“ວັນທີ 20–26 ເດືອນທັນວາ. ຄຣິດສະມາດ: ຂອງປະທານທີ່ຫາອັນປຽບບໍ່ໄດ້ຂອງພຣະບຸດແຫ່ງສະຫວັນຂອງພຣະເຈົ້າ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 20–26 ເດືອນທັນວາ. ຄຣິດສະມາດ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
Nativity in Copper and Umber [ຮູບການກຳເນີດ ໃນສີທອງ ແລະ ສີນ້ຳຕານແກ່], ໂດຍ ເຈ ເຄີກ ຣິເຈີດສ໌
ວັນທີ 20–26 ເດືອນທັນວາ
ຄຣິດສະມາດ
ຂອງປະທານທີ່ຫາອັນປຽບບໍ່ໄດ້ຂອງພຣະບຸດແຫ່ງສະຫວັນຂອງພຣະເຈົ້າ
ວິທີໜຶ່ງທີ່ຈະສຸມຄວາມຄິດຂອງທ່ານຢູ່ທີ່ພຣະຜູ້ຊ່ວຍໃຫ້ລອດໃນບຸນຄຣິດສະມາດນີ້ ແມ່ນການສຶກສາ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ.” ໂຄງຮ່າງນີ້ແນະນຳວິທີທີ່ທ່ານສາມາດເຮັດໃຫ້ປະຈັກພະຍານຂອງສາດສະດາເປັນພາກສ່ວນໜຶ່ງໃນການສຶກສາເປັນສ່ວນຕົວ ແລະ ເປັນຄອບຄົວຂອງທ່ານ.
ບັນທຶກຄວາມປະທັບໃຈຂອງທ່ານ
ໃນປີ 1838, ສາດສະດາໂຈເຊັບ ສະມິດ ໄດ້ປະກາດວ່າ, “ຫລັກທຳຂັ້ນພື້ນຖານຂອງສາດສະໜາຂອງເຮົາແມ່ນປະຈັກພະຍານຂອງອັກຄະສາວົກ ແລະ ສາດສະດາ, ກ່ຽວກັບພຣະເຢຊູຄຣິດ, ວ່າພຣະອົງໄດ້ສິ້ນພຣະຊົນ, ໄດ້ຖືກຝັງ, ແລະ ໄດ້ຟື້ນຄືນມາອີກໃນມື້ທີສາມ, ແລະ ໄດ້ສະເດັດຂຶ້ນໄປສະຫວັນ; ແລະ ທຸກສິ່ງທັງໝົດທີ່ກ່ຽວພັນກັບສາດສະໜາຂອງເຮົາເປັນພຽງສ່ວນປະກອບໃສ່ກັບສິ່ງເຫລົ່ານີ້ເທົ່ານັ້ນ” (Teachings of Presidents of the Church: Joseph Smith, 49). ຫລາຍປີຕໍ່ມາ, ປະທານຣະໂຊ ເອັມ ແນວສັນ ໄດ້ສັງເກດເຫັນວ່າ “ມັນແມ່ນຂໍ້ຄວາມນີ້ແຫລະຂອງສາດສະດາ ທີ່ດົນໃຈສາດສະດາ, ຜູ້ພະຍາກອນ, ແລະ ຜູ້ເປີດເຜີຍ 15 ຄົນ ໃຫ້ລະບຸ ແລະ ເຊັນ ປະຈັກພະຍານຂອງພວກເພິ່ນ ເພື່ອເປັນອະນຸສອນໃຫ້ແກ່ ວັນເກີດຄົບຮອບ 2,000 ປີ ຂອງພຣະຜູ້ເປັນເຈົ້າ. ປະຈັກພະຍານແຫ່ງປະຫວັດສາດນີ້ ມີຫົວຂໍ້ວ່າ ‘ພຣະຄຣິດທີ່ຊົງພຣະຊົນ.’ ສະມາຊິກຫລາຍຄົນໄດ້ທ່ອງຈຳຄວາມຈິງຂອງມັນ. ບາງຄົນພຽງຮູ້ວ່າມັນມີຢູ່ເທົ່ານັ້ນ. ຂະນະທີ່ສະແຫວງຫາການຮຽນຮູ້ເພີ່ມເຕີມກ່ຽວກັບພຣະເຢຊູຄຣິດ, ຂ້າພະເຈົ້າຢາກຊັກຊວນທ່ານໃຫ້ສຶກສາ ‘ພຣະຄຣິດທີ່ຊົງພຣະຊົນ’” (“Drawing the Power of Jesus Christ into Our Lives,” Ensign ຫລື Liahona, May 2017, 40).
