“ວັນທີ 4–10 ເດືອນມັງກອນ. ໂຈເຊັບ ສະມິດ—ປະຫວັດ 1:1–26: ‘ຂ້າພະເຈົ້າໄດ້ເຫັນແສງສະຫວ່າງເປັນເລົາລົງມາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 4–10 ເດືອນມັງກອນ. ໂຈເຊັບ ສະມິດ—ປະຫວັດ 1:1–26,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

Sacred Grove [ປ່າສັກສິດ], ໂດຍ ກະເຣກ ເຄ ອໍສັນ

ວັນທີ 4–10 ເດືອນມັງກອນ

ໂຈເຊັບ ສະມິດ—ປະຫວັດ 1:1–26

“ຂ້າພະເຈົ້າໄດ້ເຫັນແສງສະຫວ່າງເປັນເລົາລົງມາ”

ຂະນະທີ່ທ່ານອ່ານ ໂຈເຊັບ ສະມິດ—ປະຫວັດ 1:1–26, ຂ່າວສານໃດແດ່ທີ່ທ່ານພົບເຫັນສຳລັບຊີວິດຂອງທ່ານ? ສິ່ງໃດທີ່ມີຄ່າຫລາຍທີ່ສຸດຕໍ່ທ່ານ ແລະ ຄອບຄົວຂອງທ່ານ?

ບັນທຶກຄວາມປະທັບໃຈຂອງທ່ານ

ຄຳສອນ ແລະ ພັນທະສັນຍາ ເປັນໜັງສືທີ່ຕອບຕໍ່ຄຳອະທິຖານ: ການເປີດເຜີຍທີ່ສັກສິດຫລາຍຢ່າງຢູ່ໃນໜັງສືເຫລັ້ມນີ້ ໄດ້ມາເຖິງເປັນການຕອບຄຳຖາມ. ຍ້ອນສິ່ງນີ້ ມັນຈຶ່ງເໝາະສົມທີ່ຈະເລີ່ມຕົ້ນສຶກສາຄຳສອນ ແລະ ພັນທະສັນຍາ ໂດຍການພິຈາລະນາກ່ຽວກັບຄຳຖາມ ທີ່ເຮັດໃຫ້ມີການເປີດເຜີຍໃນຍຸກສຸດທ້າຍ—ຄຳຖາມທີ່ໂຈເຊັບ ສະມິດ ໄດ້ຖາມຢູ່ໃນປ່າ ໃນປີ 1820. “ສົງຄາມຄາລົມ ແລະ ຄວາມວຸ້ນວາຍຂອງຄວາມຄິດຄວາມເຫັນ” (ໂຈເຊັບ ສະມິດ—ປະຫວັດ 1:10) ໄດ້ເຮັດໃຫ້ໂຈເຊັບສັບສົນກ່ຽວກັບສາດສະໜາ ແລະ ສະພາວະຂອງຈິດວິນຍານຂອງເພິ່ນ; ບາງທີທ່ານອາດຮູ້ສຶກເຊັ່ນດຽວກັນນັ້ນ. ມີແນວຄິດທີ່ຂັດແຍ້ງກັນ ແລະ ມີສຽງຊັກຊວນ ໃນວັນເວລາຂອງເຮົາ, ແລະ ໃນຂະນະທີ່ເຮົາພິຈາລະນາຂ່າວສານເຫລົ່ານີ້ ແລະ ຊອກຫາຄວາມຈິງ, ເຮົາກໍສາມາດເຮັດສິ່ງທີ່ໂຈເຊັບໄດ້ເຮັດ. ເຮົາສາມາດຖາມ, ສຶກສາພຣະຄຳພີ, ໄຕ່ຕອງ, ແລະ ໃນທີ່ສຸດທູນຖາມພຣະເຈົ້າ. ໃນການຕອບຄຳອະທິຖານຂອງໂຈເຊັບ, ມັນມີແສງສະຫວ່າງເປັນເລົາລົງມາຈາກທ້ອງຟ້າສະຫວັນ, ພຣະເຈົ້າອົງເປັນພຣະບິດາ ແລະ ພຣະເຢຊູຄຣິດໄດ້ມາປະກົດ ແລະ ໄດ້ຕອບຄຳຖາມຂອງເພິ່ນ. ປະຈັກພະຍານຂອງໂຈເຊັບເຖິງປະສົບການທີ່ໜ້າອັດສະຈັນໃຈນັ້ນ ໄດ້ປະກາດຢ່າງກ້າຫານວ່າ ຄົນໃດທີ່ “ຂາດສະຕິປັນຍາ ກໍໃຫ້ຄົນນັ້ນທູນຂໍຈາກພຣະເຈົ້າ, ແລະ ຜູ້ຈະຊົງປະທານໃຫ້” (ໂຈເຊັບ ສະມິດ—ປະຫວັດ 1:26). ເຮົາທຸກຄົນສາມາດໄດ້ຮັບ, ຖ້າຫາກບໍ່ແມ່ນພາບທີ່ມາຈາກສະຫວັນ, ຢ່າງໜ້ອຍຈະເປັນພາບທີ່ແຈ່ມແຈ້ງກວ່າເກົ່າ, ສ່ອງແຈ້ງດ້ວຍແສງສະຫວ່າງຈາກສະຫວັນ.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຈເຊັບ ສະມິດ—ປະຫວັດ 1:1–26

