“ວັນທີ 28 ເດືອນທັນວາ–ວັນທີ 3 ເດືອນມັງກອນ. ຄຳສອນ ແລະ ພັນທະສັນຍາ 1: ‘ຈົ່ງເຊື່ອຟັງ, ໂອ້ ເຈົ້າຜູ້ຄົນ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 28 ເດືອນທັນວາ–ວັນທີ 3 ເດືອນມັງກອນ. ຄຳສອນ ແລະ ພັນທະສັນຍາ 1,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ວັນທີ 28 ເດືອນທັນວາ–ວັນທີ 3 ເດືອນມັງກອນ

ຄຳສອນ ແລະ ພັນທະສັນຍາ 1

“ຈົ່ງເຊື່ອຟັງ, ໂອ້ ເຈົ້າຜູ້ຄົນ”

ໃຫ້ຄິດກ່ຽວກັບ ຄຳສອນ ແລະ ພັນທະສັນຍາ 1 ວ່າເປັນຄຳແນະນຳສ່ວນຕົວຂອງພຣະຜູ້ເປັນເຈົ້າຕໍ່ໜັງສືເຫລັ້ມນີ້ ເຖິງການເປີດເຜີຍໃນຍຸກສຸດທ້າຍຂອງພຣະອົງ. ພຣະອົງປະສົງໃຫ້ທ່ານຮູ້ຫຍັງແດ່ກ່ຽວກັບ ຄຳສອນ ແລະ ພັນທະສັນຍາ? ໃຫ້ໄຕ່ຕອງຄຳຖາມຂໍ້ນີ້, ແລະ ໃຫ້ຂຽນຄວາມປະທັບໃຈໃດໆໄວ້ ທີ່ມາສູ່ທ່ານຂະນະທີ່ທ່ານອ່ານ ພາກທີ 1.

ບັນທຶກຄວາມປະທັບໃຈຂອງທ່ານ

ໃນເດືອນພະຈິກ ປິ 1831, ສາດສະໜາຈັກທີ່ຟື້ນຟູຂອງພຣະເຢຊູຄຣິດ ຫາກໍຖືກຈັດຕັ້ງຂຶ້ນໄດ້ໜຶ່ງປີເຄິ່ງເທົ່ານັ້ນ. ເຖິງແມ່ນມັນໄດ້ເຕີບໂຕຂຶ້ນ, ແຕ່ມັນກໍເປັນພຽງກຸ່ມຜູ້ທີ່ເຊື່ອທີ່ແອບແຝງຢູ່ໃນບັນດາຜູ້ຄົນກຸ່ມນ້ອຍ ທີ່ມາຕັ້ງຖິ່ນຖານຢູ່ໃນພົມແດນໃໝ່, ທີ່ຖືກນຳພາໂດຍສາດສະດາຜູ້ມີອາຍຸຊາວປາຍປີ. ແຕ່ພຣະຜູ້ເປັນເຈົ້າຖືວ່າ ຜູ້ທີ່ເຊື່ອເຫລົ່ານີ້ ເປັນຜູ້ຮັບໃຊ້ ແລະ ຜູ້ສົ່ງຂ່າວຂອງພຣະອົງ, ແລະ ພຣະອົງປະສົງໃຫ້ການເປີດເຜີຍ ທີ່ພຣະອົງໄດ້ມອບໃຫ້ເຂົາເຈົ້າ ຖືກປະກາດຕໍ່ໂລກ.

ຄຳສອນ ແລະ ພັນທະສັນຍາ ພາກທີ 1 ເປັນຄຳນຳຂອງພຣະຜູ້ເປັນເຈົ້າ ຕໍ່ການຮວບຮວມການເປີດເຜີຍເຫລົ່ານີ້, ແລະ ມັນສະແດງອອກຢ່າງແຈ່ມແຈ້ງວ່າ ເຖິງແມ່ນວ່າສາດສະໜາຈັກມີສະມາຊິກພຽງເລັກນ້ອຍ, ແຕ່ກໍບໍ່ມີຫຍັງເລັກນ້ອຍກ່ຽວກັບຂ່າວສານທີ່ພຣະເຈົ້າປະສົງໃຫ້ໄພ່ພົນຂອງພຣະອົງແບ່ງປັນ. ມັນເປັນ “ສຽງເຕືອນ” ສຳລັບ “ຜູ້ອາໄສຂອງແຜ່ນດິນໂລກ” ທັງປວງ, ສິດສອນເຂົາເຈົ້າໃຫ້ກັບໃຈ ແລະ ສະຖາປະນາ “ພັນທະສັນຍາອັນເປັນນິດ” ຂອງພຣະເຈົ້າ (ຂໍ້ທີ 4, 8, 22). ຜູ້ຮັບໃຊ້ທີ່ນຳຂ່າວສານນີ້ເປັນ “ຄົນທີ່ອ່ອນແອ ແລະ ຄົນທີ່ຕ່ຳຕ້ອຍ,” ແຕ່ເປັນຜູ້ຮັບໃຊ້ທີ່ຖ່ອມຕົວ ຊຶ່ງເປັນຜູ້ທີ່ພຣະເຈົ້າຕ້ອງການ—ໃນເວລານັ້ນ ແລະ ໃນເວລານີ້—ເພື່ອພາສາດສະໜາຈັກຂອງພຣະອົງ “ອອກຈາກການປິດບັງ ແລະ ອອກຈາກຄວາມມືດ” (ຂໍ້ທີ 23, 30).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 1

ພຣະຜູ້ເປັນເຈົ້າເຊື້ອເຊີນເຮົາໃຫ້ “ຄົ້ນຄວ້າບັນຍັດເຫລົ່ານີ້.”

