“ວັນທີ 13–19 ເດືອນກັນຍາ. ຄຳສອນ ແລະ ພັນທະສັນຍາ 102–105: ຫລັງຈາກຄວາມທຸກຍາກລຳບາກ … ພອນຈະມາເຖິງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 13–19 ເດືອນກັນຍາ. ຄຳສອນ ແລະ ພັນທະສັນຍາ 102–105,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຊີ ຊີ ເອ ຄຣິສເຕັນເຊັນ (1831–1912), Zion’s Camp [ຄ້າຍຊີໂອນ], ປະມານ 1878, ສີຖາວອນແຫ້ງໄວ ເທິງຜ້າຝ້າຍມັດສະລິນ, 78 × 114 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລ ບຣິກຳ ຢັງ, ຂອງຂວັນຈາກຫລານຂອງ ຊີ ຊີ ເອ ຄຣິສເຕັນເຊັນ, 1970

ວັນທີ 13–19 ເດືອນກັນຍາ

ຄຳສອນ ແລະ ພັນທະສັນຍາ 102–105

“ຫລັງຈາກຄວາມທຸກຍາກລຳບາກ … ພອນຈະມາເຖິງ”

ຫລັກທຳຢ່າງໃດແດ່ຈາກ ຄຳສອນ ແລະ ພັນທະສັນຍາ 102–5 ທີ່ມີຄວາມໝາຍຕໍ່ທ່ານ? ໃຫ້ຄິດທີ່ຈະບັນທຶກຄວາມຄິດ ແລະ ຄວາມປະທັບໃຈຂອງທ່ານກ່ຽວກັບຫລັກທຳເຫລົ່ານີ້.

ບັນທຶກຄວາມປະທັບໃຈຂອງທ່ານ

ໄພ່ພົນຢູ່ໃນເມືອງເຄີດແລນໄດ້ໂສກເສົ້າເມື່ອໄດ້ຍິນວ່າ ອ້າຍເອື້ອຍນ້ອງຂອງເຂົາເຈົ້າຢູ່ໃນເຂດແຈ໊ກສັນ, ລັດມີເຊີຣີ ໄດ້ຖືກຂັບໄລ່ອອກຈາກບ້ານເຮືອນຂອງເຂົາເຈົ້າ. ມັນຄົງເປັນສິ່ງໃຫ້ກຳລັງໃຈ, ໃນເວລານັ້ນ, ເມື່ອພຣະຜູ້ເປັນເຈົ້າໄດ້ປະກາດວ່າ “ການໄຖ່ຊີໂອນ” ຈະ “ມາເຖິງໂດຍອຳນາດ” (ຄຳສອນ ແລະ ພັນທະສັນຍາ 103:15). ດ້ວຍຄຳສັນຍານັ້ນ ຢູ່ໃນຫົວໃຈຂອງເຂົາເຈົ້າ, ຜູ້ຊາຍຫລາຍກວ່າ 200 ຄົນ, ພ້ອມທັງຜູ້ຍິງ ແລະ ເດັກນ້ອຍ 25 ຄົນ, ໄດ້ຖືກເກນເຂົ້າໃນກຸ່ມທີ່ເອີ້ນວ່າ ຄ້າຍອິດສະຣາເອນ, ຕໍ່ມາຖືກເອີ້ນວ່າ ຄ້າຍຊີໂອນ. ພາລະກິດຂອງຄ້າຍນີ້ ແມ່ນເພື່ອເດີນທາງໄປລັດມີເຊີຣີ ແລະ ໄຖ່ຊີໂອນ.