ໃນຖານະໄພ່ພົນຍຸກສຸດທ້າຍ, ພວກເຮົາປິຕິຍິນດີໃນພອນຂອງການເປີດເຜີຍອັນຕໍ່ເນື່ອງ ຜ່ານທາງສາດສະດາ ແລະ ອັກຄະສາວົກຂອງສະໄໝໃໝ່. ພວກເຮົາຂອບພຣະໄທສຳລັບຄຳແນະນຳທີ່ດົນໃຈ, ຄຳເຕືອນ, ແລະ ການສະໜັບສະໜູນ. ແຕ່ເໜືອກວ່າສິ່ງອື່ນໃດ, ພວກເຮົາໄດ້ຮັບພອນໂດຍປະຈັກພະຍານທີ່ມີພະລັງເຖິງພຣະເຢຊູຄຣິດ—ລະຫວ່າງບຸນຄຣິດສະມາດ ແລະ ຕະຫລອດປີ. ມັນບໍ່ໄດ້ເປັນພຽງຖ້ອຍຄຳທີ່ດົນໃຈຂອງນັກປະພັນທີ່ຊຳນານ ຫລື ເປັນຄວາມຮູ້ຈາກຜູ້ຊຳນານດ້ານພຣະຄຳພີເທົ່ານັ້ນ. ມັນເປັນຖ້ອຍຄຳຂອງ “ພະຍານພິເສດເຖິງພຣະນາມຂອງພຣະຄຣິດ ຢູ່ທຸກບ່ອນທົ່ວໂລກ” ຊຶ່ງຖືກເລືອກໄວ້, ຖືກເອີ້ນ, ແລະ ມີສິດອຳນາດຂອງພຣະເຈົ້າ (ຄຳສອນ ແລະ ພັນທະສັນຍາ 107:23).
ແນວຄິດສຳລັບການສຶກສາພຣະຄຳພີເປັນສ່ວນຕົວ
“ບໍ່ມີມະນຸດຄົນໃດຢູ່ໃນໂລກນີ້ ທີ່ຈະມີອິດທິພົນເໜືອກວ່າ.”
ແນວຄິດໃດແດ່ທີ່ມາສູ່ທ່ານ ຂະນະທີ່ທ່ານອ່ານ ລູກາ 2:10–11 ພ້ອມກັບວັກທີໜຶ່ງຂອງ “ພຣະຄຣິດທີ່ຊົງພຣະຊົນ”? ທ່ານຈະວ່າແນວໃດໃນການສະໜັບສະໜູນຂໍ້ຄວາມທີ່ວ່າ “ບໍ່ມີມະນຸດຄົນໃດຢູ່ໃນໂລກນີ້ ທີ່ຈະມີອິດທິພົນເໜືອຜູ້ຄົນ ຫລາຍໄປກວ່າ [ພຣະເຢຊູຄຣິດ] ໄດ້”? ໃຫ້ຊອກຫາຄວາມຈິງຢູ່ໃນ “ພຣະຄຣິດທີ່ຊົງພຣະຊົນ” ທີ່ບັນຍາຍອິດທິພົນທີ່ເລິກຊຶ້ງຂອງພຣະຜູ້ຊ່ວຍໃຫ້ລອດ. ພຣະອົງໄດ້ເປັນອິດທິພົນແກ່ທ່ານ ແລະ ໄດ້ນຳ “ຄວາມຊົມຊື່ນຍິນດີອັນໃຫຍ່ຫລວງ” ມາສູ່ທ່ານແນວໃດ? (ລູກາ 2:10).
“ພຣະອົງໄດ້ຟື້ນຄືນພຣະຊົນ.”
