“Ib Hlis Ntuj 18–24. Lus Qhuab Qhia thiab Kev Khi Lus 3–5: ‘Kuv txoj Hauj Lwm Yeej Yuav Mus Lawm Yav Tom Ntej,’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)

“Ib Hlis Ntuj 18–24. Lus Qhuab Qhia thiab Kev Khi Lus 3–5,” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus: 2021

Daim Duab

cov txiv neej ua hauj lwm hauv tiaj

Harvest Time in France, los ntawm James Taylor Harwood

Ib Hlis Ntuj 18–24

Lus Qhuab Qhia thiab Kev Khi Lus 3–5

“Kuv txoj Hauj Lwm Yeej Yuav Mus Lawm Yav Tom Ntej”

Cia li sau ntawv txog tej yam uas koj kawm thiab xav thaum koj kawm vaj lug kub. Ua li no yuav pab koj nco txog tej kev tshoov siab ntawd thiab qhia rau lwm tus.

Sau Ntawv txog Koj tej Kev Tshoov Siab

Thawj ob peb xyoo uas nws yog tus Tswv tus yaj saub, Joseph Smith tseem tsis tau paub txhua yam txog “txoj hauj lwm zoo kawg nkaus” uas tus Tswv tau hu nws ua. Tiam sis muaj ib yam uas nws kawm thaum ntxov hais tias yog nws yuav tsim nyog ua Vajtswv txoj hauj lwm, nws yuav tsum ua kom nws lub qhov muag “ntsia ntsoov rau Vajtswv lub yeeb koob” tiag tiag (Lus Qhuab Qhia thiab Kev Khi Lus 4:1, 5). Piv txwv hais tias, yog tus Tswv hais kom nws ua ib yam uas tsis yog raws li nws lub siab xav, nws yuav tsum ua raws li tus Tswv tej lus. Thiab txawm hais tias nws muaj “tej kev tshwm sim ntau, thiab muaj hwj chim ua tau ntau yam zoo kawg,” yog tias nws xav tias nws lub siab nyiam tseem ceeb dua li Vajtswv lub siab nyiam, nws “yeej yuav poob” (Lus Qhuab Qhia thiab Kev Khi Lus 3:4). Tiam sis Joseph twb kawm ib yam uas tseem ceeb npaum li txoj kev ua Vajtswv txoj hauj lwm: “Vajtswv muaj siab hlub tshua,” thiab yog Joseph yuav hloov siab lees txim tiag tiag, nws “tseem yog tus uas Vajtswv xaiv tseg” (nqe 10). Vim Vajtswv txoj hauj lwm yeej yog ib txoj hauj lwm txhiv dim. Thiab “rhuav tsis tau” tej hauj lwm ntawd (nqe 1).

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 3:1–15

Kuv yuav tsum tso siab rau Vajtswv thiab tsis txhob ntshai tib neeg.

Joseph Smith ua hauj lwm qhuab qhia thaum xub thawj, nyuaj rau nws ntaus phooj ywg zoo—cov phooj ywg zoo li Martin Harris, uas yog ib tug txiv neej nplua nuj uas neeg coob saib taus, ib tug uas muaj nyiaj txaus txhawb nqa Joseph. Thiab Martin txaus siab txhawb nqa Joseph, txawm yog nws cov phooj ywg saib tsis taus nws thiab nws yuav tsum muab nyiaj txiag pab.

Yog li ntawd yooj yim rau peb paub vim li cas Joseph xav ua raws li Martin thov kom muab feem thib ib ntawm kev txhais Phau Ntawv Maumoos muab rau nws tus poj niam saib, vim nws tus poj niam tsis ntseeg tias Phau Ntawv Maumoos muaj tseeb. Joseph pheej thov tus Tswv txog qhov no, tsis hais thaum tus Tswv txwv tsis pub nws ua li ntawd, mus txog thaum, tom qab Joseph tau thov peb zaug lawm, tus Tswv pub nws ua li ntawd. Tu siab uas thaum Martin tseem muaj cov ntaub ntawv ces cov ntaub ntawv twb xiam lawm, thiab tus Tswv tau qhuab ntuas Joseph thiab Martin heev (saib Saints, 1:51–53).

Thaum koj nyeem phau Lus Qhuab Qhia thiab Kev Khi Lus 3:1–15, cia li xav txog qhov uas tej zaum koj mloog lwm tus neeg tej lus. Tej zaum koj yuav pom hais tias ntxiv rau qhov uas tus Tswv cem Joseph Smith, tus Tswv kuj hais lus hlub tshua. Koj kawm dab tsi los ntawm tus Tswv txoj kev qhia thiab txhawb nqa Joseph? Muaj tej lus ntuas twg uas pab koj thaum koj raug ntxias kom ntshai lwm tus neeg tej kev xav ntau dua li koj hwm Vajtswv?

Kuj saib “The Contributions of Martin Harris,” Revelations in Context, 1–9, history.ChurchofJesusChrist.org.

Lus Qhuab Qhia thiab Kev Khi Lus 4

Tus Tswv hais kom kuv ua hauj lwm rau Nws kawg kuv lub siab.

Tshooj 4 los feem ntau yog hais rau cov tub txib. Tiam sis, yog ib yam zoo kawm tias kev tshwm sim no yog muab rau Joseph Smith tus Laus thaum xub thawj, es tus Tswv tsis hu nws mus ua tub txib tiam sis nws tseem “xav ua hauj lwm rau Vajtswv” (nqe 3).

