“ວັນທີ 6–12 ເດືອນທັນວາ. ຫລັກແຫ່ງຄວາມເຊື່ອ ແລະ ຂໍ້ປະກາດຢ່າງເປັນທາງການ 1 ແລະ 2: ‘ພວກເຮົາເຊື່ອ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 6–12 ເດືອນທັນວາ. ຫລັກແຫ່ງຄວາມເຊື່ອ ແລະ ຂໍ້ປະກາດຢ່າງເປັນທາງການ 1 ແລະ 2,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021
To All Worthy Male Members [ຕໍ່ສະມາຊິກຜູ້ຊາຍທີ່ມີຄ່າຄວນທຸກຄົນ], ໂດຍ ເອມມາ ອາລີເບສ
ວັນທີ 6–12 ເດືອນທັນວາ
ຫລັກແຫ່ງຄວາມເຊື່ອ ແລະ ຂໍ້ປະກາດຢ່າງເປັນທາງການ 1 ແລະ 2
“ພວກເຮົາເຊື່ອ”
ຂະນະທີ່ທ່ານສຶກສາ ຫລັກແຫ່ງຄວາມເຊື່ອ ແລະ ຂໍ້ປະກາດຢ່າງເປັນທາງການ 1 ແລະ 2, ໃຫ້ພິຈາລະນາຜົນກະທົບຂອງມັນຕໍ່ສາດສະໜາຈັກ. ແມ່ນຫຍັງທີ່ປະທັບໃຈທ່ານກ່ຽວກັບຄວາມຈິງທີ່ສອງຢ່າງນີ້ສິດສອນ?
ບັນທຶກຄວາມປະທັບໃຈຂອງທ່ານ
ພາຍໃນ 200 ປີ ນັບແຕ່ພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ, ພຣະເຈົ້າໄດ້ສືບຕໍ່ມອບ “ການເປີດເຜີຍຕື່ມໃສ່ການເປີດເຜີຍ, ຄວາມຮູ້ຕື່ມໃສ່ຄວາມຮູ້” ໃຫ້ແກ່ຜູ້ນຳຂອງສາດສະໜາຈັກຂອງພຣະອົງ (ຄຳສອນ ແລະ ພັນທະສັນຍາ 42:61). ໃນບາງກໍລະນີ, ການເປີດເຜີຍນັ້ນໄດ້ແນະນຳໃຫ້ຜູ້ນຳຂອງສາດສະໜາຈັກ ປ່ຽນແປງນະໂຍບາຍຂອງສາດສະໜາຈັກ, “ຕາມທີ່ພຣະຜູ້ເປັນເຈົ້າປະສົງ, ເໝາະສົມຕໍ່ຄວາມເມດຕາຂອງພຣະອົງຕາມສະພາບຂອງລູກຫລານມະນຸດ” (ຄຳສອນ ແລະ ພັນທະສັນຍາ 46:15). ຂໍ້ປະກາດຢ່າງເປັນທາງການ 1 ແລະ 2 ເປັນຕົວແທນໃຫ້ແກ່ການເປີດເຜີຍເຊັ່ນນີ້—ຢ່າງໜຶ່ງໄດ້ພາໄປສູ່ການເລີກລົ້ມການແຕ່ງເມຍຫລາຍຄົນ, ແລະ ອີກຢ່າງໜຶ່ງໄດ້ເປັນພອນຂອງຖານະປະໂລຫິດ, ລວມທັງພອນຂອງພຣະວິຫານ, ມີໃຫ້ຜູ້ຄົນທຸກຊົນຊາດຊົນເຜົ່າ. ການປ່ຽນແປງເຊັ່ນນີ້ເປັນພາກສ່ວນໜຶ່ງຂອງສິ່ງທີ່ໝາຍຄວາມວ່າ “ສາດສະໜາຈັກທີ່ແທ້ຈິງ ແລະ ດຳລົງຢູ່” (ຄຳສອນ ແລະ ພັນທະສັນຍາ 1:30), ພ້ອມດ້ວຍສາດສະດາທີ່ແທ້ຈິງ ແລະ ມີຊີວິດຢູ່.