ສຳລັບສະມາຊິກຂອງຄ້າຍນີ້, ການໄຖ່ຊີໂອນໝາຍເຖິງການໃຫ້ໄພ່ພົນສາມາດກັບຄືນໄປຢູ່ໃນທີ່ດິນຂອງຕົນ. ແຕ່ກ່ອນທີ່ຄ້າຍຈະໄປເຖິງເຂດແຈ໊ກສັນ, ພຣະຜູ້ເປັນເຈົ້າໄດ້ບອກໂຈເຊັບ ສະມິດ ໃຫ້ຍຸບຄ້າຍຊີໂອນ. ສະມາຊິກໃນຄ້າຍບາງຈຳນວນໄດ້ເກີດສັບສົນ ແລະ ບໍ່ພໍໃຈກັບຄຳແນະນຳໃໝ່ນີ້; ສຳລັບເຂົາເຈົ້າແລ້ວ, ມັນໝາຍຄວາມວ່າການເດີນທາງລົ້ມເຫລວ ແລະ ຄຳສັນຍາຂອງພຣະຜູ້ເປັນເຈົ້າບໍ່ໄດ້ບັນລຸຄວາມສຳເລັດ. ເຖິງຢ່າງໃດກໍຕາມ, ກໍມີບາງຄົນທີ່ເຫັນມັນໃນທາງທີ່ແຕກຕ່າງ. ເຖິງແມ່ນວ່າໄພ່ພົນທີ່ໜີໄປຈາກເຂດແຈ໊ກສັນ ບໍ່ໄດ້ກັບຄືນໄປຢູ່ບ່ອນເກົ່າ, ແຕ່ປະສົບການນັ້ນໄດ້ນຳ “ການໄຖ່” ມາໃຫ້ຊີໂອນ, ແລະ ມັນກໍ “ມາເຖິງໂດຍອຳນາດ” ໃນລະດັບໃດໜຶ່ງ. ສະມາຊິກທີ່ຊື່ສັດຂອງຄ້າຍຊີໂອນ, ຫລາຍຄົນຊຶ່ງຕໍ່ມາກາຍເປັນຜູ້ນຳຂອງສາດສະໜາຈັກ, ໄດ້ເປັນພະຍານວ່າ ປະສົບການນັ້ນໄດ້ເຮັດໃຫ້ເຂົາເຈົ້າມີສັດທາຫລາຍຂຶ້ນໃນອຳນາດຂອງພຣະເຈົ້າ, ໃນການເອີ້ນຈາກສະຫວັນຂອງໂຈເຊັບ ສະມິດ, ແລະ ໃນຊີໂອນ—ຊີໂອນບໍ່ພຽງແຕ່ເປັນສະຖານທີ່ເທົ່ານັ້ນ ແຕ່ຊີໂອນຄືຜູ້ຄົນຂອງພຣະເຈົ້ານຳອີກ. ແທນທີ່ຈະຂ້ອງໃຈກ່ຽວກັບຄຸນຄ່າຂອງພາລະກິດທີ່ເບິ່ງຄືວ່າບໍ່ສຳເລັດນີ້, ເຂົາເຈົ້າໄດ້ຮຽນຮູ້ວ່າ ພາລະກິດທີ່ແທ້ຈິງ ຄືການຕິດຕາມພຣະຜູ້ຊ່ວຍໃຫ້ລອດ, ເຖິງແມ່ນວ່າເຮົາບໍ່ເຂົ້າໃຈທຸກສິ່ງທຸກຢ່າງ. ນີ້ຄືວິທີທີ່, ໃນທີ່ສຸດ, ຊີໂອນຈະຖືກໄຖ່.

ເບິ່ງ Saints, 1:194–206; “The Acceptable Offering of Zion’s Camp,” Revelations in Context, 213–18.

ແມ່ນ້ຳນ້ອຍ — ຮູບນີ້ຄື ຄ້າຍຊີໂອນໄດ້ຢຸດພັກຢູ່ແຄມແມ່ນ້ຳລິໂດ ຟິດຊິງ.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 102:12–23

ແມ່ນຫຍັງຄືຈຸດປະສົງຂອງຄຳແນະນຳຢູ່ໃນຂໍ້ເຫລົ່ານີ້?

ພາກທີ 102 ບັນຈຸລາຍງານຫຍໍ້ຂອງກອງປະຊຸມຢູ່ໃນເມືອງເຄີດແລນ, ລັດໂອໄຮໂອ, ບ່ອນທີ່ສະພາສູງກຸ່ມທຳອິດຂອງສາດສະໜາຈັກໄດ້ຖືກຈັດຕັ້ງຂຶ້ນ. ຂໍ້ທີ 12–23 ບັນຍາຍລະບຽບການທີ່ສະພາສູງຈະປະຕິບັດຕາມ ເມື່ອຈັດສະພາວິໄນຂຶ້ນ ສຳລັບຜູ້ທີ່ໄດ້ລ່ວງລະເມີດຢ່າງຮ້າຍແຮງ.

