“ວັນທີ 29 ເດືອນພະຈິກ–ວັນທີ 5 ເດືອນທັນວາ. ຄຳສອນ ແລະ ພັນທະສັນຍາ 137–138: ‘ພາບນິມິດກ່ຽວກັບການໄຖ່ຄົນຕາຍ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 29 ເດືອນພະຈິກ–ວັນທີ 5 ເດືອນທັນວາ. ຄຳສອນ ແລະ ພັນທະສັນຍາ 137–138,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ໂຈເຊັບເຫັນພໍ່, ແມ່, ແລະ ອ້າຍຂອງເພິ່ນຢູ່ໃນອານາຈັກຊັ້ນສູງ (Joseph Smith’s Vision of the Celestial Kingdom [ພາບນິມິດຂອງໂຈເຊັບ ສະມິດ ກ່ຽວກັບອານາຈັກຊັ້ນສູງ], ຣໍເບີດ ແບແຣັດ).

ວັນທີ 29 ເດືອນພະຈິກ–ວັນທີ 5 ເດືອນທັນວາ

ຄຳສອນ ແລະ ພັນທະສັນຍາ 137–138

“ພາບນິມິດກ່ຽວກັບການໄຖ່ຄົນຕາຍ”

ປະທານເອັມ ຣະໂຊ ບາເລີດ ໄດ້ສິດສອນວ່າ: “ຂ້າພະເຈົ້າເຊື້ອເຊີນທ່ານໃຫ້ອ່ານ [ຄຳສອນ ແລະ ພັນທະສັນຍາ 138] ຢ່າງລະອຽດ ແລະ ຮອບຄອບ. ເມື່ອທ່ານເຮັດເຊັ່ນນັ້ນ, ຂໍໃຫ້ພຣະຜູ້ເປັນເຈົ້າຈົ່ງອວຍພອນທ່ານ ໃຫ້ເຂົ້າໃຈຫລາຍຂຶ້ນ ແລະ ຮູ້ບຸນຄຸນຕໍ່ຄວາມຮັກຂອງພຣະເຈົ້າ ແລະ ຕໍ່ແຜນແຫ່ງຄວາມລອດ ແລະ ແຜນແຫ່ງຄວາມສຸກຂອງພຣະອົງ ສຳລັບລູກໆຂອງພຣະອົງ” (“The Vision of the Redemption of the Dead,” Ensign ຫລື Liahona, Nov. 2018, 73).

ບັນທຶກຄວາມປະທັບໃຈຂອງທ່ານ

ການເປີດເຜີຍທີ່ບັນທຶກຢູ່ໃນ ຄຳສອນ ແລະ ພັນທະສັນຍາ 137 ແລະ 138 ໄດ້ຖືກແຍກຈາກກັນຫລາຍກວ່າ 80 ປີ ແລະ ເປັນໄລຍະທາງ 1,500 ໄມ (2,400 ກິໂລແມັດ). ພາກທີ 137 ໄດ້ຮັບໂດຍສາດສະດາໂຈເຊັບ ສະມິດ ໃນປີ 1836 ຢູ່ໃນພຣະວິຫານເຄີດແລນທີ່ຍັງສ້າງບໍ່ທັນສຳເລັດ, ແລະ ພາກທີ 138 ໄດ້ຮັບໂດຍໂຈເຊັບ ແອັຟ ສະມິດ, ປະທານຂອງສາດສະໜາຈັກຄົນທີຫົກ, ໃນປີ 1918 ຢູ່ໃນເມືອງເຊົາເລັກ. ແຕ່ໂດຍທາງຄຳສອນແລ້ວ, ພາບນິມິດທັງສອງນີ້ແມ່ນຄຽງຄູ່ກັນໄປ. ທັງສອງໄດ້ຕອບຄຳຖາມກ່ຽວກັບຈຸດໝາຍປາຍທາງຂອງລູກໆຂອງພຣະເຈົ້າ ໃນຊີວິດໜ້າ. ແລະ ທັງສອງມີຄວາມໝາຍທີ່ເລິກຊຶ້ງເມື່ອເຮົາພິຈາລະນາປະສົບການໃນຊີວິດຂອງສາດສະດາຜູ້ໄດ້ຮັບພາບນິມິດ.