ແຕ່ກໍມີບາງສິ່ງທີ່ບໍ່ປ່ຽນແປງ—ພື້ນຖານ, ຄວາມຈິງນິລັນດອນ. ແລະ ບາງເທື່ອຈຸດປະສົງຂອງການເປີດເຜີຍແມ່ນເພື່ອໃຫ້ຄວາມສະຫວ່າງເພີ່ມເຕີມ ເລື່ອງຄວາມຈິງ, ຊ່ວຍເຮົາໃຫ້ເຫັນມັນຢ່າງແຈ່ມແຈ້ງກວ່າເກົ່າ. ຫລັກແຫ່ງຄວາມເຊື່ອ—ໂຈເຊັບ ສະມິດ ໄດ້ໃຫ້ຄຳຊີ້ແຈງສັ້ນໆ 13 ຂໍ້ ກ່ຽວກັບຄວາມເຊື່ອຂອງໄພ່ພົນຍຸກສຸດທ້າຍ—ເບິ່ງຄືວ່າໄດ້ຕອບສະໜອງຈຸດປະສົງນີ້ຢ່າງແຈ່ມແຈ້ງ. ການເປີດເຜີຍທັງສອງນຳພາ ແລະ ເປັນພອນໃຫ້ແກ່ສາດສະໜາຈັກ, ຊຶ່ງເປັນສາດສະໜາຈັກທີ່ຖືກສ້າງຕັ້ງຂຶ້ນເທິງຮາກຖານທີ່ໝັ້ນຄົງໃນເລື່ອງຄວາມຈິງນິລັນດອນ ແຕ່ກໍຍັງສາມາດເຕີບໂຕ ແລະ ປ່ຽນແປງໄດ້ ເມື່ອພຣະຜູ້ເປັນເຈົ້າເພີ່ມຄວາມເຂົ້າໃຈຂອງເຮົາ ເພື່ອຊ່ວຍເຮົາໃຫ້ສາມາດປະເຊີນກັບການທ້າທາຍໃນປະຈຸບັນໄດ້. ໃນອີກຄຳໜຶ່ງ, “ພວກເຮົາເຊື່ອທັງໝົດທີ່ພຣະເຈົ້າໄດ້ເປີດເຜີຍມາ, ທັງໝົດທີ່ພຣະອົງເປີດເຜີຍຢູ່ໃນຂະນະນີ້ ແລະ ພວກເຮົາເຊື່ອວ່າ ພຣະອົງຈະເປີດເຜີຍເລື່ອງສຳຄັນ ແລະ ຍິ່ງໃຫຍ່ອີກຫລາຍເລື່ອງກ່ຽວກັບອານາຈັກຂອງພຣະເຈົ້າ” (ຫລັກແຫ່ງຄວາມເຊື່ອ 1:9).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຫລັກແຫ່ງຄວາມເຊື່ອ ບັນຈຸພື້ນຖານແຫ່ງຄວາມຈິງຂອງພຣະກິດຕິຄຸນທີ່ຖືກຟື້ນຟູ.
ວິທີໜຶ່ງທີ່ທ່ານສາມາດສຶກສາ ຫລັກແຫ່ງຄວາມເຊື່ອ ແມ່ນການຂຽນຄວາມຈິງທີ່ພົບເຫັນຢູ່ໃນແຕ່ລະຂໍ້ ແລະ ແລ້ວໃຫ້ຊອກຫາຂໍ້ພຣະຄຳພີທີ່ກ່ຽວພັນກັບຄວາມຈິງເຫລົ່ານີ້. ຂໍ້ພຣະຄຳພີເຫລົ່ານີ້ເພີ່ມພູນຄວາມເຂົ້າໃຈຂອງທ່ານເຖິງຄວາມຈິງໃນ ຫລັກແຫ່ງຄວາມເຊື່ອ ແນວໃດ?
ເບິ່ງຄູ່ມືພຣະຄຳພີ, “ຫລັກແຫ່ງຄວາມເຊື່ອ,” scriptures.ChurchofJesusChrist.org; L. Tom Perry, “The Doctrines and Principles Contained in the Articles of Faith,” Ensign ຫລື Liahona, Nov. 2013, 46–48; “Chapter 38: The Wentworth Letter,” ໃນ Teachings of Presidents of the Church: Joseph Smith, 435–47 ນຳອີກ.