ໂຈເຊັບ ສະມິດ ເປັນສາດສະດາຂອງການຟື້ນຟູ.

ຈຸດປະສົງຂອງປະຫວັດຂອງໂຈເຊັບ ສະມິດ ແມ່ນເພື່ອໃຫ້ເຮົາຮູ້ຈັກ “ຂໍ້ຄວາມເທັດຈິງ” ເພາະຄວາມຈິງກ່ຽວກັບໂຈເຊັບ ມັກຖືກບິດເບືອນ (ໂຈເຊັບ ສະມິດ—ປະຫວັດ 1:1). ຂະນະທີ່ທ່ານອ່ານ ໂຈເຊັບ ສະມິດ—ປະຫວັດ 1:1–26, ແມ່ນຫຍັງທີ່ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານ ເລື່ອງການເອີ້ນຈາກສະຫວັນຂອງເພິ່ນ? ໃຫ້ສັງເກດເບິ່ງຫລັກຖານທີ່ທ່ານພົບເຫັນ ວ່າພຣະຜູ້ເປັນເຈົ້າໄດ້ກະກຽມໂຈເຊັບ ສະມິດ ສຳລັບພາລະກິດຂອງການເປັນສາດສະດາຂອງເພິ່ນແນວໃດ. ຂະນະທີ່ທ່ານອ່ານ, ທ່ານສາມາດບັນທຶກຄວາມຄິດ ແລະ ຄວາມຮູ້ສຶກຂອງທ່ານ ກ່ຽວກັບໂຈເຊັບ ສະມິດ ແລະ ປະຈັກພະຍານຂອງເພິ່ນໄວ້.

ເບິ່ງ Saints, 1:3–19 ນຳອີກ.

ໂຈເຊັບ ສະມິດ—ປະຫວັດ 1:5–20

ຖ້າຫາກເຮົາທູນຖາມດ້ວຍສັດທາ, ແລ້ວພຣະເຈົ້າຈະຕອບ.

ທ່ານເຄີຍ “ຂາດສະຕິປັນຍາ” ຫລື ຮູ້ສຶກສັບສົນກ່ຽວກັບການຕັດສິນໃຈໃດໜຶ່ງທີ່ທ່ານຕ້ອງໄດ້ເຮັດບໍ? (ໂຈເຊັບ ສະມິດ—ປະຫວັດ 1:13). ທ່ານໄດ້ຮຽນຮູ້ຫຍັງແດ່ຈາກປະສົບການຂອງໂຈເຊັບ ສະມິດ ໃນ ຂໍ້ທີ 5–20? ໃຫ້ຄິດກ່ຽວກັບຄວາມຕ້ອງການສະຕິປັນຍາ ແລະ ຄວາມເຂົ້າໃຈຫລາຍກວ່າເກົ່າຂອງທ່ານເອງ, ແລະ ໃຫ້ພິຈາລະນາວິທີທີ່ທ່ານຈະຊອກຫາຄວາມຈິງ.

