“ວັນທີ 18–24 ເດືອນມັງກອນ. ຄຳສອນ ແລະ ພັນທະສັນຍາ 3–5: ‘ວຽກງານຂອງເຮົາຈະດຳເນີນໄປໜ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 18–24 ເດືອນມັງກອນ. ຄຳສອນ ແລະ ພັນທະສັນຍາ 3–5,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
ວັນທີ 18–24 ເດືອນມັງກອນ
ຄຳສອນ ແລະ ພັນທະສັນຍາ 3–5
“ວຽກງານຂອງເຮົາຈະດຳເນີນໄປໜ້າ”
ໃຫ້ຂຽນສິ່ງທີ່ທ່ານໄດ້ຮຽນຮູ້ ແລະ ຮູ້ສຶກ ຂະນະທີ່ທ່ານສຶກສາພຣະຄຳພີ. ສິ່ງນີ້ຈະຊ່ວຍທ່ານໃຫ້ຈື່ຈຳຄວາມປະທັບໃຈເຫລົ່ານັ້ນ ແລະ ແບ່ງປັນມັນໃຫ້ກັບຄົນອື່ນ.
ບັນທຶກຄວາມປະທັບໃຈຂອງທ່ານ
ລະຫວ່າງສອງສາມປີທຳອິດຂອງເພິ່ນ ໃນຖານະສາດສະດາຂອງພຣະຜູ້ເປັນເຈົ້າ, ໂຈເຊັບ ສະມິດ ຍັງບໍ່ຮູ້ຈັກທຸກສິ່ງກ່ຽວກັບ “ວຽກງານອັນໜ້າອັດສະຈັນ” ທີ່ເພິ່ນໄດ້ຖືກເອີ້ນໃຫ້ເຮັດ. ແຕ່ສິ່ງໜຶ່ງທີ່ປະສົບການໃນຕອນຕົ້ນຂອງເພິ່ນໄດ້ສອນເພິ່ນແມ່ນວ່າ ເພື່ອຈະເໝາະສົມສຳລັບວຽກງານຂອງພຣະເຈົ້າ, ເພິ່ນຕ້ອງ “ເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ” (ຄຳສອນ ແລະ ພັນທະສັນຍາ 4:1, 5). ຍົກຕົວຢ່າງ, ຖ້າຫາກພຣະຜູ້ເປັນເຈົ້າໄດ້ໃຫ້ຄຳແນະນຳທີ່ຕ້ານກັບຄວາມປາດຖະໜາຂອງເພິ່ນ, ເພິ່ນຕ້ອງເຮັດຕາມຄຳແນະນຳຂອງພຣະຜູ້ເປັນເຈົ້າ. ແລະ ເຖິງແມ່ນວ່າເພິ່ນໄດ້ຮັບ “ການເປີດເຜີຍຫລາຍຢ່າງ, ແລະ … ມີອຳນາດທີ່ຈະເຮັດວຽກງານອັນຍິ່ງໃຫຍ່ຫລາຍຢ່າງ,” ຖ້າຫາກເພິ່ນຄິດວ່າ ຄວາມປະສົງຂອງເພິ່ນ ສຳຄັນຕໍ່ເພິ່ນຫລາຍກວ່າພຣະປະສົງຂອງພຣະເຈົ້າ, ແລ້ວເພິ່ນ “ຈະຕົກໄປ” (ຄຳສອນ ແລະ ພັນທະສັນຍາ 3:4). ແຕ່ໂຈເຊັບໄດ້ຮຽນຮູ້ບາງສິ່ງອື່ນອີກທີ່ສຳຄັນເທົ່າກັບການເຮັດວຽກງານຂອງພຣະເຈົ້າ ນັ້ນຄື: “ພຣະເຈົ້າມີເມດຕາ,” ແລະ ຖ້າຫາກໂຈເຊັບໄດ້ກັບໃຈຢ່າງຈິງໃຈ, ເພິ່ນຈະ “ຖືກເລືອກ” ຢູ່ (ຂໍ້ທີ 10). ເຖິງແນວໃດກໍຕາມ, ວຽກງານຂອງພຣະເຈົ້າ ເປັນວຽກງານຂອງການໄຖ່. ແລະ ວ່າວຽກງານນັ້ນ “ຈະລົ້ມເຫລວບໍ່ໄດ້” (ຂໍ້ທີ 1).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄຳສອນ ແລະ ພັນທະສັນຍາ 3:1–15
ເຮົາຄວນໄວ້ວາງໃຈໃນພຣະເຈົ້າ ແທນທີ່ຈະຢ້ານກົວມະນຸດ.