Ib txoj kev rau koj nyeem tshooj no yog kom xav tias yog ib zaj piav txog txoj hauj lwm rau ib tug uas xav ua tus Tswv tej hauj lwm. Yuav tsum ua li cas kom tsim nyog ua? Vim li cas yuav tsum muaj tej txuj ci los yog tej cwj pwm zoo li no? Tej zaum koj yuav xav thov Vajtswv thiab xaiv ib yam uas koj ua tau zoo dua kom koj “tsim nyog ua txoj hauj lwm no” (nqe 5).

Lus Qhuab Qhia thiab Kev Khi Lus 5

Kuv yeej paub tau ntawm kuv tus kheej hais tias Phau Ntawv Maumoos muaj tseeb.

Martin Harris, los ntawm Lewis A. Ramsey

Yog tias koj raug hu mus ua tim khawv hauv tsev hais plaub ntug txog qhov uas Phau Ntawv Maumoos muaj tseeb, ces koj yuav muab dab tsi los ua puav pheej? Martin Harris tau xav zoo ib yam li no thaum nws tus poj niam, Lucy, tau xa ntawv liam hais tias Joseph Smith ntxias cov neeg vim nws ua txuj txhais cov phiaj kub (saib Saints, 1:56–58). Yog li ntawd Martin tau thov Joseph kom muab puav pheej ntxiv hais tias muaj cov phiaj kub tiag. Lus Qhuab Qhia thiab Kev Khi Lus 5 yog kev tshwm sim uas teb Martin tej lus thov.

Koj kawm dab tsi los ntawm phau Lus Qhuab Qhia thiab Kev Khi Lus 5 txog tej yam no:

Tus Tswv xav li cas txog cov uas tsis ntseeg tej yam tseeb ntawm sab ntsuj plig tsuas yog lawv txais tau tej yam los ua puav pheej (saib nqe 5–8; kuj saib Yauhas 20:24–29).
Lub luag hauj lwm ntawm cov neeg tim khawv nyob hauv tus Tswv txoj hauj lwm (saib nqe 11–15; kuj saib 2 Kauleethaus 13:1).
Yuav ua li cas kom txais tau ib zaj lus tim khawv txog Phau Ntawv Maumoos rau koj tus kheej (saib nqe 16; kuj saib Maulaunais 10:3–5).

Lus Qhuab Qhia thiab Kev Khi Lus 5:1–10

Tiam neeg no yuav tau txais Vajtswv txoj lus los ntawm Joseph Smith.

Phau Lus Qhuab Qhia thiab Kev Khi Lus 5:1–10 qhia dab tsi rau koj txog Joseph Smith lub luag hauj lwm hauv peb lub caij nyoog tso cai—thiab nyob hauv koj lub neej? Cia li xav txog qhov uas koj tau txais Vajtswv txoj lus los ntawm tus Yaj Saub Joseph Smith li cas. Xav seb koj puas sau ntawv hauv ib phau ceev xwm txheej los yog qhia lwm tus txog qhov uas koj ua Vajtswv tsaug rau tej yam tseeb uas nws tau muab txum tim rov qab los los sis nws tau piav meej txog.

Kuj saib 2 Nifais 3:6–24.

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 3:1–4.Hais kom ib tug hauv nej tsev neeg taug ib txoj kev “nkhaus” ces taug kev “ncaj qha” xwb. Qhov uas peb tsev neeg paub tias “[Vajtswv] tej kev yeej ncaj” pab peb li cas?

Lus Qhuab Qhia thiab Kev Khi Lus 3:7–10.Thaum ib tug neeg xav txhib peb kom peb tsis mloog Vajtswv lus, tej yam tseeb twg hauv tej nqe no yuav pab peb rau siab ntseeg ntxiv mus? Tej zaum cov hauv nej tsev neeg yuav xav ua yeeb yam txog ib zaug uas ib tug neeg rau siab ntseeg txawm yog muaj neeg txhib nws kom nws tsis mloog Vajtswv lus.

Lus Qhuab Qhia thiab Kev Khi Lus 4.Thaum nej tsev neeg sib tham txog qhov uas kev ua hauj lwm hauv Vajtswv thaj teb txhais li cas, tej zaum lawv yuav xav ua hauj lwm hauv ib lub vaj (los sis ua txuj ua li ntawd). Yuav tsum siv tej cuab yeej twg thaum ua hauj lwm hauv lub vaj? Nyob hauv nqe 4, Vajtswv piav txog tej yam twg uas zoo li tej cuab yeej uas yuav tsum muaj kom ua Nws txoj hauj lwm? Tej zaum nej tsev neeg yuav xav sib tham txog vim li cas txhua lub cuab yeej ntawd tseem ceeb rau kev ua Vajtswv txoj hauj lwm.

Lus Qhuab Qhia thiab Kev Khi Lus 5:7.Tej yam tseeb twg yog tej yam uas peb ntseeg tiam sis peb pom tsis taus? Peb yuav hais li cas rau ib tug phooj ywg uas xav tau puav pheej qhia tias Phau Ntawv Maumoos muaj tseeb?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “I Will Be Valiant,” Children’s Songbook, 162.

Kev Kawm Zoo Dua Ntxiv ntawm Yus Ib Leeg

Cim ntsoov ib nqe. “Kev cim ntsoov ib nqe vaj lug kub zoo li kev ua phooj ywg tshiab. Nws zoo li yus nrhiav tau ib tug uas pab thaum twg xav tau, tshoov thiab nplij yus lub siab, thiab yog lub hauv paus uas txhawb yus lub siab thaum twg yus yuav tsum hloov” (Richard G. Scott, “The Power of Scripture,” Ensign los sis Liahona, Nov. 2011, 6)