ພາບນິມິດຂອງໂຈເຊັບ ສະມິດ ໄດ້ຊ່ວຍເພິ່ນໃຫ້ເຂົ້າໃຈຈຸດໝາຍປາຍທາງນິລັນດອນຂອງອາລ໌ວິນອ້າຍຂອງເພິ່ນ, ຜູ້ໄດ້ເສຍຊີວິດ ຫົກປີກ່ອນສິດອຳນາດທີ່ຈະໃຫ້ບັບຕິສະມາໄດ້ຖືກຟື້ນຟູ. ຄຳຖາມເລື່ອງຄວາມລອດນິລັນດອນຂອງອາລ໌ວິນໄດ້ວົນວຽນຢູ່ໃນໃຈຂອງໂຈເຊັບນັບແຕ່ນັ້ນມາ. ພາບນິມິດຂອງໂຈເຊັບ ແອັຟ ສະມິດ ໄດ້ເປີດເຜີຍຄວາມຈິງທີ່ສະຫງ່າລາສີກ່ຽວກັບໂລກວິນຍານ—ເປັນການເປີດເຜີຍທີ່ປອບໂຍນແທ້ໆ ຕໍ່ຜູ້ທີ່ໂສກເສົ້າກັບການຕາຍຂອງສະມາຊິກໃນຄອບຄົວທີ່ໃກ້ຊິດ. ໂຈເຊັບ ແອັຟ ສະມິດ, ໄດ້ສູນເສຍ ໄຮຣຳ ສະມິດ ພໍ່ຂອງເພິ່ນໄປ, ຕອນເພິ່ນມີອາຍຸໄດ້ 5 ປີ ແລະ ໄດ້ສູນເສຍແມ່ຂອງເພິ່ນ, ແມຣີ ຟຽວດິງ ສະມິດ, ຕອນເພິ່ນມີອາຍຸໄດ້ 13 ປີ. ຕອນເພິ່ນໄດ້ຮັບພາບນິມິດໃນປີ 1918, ເພິ່ນໄດ້ໂສກເສົ້າກັບການຕາຍຂອງລູກເພິ່ນ 13 ຄົນ.

ຫລາຍຄຳຖາມທີ່ຜູ້ຄົນມີກ່ຽວກັບຊີວິດຫລັງຈາກຄວາມຕາຍ ໄດ້ຖືກຕອບຢູ່ໃນການເປີດເຜີຍເຫລົ່ານີ້. ພາກທີ 137 ໃຫ້ຄວາມຮູ້ ແລະ ຄຳຖາມທຳອິດກ່ຽວກັບເລື່ອງນີ້, ແລະ ພາກທີ 138 ເປີດຜ້າມ່ານອອກກວ້າງກວ່າເກົ່າ. ທັງສອງ, ໄດ້ເປັນພະຍານເຖິງ “ຄວາມຮັກອັນຍິ່ງໃຫຍ່ ແລະ ປະເສີດທີ່ພຣະບິດາ ແລະ ພຣະບຸດໄດ້ສະແດງໃຫ້ປະຈັກ” (ຄຳສອນ ແລະ ພັນທະສັນຍາ 138:3).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 137

ແມ່ນແຕ່ຈິດວິນຍານຈະໄດ້ຮັບໂອກາດທີ່ຈະເລືອກເອົາລັດສະໝີພາບຊັ້ນສູງ.