ຫລັກແຫ່ງຄວາມເຊື່ອ 1:9; ຂໍ້ປະກາດຢ່າງເປັນທາງການ 1 ແລະ 2
ສາດສະໜາຈັກຂອງພຣະເຢຊູຄຣິດຖືກນຳພາໂດຍການເປີດເຜີຍ.
“ພວກເຮົາເຊື່ອວ່າ [ພຣະເຈົ້າ] ຈະເປີດເຜີຍເລື່ອງສຳຄັນ ແລະ ຍິ່ງໃຫຍ່ອີກຫລາຍເລື່ອງກ່ຽວກັບອານາຈັກຂອງພຣະເຈົ້າ” (ຫລັກແຫ່ງຄວາມເຊື່ອ 1:9), ແມ່ນແຕ່ເມື່ອສິ່ງເຫລົ່ານັ້ນໝາຍເຖິງການປ່ຽນແປງນະໂຍບາຍ ແລະ ການປະຕິບັດຂອງສາດສະໜາຈັກກໍຕາມ. ໂດຍທີ່ມີຫລັກທຳຂໍ້ນີ້ຢູ່ໃນໃຈ, ໃຫ້ທົບທວນ ຂໍ້ປະກາດຢ່າງເປັນທາງການ 1 ແລະ 2, ແລະ ຊອກຫາຂໍ້ຄວາມ ແລະ ສຳນວນທີ່ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານ ໃນການເປີດເຜີຍອັນຕໍ່ເນື່ອງ. ມີຕົວຢ່າງໃດແດ່ຂອງການເປີດເຜີຍອັນຕໍ່ເນື່ອງທີ່ສາດສະດາຂອງພຣະຜູ້ເປັນເຈົ້າໄດ້ຮັບ ທີ່ທ່ານສາມາດຄິດໄດ້? ການເປີດເຜີຍເຫລົ່ານີ້ມີຜົນກະທົບຕໍ່ຊີວິດຂອງທ່ານແນວໃດ? ການເປີດເຜີຍເຫລົ່ານີ້ຊ່ວຍໃຫ້ວຽກງານໃນອານາຈັກຂອງພຣະບິດາເທິງສະຫວັນກ້າວໜ້າແນວໃດ?
ເບິ່ງ ອາໂມດ 3:7; 2 ນີໄຟ 28:30 ນຳອີກ.
ຂໍ້ປະກາດຢ່າງເປັນທາງການ 1
ວຽກງານຂອງພຣະເຈົ້າຈະຕ້ອງດຳເນີນໄປໜ້າ.
ໃນ “ຂໍ້ຄວາມທີ່ຂັດເລືອກອອກມາຈາກຄຳປາໄສສາມບົດ ຊຶ່ງກ່າວໂດຍປະທານວິວເຝີດ ວູດຣັບ ກ່ຽວກັບຄຳຖະແຫລງນະໂຍບາຍ” (ທີ່ຢູ່ໃນທ້າຍ ຂໍ້ປະກາດຢ່າງເປັນທາງການ 1), ມີເຫດຜົນຢ່າງໃດແດ່ທີ່ສາດສະດາໄດ້ໃຫ້ໄວ້ ເຖິງເຫດຜົນທີ່ພຣະຜູ້ເປັນເຈົ້າໄດ້ຍົກເລີກການແຕ່ງເມຍຫລາຍຄົນ? ສິ່ງນີ້ສິດສອນທ່ານຫຍັງແດ່ກ່ຽວກັບວຽກງານຂອງພຣະເຈົ້າ?
ສຳລັບຂໍ້ມູນເພີ່ມເຕີມກ່ຽວກັບປະຫວັດຄວາມເປັນມາຂອງ ຂໍ້ປະກາດຢ່າງເປັນທາງການ 1, ໃຫ້ເບິ່ງ “The Messenger and the Manifesto” (Revelations in Context, 323–31) ແລະ “Plural Marriage and Families in Early Utah” (Gospel Topics, topics.ChurchofJesusChrist.org).