ຄຳນຳເພື່ອແນະນຳໜັງສື. ມັນແຈ້ງບອກຫົວຂໍ້ ແລະ ຈຸດປະສົງຂອງໜັງສື ແລະ ຊ່ວຍຜູ້ອ່ານເພື່ອກະກຽມທີ່ຈະອ່ານ. ຂະນະທີ່ທ່ານອ່ານ ພາກທີ 1—“ບົດຄຳນຳ” ຂອງພຣະຜູ້ເປັນເຈົ້າ ກ່ຽວກັບ ຄຳສອນ ແລະ ພັນທະສັນຍາ (ຂໍ້ທີ 6)—ໃຫ້ຊອກຫາຫົວຂໍ້ ແລະ ຈຸດປະສົງທີ່ພຣະຜູ້ເປັນເຈົ້າໄດ້ມອບໃຫ້ ສຳລັບການເປີດເຜີຍຂອງພຣະອົງ. ທ່ານຮຽນຮູ້ຫຍັງແດ່ຈາກ ພາກທີ 1 ທີ່ຈະຊ່ວຍທ່ານໃຫ້ໄດ້ຮັບຜົນປະໂຫຍດຫລາຍທີ່ສຸດ ຈາກການສຶກສາ ຄຳສອນ ແລະ ພັນທະສັນຍາ ຂອງທ່ານ? ຍົກຕົວຢ່າງ, ທ່ານອາດໄຕ່ຕອງຄຳວ່າ “ຟັງສຸລະສຽງຂອງພຣະຜູ້ເປັນເຈົ້າ” ໃນການເປີດເຜີຍເຫລົ່ານີ້ (ຂໍ້ທີ 14) ຫລື ໄຕ່ຕອງຄຳວ່າ “ຄົ້ນຄວ້າບັນຍັດເຫລົ່ານີ້” (ຂໍ້ທີ 37) ວ່າມັນມີຄວາມໝາຍແນວໃດ.

ເບິ່ງ ຄຳນຳຕໍ່ ຄຳສອນ ແລະ ພັນທະສັນຍາ ນຳອີກ.

ຄຳສອນ ແລະ ພັນທະສັນຍາ 1:1–6, 23–24, 37–39

ພຣະເຈົ້າກ່າວຜ່ານທາງຜູ້ຮັບໃຊ້ຂອງພຣະອົງ, ແລະ ພຣະຄຳຂອງພຣະອົງຈະເກີດເປັນຈິງ.

ພາກທີ 1 ເລີ່ມຕົ້ນ ແລະ ຈົບດ້ວຍການປະກາດຂອງພຣະເຈົ້າ ວ່າພຣະອົງກ່າວຜ່ານທາງຜູ້ຮັບໃຊ້ຂອງພຣະອົງ (ເບິ່ງ ຂໍ້ທີ 4–6, 23–24, 38). ໃຫ້ຂຽນສິ່ງທີ່ທ່ານໄດ້ຮຽນຮູ້ຈາກການເປີດເຜີຍນີ້ ກ່ຽວກັບພຣະຜູ້ເປັນເຈົ້າ ແລະ ສຸລະສຽງຂອງພຣະອົງ. ທ່ານຮຽນຮູ້ຫຍັງແດ່ກ່ຽວກັບຜູ້ຮັບໃຊ້ຂອງພຣະຜູ້ເປັນເຈົ້າ? ທ່ານໄດ້ຍິນສຸລະສຽງຂອງພຣະຜູ້ເປັນເຈົ້າ ໃນສຽງຂອງຜູ້ຮັບໃຊ້ຂອງພຣະອົງຕອນໃດ? (ເບິ່ງ ຂໍ້ທີ 38).

ພາກກອງປະຊຸມໃຫຍ່ສາມັນ — ສາດສະດາ ແລະ ອັກຄະສາວົກສິດສອນເຮົາເຖິງພຣະບັນຍັດຂອງພຣະເຈົ້າ.

ຄຳສອນ ແລະ ພັນທະສັນຍາ 1:3, 24–28, 31–33

ຖ້າຫາກເຮົາຖ່ອມຕົວ, ແລ້ວການຕີສອນຂອງພຣະຜູ້ເປັນເຈົ້າ ຈະສາມາດນຳພາເຮົາໄປສູ່ການກັບໃຈ.