ເບິ່ງ 1 ນີໄຟ 10:17–19; 15:6–11; Russell M. Nelson, “Revelation for the Church, Revelation for Our Lives,” Ensign ຫລື Liahona, May 2018, 93–96 ນຳອີກ.

ຍິງໜຸ່ມກຳລັງອະທິຖານ — ເຮົາສາມາດທູນຖາມພຣະເຈົ້າຜ່ານທາງການອະທິຖານ.

ໂຈເຊັບ ສະມິດ—ປະຫວັດ 1:15–20

ເປັນຫຍັງຈຶ່ງມີເລື່ອງລາວກ່ຽວກັບພາບທີ່ມາໃຫ້ເຫັນຄັ້ງທຳອິດຫລາຍເລື່ອງທີ່ແຕກຕ່າງກັນ?

ໃນຊ່ວງຊີວິດຂອງເພິ່ນ, ໂຈເຊັບ ສະມິດ ໄດ້ບັນທຶກປະສົບການຂອງເພິ່ນ ທີ່ເກີດຂຶ້ນຢູ່ໃນປ່າສັກສິດໄວ້ ຢ່າງໜ້ອຍສີ່ເທື່ອ, ສ່ວນຫລາຍມີຜູ້ຂຽນໃຫ້. ນອກເໜືອຈາກນັ້ນ, ກໍມີເລື່ອງລາວມືສອງທີ່ຂຽນໂດຍຜູ້ຄົນທີ່ໄດ້ຍິນໂຈເຊັບເລົ່າກ່ຽວກັບພາບທີ່ມາໃຫ້ເຫັນຂອງເພິ່ນ. ເຖິງແມ່ນວ່າ ເລື່ອງລາວເຫລົ່ານີ້ມີຂໍ້ປີກຍ່ອຍທີ່ແຕກຕ່າງກັນ, ຊຶ່ງຂຶ້ນກັບຜູ້ຊົມ ແລະ ສະຖານທີ່, ແຕ່ມັນກໍມີຄວາມສອດຄ່ອງກັນ. ແລະ ແຕ່ລະເລື່ອງກໍໄດ້ໃຫ້ຂໍ້ປີກຍ່ອຍເພີ່ມເຕີມ ທີ່ຊ່ວຍເຮົາໃຫ້ເຂົ້າໃຈຫລາຍຂຶ້ນກ່ຽວກັບປະສົບການຂອງໂຈເຊັບ ສະມິດ, ຄືກັນກັບພຣະທຳສີ່ເຫລັ້ມ ທີ່ຊ່ວຍເຮົາໃຫ້ເຂົ້າໃຈກ່ຽວກັບພາລະກິດຂອງພຣະຜູ້ຊ່ວຍໃຫ້ລອດຫລາຍຂຶ້ນ.

ເພື່ອອ່ານເລື່ອງລາວອື່ນໆກ່ຽວກັບໂຈເຊັບ, ໃຫ້ເບິ່ງ “First Vision Accounts” (Gospel Topics, topics.ChurchofJesusChrist.org). ທ່ານໄດ້ຮຽນຮູ້ຫຍັງແດ່ຈາກການອ່ານເລື່ອງລາວທັງໝົດເຫລົ່ານີ້?

ໂຈເຊັບ ສະມິດ—ປະຫວັດ 1:15–20

ພາບທີ່ມາໃຫ້ເຫັນຄັ້ງທຳອິດ ໄດ້ເລີ່ມຕົ້ນການຟື້ນຟູພຣະກິດຕິຄຸນຂອງພຣະເຢຊູຄຣິດ.