ຄວາມເຂົ້າໃຈທົ່ວໄປໃນບັນດາຊາວຄຣິດ ໃນປີ 1836 ແມ່ນວ່າ ຖ້າຫາກບຸກຄົນໃດໜຶ່ງຕາຍໄປປາດສະຈາກການບັບຕິສະມາ—ຄືກັນກັບອາລ໌ວິນ ອ້າຍຂອງໂຈເຊັບ ສະມິດ—ບຸກຄົນນັ້ນບໍ່ສາມາດໄປສະຫວັນ. ແຕ່ໂຈເຊັບໄດ້ເຫັນອາລ໌ວິນຢູ່ໃນພາບນິມິດກ່ຽວກັບອານາຈັກຊັ້ນສູງ. ຂະນະທີ່ທ່ານອ່ານ ພາກທີ 137, ໃຫ້ໄຕ່ຕອງສິ່ງທີ່ທ່ານໄດ້ຮຽນຮູ້ກ່ຽວກັບພຣະບິດາເທິງສະຫວັນ, ແຜນແຫ່ງຄວາມລອດ, ແລະ ອານາຈັກຊັ້ນສູງ.

ເບິ່ງ Saints, 1:232–35 ນຳອີກ.

ຄຳສອນ ແລະ ພັນທະສັນຍາ 138:1–11, 25–30

ການອ່ານ ແລະ ການໄຕ່ຕອງພຣະຄຳພີ ກະກຽມເຮົາໃຫ້ຮັບເອົາການເປີດເຜີຍ.

ບາງເທື່ອການເປີດເຜີຍເກີດຂຶ້ນແມ່ນແຕ່ເມື່ອເຮົາບໍ່ໄດ້ສະແຫວງຫາມັນ. ແຕ່ສ່ວນຫລາຍ, ມັນເກີດຂຶ້ນເພາະເຮົາສະແຫວງຫາ ແລະ ກະກຽມສຳລັບມັນຢ່າງພາກພຽນ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 138:1–11, 25–30, ໃຫ້ສັງເກດເບິ່ງສິ່ງທີ່ປະທານໂຈເຊັບ ແອັຟ ສະມິດ ໄດ້ເຮັດເມື່ອ “ຕາແຫ່ງຄວາມເຂົ້າໃຈ [ຂອງເພິ່ນ] ໄດ້ເປີດ” ຕໍ່ຄວາມເຂົ້າໃຈພາລະກິດຊ່ວຍໃຫ້ລອດຂອງພຣະຜູ້ຊ່ວຍໃຫ້ລອດຫລາຍກວ່າເກົ່າ. ແລ້ວໃຫ້ພິຈາລະນາວິທີທີ່ທ່ານສາມາດເຮັດຕາມຕົວຢ່າງຂອງປະທານສະມິດ. ຍົກຕົວຢ່າງ, ທ່ານສາມາດປ່ຽນແປງສິ່ງໃດກັບການສຶກສາພຣະຄຳພີຂອງທ່ານ ເພື່ອຈະໄດ້ “ໄຕ່ຕອງຂໍ້ພຣະຄຳພີ” ຫລາຍກວ່າເກົ່າ ແລະ ເພື່ອຈະໄດ້ “ຄຳນຶງເຖິງການເສຍສະລະຊົດໃຊ້ອັນຍິ່ງໃຫຍ່ [ຂອງພຣະຜູ້ຊ່ວຍໃຫ້ລອດ]” ຫລາຍກວ່າເກົ່າ? (ຂໍ້ທີ 1–2).

ໃນຂ່າວສານນີ້ “The Vision of the Redemption of the Dead” (Ensign ຫລື Liahona, Nov. 2018, 71–74), ປະທານເອັມ ຣະໂຊ ບາເລີດ ໄດ້ແນະນຳວິທີອື່ນ ຊຶ່ງໃນວິທີນັ້ນປະທານສະມິດ ໄດ້ກະກຽມທີ່ຈະໄດ້ຮັບການເປີດເຜີຍນີ້. ໃຫ້ພິຈາລະນາວິທີທີ່ທ່ານໄດ້ກະກຽມສຳລັບປະສົບການທີ່ທ່ານກຳລັງມີຢູ່ ແລະ ຈະມີໃນອະນາຄົດແນວໃດ.

ເບິ່ງ ວິດີໂອ “Ministry of Joseph F. Smith: A Vision of the Redemption of the Dead,” ChurchofJesusChrist.org ນຳອີກ.

