“ວັນທີ 22–28 ເດືອນພະຈິກ. ຄຳສອນ ແລະ ພັນທະສັນຍາ 135–136: ‘ເພິ່ນ “ໄດ້ຜະນຶກພາລະກິດຂອງເພິ່ນ ແລະ ວຽກງານຂອງເພິ່ນດ້ວຍເລືອດຂອງເພິ່ນເອງ,”’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 22–28 ເດືອນພະຈິກ. ຄຳສອນ ແລະ ພັນທະສັນຍາ 135–136,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
ຄຸກຄາດເທດ
ວັນທີ 22–28 ເດືອນພະຈິກ
ຄຳສອນ ແລະ ພັນທະສັນຍາ 135–136
ເພິ່ນ “ໄດ້ຜະນຶກພາລະກິດຂອງເພິ່ນ ແລະ ວຽກງານຂອງເພິ່ນດ້ວຍເລືອດຂອງເພິ່ນເອງ”
ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 135–36, ພຣະຜູ້ເປັນເຈົ້າອາດກະຕຸ້ນທ່ານດ້ວຍຄວາມຮູ້ທີ່ຊ່ວຍທ່ານໃຫ້ນຳໃຊ້ສິ່ງທີ່ທ່ານໄດ້ອ່ານ. ເມື່ອສິ່ງນັ້ນເກີດຂຶ້ນ, ໃຫ້ຂຽນສິ່ງທີ່ພຣະອົງໄດ້ສິດສອນທ່ານໄວ້.
ບັນທຶກຄວາມປະທັບໃຈຂອງທ່ານ
ຕອນບ່າຍຂອງວັນທີ 27 ເດືອນມິຖຸນາ, 1844, ໄດ້ພົບເຫັນໂຈເຊັບ ແລະ ໄຮຣຳ ສະມິດ ຢູ່ໃນຄຸກອີກເທື່ອໜຶ່ງ, ພ້ອມດ້ວຍຈອນ ເທເລີ ແລະ ວິວເລີດ ຣິເຈີສ໌. ພວກເພິ່ນເຊື່ອວ່າພວກເພິ່ນບໍ່ມີຄວາມຜິດໃນຄະດີໃດໆ, ແຕ່ພວກເພິ່ນໄດ້ຍອມຕົວໃຫ້ຖືກຈັບ, ຫວັງວ່າຈະກີດກັນບໍ່ໃຫ້ມີຄວາມຮຸນແຮງເກີດຂຶ້ນກັບໄພ່ພົນຢູ່ໃນເມືອງນາວູ. ມັນບໍ່ໄດ້ເປັນເທື່ອທຳອິດທີ່ສັດຕູຂອງສາດສະໜາຈັກໄດ້ເອົາສາດສະດາໂຈເຊັບເຂົ້າຄຸກ, ແຕ່ເທື່ອນີ້ ຄືວ່າເພິ່ນຮູ້ວ່າເພິ່ນຈະບໍ່ໄດ້ກັບຄືນໄປແບບຍັງມີຊີວິດ. ເພິ່ນ ແລະ ໝູ່ເພື່ອນຂອງເພິ່ນໄດ້ພະຍາຍາມປອບໃຈກັນແລະກັນ ໂດຍການອ່ານຈາກພຣະຄຳພີມໍມອນ ແລະ ການຮ້ອງເພງສວດ. ແລ້ວພວກເພິ່ນໄດ້ຍິນສຽງປືນ, ແລະ ພາຍໃນສອງສາມນາທີ ຊີວິດທີ່ເປັນມະຕະຂອງໂຈເຊັບ ສະມິດ ແລະ ໄຮຣຳ ອ້າຍຂອງເພິ່ນກໍໄດ້ສິ້ນສຸດລົງ.