ໂຈເຊັບ ສະມິດ ໄດ້ໝັ້ນໃຈວ່າ ພຣະເຈົ້າຈະຕອບຄຳອະທິຖານຂອງເພິ່ນ, ແຕ່ເພິ່ນບໍ່ຮູ້ວ່າຄຳຕອບນັ້ນຈະປ່ຽນແປງຊີວິດຂອງເພິ່ນ—ແລະ ຊາວໂລກແນວໃດ. ຂະນະທີ່ທ່ານອ່ານກ່ຽວກັບປະສົບການຂອງໂຈເຊັບ ສະມິດ, ໃຫ້ໄຕ່ຕອງວິທີທີ່ພາບທີ່ມາໃຫ້ເຫັນຄັ້ງທຳອິດໄດ້ປ່ຽນແປງຊີວິດຂອງທ່ານແນວໃດ. ຍົກຕົວຢ່າງ, ທ່ານສາມາດຕື່ມຂໍ້ຄວາມໃສ່ປະໂຫຍກນີ້ໃຫ້ສົມບູນ ໃນວິທີທາງທີ່ແຕກຕ່າງກັນ: “ເພາະພາບທີ່ມາໃຫ້ເຫັນຄັ້ງທຳອິດໄດ້ເກີດຂຶ້ນ, ເຮົາຈຶ່ງຮູ້ວ່າ …” ທ່ານໄດ້ຮັບພອນແນວໃດແດ່ ເພາະພາບທີ່ມາໃຫ້ເຫັນຄັ້ງທຳອິດ?

ເບິ່ງວິດີໂອ “Ask of God: Joseph Smith’s First Vision,” ChurchofJesusChrist.org; Saints, 1:14–19; Russell M. Nelson, “Hear Him,” Ensign ຫລື Liahona, May 2020, 88–92.

6:35

ໂຈເຊັບ ສະມິດ—ປະຫວັດ 1:21–26

ເຮົາສາມາດຍຶດໝັ້ນຢູ່ກັບສິ່ງທີ່ເຮົາຮູ້, ແມ່ນແຕ່ຖ້າຫາກຄົນອື່ນປະຕິເສດເຮົາ.

ພອນຢ່າງໜຶ່ງຂອງພຣະຄຳພີແມ່ນວ່າ ມັນບັນຈຸຕົວຢ່າງທີ່ໃຫ້ການດົນໃຈ ກ່ຽວກັບຊາຍ ແລະ ຍິງທີ່ກ້າຫານ ຜູ້ເຄີຍປະເຊີນກັບການທ້າທາຍດ້ວຍສັດທາໃນພຣະເຢຊູຄຣິດ. ເມື່ອໂຈເຊັບ ສະມິດ ໄດ້ປະເຊີນກັບການຕໍ່ຕ້ານ ເພາະພາບທີ່ມາໃຫ້ເຫັນຂອງເພິ່ນ, ເພິ່ນກໍຄືກັນກັບອັກຄະສາວົກໂປໂລ, ຜູ້ໄດ້ຖືກຂົ່ມເຫັງເພາະເພິ່ນໄດ້ເວົ້າວ່າ ເພິ່ນໄດ້ເຫັນພາບທີ່ມາໃຫ້ເຫັນ. ຂະນະທີ່ທ່ານອ່ານເລື່ອງລາວຂອງໂຈເຊັບ, ແມ່ນຫຍັງທີ່ດົນໃຈທ່ານ ໃຫ້ຍຶດໝັ້ນຢູ່ກັບປະຈັກພະຍານຂອງທ່ານ? ຕົວຢ່າງອື່ນໃດແດ່—ຈາກພຣະຄຳພີ ຫລື ຜູ້ຄົນທີ່ທ່ານຮູ້ຈັກ—ຊ່ວຍໃຫ້ທ່ານກ້າຫານ ເພື່ອຍຶດໝັ້ນຢູ່ກັບປະສົບການທາງວິນຍານ ທີ່ທ່ານເຄີຍມີ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂຈເຊັບ ສະມິດ—ປະຫວັດ 1:6.ເຮົາຈະຈັດການກັບຄວາມເຫັນທີ່ແຕກຕ່າງກັນ ໂດຍບໍ່ໃຫ້ເປັນຄົນທີ່ໂຕ້ຖຽງກັນ ຄືກັນກັບຜູ້ຄົນທີ່ກ່າວເຖິງຢູ່ໃນຂໍ້ນີ້ໄດ້ແນວໃດ?