ໃນຕອນຕົ້ນຂອງການປະຕິບັດສາດສະໜາກິດຂອງໂຈເຊັບ ສະມິດ, ໝູ່ເພື່ອນທີ່ດີແມ່ນຫາໄດ້ຍາກ—ໂດຍສະເພາະໝູ່ເພື່ອນເຊັ່ນມາຕິນ ແຮຣິສ, ເປັນຊາຍທີ່ຮັ່ງມີ ແລະ ຜູ້ຄົນນັບລືຖືໜ້າ, ຜູ້ມີຖານະດີພໍທີ່ຈະຊ່ວຍເຫລືອໄດ້ຫລາຍ. ແລະ ມາຕິນກໍເຕັມໃຈທີ່ສະໜັບສະໜູນໂຈເຊັບ, ເຖິງແມ່ນວ່າເພິ່ນອາດຖືກໝູ່ເພື່ອນເຊົານັບຖື ແລະ ອາດຕ້ອງໄດ້ເສຍສະລະຊັບສິນກໍຕາມ.
ສະນັ້ນ ຈຶ່ງເຫັນໄດ້ຢ່າງງ່າຍດາຍວ່າ ເປັນຫຍັງໂຈເຊັບຈຶ່ງໄດ້ເຮັດຕາມຄຳຂໍຮ້ອງຂອງມາຕິນ ທີ່ຈະເອົາການແປຂອງພຣະຄຳພີມໍມອນ ພາກສ່ວນໜຶ່ງໄປໃຫ້ພັນລະຍາຂອງເພິ່ນເບິ່ງ, ຜູ້ບໍ່ເຊື່ອເລື່ອງພຣະຄຳພີມໍມອນ. ໂຈເຊັບໄດ້ສືບຕໍ່ທູນຖາມພຣະຜູ້ເປັນເຈົ້າກ່ຽວກັບຄຳຂໍຮ້ອງນັ້ນ, ເຖິງແມ່ນວ່າພຣະອົງໄດ້ສັ່ງຫ້າມແລ້ວກໍຕາມ, ຈົນວ່າໃນທີ່ສຸດ, ຫລັງຈາກໂຈເຊັບໄດ້ທູນຖາມເປັນເທື່ອທີສາມ, ພຣະຜູ້ເປັນເຈົ້າຈຶ່ງໄດ້ອະນຸຍາດ. ໜ້າໂສກເສົ້າທີ່ຕົ້ນສະບັບໄດ້ສູນເສຍໄປ ຂະນະທີ່ຢູ່ໃນຄວາມດູແລຂອງມາຕິນ, ແລະ ໂຈເຊັບກັບມາຕິນໄດ້ຖືກພຣະຜູ້ເປັນເຈົ້າຕີສອນ.
ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 3:1–15, ໃຫ້ໄຕ່ຕອງກ່ຽວກັບຄວາມຄິດຄວາມເຫັນຂອງຄົນອື່ນ ອາດມີອິດທິພົນຕໍ່ທ່ານແນວໃດ. ທ່ານອາດສັງເກດເຫັນວ່າ ນອກເໜືອໄປຈາກການຕິຕຽນໂຈເຊັບ ສະມິດ ແລ້ວ, ພຣະຜູ້ເປັນເຈົ້າຍັງໄດ້ກ່າວພຣະຄຳແຫ່ງຄວາມເມດຕານຳອີກ. ທ່ານຮຽນຮູ້ຫຍັງແດ່ຈາກວິທີທີ່ພຣະຜູ້ເປັນເຈົ້າໄດ້ລົງໂທດ ແລະ ໃຫ້ກຳລັງໃຈແກ່ໂຈເຊັບ? ຄຳແນະນຳໃດແດ່ທີ່ທ່ານພົບເຫັນວ່າ ສາມາດຊ່ວຍທ່ານໄດ້ເວລາທີ່ທ່ານຮູ້ສຶກຢ້ານກົວຄົນອື່ນຫລາຍກວ່າພຣະເຈົ້າ?