ປະທານ ເອັມ ຣະໂຊ ບາເລີດ ໄດ້ສິດສອນວ່າ, “ບາງເທື່ອສະມາຊິກຖາມວ່າ ເປັນຫຍັງຈຶ່ງມີສະພາວິໄນຂອງສາດສະໜາຈັກ. ຈຸດປະສົງມີຢູ່ດ້ວຍກັນສາມຢ່າງ: ເພື່ອຮັກສາຈິດວິນຍານຂອງຜູ້ລ່ວງລະເມີດ, ເພື່ອປົກປ້ອງຜູ້ບໍ່ມີຄວາມຜິດ, ແລະ ເພື່ອຮັກສາຄວາມບໍລິສຸດ, ຄວາມສຸດຈະລິດ, ແລະ ຊື່ສຽງຂອງສາດສະໜາຈັກເອົາໄວ້” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).

ເບິ່ງ Gospel Topics, “Church Disciplinary Councils,” topics.ChurchofJesusChrist.org ນຳອີກ.

ຄຳສອນ ແລະ ພັນທະສັນຍາ 103:1–12, 36; 105:1–19

ຊີໂອນສາມາດຖືກສ້າງຂຶ້ນໄດ້ພຽງແຕ່ຢູ່ເທິງຫລັກທຳແຫ່ງຄວາມຊອບທຳເທົ່ານັ້ນ.

ເປັນຫຍັງໄພ່ພົນຈຶ່ງສູນເສຍທີ່ດິນທີ່ຖືກສັນຍາຂອງເຂົາເຈົ້າຢູ່ໃນລັດມີເຊີຣີ? ແລະ ເປັນຫຍັງພຣະຜູ້ເປັນເຈົ້າຈຶ່ງບໍ່ປ່ອຍໃຫ້ຄ້າຍຊີໂອນສາມາດກັບຄືນໄປຢູ່ໃນທີ່ດິນຂອງຕົນ? ສິ່ງທີ່ແນ່ນອນແມ່ນກຸ່ມອັນຕະພານຢູ່ໃນລັດມີເຊີຣີມີສ່ວນກ່ຽວຂ້ອງກັບການກໍ່ຄວາມຮຸນແຮງ, ແລະ ເຈົ້າລັດມີເຊີຣີໄດ້ສັນຍາວ່າຈະຊ່ວຍເຫລືອໄພ່ພົນ ແຕ່ກໍບໍ່ໄດ້ເຮັດຕາມທີ່ສັນຍາ. ແຕ່ພຣະຜູ້ເປັນເຈົ້າໄດ້ກ່າວວ່າ “ຖ້າຫາກບໍ່ເປັນເພາະການລ່ວງລະເມີດຂອງຜູ້ຄົນຂອງເຮົາ,” ຊີໂອນ “ອາດໄດ້ຮັບການໄຖ່ແລ້ວ” (ຄຳສອນ ແລະ ພັນທະສັນຍາ 105:2). ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 103:1–12, 36; 105:1–19, ທ່ານອາດສັງເກດເຫັນບາງສິ່ງທີ່ຢຸດຢັ້ງການສະຖາປະນາຊີໂອນ ຢູ່ໃນລັດມີເຊີຣີ ແລະ ບາງສິ່ງທີ່ອາດຊ່ວຍໄດ້. ທ່ານຮຽນຮູ້ຫຍັງແດ່ທີ່ສາມາດຊ່ວຍທ່ານໃຫ້ສະຖາປະນາຊີໂອນຢູ່ໃນໃຈ ແລະ ຢູ່ໃນບ້ານເຮືອນຂອງທ່ານ?

ຄຳສອນ ແລະ ພັນທະສັນຍາ 103:12–13; 105:1–6, 13–19

ພອນຈະມີມາຫລັງຈາກຄວາມທຸກຍາກລຳບາກ ແລະ ການທົດລອງສັດທາ.