Wilford Woodruff [ວິວເຝີດ ວູດຣັບ], ໂດຍ ເອັຈ ອີ ພີເຕີສັນ
ຂໍ້ປະກາດຢ່າງເປັນທາງການ 2
ເຮົາສາມາດໄວ້ວາງໃຈໃນພຣະຜູ້ເປັນເຈົ້າ, ແມ່ນແຕ່ຕອນທີ່ເຮົາບໍ່ເຂົ້າໃຈທັງໝົດ.
ພຣະຄຳພີສິດສອນເຮົາໃຫ້ໄວ້ວາງໃຈໃນພຣະຜູ້ເປັນເຈົ້າ (ເບິ່ງ ສຸພາສິດ 3:5), ແລະ ນັ້ນຄືສິ່ງທີ່ສະມາຊິກຊາວອາຟຣິກາຫລາຍຄົນຂອງສາດສະໜາຈັກໄດ້ເຮັດ ຕອນສາດສະໜາຈັກຈຳກັດພິທີການຂອງຖານະປະໂລຫິດ ແລະ ພິທີການຂອງພຣະວິຫານຈາກເຂົາເຈົ້າ. ເຖິງແມ່ນວ່າເຂົາເຈົ້າບໍ່ເຂົ້າໃຈເຫດຜົນຂອງນະໂຍບາຍນີ້—ແລະ ຮູ້ສຶກເຈັບປວດສະເໝີ ເມື່ອໄດ້ຍິນຄຳສິດສອນອະທິບາຍ ໃນເວລານັ້ນ, ຊຶ່ງປະຈຸບັນນີ້ ສາດສະໜາຈັກໄດ້ຖອນຄຳເວົ້າ—ສະມາຊິກຊາວອາຟຣິກາທີ່ອຸທິດຕົນຫລາຍຄົນໄດ້ໄວ້ວາງໃຈໃນພຣະຜູ້ເປັນເຈົ້າ ແລະ ຍຶດໝັ້ນຢ່າງຊື່ສັດຕະຫລອດຊີວິດຂອງເຂົາເຈົ້າ. ຂະນະທີ່ທ່ານອ່ານ ຂໍ້ປະກາດຢ່າງເປັນທາງການ 2, ໃຫ້ໄຕ່ຕອງວິທີທີ່ທ່ານໄດ້ຮຽນຮູ້ທີ່ຈະໄວ້ວາງໃຈໃນພຣະຜູ້ເປັນເຈົ້າ ແມ່ນແຕ່ເວລາທີ່ທ່ານບໍ່ເຂົ້າໃຈທັງໝົດ.
ການຮຽນຮູ້ກ່ຽວກັບສັດທາຂອງສະມາຊິກຊາວອາຟຣິກາຂອງສາດສະໜາຈັກ ສາມາດເປັນສິ່ງດົນໃຈແກ່ທ່ານໄດ້. ຕໍ່ໄປນີ້ແມ່ນເລື່ອງລາວຈຳນວນໜຶ່ງຂອງເຂົາເຈົ້າ, ຢູ່ໃນ history.ChurchofJesusChrist.org:
-
“Jane Elizabeth Manning James” (ຫົວຂໍ້ກ່ຽວກັບປະຫວັດສາດຂອງສາດສະໜາຈັກ)
-
“In My Father’s House Are Many Mansions” (ເລື່ອງລາວຂອງ ກຣີນ ຟະເລັກ)
-
“You Have Come at Last” (ເລື່ອງລາວຂອງ ແອນຕະນີ ໂອບິນນາ)
-
“Break the Soil of Bitterness” (ເລື່ອງລາວຂອງ ຈູເລຍ ມາວິມເບລາ)
-
“I Will Take It in Faith” (ເລື່ອງລາວຂອງ ໂຈດ ຣິກຝອດ)
ເບິ່ງ “Witnessing the Faithfulness,” Revelations in Context, 332–41; Gospel Topics, “Race and the Priesthood,” topics.ChurchofJesusChrist.org; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຫລັກແຫ່ງຄວາມເຊື່ອ.ໃຫ້ພິຈາລະນາວິທີທີ່ຄອບຄົວຂອງທ່ານສາມາດສ້າງ “ບົດຮຽນສັ້ນໆ” ສຳລັບ ຫລັກແຫ່ງຄວາມເຊື່ອ. ຍົກຕົວຢ່າງ, ໃນລະຫວ່າງສັບປະດາ, ສະມາຊິກໃນຄອບຄົວແຕ່ລະຄົນສາມາດເລືອກເອົາຫລັກແຫ່ງຄວາມເຊື່ອໜຶ່ງຂໍ້ ແລະ ຊອກຫາຂໍ້ພຣະຄຳພີ, ຮູບພາບ, ເພງສວດ, ຫລື ເພງຂອງເດັກນ້ອຍ ຫລື ແບ່ງປັນປະສົບການສ່ວນຕົວທີ່ກ່ຽວພັນກັນ.