ແລະ ມັນກໍບໍ່ໄດ້ເປັນທີ່ສິ້ນສຸດຂອງອຸດົມການແຫ່ງສະຫວັນທີ່ພວກເພິ່ນໄດ້ຮັບເອົາ. ແລະ ມັນກໍບໍ່ໄດ້ເປັນທີ່ສິ້ນສຸດຂອງການຟື້ນຟູພຣະກິດຕິຄຸນຂອງພຣະເຢຊູຄຣິດ. ມັນມີວຽກງານຕື່ມອີກທີ່ຕ້ອງເຮັດ ແລະ ມີການເປີດເຜີຍຕື່ມອີກທີ່ຈະນຳພາສາດສະໜາຈັກໄປຂ້າງໜ້າ. ການຂ້າສາດສະດາບໍ່ສາມາດຂ້າວຽກງານຂອງພຣະເຈົ້າໄດ້.
ເບິ່ງ Saints, 1:521–52.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄຳສອນ ແລະ ພັນທະສັນຍາ 135; 136:37–39
ໂຈເຊັບ ແລະ ໄຮຣຳ ສະມິດ ໄດ້ຜະນຶກປະຈັກພະຍານຂອງພວກເພິ່ນດ້ວຍເລືອດຂອງພວກເພິ່ນ.
ໃຫ້ວາດພາບເບິ່ງວິທີທີ່ທ່ານອາດຮູ້ສຶກ ຖ້າຫາກວ່າທ່ານໄດ້ມີຊີວິດຢູ່ໃນເມືອງນາວູ ຕອນທີ່ໂຈເຊັບ ແລະ ໄຮຣຳ ສະມິດ ໄດ້ຖືກຂ້າ ວ່າຊິເປັນແນວໃດ (ເບິ່ງ Saints, 1:554–55). ທ່ານຈະພະຍາຍາມເຂົ້າໃຈເຫດການທີ່ໜ້າເສົ້າສະຫລົດໃຈນີ້ແນວໃດ? ຄຳສອນ ແລະ ພັນທະສັນຍາ 135, ທີ່ຖືກຈັດພິມເປັນເທື່ອທຳອິດ ພາຍໃນສອງສາມເດືອນຫລັງຈາກການຂ້າເລື່ອງສາດສະໜາ, ອາດຊ່ວຍໃນເລື່ອງນີ້ໄດ້. ທ່ານສາມາດໝາຍຂໍ້ຄວາມ ແລະ ສຳນວນທີ່ຈະໃຫ້ຄວາມເຂົ້າໃຈ ແລະ ຄວາມໝັ້ນໃຈແກ່ທ່ານ. ທ່ານຈະເວົ້າແນວໃດກັບບາງຄົນທີ່ຖາມວ່າ, “ເປັນຫຍັງພຣະເຈົ້າຈຶ່ງປ່ອຍໃຫ້ສາດສະດາຂອງພຣະອົງຖືກຂ້າ?”
ເບິ່ງ ຄຳສອນ ແລະ ພັນທະສັນຍາ 5:21–22; 6:29–30; “Remembering the Martyrdom,” Revelations in Context, 299–306; Teachings of Presidents of the Church: Joseph Smith, 522–23, 529–40; M. Russell Ballard, “Shall We Not Go On in So Great a Cause?” Ensign ຫລື Liahona, May 2020, 8-11) ນຳອີກ.
ຄຳສອນ ແລະ ພັນທະສັນຍາ 135:3
ໂຈເຊັບ ສະມິດ ໄດ້ເຮັດເພື່ອຄວາມລອດຂອງມະນຸດໃນໂລກນີ້ຫລາຍກວ່າຄົນອື່ນ, ຍົກເວັ້ນແຕ່ພຣະເຢຊູຄຣິດເທົ່ານັ້ນ.