ພຣະຜູ້ເປັນເຈົ້າຂໍໃຫ້ເຮົາຮັບໃຊ້ພຣະອົງດ້ວຍສຸດໃຈຂອງເຮົາ.
ພາກທີ 4 ສ່ວນຫລາຍແມ່ນກ່ຽວພັນກັບຜູ້ສອນສາດສະໜາເຕັມເວລາ. ເຖິງຢ່າງໃດກໍຕາມ, ມັນສຳຄັນທີ່ຈະສັງເກດເຫັນວ່າ ການເປີດເຜີຍນີ້ ຕົ້ນເດີມແມ່ນເພື່ອມອບໃຫ້ແກ່ໂຈເຊັບ ສະມິດ ຜູ້ພໍ່, ຜູ້ບໍ່ໄດ້ຖືກເອີ້ນໃຫ້ໄປສອນສາດສະໜາ ແຕ່ກໍຍັງ “ມີຄວາມປາດຖະໜາທີ່ຈະຮັບໃຊ້ພຣະເຈົ້າຢູ່” (ຂໍ້ທີ 3).
ວິທີໜຶ່ງທີ່ຈະອ່ານພາກນີ້ ຄືການວາດພາບເຫັນວ່າ ມັນເປັນການບັນຍາຍເຖິງວຽກງານສຳລັບບາງຄົນ ຜູ້ຢາກເຮັດວຽກງານຂອງພຣະຜູ້ເປັນເຈົ້າ. ຕ້ອງມີຄວາມເໝາະສົມຢ່າງໃດແດ່? ເປັນຫຍັງຈຶ່ງຈຳເປັນຕ້ອງມີຄວາມຊຳນານ ຫລື ລັກສະນະພິເສດເຫລົ່ານີ້? ບາງທີທ່ານສາມາດເລືອກຢ່າງໜຶ່ງດ້ວຍການອະທິຖານ ອັນທີ່ທ່ານສາມາດເຮັດໄດ້ດີກວ່າຢ່າງອື່ນ “ເພື່ອໃຫ້ [ຕົວເອງ] ເໝາະສົມສຳລັບວຽກງານ” (ຂໍ້ທີ 5).
ເຮົາສາມາດເປັນພະຍານໄດ້ເຖິງພຣະຄຳພີມໍມອນ.
ມາຕິນ ແຮຣິສ, ໂດຍ ຫລຸຍ ເອ ແຣມສີ
ຖ້າຫາກທ່ານຖືກເອີ້ນໃຫ້ໄປເປັນພະຍານຢູ່ສານ ກ່ຽວກັບຄວາມຈິງແທ້ຂອງພຣະຄຳພີມໍມອນ, ທ່ານມີຫລັກຖານຢ່າງໃດແດ່? ມາຕິນ ແຮຣິສ ກໍມີຄຳຖາມທີ່ຄ້າຍຄືກັນນີ້ ເມື່ອນາງລູສີ ພັນລະຍາຂອງເພິ່ນ ໄດ້ອຸທອນຂຶ້ນສານວ່າ ໂຈເຊັບ ສະມິດ ຕົວະຍົວະຜູ້ຄົນ ໂດຍການທຳທ່າແປແຜ່ນຈາລຶກຄຳ. ສະນັ້ນ ມາຕິນຈຶ່ງໄດ້ຂໍຫລັກຖານຕື່ມອີກຈາກໂຈເຊັບ ເພື່ອຢືນຢັນວ່າແຜ່ນຈາລຶກຄຳມີຈິງ. ຄຳສອນ ແລະ ພັນທະສັນຍາ 5 ແມ່ນການເປີດເຜີຍຢ່າງໜຶ່ງ ໃນການຕອບຕໍ່ຄຳຂໍຮ້ອງຂອງມາຕິນ.