ໂຈເຊັບ ສະມິດ—ປະຫວັດ 1:11–13.ການອ່ານຂໍ້ເຫລົ່ານີ້ ອາດດົນໃຈສະມາຊິກໃນຄອບຄົວໃຫ້ແບ່ງປັນປະສົບການ ເມື່ອຂໍ້ຄວາມໃນພຣະຄຳພີປະທັບໃຈເຂົາເຈົ້າ ແລະ ດົນໃຈເຂົາເຈົ້າໃຫ້ປະຕິບັດຕາມ.

ໂຈເຊັບ ສະມິດ—ປະຫວັດ 1:16–20.ຂະນະທີ່ຄອບຄົວຂອງທ່ານອ່ານຂໍ້ເຫລົ່ານີ້, ໃຫ້ຄິດທີ່ຈະສະແດງຮູບພາບທີ່ມາກັບໂຄງຮ່າງນີ້ ຫລື ຮູບພາບອື່ນອີກກ່ຽວກັບພາບທີ່ມາໃຫ້ເຫັນຄັ້ງທຳອິດ (ບາງທີຄອບຄົວຂອງທ່ານອາດຢາກແຕ້ມຮູບເອງກໍເປັນໄດ້). ພວກທ່ານສາມາດເບິ່ງວິດີໂອ “Ask of God: Joseph Smith’s First Vision” (ChurchofJesusChrist.org). ທ່ານແຕ່ລະຄົນສາມາດຂຽນກ່ຽວກັບຄວາມຈິງທີ່ເຮົາໄດ້ຮຽນຮູ້ຈາກພາບທີ່ມາໃຫ້ເຫັນນີ້, ແລ້ວໃຫ້ບອກສິ່ງທີ່ຕົນໄດ້ຂຽນໄວ້ ໃຫ້ກັນຟັງ. ເວລານີ້ ອາດເປັນເວລາທີ່ດີສຳລັບສະມາຊິກໃນຄອບຄົວ ທີ່ຈະບອກເຖິງວິທີທີ່ເຂົາເຈົ້າໄດ້ຮັບປະຈັກພະຍານຂອງຕົນ ກ່ຽວກັບພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ.

6:35

ໂຈເຊັບ ສະມິດ—ປະຫວັດ 1:17.ຕອນພຣະເຈົ້າໄດ້ມາປະກົດຕໍ່ໂຈເຊັບ ສະມິດ, ພຣະອົງໄດ້ເອີ້ນຊື່ໂຈເຊັບ. ເວລາໃດທີ່ສະມາຊິກໃນຄອບຄົວຂອງທ່ານຮູ້ສຶກວ່າ ພຣະບິດາເທິງສະຫວັນຮູ້ຈັກເຂົາເຈົ້າເປັນສ່ວນຕົວ?

ໂຈເຊັບ ສະມິດ—ປະຫວັດ 1:21–26.ເຮົາຈະຕອບຮັບແນວໃດ ເມື່ອຜູ້ຄົນສົງໄສກ່ຽວກັບປະຈັກພະຍານຂອງເຮົາ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ສັນເສີນບຸລຸດ,” ເພງສວດ ແລະ ເພງຂອງເດັກນ້ອຍ, 54.