ໃຫ້ຄິດກ່ຽວກັບພອນທີ່ມາສູ່ທ່ານ ໃນຖານະທີ່ເປັນສະມາຊິກຂອງສາດສະໜາຈັກຂອງພຣະເຢຊູຄຣິດ. ມີຈັກຢ່າງທີ່ເປັນເພາະຜົນຂອງການສຳເລັດພາລະກິດໂດຍສາດສະດາໂຈເຊັບ ສະມິດ? ຄຳສອນ ແລະ ພັນທະສັນຍາ 135:3 ບອກບາງສິ່ງທີ່ຍິ່ງໃຫຍ່ທີ່ໂຈເຊັບ ສະມິດ ໄດ້ປະສົບຄວາມສຳເລັດ ພາຍໃນ 24 ປີ ຫລັງຈາກພາບທີ່ມາໃຫ້ເຫັນຄັ້ງທຳອິດ. ສິ່ງເຫລົ່ານີ້ມີຜົນກະທົບຕໍ່ທ່ານ ແລະ ຕໍ່ຄວາມສຳພັນຂອງທ່ານກັບພຣະບິດາເທິງສະຫວັນ ແລະ ພຣະເຢຊູຄຣິດແນວໃດ? ໃຫ້ຄິດທີ່ຈະບັນທຶກປະຈັກພະຍານຂອງທ່ານກ່ຽວກັບສາດສະດາໂຈເຊັບ ສະມິດ. ແມ່ນໃຜທີ່ຄວນໄດ້ຍິນປະຈັກພະຍານຂອງທ່ານ?
ພຣະຜູ້ເປັນເຈົ້າມອບຄຳແນະນຳໃຫ້ແກ່ເຮົາ ສຳລັບ “ການເດີນທາງ” ໃນຊີວິດຂອງເຮົາ.
ຫລັງຈາກໄດ້ຖືກຂັບໄລ່ອອກຈາກເມືອງນາວູແລ້ວ, ໄພ່ພົນໄດ້ປະເຊີນກັບການເດີນທາງອັນຍາວໄກ ໄປຫາຮ່ອມພູເຊົາເລັກ, ແລະ ສອງສາມຮ້ອຍກິໂລແມັດທຳອິດ ແມ່ນຊ້າ ແລະ ລຳບາກຫລາຍ. ບຣິກຳ ຢັງ, ຜູ້ເວລານັ້ນ ໄດ້ນຳພາສາດສະໜາຈັກ ໃນຖານະປະທານກຸ່ມອັກຄະສາວົກສິບສອງ, ມີຄວາມເປັນຫ່ວງວ່າໄພ່ພົນຈະເດີນທາງໄປເຖິງຈຸດໝາຍໄດ້ແນວໃດ. ເພິ່ນໄດ້ຕັ້ງທີ່ພັກເຊົາຊົ່ວຄາວ ເອີ້ນວ່າ ວິນເຕີຄວດເຕີສ໌ ແລະ ໄດ້ທູນຂໍການຊີ້ນຳ. ໃນການຕອບ, ພຣະຜູ້ເປັນເຈົ້າໄດ້ເປີດເຜີຍແກ່ເພິ່ນ, ເວລານີ້ແມ່ນ ພາກທີ 136. ໃນບັນດາສິ່ງອື່ນໆ, ການເປີດເຜີຍນີ້ໄດ້ເຕືອນໄພ່ພົນວ່າ “ການກະທຳຂອງເຂົາເຈົ້າໃນລະຫວ່າງການເດີນທາງກໍສຳຄັນເທົ່າໆກັບຈຸດໝາຍປາຍທາງຂອງເຂົາເຈົ້າ” ແລະ “ໄດ້ຊ່ວຍໃນການອົບພະຍົບໄປຫາພາກຕາເວັນຕົກ ດ້ວຍຄວາມຈຳເປັນທີ່ໂຊກຮ້າຍ ໄປຫາການແບ່ງປັນປະສົບການທາງວິນຍານທີ່ສຳຄັນ” (“This Shall Be Our Covenant,” Revelations in Context, 308).
