“Kaum Ob Hlis Ntuj 6–12. Tej Nqe Kev Ntseeg thiab Zaj Lus Tshaj Tawm Raug Cai 1 thiab 2: ‘Peb Ntseeg’” Los, Nrog Kuv Mus—Rau Ib Leeg thiab Tsev Neeg: Lus Qhuab Qhia thiab Kev Khi Lus 2021 (2020)
“Kaum Ob Hlis Ntuj 6–12. Tej Nqe Kev Ntseeg thiab Zaj Lus Tshaj Tawm Raug Cai 1 thiab 2” Los, Nrog Kuv Mus—Rau Ib Leeg thiab Tsev Neeg: 2021
Rau Txhua tus Mej Zeej uas Yog Txiv Neej Tsim Nyog, los ntawm Emma Allebes
Kaum Ob Hlis Ntuj 6–12
Tej Nqe Kev Ntseeg thiab Zaj Lus Tshaj Tawm Raug Cai 1 thiab 2
“Peb Ntseeg”
Thaum koj kawm Tej Nqe Kev Ntseeg thiab Zaj Lus Tshaj Tawm Raug Cai 1 thiab 2, cia li xav txog qhov uas tej zaj no tau pab lub Koom Txoos li cas. Koj xav li cas txog tej yam tseeb uas tej zaj no qhia?
Sau Ntawv txog Koj tej Kev Tshoov Siab
200 xyoo txij thaum Joseph Smith Thawj zaj Ua Yog Toog, Vajtswv tau muab “kev tshwm sim ntxiv rau kev tshwm sim, kev txawj ntse ntxiv rau kev txawj ntse” rau cov thawj coj ntawm Nws lub Koom Txoos (Lus Qhuab Qhia thiab Kev Khi Lus 42:61). Tej lub sij hawm, kev tshwm sim tau qhia kom lub Koom Txoos cov thawj coj hloov tej kev cai thiab tej yam uas cov Ntseeg ua, “raws li tus Tswv siab nyiam, ua kom tus Tswv tej kev hlub tshua haum rau noob neej tej zwj ceeb” (Lus Qhuab Qhia thiab Kev Khi Lus 46:15). Zaj Lus Tshaj Tawm Raug Cai 1 thiab 2 yog kev tshwm sim zoo li no—ib zaj tau hais kom lawv txhob yuav ntau tus poj niam ntxiv, thiab ib zaj tau muab cov koob hmoov ntawm lub pov thawj hwj, tsis hais cov koob hmoov hauv lub tuam tsev, rau tib neeg uas yog txhua haiv neeg. Tej kev hloov zoo li no yeej yuav muaj hauv ib “lub koom txoos uas tseeb thiab muaj sia zees” (Lus Qhuab Qhia thiab Kev Khi Lus 1:30), uas muaj ib tug yaj saub tseeb thiab muaj sia zees.
Tiam sis yeej muaj tej yam uas tsis hloov—tej yam tseeb nyob mus ib txhis uas tseem ceeb tshaj plaws. Thiab tej lub sij hawm cov yaj saub txais kev tshwm sim kom paub ntxiv txog tej yam tseeb no, peb thiaj li pom tau meej dua li qub. Tej Nqe Kev Ntseeg—Joseph Smith 13 nqe lus txog tej yam uas Tsoom Haiv Neeg Ntseeg hauv Hnub Nyoog Kawg ntseeg—yeej pab qhia meej li no. Ob yam kev tshwm sim no pab coj lub Koom Txoos, lub Koom Txoos uas lub hauv paus yog kev tseeb mus ib txhis tiam sis tseem yuav hloov tau thaum tus Tswv pab peb to taub ntxiv kom peb paub kov yeej tej teeb meem hauv hnub nyoog no. “Peb ntseeg tag nrho txhua yam uas Vajtswv tau muab qhia tshwm sim los, txhua yam uas Nws qhia tshwm sim los ziag no, thiab peb ntseeg hais tias Nws tseem yuav muab ntau yam tseem ceeb thiab muaj nqis ntsig txog Vajtswv lub Nceeg Vaj qhia tshwm sim los” (Tej Nqe Kev Ntseeg 1:9).