ສຽງຂອງການຟື້ນຟູ

ຄອບຄົວຂອງໂຈເຊັບ ສະມິດ

ເຮົາແຕ່ລະຄົນຈະໄດ້ຮັບຜົນກະທົບຫລາຍທີ່ສຸດຈາກຊີວິດຂອງຄອບຄົວ, ແລະ ໂຈເຊັບ ສະມິດ ກໍບໍ່ແຕກຕ່າງ. ຄວາມເຊື່ອ ແລະ ການປະຕິບັດເລື່ອງສາດສະໜາຂອງພໍ່ແມ່ຂອງເພິ່ນ ໄດ້ເພາະປູກເມັດພຶດແຫ່ງສັດທາ ທີ່ເຮັດໃຫ້ການຟື້ນຟູເປັນໄປໄດ້. ປຶ້ມບັນທຶກສ່ວນຕົວຂອງໂຈເຊັບ ບັນຈຸຄຳຍ້ອງຍໍນີ້: “ບໍ່ມີຄຳໃດທີ່ດີພໍທີ່ຈະເອົາມາກ່າວສະແດງຄວາມກະຕັນຍູຕໍ່ພຣະເຈົ້າ ທີ່ໃຫ້ຂ້າພະເຈົ້າມີພໍ່ແມ່ທີ່ປະເສີດ.”¹

ຂໍ້ຄວາມທີ່ອ້າງເຖິງດັ່ງຕໍ່ໄປນີ້ ຈາກລູສີ ແມັກ ສະມິດ ແມ່ຂອງເພິ່ນ; ວິວລຽມ ສະມິດ ນ້ອງຊາຍຂອງເພິ່ນ, ແລະ ສາດສະດາເອງ ໄດ້ໃຫ້ເຮົາເຫັນໜ້ອຍໜຶ່ງກ່ຽວກັບອິດທິພົນຂອງສາດສະໜາ ຢູ່ໃນບ້ານເຮືອນຂອງຄອບຄົວສະມິດ.

ຄອບຄົວສະມິດ — Joseph Smith Family [ຄອບຄົວຂອງໂຈເຊັບ ສະມິດ], ໂດຍ ແດນ ແບັກສະເຕີ

ລູສີ ແມັກ ສະມິດ

“[ປະມານ 1802], ຂ້າພະເຈົ້າໄດ້ລົ້ມປ່ວຍ. … ຂ້າພະເຈົ້າເວົ້າກັບຕົວເອງວ່າ, ຂ້າພະເຈົ້າບໍ່ພ້ອມທີ່ຈະຕາຍເທື່ອ ເພາະຂ້າພະເຈົ້າຍັງບໍ່ຮູ້ຈັກທິດທາງຂອງພຣະຄຣິດເທື່ອ, ແລະ ເບິ່ງຄືວ່າ ມັນມີເຫວທີ່ມືດມົນ ແລະ ເປົ່າປ່ຽວ ຢູ່ລະຫວ່າງຕົວຂ້າພະເຈົ້າ ແລະ ພຣະຄຣິດ ຊຶ່ງຂ້າພະເຈົ້າບໍ່ກ້າທີ່ຈະຜ່ານຂ້າມ. …

