawv lawv cev ua cov kab ke hauv lub tuam tsev? Peb tau koob hmoov li cas thaum peb koom tes nrhiav tsev neeg zaj keeb kwm thiab ua hauj lwm hauv lub tuam tsev? (saib Dale G. Renlund, “Kev Nrhiav Tsev Neeg Zaj Keeb Kwm thiab tej Hauj Lwm hauv lub Tuam Tsev: Kev Khi thiab Kev Kho Mob,” Ensign los sis Liahona, Tsib Hlis Ntuj 2018, 46–49).

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Family History—I Am Doing It,” Children’s Songbook, 94.

Kev Kawm Zoo Dua Ntxiv ntawm Yus Ib Leeg

Siv tej yam pab kawm vaj lug kub. Tej cuab yeej xws li tej lus cim nram qab, Topical Guide, Bible Dictionary, Phau Qhia txog Vaj Lug Kub, thiab ChurchofJesusChrist.org pab tau koj to taub ntxiv txog cov neeg,

Maulaunais muab cov phiaj kub rau Joseph Smith

Joseph Txais cov Phiaj, los ntawm Gary E. Smith