ຮູບ ໂຈເຊັບ ແອັຟ ສະມິດ — Joseph F. Smith [ໂຈເຊັບ ແອັຟ ສະມິດ], ໂດຍ ອາລ໌ເບີດ ອີ ຊາລ໌ບະເຣັນເນີ

ຄຳສອນ ແລະ ພັນທະສັນຍາ 138:25–60

ວຽກງານແຫ່ງຄວາມລອດກຳລັງເກີດຂຶ້ນຢູ່ທັງສອງຟາກມ່ານ.

ປະທານຣະໂຊ ເອັມ ແນວສັນ ໄດ້ສິດສອນວ່າ, “ຂ່າວສານຂອງພວກເຮົາຕໍ່ໂລກແມ່ນລຽບງ່າຍ ແລະ ຈິງໃຈ ທີ່ວ່າ: ພວກເຮົາຂໍເຊື້ອເຊີນລູກໆຂອງພຣະເຈົ້າທຸກຄົນ ທັງສອງຟາກມ່ານ ໃຫ້ມາຫາພຣະຜູ້ຊ່ວຍໃຫ້ລອດ, ຮັບເອົາພອນຂອງພຣະວິຫານທີ່ສັກສິດ, ມີຄວາມສຸກທີ່ຍືນຍາວ, ແລະ ເໝາະສົມສຳລັບຊີວິດນິລັນດອນ” (“Let Us All Press On,” Ensign ຫລື Liahona, May 2018, 118–19). ໃຫ້ໄຕ່ຕອງຂໍ້ຄວາມນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 138:25–60. ທ່ານກໍສາມາດພິຈາລະນາກ່ຽວກັບຄຳຖາມດັ່ງຕໍ່ໄປນີ້ຄືກັນ:

ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້ກ່ຽວກັບວິທີທີ່ວຽກງານແຫ່ງຄວາມລອດກຳລັງດຳເນີນຢູ່ໃນໂລກວິນຍານ? ເປັນຫຍັງມັນຈຶ່ງສຳຄັນສຳລັບທ່ານທີ່ຈະຮູ້ວ່າ ວຽກງານນີ້ກຳລັງເກີດຂຶ້ນຢູ່? ຂໍ້ເຫລົ່ານີ້ໃຫ້ຄວາມເຂັ້ມແຂງແກ່ສັດທາຂອງທ່ານແນວໃດ ໃນການຊົດໃຊ້ຂອງພຣະຜູ້ຊ່ວຍໃຫ້ລອດ?
ຂໍ້ເຫລົ່ານີ້ສິດສອນຫຍັງແດ່ກ່ຽວກັບຜູ້ທີ່ມີພາກສ່ວນໃນວຽກງານແຫ່ງຄວາມລອດ ຢູ່ໃນໂລກວິນຍານ? ເປັນຫຍັງມັນຈຶ່ງສຳຄັນທີ່ຈະເຂົ້າໃຈວ່າ ວຽກງານແຫ່ງຄວາມລອດກຳລັງເກີດຂຶ້ນຢູ່ທັງສອງຟາກມ່ານ?

ເບິ່ງ Dallin H. Oaks, “Trust in the Lord,” Ensign ຫລື Liahona, Nov. 2019, 26–29; “Susa Young Gates and the Vision of the Redemption of the Dead,” Revelations in Context, 315–22.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 137:1–5.ເຊື້ອເຊີນຄອບຄົວຂອງທ່ານໃຫ້ແຕ້ມຮູບກ່ຽວກັບສິ່ງທີ່ເຂົາເຈົ້າຄິດວ່າອານາຈັກຊັ້ນສູງອາດເປັນແບບໃດ ອີງຕາມຂໍ້ເຫລົ່ານີ້. ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ຊ່ວຍທ່ານໃຫ້ຫວັງວ່າທ່ານຈະໄດ້ຢູ່ໃນທີ່ນັ້ນ? ເຮົາເຮັດຫຍັງແດ່ໃນເວລານີ້ ເພື່ອກະກຽມທີ່ຈະຢູ່ໃນອານາຈັກຊັ້ນສູງກັບພຣະບິດາເທິງສະຫວັນ ແລະ ພຣະເຢຊູຄຣິດ?