“ຂ້າພະເຈົ້າໄດ້ຫວັງເພິ່ງພຣະຜູ້ເປັນເຈົ້າ ແລະ ໄດ້ອ້ອນວອນ ແລະ ທູນຕໍ່ພຣະຜູ້ເປັນເຈົ້າ ຂໍໃຫ້ພຣະອົງໂຜດຊີວິດຂອງຂ້າພະເຈົ້າ ເພື່ອວ່າຂ້າພະເຈົ້າຈະໄດ້ລ້ຽງດູລູກໆໃຫ້ເຕີບໃຫຍ່ ແລະ ໃຫ້ກຳລັງໃຈແກ່ສາມີຂອງຂ້າພະເຈົ້າ; ຂ້າພະເຈົ້າໄດ້ນອນຢູ່ໝົດຄືນດັ່ງນັ້ນ … ຂ້າພະເຈົ້າໄດ້ເຮັດພັນທະສັນຍານຳພຣະເຈົ້າ [ວ່າ] ຖ້າຫາກພຣະອົງປ່ອຍໃຫ້ຂ້າພະເຈົ້າມີຊີວິດຢູ່ຕໍ່ໄປ ແລ້ວຂ້າພະເຈົ້າຈະຊອກຫາສາດສະໜາທີ່ສາມາດຊ່ວຍໃຫ້ຂ້າພະເຈົ້າຮັບໃຊ້ພຣະອົງຢ່າງຖືກຕ້ອງ, ບໍ່ວ່າຈະເປັນຢູ່ໃນພຣະຄຣິສຕະທຳຄຳພີ ຫລື ຈະພົບເຫັນຢູ່ບ່ອນໃດກໍຕາມຈາກສະຫວັນ ໂດຍການອະທິຖານ ແລະ ໂດຍສັດທາ. ໃນທີ່ສຸດ ສຸລະສຽງໄດ້ກ່າວກັບຂ້າພະເຈົ້າວ່າ, ‘ຈົ່ງໝັ່ນຊອກຫາ ແລະ ເຈົ້າຈະໄດ້ພົບ, ຈົ່ງໝັ່ນເຄາະ ແລະ ຈະມີຜູ້ໄຂປະຕູໃຫ້. ໃຫ້ໃຈຂອງເຈົ້າໄດ້ຮັບການປອບໂຍນ. ເຈົ້າເຊື່ອໃນພຣະເຈົ້າ; ຈົ່ງເຊື່ອໃນຕົວເຮົາຄືກັນ.’ …

“ຈາກເວລານັ້ນເປັນຕົ້ນມາ ຂ້າພະເຈົ້າກໍມີກຳລັງວັງຊາສືບຕໍ່ມາຕະຫລອດ. ຂ້າພະເຈົ້າບໍ່ໄດ້ເວົ້າຫຍັງຫລາຍເລື່ອງສາດສະໜາ ເຖິງແມ່ນວ່າມັນຢູ່ໃນຈິດໃຈຂອງຂ້າພະເຈົ້າຢູ່ຕະຫລອດເວລາກໍຕາມ, ແລະ ຂ້າພະເຈົ້າຄິດວ່າ ຂ້າພະເຈົ້າຈະປະຕິບັດຢ່າງພາກພຽນ ທັນທີທີ່ຂ້າພະເຈົ້າພົບເຫັນບາງຄົນທີ່ຈິງຈັງ ຜູ້ຮູ້ຈັກທິດທາງຂອງພຣະເຈົ້າ ເພື່ອແນະນຳຂ້າພະເຈົ້າໃນສິ່ງທີ່ເປັນຂອງສະຫວັນ.”²

ວິວລຽມ ສະມິດ

“ແມ່ຂອງຂ້າພະເຈົ້າ, ຜູ້ຈິງຈັງແທ້ໆ ແລະ ສົນໃຈຫລາຍກັບຄວາມຜາສຸກຂອງລູກໆຂອງເພິ່ນ, ທັງໃນຊີວິດນີ້ ແລະ ຫລັງຈາກຊີວິດນີ້, ໄດ້ເຮັດທຸກສິ່ງດ້ວຍຄວາມຮັກຂອງການເປັນແມ່, ເພື່ອໃຫ້ພວກເຮົາສະແຫວງຫາຄວາມລອດໃຫ້ແກ່ຈິດວິນຍານຂອງພວກເຮົາ, ຫລື (ອີກຄຳໜຶ່ງ) ‘ໃນການຊອກຫາສາດສະໜາ.’ ເພິ່ນໄດ້ຊັກຊວນພວກເຮົາໃຫ້ໄປຮ່ວມການປະຊຸມ, ແລະ ເກືອບທຸກຄົນໃນຄອບຄົວ ກໍມີຄວາມສົນໃຈເລື່ອງສາດສະໜາ, ແລະ ຊອກຫາຄວາມຈິງ.”³