ໃຫ້ເກັບສະພາບການນີ້ໄວ້ໃນໃຈຂະນະທີ່ທ່ານສຶກສາ ພາກທີ 136. ຄຳແນະນຳໃດແດ່ທີ່ທ່ານພົບເຫັນ ທີ່ສາມາດຊ່ວຍປ່ຽນການທົດລອງອັນຫຍຸ້ງຍາກໃນຊີວິດຂອງທ່ານໃຫ້ “ເປັນປະສົບການທາງວິນຍານ … ທີ່ສຳຄັນ”? ທ່ານອາດໄຕ່ຕອງນຳອີກເຖິງວິທີທີ່ຄຳແນະນຳສາມາດຊ່ວຍທ່ານບັນລຸພຣະປະສົງຂອງພຣະຜູ້ເປັນເຈົ້າໃນຊີວິດຂອງທ່ານເອງແນວໃດ, ດັ່ງທີ່ມັນໄດ້ຊ່ວຍເຫລືອໄພ່ພົນລຸ້ນທຳອິດໃຫ້ຕັດສິນໃຈເດີນທາງດ້ວຍຄວາມລຳບາກໄປຫາພາກຕາເວັນຕົກນັ້ນ.
ເບິ່ງ “This Shall Be Our Covenant,” Revelations in Context, 307–14; Church History Topics, “Succession of Church Leadership,” ChurchofJesusChrist.org/study/history/topics ນຳອີກ.
WinterQuarters [ວິນເຕີຄວດເຕີສ໌], ໂດຍ ກະເຣກ ອໍເຊັນ
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 135:1, 3.ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈຄວາມໝາຍທີ່ວ່າໂຈເຊັບ ສະມິດ “ໄດ້ຜະນຶກພາລະກິດຂອງເພິ່ນ ແລະ ວຽກງານຂອງເພິ່ນດ້ວຍເລືອດຂອງເພິ່ນເອງ,” ຄອບຄົວຂອງທ່ານສາມາດເບິ່ງວິດີໂອ “Testimony of the Book of Mormon” (ChurchofJesusChrist.org; ເບິ່ງ Jeffrey R. Holland, “Safety for the Soul,” Ensign ຫລື Liahona, Nov. 2009, 88–90) ນຳອີກ. ແມ່ນຫຍັງທີ່ປະທັບໃຈເຮົາກ່ຽວກັບຂໍ້ເຫລົ່ານີ້? ເຮົາຈະເປັນຄົນທີ່ຊື່ສັດຫລາຍກວ່າເກົ່າໃນປະຈັກພະຍານຂອງເຮົາໄດ້ແນວໃດ, ແມ່ນແຕ່ຖ້າຫາກເຮົາບໍ່ໄດ້ຖືກຂໍຮ້ອງໃຫ້ສະລະຊີວິດຂອງເຮົາເພື່ອພາລະກິດ ແລະ ວຽກງານເຫລົ່ານັ້ນກໍຕາມ?
-
ຄຳສອນ ແລະ ພັນທະສັນຍາ 135:3.ເພື່ອສົນທະນາກ່ຽວກັບຄວາມໝາຍຂອງຖ້ອຍຄຳທີ່ວ່າໂຈເຊັບ ສະມິດ ໄດ້ “ເຮັດເພື່ອຄວາມລອດຂອງມະນຸດໃນໂລກນີ້ຫລາຍກວ່າຄົນອື່ນ, ຍົກເວັ້ນແຕ່ພຣະເຢຊູເທົ່ານັ້ນ,” ໃຫ້ຄິດທີ່ຈະທົບທວນສິ່ງທີ່ຄອບຄົວຂອງທ່ານໄດ້ຮຽນຮູ້ກ່ຽວກັບໂຈເຊັບ ສະມິດ ໃນປີນີ້. ທ່ານສາມາດໃຊ້ຮູບຈາກແຫລ່ງນີ້ເພື່ອຊ່ວຍເຂົາເຈົ້າໃຫ້ຈື່ຈຳສິ່ງທີ່ເຂົາເຈົ້າໄດ້ຮຽນຮູ້ ແລະ ເຊື້ອເຊີນເຂົາເຈົ້າໃຫ້ແບ່ງປັນເລື່ອງເລົ່າ ຫລື ຄຳສອນທີ່ເຂົາເຈົ້າມັກ. ເປັນຫຍັງເຮົາຈຶ່ງກະຕັນຍູສຳລັບສາດສະດາໂຈເຊັບ ສະມິດ ແລະ ສຳລັບສິ່ງທີ່ພຣະຜູ້ເປັນເຈົ້າໄດ້ບັນລຸຜ່ານທາງເພິ່ນ? ພວກທ່ານສາມາດເບິ່ງວິດີໂອ “Joseph Smith: The Prophet of the Restoration” (ChurchofJesusChrist.org).