ທ່ານຮຽນຮູ້ຫຍັງແດ່ຈາກ ຄຳສອນ ແລະ ພັນທະສັນຍາ 5 ກ່ຽວກັບສິ່ງດັ່ງຕໍ່ໄປນີ້:
-
ຄວາມຮູ້ສຶກຂອງພຣະຜູ້ເປັນເຈົ້າ ກ່ຽວກັບຜູ້ທີ່ບໍ່ເຊື່ອໃນຄວາມຈິງທາງວິນຍານ ຍົກເວັ້ນແຕ່ພວກເຂົາຈະເຫັນຫລັກຖານເທົ່ານັ້ນ (ເບິ່ງ ຂໍ້ທີ 5–8; ເບິ່ງ ໂຢຮັນ 20:24–29 ນຳອີກ).
-
ບົດບາດຂອງການເປັນພະຍານ ໃນວຽກງານຂອງພຣະຜູ້ເປັນເຈົ້າ (ເບິ່ງ ຂໍ້ທີ 11–15; ເບິ່ງ 2 ໂກຣິນໂທ 13:1 ນຳອີກ).
-
ວິທີທີ່ຈະມີປະຈັກພະຍານເຖິງພຣະຄຳພີມໍມອນສຳລັບຕົວເອງ (ເບິ່ງ ຂໍ້ທີ 16; ເບິ່ງ ໂມໂຣໄນ 10:3–5 ນຳອີກ).
ຄຳສອນ ແລະ ພັນທະສັນຍາ 5:1–10
ຜູ້ຄົນລຸ້ນນີ້ຈະໄດ້ຮັບພຣະຄຳຂອງພຣະເຈົ້າຜ່ານທາງໂຈເຊັບ ສະມິດ.
ຄຳສອນ ແລະ ພັນທະສັນຍາ 5:1–10 ສິດສອນທ່ານຫຍັງແດ່ ກ່ຽວກັບບົດບາດທີ່ສຳຄັນຂອງໂຈເຊັບ ສະມິດ ໃນຍຸກສະໄໝຂອງເຮົາ—ແລະ ໃນຊີວິດຂອງທ່ານ? ໃຫ້ໄຕ່ຕອງວິທີທີ່ທ່ານໄດ້ຮັບພຣະຄຳຂອງພຣະເຈົ້າຜ່ານທາງສາດສະດາໂຈເຊັບ ສະມິດ. ໃຫ້ຄິດທີ່ຈະບັນທຶກມັນໄວ້ຢູ່ໃນປຶ້ມບັນທຶກສ່ວນຕົວ ຫລື ແບ່ງປັນມັນກັບບາງຄົນ ເຖິງຄວາມກະຕັນຍູຂອງທ່ານສຳລັບຄວາມຈິງທີ່ໄດ້ຖືກຟື້ນຟູ ຫລື ຖືກເຮັດໃຫ້ແຈ່ມແຈ້ງຜ່ານທາງຕົວເພິ່ນ.
ເບິ່ງ 2 ນີໄຟ 3:6–24 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 3:1–4.ຂໍໃຫ້ຄົນໜຶ່ງໃນຄອບຄົວຍ່າງໄປຕາມເສັ້ນ “ຄົດ” ແລະ ແລ້ວໃຫ້ຍ່າງໄປຕາມເສັ້ນ “ຊື່ຕົງ”. ມັນໝາຍຄວາມວ່າແນວໃດຕໍ່ຄອບຄົວຂອງເຮົາ ທີ່ຮູ້ວ່າ “ທາງ [ຂອງພຣະເຈົ້າ] ຊື່ຕົງ”?