ໃນຫລາຍວິທີທາງ, ການມີສ່ວນຮ່ວມຢູ່ໃນຄ້າຍຊີໂອນ ແມ່ນການທົດລອງສັດທາ. ການເດີນທາງນັ້ນແມ່ນຍາວໄກ, ອາກາດກໍຮ້ອນອົບເອົ້າ, ແລະ ບາງຄັ້ງກໍຂາດແຄນອາຫານ ແລະ ນ້ຳ. ແລະ ຫລັງຈາກທັງໝົດທີ່ເຂົາເຈົ້າໄດ້ອົດທົນຕໍ່, ໄພ່ພົນກໍຍັງບໍ່ສາມາດກັບຄືນໄປຢູ່ໃນທີ່ດິນຂອງຕົນໄດ້. ໃຫ້ພິຈາລະນາວິທີທີ່ຫລັກທຳ ຢູ່ໃນ ຄຳສອນ ແລະ ພັນທະສັນຍາ 103:12–13 ແລະ 105:1–6, 13–19 ອາດຊ່ວຍສະມາຊິກຢູ່ໃນຄ້າຍຊີໂອນ ຜູ້ທີ່ມີຄວາມສົງໃສວ່າ ພຣະບັນຍັດໃຫ້ຈັດຄ້າຍນັ້ນ ແມ່ນມາຈາກພຣະເຈົ້າແທ້ໆບໍ. ຫລັກທຳເຫລົ່ານີ້ສາມາດຊ່ວຍທ່ານຢູ່ໃນການທົດລອງສັດທາຂອງທ່ານເອງແນວໃດ?

ທ່ານກໍສາມາດອ່ານກ່ຽວກັບປະສົບການຂອງສະມາຊິກໃນຄ້າຍຊີໂອນ ຢູ່ໃນ “ສຽງຂອງການຟື້ນຟູ” ຢູ່ທ້າຍໂຄງຮ່າງນີ້. ແມ່ນຫຍັງທີ່ປະທັບໃຈທ່ານ ກ່ຽວກັບທ່າທີຂອງເຂົາເຈົ້າ? ທ່ານສາມາດຮຽນຮູ້ຫຍັງແດ່ຈາກຕົວຢ່າງຂອງເຂົາເຈົ້າ?

ເບິ່ງ David A. Bednar, “On the Lord’s Side: Lessons from Zion’s Camp,” Ensign, July 2017, 26–35 ນຳອີກ.

ຄຳສອນ ແລະ ພັນທະສັນຍາ 104:11–18, 78–83

ເຮົາເປັນ “ຜູ້ພິທັກຮັກສາພອນຝ່າຍແຜ່ນດິນໂລກ.”

ນອກເໜືອຈາກການທົດລອງຢູ່ໃນລັດມີເຊີຣີແລ້ວ, ໃນປີ 1834 ສາດສະໜາຈັກໄດ້ປະເຊີນກັບບັນຫາເລື່ອງການເງິນ, ລວມທັງການມີໜີ້ສິນ ແລະ ມີລາຍຈ່າຍຢ່າງຫລວງຫລາຍ. ໃນ ພາກທີ 104 ພຣະຜູ້ເປັນເຈົ້າໄດ້ໃຫ້ຄຳແນະນຳເລື່ອງສະພາບການເງິນຂອງສາດສະໜາຈັກ. ທ່ານຈະສາມາດນຳໃຊ້ຫລັກທຳຢູ່ໃນ ຂໍ້ທີ 11–18 ແລະ 78–83 ກັບການຕັດສິນໃຈເລື່ອງການເງິນຂອງທ່ານເອງແນວໃດ?

ເພື່ອຮຽນຮູ້ກ່ຽວກັບໜຶ່ງໃນວິທີທາງ ທີ່ພຣະຜູ້ເປັນເຈົ້າໄດ້ກະກຽມສຳລັບສາດສະໜາຈັກ ເພື່ອໃຫ້ໄດ້ຮັບການປົດປ່ອຍຈາກຄວາມເປັນທາດຂອງໜີ້ສິນ, ໃຫ້ເບິ່ງວິດີໂອ, “Treasure in Heaven: The John Tanner Story” (ChurchofJesusChrist.org).

ເພື່ອຮຽນຮູ້ເພີ່ມເຕີມກ່ຽວກັບ “ວິທີທາງ” ຂອງພຣະຜູ້ເປັນເຈົ້າ (ຂໍ້ທີ 16) ເພື່ອຈັດຫາໃຫ້ໄພ່ພົນຂອງພຣະອົງ, ທ່ານສາມາດສຶກສາຂ່າວສານຂອງປະທານດີເດີ ແອັຟ ອຸກດອບ “Providing in the Lord’s Way” (Ensign ຫລື Liahona, Nov. 2011, 53–56).