“ພວກເຮົາໄດ້ອະທິຖານເປັນຄອບຄົວສະເໝີ ນັບແຕ່ຂ້າພະເຈົ້າຈື່ໄດ້. ຂ້າພະເຈົ້າຈື່ໄດ້ວ່າ ພໍ່ມັກເອົາແວ່ນຕາໃສ່ໄວ້ຢູ່ຖົງເສື້ອຂອງເພິ່ນ, … ແລະ ເມື່ອລູກໆເຫັນເພິ່ນງົມຫາແວ່ນຕາຂອງເພິ່ນ, ກໍເປັນສັນຍານວ່າ ຕ້ອງກຽມພ້ອມສຳລັບການອະທິຖານ, ແລະ ຖ້າຫາກພວກເຮົາບໍ່ສັງເກດເຫັນ ແມ່ຈະເວົ້າວ່າ, ‘ວິວລຽມ,’ ຫລື ໃຜກໍຕາມທີ່ບໍ່ເອົາໃຈໃສ່, ‘ກຽມພ້ອມສຳລັບການອະທິຖານເດີ້.’ ຫລັງຈາກອະທິຖານແລ້ວ ພວກເຮົາຈະຮ້ອງເພງໜຶ່ງນຳກັນ.”⁴

ແວ່ນຕາຢູ່ເທິງພຣະຄຳພີ — ໂຈເຊັບ ຜູ້ພໍ່ ແລະ ລູສີ ສະມິດ ໄດ້ສິດສອນຄອບຄົວຂອງຕົນ ໃຫ້ສຶກສາພຣະຄຳພີ.

ໂຈເຊັບ ສະມິດ

“ຂ້າພະເຈົ້າບອກໄດ້ວ່າ [ພໍ່ຂອງຂ້າພະເຈົ້າ] ບໍ່ເຄີຍເຮັດສິ່ງໃດທີ່ອາດຖືກກ່າວເຖິງວ່າ ຂາດຄວາມເພື່ອແຜ່, ໃນຊີວິດຂອງເພິ່ນ, ທີ່ຂ້າພະເຈົ້າເຄີຍຮູ້ຈັກ. ຂ້າພະເຈົ້າຮັກພໍ່ ແລະ ຄວາມຊົງຈຳຂອງເພິ່ນ; ແລະ ຄວາມຊົງຈຳກ່ຽວກັບການກະທຳຄວາມດີຂອງເພິ່ນ ຢູ່ໃນຄວາມຄິດຂອງຂ້າພະເຈົ້າຢ່າງໜັກແໜ້ນ; ແລະ ຖ້ອຍຄຳທີ່ອ່ອນໂຍນຂອງການເປັນພໍ່ຂອງເພິ່ນໄດ້ຖືກຂຽນໄວ້ຢູ່ໃນຫົວໃຈຂອງຂ້າພະເຈົ້າ. ສິ່ງທີ່ສັກສິດຕໍ່ຂ້າພະເຈົ້າ ແມ່ນຄວາມຄິດທີ່ຂ້າພະເຈົ້າທະນຸຖະໜອມກ່ຽວກັບປະຫວັດຊີວິດຂອງເພິ່ນ, ຊຶ່ງຂ້າພະເຈົ້າຈື່ບໍ່ລືມ ແລະ ຖືກຝັງໄວ້ຢູ່ໃນໃຈ, ໂດຍການສັງເກດດ້ວຍຕົວເອງ ນັບແຕ່ຂ້າພະເຈົ້າເກີດມາ. … ແມ່ຂອງຂ້າພະເຈົ້າກໍເປັນຜູ້ໜຶ່ງທີ່ປະເສີດທີ່ສຸດ, ແລະ ດີທີ່ສຸດໃນບັນດາຜູ້ຍິງທັງປວງ.”⁵

The First Vision of the Restoration [ພາບທີ່ມາໃຫ້ເຫັນຄັ້ງທຳອິດຂອງການຟື້ນຟູ], ໂດຍ ໄມໂກ ເບດາດ