ຫລື ສະມາຊິກໃນຄອບຄົວສາມາດປ່ຽນຜຽນກັນຖາມກ່ຽວກັບສາດສະໜາຈັກ ແລະ ຄວາມເຊື່ອຂອງເຮົາ ແລະ ແລ້ວໃຫ້ຕອບຄຳຖາມເຫລົ່ານັ້ນດ້ວຍຫລັກແຫ່ງຄວາມເຊື່ອ.
-
ຂໍ້ປະກາດຢ່າງເປັນທາງການ 1 ແລະ 2.ຂໍ້ປະກາດຢ່າງເປັນທາງການ 1 ແລະ 2 ຊ່ວຍເຮົາໃຫ້ເຂົ້າໃຈບົດບາດຂອງການເປີດເຜີຍຂອງສະໄໝໃໝ່ຢູ່ໃນສາດສະໜາຈັກ. ຂະນະທີ່ຄອບຄົວຂອງທ່ານອ່ານມັນນຳກັນ, ໃຫ້ຄິດທີ່ຈະສົນທະນາກ່ຽວກັບວິທີທີ່ສາດສະດານຳພາເຮົາ “ໂດຍການດົນໃຈຈາກພຣະເຈົ້າຜູ້ຊົງລິດອຳນາດຍິ່ງໃຫຍ່” (ຂໍ້ປະກາດຢ່າງເປັນທາງການ 1). ຂໍ້ປະກາດທັງສອງຢ່າງນີ້ເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາ ໃນການດຳລົງຊີວິດຕາມພຣະເຈົ້າ ຜູ້ນຳພາສາດສະໜາຈັກຂອງພຣະອົງ ດ້ວຍຕົວພຣະອົງເອງແນວໃດ? ເຮົາຈະສາມາດເຫັນພຣະຫັດຂອງພຣະອົງຢູ່ໃນວຽກງານຂອງສາດສະໜາຈັກໃນທຸກວັນນີ້ແນວໃດ? ພວກທ່ານອາດຢາກຄົ້ນຄວ້າບາງແຫລ່ງນຳກັນ ຢູ່ໃນ “ແນວຄິດສຳລັບການສຶກສາພຣະຄຳພີເປັນສ່ວນຕົວ” ຢູ່ຂ້າງເທິງ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ບອກມາສັດຈະຄືຫຍັງ,” ເພງສວດ ແລະ ເພງຂອງເດັກນ້ອຍ, 34.
ການປັບປຸງການສິດສອນຂອງເຮົາ
ຕິດຕາມເບິ່ງການເຊື້ອເຊີນໃຫ້ກະທຳ. “ເມື່ອທ່ານຕິດຕາມເບິ່ງການເຊື້ອເຊີນໃຫ້ກະທຳ, ທ່ານໄດ້ສະແດງໃຫ້ [ສະມາຊິກໃນຄອບຄົວຂອງທ່ານ] ເຫັນວ່າ ທ່ານເອົາໃຈໃສ່ຕໍ່ເຂົາເຈົ້າ ແລະ ວິທີທີ່ພຣະກິດຕິຄຸນໄດ້ເປັນພອນໃຫ້ແກ່ເຂົາເຈົ້າແນວໃດ. ທ່ານກໍຍັງໃຫ້ໂອກາດເຂົາເຈົ້າແບ່ງປັນປະສົບການຂອງເຂົາເຈົ້ານຳອີກ” (Teaching in the Savior’s Way, 35).
