“ວັນທີ 8–14 ເດືອນພະຈິກ. ຄຳສອນ ແລະ ພັນທະສັນຍາ 129–132: ‘ເມື່ອພວກເຮົາໄດ້ຮັບພອນປະການໃດຈາກພຣະເຈົ້າ, ຍ່ອມເປັນໄປເພາະການເຊື່ອຟັງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 8–14 ເດືອນພະຈິກ. ຄຳສອນ ແລະ ພັນທະສັນຍາ 129–132,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

Joseph Smith in Nauvoo, 1840 [ໂຈເຊັບ ສະມິດ ຢູ່ໃນເມືອງນາວູ, 1840], ໂດຍ ເຕຍດໍ ໂກຄາ

ວັນທີ 8–14 ເດືອນພະຈິກ

ຄຳສອນ ແລະ ພັນທະສັນຍາ 129–132

“ເມື່ອພວກເຮົາໄດ້ຮັບພອນປະການໃດຈາກພຣະເຈົ້າ, ຍ່ອມເປັນໄປເພາະການເຊື່ອຟັງ”

ພາກທີ 129–32 ສິດສອນຫລັກທຳທີ່ມີຄ່າຫລາຍຢ່າງ, ພຽງແຕ່ສອງສາມຢ່າງທີ່ກ່າວເນັ້ນຢູ່ໃນໂຄງຮ່າງນີ້. ມີຄວາມຈິງອື່ນໃດອີກທີ່ທ່ານພົບເຫັນ?

ບັນທຶກຄວາມປະທັບໃຈຂອງທ່ານ

ບຣິກຳ ຢັງ ຄັ້ງໜຶ່ງໄດ້ກ່າວເຖິງໂຈເຊັບ ສະມິດ ວ່າ, “ເພິ່ນສາມາດອະທິບາຍສິ່ງທີ່ເປັນເລື່ອງສະຫວັນ ໃນວິທີທີ່ມະນຸດຈະເຂົ້າໃຈໄດ້” (ໃນ Teachings of Presidents of the Church: Joseph Smith, 499–500). ສິ່ງນີ້ເບິ່ງຄືວ່າເປັນຄວາມຈິງ ໂດຍສະເພາະການສິດສອນຂອງສາດສະດາຢູ່ໃນເມືອງນາວູ ໃນຊ່ວງໄລຍະຊຸມປີ 1840, ຊຶ່ງບາງຢ່າງໄດ້ຖືກບັນທຶກໄວ້ ຢູ່ໃນ ຄຳສອນ ແລະ ພັນທະສັນຍາ 129–32. ພຣະຜູ້ຊ່ວຍໃຫ້ລອດເປັນແບບໃດ? “ພຣະອົງເປັນມະນຸດຄືກັນກັບພວກເຮົາ.” ສະຫວັນເປັນແບບໃດ? “ສັງຄົມດຽວກັນທີ່ມີຢູ່ໃນບັນດາພວກເຮົາຢູ່ທີ່ນີ້ ຈະມີຢູ່ໃນບັນດາພວກເຮົາຢູ່ທີ່ນັ້ນ” (ຄຳສອນ ແລະ ພັນທະສັນຍາ 130:1–2), ແລະ ຄວາມສຳພັນທີ່ໜ້າທະນຸຖະໜອມທີ່ສຸດຂອງເຮົາຢູ່ໃນໂລກນີ້, ຖ້າຫາກຖືກຜະນຶກໂດຍສິດອຳນາດທີ່ຖືກຕ້ອງ, “ຈະເກີດຜົນ” ຢູ່ໃນໂລກໜ້າ (ຄຳສອນ ແລະ ພັນທະສັນຍາ 132:19). ຄວາມຈິງແບບນີ້ ສາມາດເຮັດໃຫ້ສະຫວັນຢູ່ໃກ້ເຮົາຫລາຍຂຶ້ນ—ສະຫງ່າລາສີ, ແຕ່ເອື້ອມເຖິງໄດ້.