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 103:12, 36; 105:9–13.ຄອບຄົວຂອງທ່ານ (ຫລື ບັນພະບຸລຸດຄົນໃດຄົນໜຶ່ງຂອງທ່ານ) ເຄີຍໄດ້ຖືກຂໍໃຫ້ເຮັດບາງຢ່າງທີ່ບໍ່ໄດ້ເປັນດັ່ງທີ່ຄາດໝາຍໄວ້ບໍ? ທ່ານສາມາດຮຽນຮູ້ຫຍັງແດ່ຈາກທ່າທີຂອງສະມາຊິກໃນຄ້າຍຊີໂອນ ເມື່ອການເດີນທາງຂອງເຂົາເຈົ້າບໍ່ໄດ້ເປັນດັ່ງທີ່ເຂົາເຈົ້າຄາດໝາຍໄວ້? (ເບິ່ງ “ສຽງຂອງການຟື້ນຟູ” ຢູ່ໃນທ້າຍຂອງໂຄງຮ່າງນີ້).

ຄຳສອນ ແລະ ພັນທະສັນຍາ 104:13–18.ພຣະຜູ້ເປັນເຈົ້າໄດ້ມອບຫຍັງໃຫ້ເຮົາ? ພຣະອົງຄາດໝາຍໃຫ້ເຮົາເຮັດຫຍັງກັບສິ່ງເຫລົ່ານີ້?

ຄຳສອນ ແລະ ພັນທະສັນຍາ 104:23–46.ຄອບຄົວຂອງທ່ານສາມາດຄົ້ນຄວ້າຂໍ້ເຫລົ່ານີ້ ເພື່ອເບິ່ງວ່າ ພຣະຜູ້ເປັນເຈົ້າໄດ້ສັນຍາຈັກເທື່ອ ທີ່ຈະ “ເພີ່ມທະວີພອນ” (ຂໍ້ທີ 23) ໃຫ້ຜູ້ທີ່ຊື່ສັດ. ບາງທີຕອນນີ້ອາດເປັນເວລາທີ່ດີທີ່ຈະ “ນັບພຣະພອນຂອງທ່ານ” (“ນັບພຣະພອນຂອງທ່ານ,” ເພງສວດ ແລະ ເພງຂອງເດັກນ້ອຍ, 8) ແລະ ສົນທະນາກ່ຽວກັບວ່າການເຮັດແນວນັ້ນສາມາດຊ່ວຍເຮົາລະຫວ່າງເວລາທີ່ຫຍຸ້ງຍາກແນວໃດ. ເດັກນ້ອຍອາດມັກແຕ້ມຮູບກ່ຽວກັບພອນໃດໜຶ່ງທີ່ພວກເຂົາມີຄວາມກະຕັນຍູຕໍ່.

ຄຳສອນ ແລະ ພັນທະສັນຍາ 105:38–41.ເຮົາຈະສາມາດ “ຂໍສັນຕິພາບ” (ຂໍ້ທີ 40) ເມື່ອຄົນອື່ນປະຕິບັດຕໍ່ເຮົາຢ່າງບໍ່ສຸພາບ ຫລື ບໍ່ຍຸດຕິທຳແນວໃດ? ເຮົາຈະສາມາດເຮັດຫຍັງໄດ້ແດ່ ເພື່ອເປັນ “ປ້າຍສັນຍານແຫ່ງສັນຕິພາບ” (ຂໍ້ທີ 39) ໃນບ້ານເຮືອນຂອງເຮົາ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ນັບພຣະພອນຂອງທ່ານ,” ເພງສວດ ແລະ ເພງຂອງເດັກນ້ອຍ, 8.

ສຽງຂອງການຟື້ນຟູ

ຄ້າຍຊີໂອນ

ເປັນເພາະຄ້າຍຊີໂອນບໍ່ໄດ້ຖືກອະນຸຍາດໃຫ້ກັບໄປຢູ່ທີ່ດິນຂອງເຂົາເຈົ້າເອງຢູ່ໃນເຂດແຈ໊ກສັນ, ຫລາຍຄົນຈຶ່ງຮູ້ສຶກວ່າ ການເດີນທາງຂອງເຂົາເຈົ້າລົ້ມເຫລວ. ເຖິງຢ່າງໃດກໍຕາມ, ຫລາຍຄົນທີ່ມີສ່ວນຮ່ວມໃນຄ້າຍຊີໂອນໄດ້ຫວນຄິດກ່ຽວກັບປະສົບການຂອງຕົນ ແລະ ໄດ້ເຫັນພຣະຜູ້ເປັນເຈົ້າບັນລຸຈຸດປະສົງທີ່ສູງກວ່າໃນຊີວິດຂອງພວກເພິ່ນ ແລະ ໃນອານາຈັກຂອງພຣະອົງ. ຕໍ່ໄປນີ້ແມ່ນປະຈັກພະຍານຈຳນວນໜຶ່ງຂອງພວກເພິ່ນ:

ໂຈເຊັບ ສະມິດ

ຫລາຍກວ່າ 40 ປີ ຫລັງຈາກຄ້າຍຊີໂອນ, ໂຈເຊັບ ຢັງ, ສະມາຊິກຄົນໜຶ່ງໃນຄ້າຍ, ໄດ້ລາຍງານວ່າ ໂຈເຊັບ ສະມິດ ໄດ້ກ່າວດັ່ງຕໍ່ໄປນີ້:

“ອ້າຍນ້ອງທັງຫລາຍ, ພວກທ່ານບາງຄົນໄດ້ໃຈຮ້າຍໃຫ້ຂ້າພະເຈົ້າ, ເພາະພວກທ່ານບໍ່ໄດ້ຕໍ່ສູ້ຢູ່ລັດມີເຊີຣີ, ແຕ່ຂ້າພະເຈົ້າຈະບອກພວກທ່ານວ່າ, ພຣະເຈົ້າບໍ່ຢາກໃຫ້ພວກທ່ານຕໍ່ສູ້. ພຣະອົງບໍ່ສາມາດຈັດຕັ້ງອານາຈັກຂອງພຣະອົງຂຶ້ນ ດ້ວຍຜູ້ຊາຍສິບສອງຄົນ ເພື່ອເປີດປະຕູພຣະກິດຕິຄຸນຕໍ່ປະຊາຊາດຂອງແຜ່ນດິນໂລກ, ແລະ ດ້ວຍຜູ້ຊາຍເຈັດສິບຄົນ ພາຍໃຕ້ການຊີ້ນຳຂອງພວກເພິ່ນ ເພື່ອຕິດຕາມຮອຍຂອງພວກເພິ່ນ, ຍົກເວັ້ນແຕ່ພຣະອົງຈະເລືອກເອົາເຂົາເຈົ້າຈາກກຸ່ມຜູ້ຊາຍເຫລົ່ານັ້ນທີ່ໄດ້ຍອມມອບຊີວິດຂອງເຂົາເຈົ້າ, ແລະ ຜູ້ທີ່ໄດ້ທຳການເສຍສະລະຢ່າງຫລວງຫລາຍ ຄືກັນກັບທີ່ອັບຣາຮາມໄດ້ເຮັດ.

“ບັດນີ້, ພຣະຜູ້ເປັນເຈົ້າມີອັກຄະສາວົກສິບສອງ ແລະ ສາວົກເຈັດສິບຂອງພຣະອົງແລ້ວ, ແລະ ກໍຈະມີກຸ່ມອື່ນອີກຂອງສາວົກເຈັດສິບຖືກຈັດຕັ້ງຂຶ້ນ, ຜູ້ທີ່ຈະເສຍສະລະ, ແລະ ຜູ້ທີ່ຍັງບໍ່ໄດ້ເສຍສະລະເທື່ອໃນເວລານີ້, ກໍຈະເສຍສະລະຫລັງຈາກນີ້.”¹