ໃນ “ພຣະຄຣິດທີ່ຊົງພຣະຊົນ,” ອັກຄະສາວົກເປັນພະຍານເຖິງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ, ໂດຍການກ່າວເຖິງການມາປະກົດສາມເທື່ອຂອງພຣະຜູ້ເປັນເຈົ້າທີ່ຟື້ນຄືນພຣະຊົນແລ້ວ (ເບິ່ງ ວັກທີຫ້າ). ໃຫ້ຄິດທີ່ຈະອ່ານກ່ຽວກັບການມາຢ້ຽມຢາມເຫລົ່ານີ້ ຢູ່ໃນ ໂຢຮັນ 20–21; 3 ນີໄຟ 11–26; ແລະ ໂຈເຊັບ ສະມິດ—ປະຫວັດ 1:14–20. ທ່ານຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ ຈາກພຣະຄຳ ແລະ ການກະທຳຂອງພຣະອົງລະຫວ່າງການມາປະກົດເຫລົ່ານີ້?
“ຖານະປະໂລຫິດ ແລະ ສາດສະໜາຈັກຂອງພຣະອົງໄດ້ຖືກຟື້ນຟູ.”
ລະຫວ່າງການສຶກສາຂອງທ່ານກ່ຽວກັບຄຳສອນ ແລະ ພັນທະສັນຍາ ໃນປີນີ້, ທ່ານໄດ້ມີໂອກາດທີ່ຈະຮຽນຮູ້ຕື່ມອີກກ່ຽວກັບວິທີທີ່ “ຖານະປະໂລຫິດຂອງພຣະຜູ້ຊ່ວຍໃຫ້ລອດ ແລະ ສາດສະໜາຈັກຂອງພຣະອົງໄດ້ຖືກຟື້ນຟູ.” ຄວາມຈິງ ຫລື ຫລັກທຳທີ່ໄດ້ຖືກຟື້ນຟູຂໍ້ໃດແດ່ທີ່ມີຄວາມໝາຍຕໍ່ທ່ານໂດຍສະເພາະ? ໃຫ້ຄິດທີ່ຈະທົບທວນພຣະຄຳພີບາງຂໍ້ດັ່ງຕໍ່ໄປນີ້ ທີ່ສິດສອນກ່ຽວກັບການຟື້ນຟູ: ຄຳສອນ ແລະ ພັນທະສັນຍາ 1:17–23; 13; 20:1–12; 65; 110; 112:30–32; 124:39–42; 128:19–21. ໃຫ້ໄຕ່ຕອງວິທີທີ່ຄວາມຈິງຂອງພຣະກິດຕິຄຸນທີ່ຖືກຟື້ນຟູ ຊ່ວຍທ່ານໃຫ້ຮູ້ຈັກ ແລະ ນະມັດສະການພຣະເຢຊູຄຣິດແນວໃດ (ເບິ່ງ ຄຳສອນ ແລະ ພັນທະສັນຍາ 93:19).
“ພຣະອົງຈະກັບມາສູ່ໂລກອີກໃນມື້ໜຶ່ງ.”
ບຸນຄຣິດສະມາດເປັນຊ່ວງເວລາທີ່ໃຫ້ຄິດເຖິງອະດີດຕອນທີ່ພຣະເຢຊູຄຣິດໄດ້ກຳເນີດ ແລະ ໃຫ້ຄິດເຖິງອະນາຄົດ ເວລາທີ່ພຣະອົງຈະສະເດັດມາອີກ. ທ່ານຮຽນຮູ້ຫຍັງແດ່ກ່ຽວກັບການສະເດັດກັບມາຂອງພຣະອົງ ຈາກວັກທີສອງ ເຖິງວັກສຸດທ້າຍ “ພຣະຄຣິດທີ່ຊົງພຣະຊົນ”? ມັນອາດເປັນເລື່ອງໜ້າສົນໃຈທີ່ຈະອ່ານ, ຮ້ອງເພງ, ຫລື ຟັງເພງຄຣິດສະມາດທີ່ສິດສອນກ່ຽວກັບການສະເດັດມາຄັ້ງທີສອງ, ດັ່ງເຊັ່ນ “ພຣະຜູ້ໄຖ່ແຫ່ງອິດສະຣາເອນ” ຫລື “ຄັ້ງໜຶ່ງເຢຊູເກີດຕ່ຳຕ້ອຍ” (ເພງສວດ ແລະ ເພງຂອງເດັກນ້ອຍ, 5, 22).
“ພຣະອົງເປັນຄວາມສະຫວ່າງ, ເປັນຊີວິດ, ແລະ ເປັນຄວາມຫວັງຂອງໂລກ.”