ແຕ່ແລ້ວ, ບາງເທື່ອພຣະເຈົ້າອາດຂໍໃຫ້ເຮົາເຮັດບາງສິ່ງທີ່ບໍ່ສະບາຍໃຈທີ່ສຸດ ຈົນເຮົາຮູ້ສຶກວ່າສິ່ງເຫລົ່ານັ້ນຢູ່ໄກເກີນເອື້ອມ. ສຳລັບໄພ່ພົນລຸ້ນທຳອິດຫລາຍຄົນ, ການແຕ່ງເມຍຫລາຍຄົນໄດ້ເປັນພຣະບັນຍັດຂໍ້ໜຶ່ງເຊັ່ນນັ້ນ. ພຣະບັນຍັດໃຫ້ເອົາເມຍຫລາຍຄົນໄດ້ເປັນການທົດລອງທີ່ໜັກໜ່ວງສຳລັບໂຈເຊັບ ສະມິດ, ເອມມາ ພັນລະຍາຂອງເພິ່ນ, ແລະ ທຸກຄົນທີ່ໄດ້ຮັບພຣະບັນຍັດຂໍ້ນີ້. ໃນການຜ່ານຜ່າການທົດລອງຂໍ້ນີ້, ເຂົາເຈົ້າຕ້ອງມີຄວາມຮູ້ສຶກຫລາຍກວ່າທີ່ມີກ່ຽວກັບພຣະກິດຕິຄຸນທີ່ຟື້ນຟູ; ເຂົາເຈົ້າຕ້ອງມີສັດທາໃນພຣະເຈົ້າເກີນກວ່າຄວາມປາດຖະໜາສ່ວນຕົວ ຫລື ອະຄະຕິ. ພຣະບັນຍັດດັ່ງກ່າວບໍ່ມີອີກຕໍ່ໄປ, ແຕ່ຕົວຢ່າງທີ່ຊື່ສັດຂອງຜູ້ທີ່ໄດ້ດຳລົງຊີວິດຕາມນັ້ນຍັງມີຢູ່ຕໍ່ໄປ. ແລະ ຕົວຢ່າງນັ້ນດົນໃຈເຮົາ ເມື່ອເຮົາຖືກຂໍໃຫ້ທຳການ “ເສຍສະລະໃນການເຊື່ອຟັງ” ຂອງເຮົາ (ຄຳສອນ ແລະ ພັນທະສັນຍາ 132:50).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 130–31

ໂຈເຊັບ ສະມິດ ໄດ້ເປີດເຜີຍຄວາມຈິງກ່ຽວກັບຝ່າຍພຣະເຈົ້າ ແລະ “ໂລກທີ່ຈະມາເຖິງ.”

ທ່ານອາດສັງເກດເຫັນວ່າ ພາກທີ 130–31 ມີເນື້ອຄວາມທີ່ແຕກຕ່າງໜ້ອຍໜຶ່ງ ຈາກພາກອື່ນໆໃນ ຄຳສອນ ແລະ ພັນທະສັນຍາ. ມັນເປັນແນວນີ້ເພາະວ່າ ພາກທີ 130–31 ແມ່ນມາຈາກຂໍ້ຄວາມທີ່ວິວລຽມ ຄະເລຕັນ, ເລຂານຸການຄົນໜຶ່ງຂອງໂຈເຊັບ ສະມິດ, ໄດ້ຂຽນໄວ້ຕອນເພິ່ນໄດ້ຍິນສາດສະດາສິດສອນ. ຜົນກໍຄື, ພາກເຫລົ່ານີ້ເປັນຄືກັນກັບການຮວບຮວມຄວາມຈິງ ແທນທີ່ຈະເປັນການເປີດເຜີຍທີ່ຕິດຕໍ່ກັນ ທີ່ບອກໃຫ້ຂຽນ. ເຖິງແມ່ນແນວນັ້ນ, ຂໍ້ຄວາມເຫລົ່ານີ້ ຍັງໄດ້ເປັນຫົວຂໍ້ທົ່ວໄປໃນບັນດາຄວາມຈິງເຫລົ່ານີ້. ຍົກຕົວຢ່າງ, ທ່ານອາດອ່ານ ພາກທີ 130–131 ດ້ວຍຄຳຖາມເຫລົ່ານີ້ຢູ່ໃນໃຈ: ເຮົາຮຽນຮູ້ຫຍັງແດ່ກ່ຽວກັບພຣະເຈົ້າ? ເຮົາຮຽນຮູ້ຫຍັງແດ່ກ່ຽວກັບຊີວິດຫລັງຈາກຊ່ວງມະຕະ? ຄວາມຮູ້ນີ້ມີຜົນກະທົບຕໍ່ຊີວິດຂອງເຮົາແນວໃດ?