Tej lub Tswv Yim Kawm Vaj Lug Kub ntawm Yus Ib Leeg
Tej Nqe Kev Ntseeg muaj tej lus tseeb tseem ceeb tshaj plaws rau txoj moo zoo uas tau muab txum tim rov qab los.
Ib txoj kev uas koj siv tau kom kawm Tej Nqe Kev Ntseeg yog kev sau ntawv txog tej yam tseeb uas koj kawm hauv txhua nqe ces nrhiav tej nqe vaj lug kub uas hais txog tej yam tseeb no. Tej nqe vaj lug kub pab koj to taub dab tsi txog tej yam tseeb nyob hauv Tej Nqe Kev Ntseeg?
Kuj saib Phau Qhia txog Vaj Lug Kub, “Tej Nqe Kev Ntseeg,” scriptures.ChurchofJesusChrist.org; L. Tom Perry, “The Doctrines and Principles Contained in the Articles of Faith,” Ensign los sis Liahona, Kaum Ib Hlis Ntuj 2013, 46–48; “Chapter 38: The Wentworth Letter,” nyob hauv Teachings of Presidents of the Church: Joseph Smith, 435–47.
Tej Nqe Kev Ntseeg 1:9; Zaj Lus Tshaj Tawm Raug Cais 1 and 2
Tus Tswv coj Yexus Khetos lub Koom Txoos los ntawm kev tshwm sim.
“Peb ntseeg hais tias [Vajtswv] tseem yuav muab ntau yam tseem ceeb thiab muaj nqis ntsig txog Vajtswv lub Nceeg Vaj qhia tshwm sim los” (Tej Nqe Kev Ntseeg 1:9), tsis hais thaum tej ntawd ua rau peb yuav tsum hloov lub Koom Txoos tej kev cai thiab tej yam lawv ua. Thaum koj nco txog lub ntsiab cai no, rov qab nyeem Zaj Lus Tshaj Tawm Raug Cai 1 thiab 2, thiab nrhiav tej lus uas ntxiv dag zog rau koj txoj kev ntseeg tias tus yaj saub txais tau kev tshwm sim tas mus li. Koj puas txawj xav txog lwm lub sij hawm thaum tus Tswv tau muab kev tshwm sim ntxiv rau Nws tus yaj saub? Tej kev tshwm sim no tau pab koj lub neej li cas? Tej kev tshwm sim no tau pab tib neeg khiav hauj lwm hauv Leej Txiv Saum Ntuj Ceeb Tsheej lub nceeg vaj?
Kuj saib Amaus 3:7; 2 Nifais 28:30.
Vajtswv txoj hauj lwm yuav tsum mus tom ntej.
Nyob hauv “Tej Nqe Lus Los ntawm Peb zaj Hais Lus Los ntawm Thawj Tswj Hwm Wilford Woodruff ntsig txog Zaj Lus Qhia Tawm” (nyob qhov kawg ntawm Zaj Lus Tshaj Tawm Raug Cai 1), tus yaj saub tau hais li cas txog qhov uas tus Tswv yuav tsis pub yuav ntau tus poj niam ntxiv? Qhov no qhia dab tsi rau koj txog Vajtswv txoj hauj lwm?
Yog xav tau xov xwm ntxiv txog zaj liv xwm ntawm Zaj Lus Tshaj Tawm Raug Cai 1, saib “The Messenger and the Manifesto” (Revelations in Context, 323–31) thiab “Plural Marriage and Families in Early Utah” (Gospel Topics, topics.ChurchofJesusChrist.org).
Wilford Woodruff, los ntawm H. E. Peterson
Peb tso siab rau tus Tswv, tsis hais thaum peb tsis to taub tag nrho los yog.