ຄຳສອນ ແລະ ພັນທະສັນຍາ 137:5–10.ເພື່ອຮຽນຮູ້ກ່ຽວກັບວ່າໂຈເຊັບ ສະມິດ ຮູ້ສຶກແນວໃດເມື່ອເພິ່ນເຫັນສະມາຊິກໃນຄອບຄົວຂອງເພິ່ນໄດ້ຢູ່ນຳກັນໃນອານາຈັກຊັ້ນສູງ, ຄອບຄົວຂອງທ່ານສາມາດເບິ່ງວິດີໂອ “Ministry of Joseph Smith: Temples” (ChurchofJesusChrist.org). ບາງທີພວກທ່ານກໍສາມາດເວົ້າລົມກັນກ່ຽວກັບບາງຄົນທີ່ພວກທ່ານຮູ້ຈັກ ທີ່ໄດ້ເສຍຊີວິດປາດສະຈາກໂອກາດໄດ້ຮັບບັບຕິສະມາ. ຄຳສອນ ແລະ ພັນທະສັນຍາ 137:5–10 ສິດສອນຫຍັງແດ່ກ່ຽວກັບບຸກຄົນນັ້ນ?

ຄຳສອນ ແລະ ພັນທະສັນຍາ 138:12–24.ຄຳສອນ ແລະ ພັນທະສັນຍາ 138:12–24 ສິດສອນຫຍັງແດ່ກ່ຽວກັບຜູ້ຄົນທີ່ພຣະຜູ້ຊ່ວຍໃຫ້ລອດໄດ້ໄປຢ້ຽມຢາມຢູ່ໃນໂລກວິນຍານ? ພອນຢ່າງໃດແດ່ທີ່ເຂົາເຈົ້າໄດ້ຮັບ? ເຮົາຮຽນຮູ້ຫຍັງແດ່ຈາກຕົວຢ່າງຂອງເຂົາເຈົ້າ?

ຄຳສອນ ແລະ ພັນທະສັນຍາ 138:38–55.ຂໍ້ເຫລົ່ານີ້ບັນຍາຍເຖິງຜູ້ທີ່ປະທານໂຈເຊັບ ແອັຟ ສະມິດ ໄດ້ເຫັນຢູ່ໃນໂລກວິນຍານ ແລະ ຂໍ້ມູນເລັກນ້ອຍກ່ຽວກັບເຂົາເຈົ້າ. ບາງທີຄອບຄົວຂອງທ່ານສາມາດຂຽນລາຍຊື່ຂອງບັນພະບຸລຸດຂອງພວກທ່ານ ຜູ້ຢູ່ໃນໂລກວິນຍານ, ພ້ອມທັງຂໍ້ມູນກ່ຽວກັບຊີວິດຂອງເຂົາເຈົ້າ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ອະທິຖານຄອບຄົວ,” ເພງສວດ ແລະ ເພງຂອງເດັກນ້ອຍ, 73.

ການປັບປຸງການສິດສອນຂອງເຮົາ

ການໄຕ່ຕອງພຣະຄຳພີ. ປະທານເດວິດ ໂອ ມິກເຄ ໄດ້ເອີ້ນການນັ່ງສະມາທິວ່າເປັນ “ໜຶ່ງໃນ … ປະຕູທີ່ສັກສິດທີ່ສຸດ ຊຶ່ງຜ່ານປະຕູນັ້ນເຮົາໄດ້ເຂົ້າໄປໃນທີ່ປະທັບຂອງພຣະຜູ້ເປັນເຈົ້າ” (Teachings of Presidents of the Church: David O. McKay [2003], 32).

ພຣະເຢຊູຄຣິດຢູ່ໃນໂລກວິນຍານ — The Commissioned [ການມອບໝາຍ], ໂດຍ ແຮໂຣນ ໄອ ຮອບຄິນສັນ. ພຣະເຢຊູຄຣິດໄດ້ມອບໝາຍວິນຍານທີ່ຊອບທຳໃຫ້ສັ່ງສອນພຣະກິດຕິຄຸນຢູ່ໃນໂລກວິນຍານ.