ເບິ່ງ “Our Hearts Rejoiced to Hear Him Speak,” Revelations in Context, 277–80 ນຳອີກ.

ຄຳສອນ ແລະ ພັນທະສັນຍາ 131:1–4; 132:7, 13–25

ພຣະບິດາເທິງສະຫວັນໄດ້ເຮັດໃຫ້ເປັນໄປໄດ້ສຳລັບຄອບຄົວທີ່ຈະເປັນນິລັນດອນ.

ໜຶ່ງໃນຄວາມຈິງທີ່ອຸ່ນໃຈຫລາຍທີ່ສຸດ ຊຶ່ງຖືກຟື້ນຟູຜ່ານທາງສາດສະດາໂຈເຊັບ ສະມິດ ແມ່ນວ່າການແຕ່ງງານ ແລະ ຄວາມສຳພັນຂອງຄອບຄົວສາມາດຍືນຍົງຕະຫລອດການ. ຜ່ານທາງໂຈເຊັບ ສະມິດ, ພຣະຜູ້ເປັນເຈົ້າໄດ້ຟື້ນຟູພິທີການ ແລະ ສິດອຳນາດທີ່ຈຳເປັນໃນການເຮັດໃຫ້ຄວາມສຳພັນເປັນນິລັນດອນ (ເບິ່ງ ຄຳສອນ ແລະ ພັນທະສັນຍາ 132:7, 18–19). ໃຫ້ຄິດກ່ຽວກັບຄວາມສຳພັນຂອງຄອບຄົວທີ່ທ່ານມີ ຫລື ຫວັງທີ່ຈະມີ ໃນອະນາຄົດ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 131:1–4; 132:7, 13–15. ຂໍ້ເຫລົ່ານີ້ມີຜົນກະທົບຕໍ່ວິທີທີ່ທ່ານຄິດກ່ຽວກັບຄວາມສຳພັນເຫລົ່ານີ້ແນວໃດ?

ເຖິງຢ່າງໃດກໍຕາມ, ບາງເທື່ອຫລັກທຳຂອງຄອບຄົວນິລັນດອນບໍ່ໄດ້ໃຫ້ຄວາມອຸ່ນໃຈຫລາຍປານໃດ—ມັນອາດນຳຄວາມກັງວົນ, ແມ່ນແຕ່ຄວາມໂສກເສົ້າ, ເມື່ອສະຖານະການປະຈຸບັນຂອງຄອບຄົວຂອງເຮົາບໍ່ເປັນແບບອຸດົມຄະຕິແຫ່ງຊັ້ນສູງ. ເມື່ອປະທານເຮັນຣີ ບີ ໄອຣິງ ມີຄວາມເປັນຫ່ວງເປັນໃຍກ່ຽວກັບສະຖານະການເຊັ່ນນັ້ນຢູ່ໃນຄອບຄົວຂອງເພິ່ນເອງ, ເພິ່ນໄດ້ຮັບຄຳແນະນຳທີ່ສະຫລາດນີ້ຈາກສະມາຊິກຄົນໜຶ່ງໃນກຸ່ມອັກຄະສາວົກສິບສອງ ທີ່ວ່າ: “ຂໍໃຫ້ເຈົ້າພຽງແຕ່ດຳລົງຊີວິດໃຫ້ມີຄ່າຄວນຕໍ່ອານາຈັກຊັ້ນສູງກໍພໍແລ້ວ, ແລະ ການຈັດຕຽມຂອງຄອບຄົວຈະເລີດກວ່າທີ່ເຈົ້າຈິນຕະນາການໄດ້” (ໃນ “A Home Where the Spirit of the Lord Dwells,” Ensign ຫລື Liahona, May 2019, 25). ການເຮັດຕາມຄຳແນະນຳນີ້ອາດເປັນພອນໃຫ້ແກ່ທ່ານໃນສະຖານະການປະຈຸບັນຂອງຄອບຄົວທ່ານແນວໃດ?