Cov vaj lug kub qhia kom peb tso siab rau tus Tswv (saib Paj Lug 3:5), thiab cov mej zeej hauv lub Koom Txoos uas los ntawm Afikas Teb tau ua li ntawd thaum lub Koom Txoos tsis pub tsa lawv rau lub pov thawj hwj thiab tsis pub lawv ua cov kab ke hauv lub tuam tsev. Txawm yog lawv tsis tau to taub vim li cas muaj txoj kev cai no—thiab lawv tu siab thaum tib neeg hais tej lus piav yog vim li cas muaj li ntawd, tej lus piav ntawd los lub Koom Txoos tsis pom zoo niaj hnub no—cov mej zeej mob siab los ntawm Afikas Teb coob heev twb tso siab rau tus Tswv thiab rau siab ntseeg tas lawv lub neej. Thaum koj nyeem Zaj Lus Tshaj Tawm Raug Cai 2, cia li xav txog qhov usa koj tau kawm tso siab rau tus Tswv tsis hais thaum koj tsis tau to taub tag nrho.
Kev kawm txog kev ntseeg ntawm cov mej zeej uas muaj tawv nqaij dub hauv lub Koom Txoos tej zaum yuav tshoov koj lub siab. Nov yog lawv tej zaj, nyob ntawm history.ChurchofJesusChrist.org:
-
“Jane Elizabeth Manning James” (Church History Topics)
-
“In My Father’s House Are Many Mansions” (zaj dab neeg txog Green Flake)
-
“You Have Come at Last” (zaj dab neeg txog Anthony Obinna)
-
“Break the Soil of Bitterness” (zaj dab neeg txog Julia Mavimbela)
-
“I Will Take It in Faith” (zaj dab neeg txog George Rickford)
Kuj saib “Witnessing the Faithfulness,” Revelations in Context, 332–41; Gospel Topics, “Race and the Priesthood,” topics.ChurchofJesusChrist.org; Ahmad Corbitt, “A Personal Essay on Race and the Priesthood,” feem 1–4, history.ChurchofJesusChrist.org; BeOne.ChurchofJesusChrist.org.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
-
Tej Nqe Kev NtseegXav seb ntej tsev neeg yuav ua li cas kom tsim “tej zaj lus qhia me me” rau Tej Nqe Kev Ntseeg. Piv txwv hais tias, nyob hauv ib lub lim tiam, txhua tus hauv nej tsev neeg yuav xaiv ib nqe thiab nrhiav ib nqe vaj lug kub, daim duab, zaj nkauj qhuas Vajtswv, los sis zaj nkauj rau cov me nyuam los sis qhia ib zaj los ntawm nws lub neej.
Los sis nej tsev neeg ib leeg yuav nug ib leeg tej lus nug txog lub Koom Txoos thiab tej yam peb ntseeg rau ib leeg ces cia li siv ib nqe kev ntseeg kom teb.
-
Zaj Lus Tshaj Tawm Raug Cai 1 thiab 2.Zaj Lus Tshaj Tawm Raug Cai 1 thiab 2 pab peb to taub vim li cas peb muaj kev tshwm sim hauv hnub nyoog no nyob hauv lub Koom Txoos. Thaum nej tsev neeg nyeem ob zag no ua ke, xav seb nej puas sib tham txog qhov uas tus yaj saub coj peb “los ntawm txoj kev tshoov siab ntawm tus Vajtswv uas Muaj Hwj Chim Tag Nrho” (Zaj Lus Tshaj Tawm Raug Cai 1). Ob zag no ua li cas ntxiv dag zog rau peb txoj kev ntseeg ib tug Vajtswv uas muaj txoj sia nyob thiab coj Nws lub Koom Txoos Nws tus kheej? Peb pom Nws tes hauj lwm li cas hauv lub Koom Txoos hnub no? Tej zaum nej yuav xav saib tej yam nyob hauv “Tej lub Tswv Yim Kawm Vaj Lug Kub ntawm Yus Ib Leeg” nyob saud ua ke.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Zaj nkauj zoo hu: “Mloog Vajtswv cov Lus,” Cov Nkauj Qhuas Vajtswv, zaj 144.
Kev Qhia Zoo Dua Ntxiv
Rov qab nug txog tej yam uas nej caw nej tsev neeg ua. “Thaum nej rov qab nug txog tej yam uas nej caw nej tsev neeg ua, nej qhia nej tsev neeg tias nej hlub lawv thiab qhia vim li cas txoj moo zoo pab lawv tau koob hmoov. Nej kuj muab cib fim rau lawv qhia txog lawv lub neej” (Teaching in the Savior’s Way, 35).