-
ຄຳສອນ ແລະ ພັນທະສັນຍາ 3:7–10.ເມື່ອບາງຄົນຊັກຊວນເຮົາບໍ່ໃຫ້ເຊື່ອຟັງພຣະເຈົ້າ, ຄວາມຈິງໃດແດ່ຢູ່ໃນຂໍ້ເຫລົ່ານີ້ ທີ່ສາມາດຊ່ວຍເຮົາໃຫ້ຊື່ສັດເໝືອນເດີມ? ບາງເທື່ອສະມາຊິກໃນຄອບຄົວສາມາດຫລິ້ນລະຄອນກ້ອມ ກ່ຽວກັບສະຖານະການໜຶ່ງ ຊຶ່ງບາງຄົນຍັງຊື່ສັດເໝືອນເດີມ ເຖິງແມ່ນຈະຖືກກົດດັນບໍ່ໃຫ້ເຊື່ອຟັງພຣະເຈົ້າກໍຕາມ.
-
ຄຳສອນ ແລະ ພັນທະສັນຍາ 4.ຂະນະທີ່ຄອບຄົວຂອງທ່ານສົນທະນາກັນ ກ່ຽວກັບຄວາມໝາຍຂອງການເຮັດວຽກງານຢູ່ໃນທົ່ງຂອງພຣະເຈົ້າ, ເຂົາເຈົ້າສາມາດເຮັດບາງຢ່າງຢູ່ໃນສວນ (ຫລື ທຳທ່າເຮັດ). ຕ້ອງໃຊ້ເຄື່ອງມືຢ່າງໃດແດ່ສຳລັບການເຮັດວຽກງານຢູ່ໃນສວນ? ພຣະເຈົ້າບັນຍາຍຫຍັງແດ່ ຢູ່ໃນ ພາກທີ 4 ຊຶ່ງສາມາດຖືໄດ້ວ່າເປັນເຄື່ອງມືທີ່ຕ້ອງການ ເພື່ອເຮັດວຽກງານຂອງພຣະອົງ? ຄອບຄົວຂອງທ່ານສາມາດສົນທະນາກັນເຖິງຄວາມສຳຄັນຂອງເຄື່ອງມືແຕ່ລະຢ່າງ ໃນການເຮັດວຽກງານຂອງພຣະເຈົ້າ.
-
ຄຳສອນ ແລະ ພັນທະສັນຍາ 5:7.ມີຕົວຢ່າງໃດແດ່ກ່ຽວກັບຄວາມຈິງທີ່ເຮົາເຊື່ອ ແຕ່ບໍ່ເຫັນກັບຕາ? ເຮົາຈະຕອບຮັບໝູ່ເພື່ອນຜູ້ຢາກເຫັນຫລັກຖານວ່າພຣະຄຳພີມໍມອນແມ່ນຈິງແທ້ແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ເຮົາຈະໄປທີ່ພຣະອົງບັນຊາ,” ເພງສວດ ແລະ ເພງຂອງເດັກນ້ອຍ, 50.
ການປັບປຸງການສຶກສາສ່ວນຕົວ
ທ່ອງຈຳໜຶ່ງຂໍ້. “ການທ່ອງຈຳພຣະຄຳພີກໍຄືການສ້າງເພື່ອນໃໝ່. ມັນຄືກັນກັບການຄົ້ນພົບຄົນໃໝ່ ຜູ້ທີ່ສາມາດຊ່ວຍເຮົາໃນຍາມຕ້ອງການ, ດົນໃຈ ແລະ ປອບໂຍນເຮົາ, ແລະ ເປັນແຫລ່ງຊຸກຍູ້ຕອນທີ່ເຮົາຕ້ອງການ ການປ່ຽນແປງ” (Richard G. Scott, “The Power of Scripture,” Ensign ຫລື Liahona, Nov. 2011, 6).
ຄວາມເສຍຫາຍຢ່າງໜັກຂອງ 116 ໜ້າ, ໂດຍ ຄະວານີ ໂພວີ ວິນເດີ