ບຣິກຳ ຢັງ

“ເວລາພວກເຮົາໄດ້ໄປເຖິງລັດມີເຊີຣີ ພຣະຜູ້ເປັນເຈົ້າໄດ້ກ່າວຕໍ່ ໂຈເຊັບຜູ້ຮັບໃຊ້ຂອງພຣະອົງວ່າ, ‘ເຮົາໄດ້ຮັບເອົາການຖວາຍຂອງພວກເຈົ້າແລ້ວ,’ ແລະ ພວກເຮົາໄດ້ຮັບສິດທິພິເສດໃຫ້ກັບຄືນໄປອີກ. ຕອນກັບຄືນໄປ ໝູ່ເພື່ອນຫລາຍຄົນຂອງຂ້າພະເຈົ້າໄດ້ຖາມຂ້າພະເຈົ້າກ່ຽວກັບວ່າ ມັນໄດ້ປະໂຫຍດຫຍັງທີ່ເອີ້ນໃຫ້ຜູ້ຊາຍຫລາຍຄົນໃຫ້ປະໜ້າທີ່ວຽກງານຂອງຕົນ ເພື່ອໄປລັດມີເຊີຣີ ແລະ ກັບຄືນມາຊື່ໆ, ໂດຍທີ່ບໍ່ໄດ້ບັນລຸຄວາມສຳເລັດຢ່າງໃດເລີຍ. ‘ມັນໄດ້ປະໂຫຍດຫຍັງ?’ ເຂົາເຈົ້າຖາມ. ‘ຖ້າຫາກພຣະຜູ້ເປັນເຈົ້າໄດ້ບັນຊາໃຫ້ເຮັດມັນສຳເລັດ, ພຣະອົງມີເປົ້າໝາຍແນວໃດ ໃນການເຮັດແນວນັ້ນ?’ … ຂ້າພະເຈົ້າໄດ້ບອກບັນດາອ້າຍນ້ອງເຫລົ່ານັ້ນວ່າ ຂ້າພະເຈົ້າໄດ້ຮັບລາງວັນຢ່າງເໝາະສົມ—ດ້ວຍດອກເບ້ຍທີ່ງົດງາມ—ແທ້ຈິງແລ້ວ ລາງວັນຂອງຂ້າພະເຈົ້າແມ່ນເຕັມໄປດ້ວຍຄວາມຮູ້ ທີ່ຂ້າພະເຈົ້າໄດ້ຮັບໂດຍການເດີນທາງໄປກັບສາດສະດາ.”²

ວິວເຝີດ ວູດຣັບ

“ຂ້າພະເຈົ້າໄດ້ຢູ່ໃນຄ້າຍຊີໂອນກັບສາດສະດາຂອງພຣະເຈົ້າ. ຂ້າພະເຈົ້າໄດ້ເຫັນພຣະເຈົ້າທຳງານກັບເພິ່ນ. ຂ້າພະເຈົ້າໄດ້ເຫັນອຳນາດຂອງພຣະເຈົ້າຢູ່ກັບເພິ່ນ. ຂ້າພະເຈົ້າໄດ້ເຫັນວ່າ ເພິ່ນເປັນສາດສະດາ. ສິ່ງທີ່ສະແດງໃຫ້ປະຈັກແກ່ເພິ່ນໂດຍອຳນາດຂອງພຣະເຈົ້າກ່ຽວກັບພາລະກິດນັ້ນ ມີຄ່າຫລາຍທີ່ສຸດຕໍ່ຂ້າພະເຈົ້າ ແລະ ຕໍ່ທຸກຄົນທີ່ໄດ້ຮັບຄຳແນະນຳຈາກເພິ່ນ.”³