ໃນວັກສຸດທ້າຍຂອງ “ພຣະຄຣິດທີ່ຊົງພຣະຊົນ,” ມີການກ່າວຄຳສັນລະເສີນ ແລະ ຕຳແໜ່ງສຳລັບພຣະຜູ້ຊ່ວຍໃຫ້ລອດ. ຂໍ້ພຣະຄຳພີດັ່ງຕໍ່ໄປນີ້ສາມາດຊ່ວຍທ່ານໃຫ້ໄຕ່ຕອງວິທີທີ່ພຣະເຢຊູຄຣິດ “ເປັນຄວາມສະຫວ່າງ, ເປັນຊີວິດ, ແລະ ເປັນຄວາມຫວັງຂອງໂລກ”: ລູກາ 2:25–32; 1 ໂກຣິນໂທ 15:19–23; ໂມໂຣໄນ 7:41; ຄຳສອນ ແລະ ພັນທະສັນຍາ 50:24; 84:44–46; 93:7–10. ພຣະອົງເປັນຄວາມສະຫວ່າງ, ເປັນຊີວິດ, ແລະ ເປັນຄວາມຫວັງຂອງທ່ານແນວໃດ? ມີຄຸນລັກສະນະ ຫລື ຕຳແໜ່ງໃດແດ່ຂອງພຣະຜູ້ຊ່ວຍໃຫ້ລອດ ທີ່ມີຄວາມໝາຍຫລາຍທີ່ສຸດຕໍ່ທ່ານ?
ການສຶກສາ “ພຣະຄຣິດທີ່ຊົງພຣະຊົນ” ມີຜົນກະທົບຕໍ່ສັດທາຂອງທ່ານ ໃນພຣະຜູ້ຊ່ວຍໃຫ້ລອດ ແລະ ມີຄວາມຮັກສຳລັບພຣະອົງແນວໃດ?
Light of the World [ຄວາມສະຫວ່າງຂອງໂລກ], ໂດຍ ຮາວເວີດ ລີອອນ
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
“ພຣະຄຣິດທີ່ຊົງພຣະຊົນ.”ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈຄວາມຈິງທີ່ສິດສອນກ່ຽວກັບພຣະຜູ້ຊ່ວຍໃຫ້ລອດ ຢູ່ໃນ “ພຣະຄຣິດທີ່ຊົງພຣະຊົນ,” ທ່ານສາມາດເລືອກສຳນວນທີ່ສຳຄັນບາງຢ່າງ ແລະ ຊ່ວຍກັນຊອກຫາ ຫລື ແຕ້ມຮູບ ທີ່ສະແດງສຳນວນເຫລົ່ານັ້ນ. ແລ້ວພວກທ່ານສາມາດຮວບຮວມຮູບພາບ ແລະ ສຳນວນເຫລົ່ານັ້ນ ເຮັດເປັນປຶ້ມ.
-
“ເຮົາໄດ້ເປັນພະຍານ.”ເຮົາຮຽນຮູ້ຫຍັງແດ່ຈາກ “ພຣະຄຣິດທີ່ຊົງພຣະຊົນ” ກ່ຽວກັບຄວາມໝາຍຂອງການສະແດງປະຈັກພະຍານ? ພວກທ່ານອາດຢາກບັນທຶກປະຈັກພະຍານຂອງພວກທ່ານເຖິງພຣະຄຣິດໄວ້ ເພື່ອເປັນການລະນຶກເຖິງການກຳເນີດຂອງພຣະຜູ້ຊ່ວຍໃຫ້ລອດ.
-
“ພຣະອົງໄດ້ໄປທຸກຫົນທຸກແຫ່ງເຮັດຄຸນງາມຄວາມດີ.”ຄອບຄົວຂອງທ່ານອາດເຮັດຕາມຕົວຢ່າງຂອງການຮັບໃຊ້ຂອງພຣະຜູ້ຊ່ວຍໃຫ້ລອດ ໃນບຸນຄຣິດສະມາດນີ້ແນວໃດ? ພວກທ່ານຈະປ່າວປະກາດ “ຄວາມສະຫງົບ ແລະ ຂ່າວປະເສີດ” ໃນຄອບຄົວ ແລະ ໃນຊຸມຊົນຂອງພວກທ່ານແນວໃດ? ພວກທ່ານຈະສາມາດຊ່ວຍນຳ “ການປິ່ນປົວ [ມາໃຫ້] ຄົນເຈັບປ່ວຍ” ໄດ້ແນວໃດ? ພວກທ່ານອາດຊອກຫາແນວຄິດຢູ່ໃນບາງວິດີໂອ ຈາກ Christmas videos ຢູ່ໃນແອພ Gospel Media ຫລື ຫ້ອງສະໝຸດ Gospel Media (medialibrary.ChurchofJesusChrist.org).