-
ຄຳສອນ ແລະ ພັນທະສັນຍາ 136.ເມື່ອພຣະຜູ້ເປັນເຈົ້າໄດ້ເປີດເຜີຍ ພາກທີ 136, ໄພ່ພົນຕ້ອງໄດ້ເດີນທາງອັນຍາວໄກທີ່ລຳບາກ, ພາຍໃຕ້ການຊີ້ນຳຂອງບຣິກຳ ຢັງ (ເບິ່ງ ບົດທີ 58, 60, ແລະ 62 ໃນ ເລື່ອງຄຳສອນ ແລະ ພັນທະສັນຍາ, 206–8, 211–16, 222–24). ຂະນະທີ່ທ່ານອ່ານ ພາກທີ 136 ນຳກັນ, ໃຫ້ຄິດກ່ຽວກັບສິ່ງທີ່ຫຍຸ້ງຍາກທີ່ຄອບຄົວຂອງທ່ານເຄີຍປະເຊີນ. ຄຳແນະນຳຢ່າງໃດແດ່ທີ່ເຮົາພົບເຫັນຢູ່ໃນການເປີດເຜີຍນີ້ ທີ່ຊ່ວຍເຮົາໃຫ້ເຂົ້າເຖິງຄວາມຊ່ວຍເຫລືອ ແລະ ອຳນາດຂອງພຣະຜູ້ເປັນເຈົ້າ?
-
ຄຳສອນ ແລະ ພັນທະສັນຍາ 136:4.ຄຳວ່າ “ດຳເນີນຊີວິດຕາມພິທີການທັງປວງຂອງພຣະຜູ້ເປັນເຈົ້າ” ໝາຍຄວາມວ່າແນວໃດ? ພິທີການທີ່ເຮົາໄດ້ຮັບມີຜົນກະທົບຕໍ່ຊີວິດປະຈຳວັນຂອງເຮົາແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ສັນເສີນບຸລຸດ,” ເພງສວດ ແລະ ເພງຂອງເດັກນ້ອຍ, 54.
ການປັບປຸງການສຶກສາສ່ວນຕົວ
ຊອກຫາຄວາມຮັກຂອງພຣະເຈົ້າ. ປະທານເອັມ ຣະໂຊ ບາເລີດ ໄດ້ສິດສອນວ່າ, “ພຣະກິດຕິຄຸນນີ້ເປັນພຣະກິດຕິຄຸນແຫ່ງຄວາມຮັກ—ຄວາມຮັກສຳລັບພຣະເຈົ້າ ແລະ ຄວາມຮັກສຳລັບກັນແລະກັນ” (“God’s Love for His Children,” Ensign, May 1988, 59). ຂະນະທີ່ທ່ານອ່ານພຣະຄຳພີ, ໃຫ້ຄິດທີ່ຈະໝາຍເຫດ ຫລື ໝາຍຫລັກຖານຂອງຄວາມຮັກຂອງພຣະເຈົ້າໄວ້.
Greater Love Hath No Man [ບໍ່ມີຜູ້ໃດມີຄວາມຮັກຍິ່ງໃຫຍ່ກວ່ານີ້], ໂດຍ ເຄຊີ ຈາຍສ໌