“ຕອນສະມາຊິກຂອງຄ້າຍຊີໂອນຖືກເອີ້ນ ຫລາຍຄົນພວກເຮົາບໍ່ຮູ້ຈັກກັນ; ພວກເຮົາເປັນຄົນແປກໜ້າຕໍ່ກັນ ແລະ ກໍບໍ່ເຄີຍເຫັນສາດສະດາ. ພວກເຮົາໄດ້ຢາຍກັນຢູ່, ຄືກັນກັບເມັດສາລີຢູ່ໃນກະດົ້ງ, ທົ່ວປະເທດ. ພວກເຮົາເປັນຊາຍສະກັນ, ແລະ ຖືກເອີ້ນໃນຊ່ວງໄລຍະຕອນຕົ້ນນັ້ນໃຫ້ຂຶ້ນໄປ ແລະ ໄຖ່ຊີໂອນ, ແລະ ສິ່ງທີ່ພວກເຮົາຈະຕ້ອງເຮັດ ພວກເຮົາຕ້ອງໄດ້ເຮັດດ້ວຍສັດທາ. ພວກເຮົາໄດ້ມາເຕົ້າໂຮມກັນຈາກຫລາຍລັດຢູ່ເມືອງເຄີດແລນ ແລະ ໄດ້ຂຶ້ນໄປເພື່ອໄຖ່ຊີໂອນ, ໃນການເຮັດຕາມພຣະບັນຍັດຂອງພຣະເຈົ້າ ທີ່ໄດ້ມອບໃຫ້ພວກເຮົາ. ພຣະເຈົ້າໄດ້ຮັບເອົາວຽກງານຂອງພວກເຮົາ ຄືກັນກັບທີ່ພຣະອົງໄດ້ຮັບເອົາວຽກງານຂອງອັບຣາຮາມ. ພວກເຮົາໄດ້ບັນລຸຄວາມສຳເລັດຫລາຍ, ເຖິງແມ່ນຜູ້ປະຖິ້ມຄວາມເຊື່ອ ແລະ ຜູ້ທີ່ບໍ່ເຊື່ອໄດ້ຖາມຫລາຍເທື່ອວ່າ ‘ພວກເຈົ້າໄດ້ເຮັດຫຍັງ?’ ພວກເຮົາໄດ້ຮັບປະສົບການທີ່ພວກເຮົາບໍ່ເຄີຍໄດ້ຮັບ [ໃນ] ວິທີທາງອື່ນ. ພວກເຮົາໄດ້ຮັບສິດທິພິເສດທີ່ໄດ້ເຫັນສາດສະດາໜ້າຕໍ່ໜ້າ, ແລະ ພວກເຮົາໄດ້ຮັບສິດທິພິເສດທີ່ໄດ້ເດີນທາງຫລາຍພັນກິໂລແມັດໄປກັບເພິ່ນ, ແລະ ໄດ້ເຫັນວຽກງານທາງວິນຍານຂອງພຣະເຈົ້າຢູ່ກັບເພິ່ນ, ແລະ ການເປີດເຜີຍຂອງພຣະເຢຊູຄຣິດແກ່ເພິ່ນ ແລະ ການສຳເລັດຄົບຖ້ວນຂອງການເປີດເຜີຍເຫລົ່ານັ້ນ. ແລະ ເພິ່ນໄດ້ເຕົ້າໂຮມບັນດາອ້າຍນ້ອງຫລາຍກວ່າສອງພັນຄົນຈາກທົ່ວປະເທດໃນຊ່ວງໄລຍະຕອນຕົ້ນນັ້ນ ແລະ ໄດ້ສົ່ງພວກເຮົາອອກໄປສູ່ໂລກ ເພື່ອສັ່ງສອນພຣະກິດຕິຄຸນຂອງພຣະເຢຊູຄຣິດ. ຖ້າຫາກວ່າຂ້າພະເຈົ້າບໍ່ໄດ້ໄປກັບຄ້າຍຊີໂອນ ຂ້າພະເຈົ້າຄົງບໍ່ໄດ້ຢູ່ທີ່ນີ້ໃນມື້ນີ້ [ໃນເມືອງເຊົາເລັກ, ຮັບໃຊ້ຢູ່ໃນກຸ່ມອັກຄະສາວົກສິບສອງ]. … ໂດຍການໄປທີ່ນັ້ນ ພວກເຮົາໄດ້ຖືກຜັກດັນເຂົ້າໄປໃນສວນອະງຸ່ນ ເພື່ອສັ່ງສອນພຣະກິດຕິຄຸນ, ແລະ ພຣະຜູ້ເປັນເຈົ້າໄດ້ຮັບເອົາວຽກງານຂອງພວກເຮົາ. ແລະ ໃນວຽກງານ ແລະ ການຂົ່ມເຫັງທັງໝົດຂອງພວກເຮົາ, ໂດຍທີ່ຊີວິດຂອງພວກເຮົາຢູ່ໃນການສ່ຽງສະເໝີ, ພວກເຮົາຕ້ອງທຳງານ ແລະ ໃຊ້ຊີວິດດ້ວຍສັດທາ.”

“ປະສົບການທີ່ [ພວກເຮົາ] ໄດ້ຮັບໃນການເດີນທາງໄປກັບຄ້າຍຊີໂອນ ມີຄ່າຫລາຍກວ່າເງິນຄຳ.”

ຄ້າຍຊີໂອນຢູ່ໃກ້ແມ່ນ້ຳ — Zion’s Camp (Zion’s Camp at Fishing River) ຄ້າຍຊີໂອນ (ຄ້າຍຊີໂອນ ຢູ່ທີ່ແມ່ນ້ຳຟິດຊິງ), ໂດຍ ຈູດິດ ເອ ເມີ