-
“ຂໍຂອບພຣະໄທພຣະເຈົ້າສຳລັບຂອງປະທານທີ່ຫາອັນປຽບບໍ່ໄດ້ຂອງພຣະບຸດແຫ່ງສະຫວັນຂອງພຣະອົງ.”ຂອງປະທານໃດແດ່ທີ່ເຮົາໄດ້ຮັບເພາະພຣະເຢຊູຄຣິດ? ບາງທີສະມາຊິກໃນຄອບຄົວສາມາດຊອກຫາຄຳຕອບຢູ່ໃນ “ພຣະຄຣິດທີ່ຊົງພຣະຊົນ” ແລະ ແລ້ວໃຫ້ຫໍ່ບາງສິ່ງທີ່ເປັນຕົວແທນໃຫ້ແກ່ຂອງປະທານຈາກພຣະຜູ້ຊ່ວຍໃຫ້ລອດ. ຄອບຄົວຂອງທ່ານສາມາດເປີດຂອງຂວັນ ໃນວັນຄຣິດສະມາດ ຫລື ຕະຫລອດອາທິດ ແລະ ອ່ານພຣະຄຳພີທີ່ກ່ຽວຂ້ອງກັບຂອງຂວັນແຕ່ລະຢ່າງ. ຕໍ່ໄປນີ້ແມ່ນຂໍ້ພະຄຳພີທີ່ເປັນໄປໄດ້, ແຕ່ຄອບຄົວຂອງທ່ານກໍສາມາດຊອກຫາຫລາຍຂໍ້ອື່ນໄດ້: ລູກາ 2:10–14; 1 ເປໂຕ 2:21; ໂມໄຊຢາ 3:8; ແອວມາ 11:42–43; ຄຳສອນ ແລະ ພັນທະສັນຍາ 18:10–12. ພວກທ່ານສາມາດຮ້ອງເພງກ່ຽວກັບພຣະຜູ້ຊ່ວຍໃຫ້ລອດ, ດັ່ງເຊັ່ນ “ພຣະຜູ້ຊ່ວຍດ້ວຍຄວາມຖ່ອມ” (ເພງສວດ ແລະ ເພງຂອງເດັກນ້ອຍ, 28), ເພື່ອຊອກຫາຂອງປະທານອື່ນໆທີ່ມາຈາກພຣະອົງ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ໄກແສນໄກ ຢູ່ທີ່ຮາບຢູດີຢາ,” ເພງສວດ ແລະ ເພງຂອງເດັກນ້ອຍ, 56.
ການປັບປຸງການສຶກສາສ່ວນຕົວ
ເອົາໃຈໃສ່ຕໍ່ພຣະຜູ້ຊ່ວຍໃຫ້ລອດ. “ການອ່ານ ‘ພຣະຄຣິດທີ່ຊົງພຣະຊົນ’ ດ້ວຍການອະທິຖານ ກໍເໝືອນກັບການອ່ານປະຈັກພະຍານຂອງ ມັດທາຍ, ມາຣະໂກ, ລູກາ, ໂຢຮັນ, ແລະ ສາດສະດາທັງຫລາຍ ຈາກພຣະຄຳພີມໍມອນ. ມັນຈະເຮັດໃຫ້ສັດທາຂອງທ່ານທີ່ມີໃນພຣະຜູ້ຊ່ວຍໃຫ້ລອດເພີ່ມທະວີຂຶ້ນ ແລະ ຊ່ວຍທ່ານໃຫ້ເອົາໃຈໃສ່ຕໍ່ພຣະອົງ (M. Russell Ballard, “Return and Receive,” Ensign ຫລື Liahona, May 2017, 65).