ເບິ່ງ Kristen M. Oaks, “To the Singles of the Church” (Church Educational System devotional for young adults, Sept. 11, 2011), broadcasts.ChurchofJesusChrist.org ນຳອີກ.

ຜູ້ຊາຍກັບຜູ້ຍິງ ຢູ່ນອກພຣະວິຫານ ອາຄະຣາ ການາ — ຄວາມສຳພັນຂອງຄອບຄົວສາມາດຖືກເຮັດໃຫ້ເປັນນິລັນດອນໄດ້ຜ່ານທາງພິທີການຂອງພຣະວິຫານ.

ຄຳສອນ ແລະ ພັນທະສັນຍາ 132:1–2, 29–40

ການແຕ່ງເມຍຫລາຍຄົນຖືກຮັບຮູ້ຈາກພຣະເຈົ້າ ພຽງແຕ່ເມື່ອພຣະອົງບັນຊາໃຫ້ເຮັດເທົ່ານັ້ນ.

ທຸກຄົນທີ່ໄດ້ອ່ານພຣະຄຳພີເດີມອາດສົງໄສກ່ຽວກັບອັບຣາຮາມ, ຢາໂຄບ, ໂມເຊ, ແລະ ຄົນອື່ນໆ ທີ່ໄດ້ເອົາເມຍຫລາຍຄົນ. ຜູ້ຊາຍທີ່ດີເຫລົ່ານີ້ໄດ້ຫລິ້ນຊູ້ບໍ? ຫລື ພຣະເຈົ້າເຫັນພ້ອມກັບການກະທຳຂອງພວກເພິ່ນ? ໃຫ້ຊອກຫາຄຳຕອບ ຢູ່ໃນ ຄຳສອນ ແລະ ພັນທະສັນຍາ 132:1–2, 29–40.

ການແຕ່ງງານລະຫວ່າງຊາຍຄົນໜຶ່ງ ແລະ ຍິງຄົນໜຶ່ງແມ່ນມາດຕະຖານຂອງການແຕ່ງງານຂອງພຣະເຈົ້າ (ເບິ່ງ ຫົວຂໍ້ພາກຂອງ ຂໍ້ປະກາດຢ່າງເປັນທາງການ 1; ເບິ່ງ ຢາໂຄບ 2:27, 30 ນຳອີກ). ເຖິງຢ່າງໃດກໍຕາມ, ມັນມີຊ່ວງເວລາໃນປະຫວັດສາດເມື່ອພຣະເຈົ້າໄດ້ບັນຊາລູກໆຂອງພຣະອົງໃຫ້ມີການແຕ່ງເມຍຫລາຍຄົນ.

ໃນຕອນຕົ້ນຂອງການຟື້ນຟູສາດສະໜາຈັກ ມັນໄດ້ເປັນຊ່ວງໄລຍະເຫລົ່ານັ້ນທີ່ຖືກອະນຸຍາດໃຫ້ເຮັດ. ຫລັງຈາກໄດ້ຮັບພຣະບັນຍັດຂໍ້ນີ້, ໂຈເຊັບ ສະມິດ ແລະ ໄພ່ພົນຍຸກສຸດທ້າຍຄົນອື່ນໆ ໄດ້ທຳການແຕ່ງເມຍຫລາຍຄົນ. ຖ້າຫາກທ່ານຢາກຮຽນຮູ້ຕື່ມອີກກ່ຽວກັບການແຕ່ງເມຍຫລາຍຄົນໃນທ່າມກາງໄພ່ພົນຍຸກສຸດທ້າຍລຸ້ນທຳອິດ, ໃຫ້ເບິ່ງ “Mercy Thompson and the Revelation on Marriage” (Revelations in Context, 281–93); Saints, 1:290–92, 432–35, 482–92, 502–4; “Plural Marriage in The Church of Jesus Christ of Latter-day Saints” (Gospel Topics, topics.ChurchofJesusChrist.org); ວິດີໂອ “Why Was It Necessary for Joseph Smith and Others to Practice Polygamy?” (ChurchofJesusChrist.org).

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 130:2, 18–19; 132:13, 19.ທ່ານອາດໃຊ້ຂໍ້ເຫລົ່ານີ້ ເພື່ອຊ່ວຍຄອບຄົວຂອງທ່ານຈັດລຳດັບຄວາມສຳຄັນຂອງສິ່ງທີ່ຍືນຍົງຊົ່ວນິລັນດອນແນວໃດ? ບາງທີໃຫ້ພວກທ່ານເອົາສິ່ງຂອງໃສ່ໃນຫີບເຄື່ອງ ຫລື ຖົງເປ້ ອັນທີ່ເປັນຕົວແທນໃຫ້ແກ່ສິ່ງທີ່, ອີງຕາມ ຄຳສອນ ແລະ ພັນທະສັນຍາ 130:2, 18–19; 132:19, ເຮົາສາມາດເອົາໄປນຳໄດ້ສູ່ຊີວິດໜ້າ, ເຊັ່ນຮູບຄອບຄົວ ຫລື ພຣະຄຳພີ. ຄຳສອນ ແລະ ພັນທະສັນຍາ 132:13 ສິດສອນເຮົາຫຍັງແດ່ກ່ຽວກັບສິ່ງທີ່ເປັນຂອງໂລກ? ສິ່ງນີ້ສາມາດນຳໄປສູ່ການສົນທະນາກ່ຽວກັບການເອົາໃຈໃສ່ຕໍ່ສິ່ງທີ່ມີຄວາມສຳຄັນນິລັນດອນ.

ຄຳສອນ ແລະ ພັນທະສັນຍາ 130:20–21.ພວກທ່ານສາມາດຮ້ອງເພງກ່ຽວກັບຄວາມກະຕັນຍູ, ດັ່ງເຊັ່ນ “ນັບພຣະພອນຂອງທ່ານ” (ເພງສວດ ແລະ ເພງຂອງເດັກນ້ອຍ, 8), ແລະ ຂຽນພອນຕ່າງໆທີ່ຄອບຄົວຂອງທ່ານໄດ້ຮັບຈາກການເຊື່ອຟັງກົດຂອງພຣະເຈົ້າ. ພອນຢ່າງໃດແດ່ທີ່ເຮົາຫວັງຈະໄດ້ຮັບ? ເຮົາຈະສາມາດໄດ້ຮັບພອນເຫລົ່ານັ້ນແນວໃດ?

ຄຳສອນ ແລະ ພັນທະສັນຍາ 131:1–4; 132:15–19.ວິດີໂອ “Marriage Is Sacred” (ChurchofJesusChrist.org) ອາດຊ່ວຍຄອບຄົວຂອງທ່ານໃຫ້ສົນທະນາກ່ຽວກັບຄວາມຈິງຢູ່ໃນຂໍ້ເຫລົ່ານີ້ໄດ້. ພຣະຜູ້ເປັນເຈົ້າຮູ້ສຶກແນວໃດກ່ຽວກັບການແຕ່ງງານ? ເຮົາ—ບໍ່ວ່າເຮົາແຕ່ງງານ ຫລື ຍັງເປັນໂສດ—ຈະກະກຽມສຳລັບການແຕ່ງງານນິລັນດອນແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ອະທິຖານຄອບຄົວ,” ເພງສວດ ແລະ ເພງຂອງເດັກນ້ອຍ, 73.

ການປັບປຸງການສຶກສາສ່ວນຕົວ

ຊອກຫາຄວາມຈິງຂອງພຣະກິດຕິຄຸນ. ບາງເທື່ອຄວາມຈິງຂອງພຣະກິດຕິຄຸນຈະຖືກກ່າວແບບໂດຍກົງ; ບາງເທື່ອກໍຖືກບອກກ່າວຜ່ານທາງຕົວຢ່າງ ຫລື ເລື່ອງລາວ. ຂະນະທີ່ທ່ານອ່ານ, ໃຫ້ຖາມຕົວເອງວ່າ, “ມີຄວາມຈິງນິລັນດອນຢ່າງໃດແດ່ທີ່ສິດສອນຢູ່ໃນຂໍ້ເຫລົ່ານີ້?”