ໃຫ້ສັງເກດເບິ່ງວ່າ ໃນ ຂໍ້ທີ 3 ແລະ ຂໍ້ທີ 24–28, ພຣະຜູ້ເປັນເຈົ້າໄດ້ກ່າວວ່າ ບາບ ແລະ ຄວາມຜິດຂອງຜູ້ຄົນ ຈະຖືກເຮັດໃຫ້ເປັນທີ່ຮູ້ຈັກ. ໃນກໍລະນີໜຶ່ງ ສິ່ງນີ້ເປັນປະສົບການທີ່ເຈັບປວດ ແລະ ໂສກເສົ້າຫລາຍ, ແລະ ໃນອີກກໍລະນີໜຶ່ງ ມັນໃຫ້ຄວາມຮູ້. ເປັນຫຍັງສະພາບການເຫລົ່ານີ້ຈຶ່ງແຕກຕ່າງກັນຫລາຍ? ໃຫ້ພິຈາລະນາປະຕິກິລິຍາຂອງທ່ານ ເມື່ອທ່ານຮູ້ເຖິງການບາບ ແລະ ຄວາມອ່ອນແອຂອງທ່ານ. ຄຸນສົມບັດຢ່າງໃດແດ່ ທີ່ທ່ານພົບເຫັນຢູ່ໃນ ຂໍ້ທີ 24–28 ທີ່ສາມາດຊ່ວຍທ່ານ ໃຫ້ຕອບຮັບໃນທາງທີ່ຖືກຕ້ອງໄດ້? ຂໍ້ເຫລົ່ານີ້, ຕະຫລອດທັງ ຂໍ້ທີ 31–33, ສິດສອນທ່ານຫຍັງແດ່ ກ່ຽວກັບວິທີທີ່ພຣະຜູ້ເປັນເຈົ້າຄິດກ່ຽວກັບຄວາມອ່ອນແອ ແລະ ການບາບຂອງທ່ານ?

ເບິ່ງ ສຸພະສິດ 3:11–12; ອີເທີ 12:27; ໂມໂຣໄນ 6:8 ນຳອີກ.

ຄຳສອນ ແລະ ພັນທະສັນຍາ 1:12–30, 35–36

ພຣະຜູ້ເປັນເຈົ້າໄດ້ຟື້ນຟູພຣະກິດຕິຄຸນຂອງພຣະອົງ ເພື່ອຊ່ວຍເຮົາໃຫ້ປະເຊີນກັບການທ້າທາຍຂອງຍຸກສຸດທ້າຍນີ້.

ເຖິງແມ່ນວ່າ ພາກທີ 1 ເຕືອນເຖິງວັນເວລາທີ່ລຳບາກໃນອະນາຄົດ, ແຕ່ມັນກໍຍັງມີຂ່າວສານທີ່ໃຫ້ຄວາມໝັ້ນໃຈ ທີ່ວ່າ: “ເຮົາພຣະຜູ້ເປັນເຈົ້າ, ໂດຍທີ່ຮູ້ເຖິງຄວາມເສຍຫາຍທີ່ຈະມາສູ່ຜູ້ອາໄສຂອງແຜ່ນດິນໂລກ, ຈຶ່ງໄດ້ເອີ້ນຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ແລະ ໄດ້ກ່າວກັບລາວຈາກສະຫວັນ” (ຂໍ້ທີ 17).

ໃຫ້ສັງເກດເບິ່ງໄພພິບັດ ທີ່ພຣະຜູ້ເປັນເຈົ້າໄດ້ເຕືອນໃຫ້ຮູ້ (ເບິ່ງ, ຍົກຕົວຢ່າງ, ຂໍ້ທີ 13–16, 35). ໄພພິບັດຢ່າງອື່ນໃດອີກແດ່ທີ່ທ່ານສັງເກດເຫັນຢູ່ໃນໂລກທຸກວັນນີ້—ຫລື ໃນຊີວິດຂອງທ່ານເອງ? ຂໍ້ທີ 17–30 ບັນຍາຍເຖິງສິ່ງທີ່ ພຣະຜູ້ເປັນເຈົ້າໄດ້ກະທຳເພື່ອທ່ານ ເພື່ອກະກຽມສຳລັບໄພພິບັດທີ່ຄາດໝາຍລ່ວງໜ້າເຫລົ່ານີ້. ໃຫ້ຂຽນສິ່ງທີ່ທ່ານພົບເຫັນລົງໄວ້.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 1:1–6, 37–39.ເພື່ອເລີ່ມຕົ້ນສົນທະນາກ່ຽວກັບຄຳເຕືອນຈາກພຣະຜູ້ເປັນເຈົ້າ, ພວກທ່ານສາມາດເວົ້າລົມກັນກ່ຽວກັບຄຳເຕືອນທີ່ທ່ານໄດ້ຮັບຈາກຄົນອື່ນ ກ່ຽວກັບສິ່ງອັນຕະລາຍທີ່ເຮົາບໍ່ສາມາດຫລຽວເຫັນ—ດັ່ງເຊັ່ນພື້ນທີ່ມື່ນ, ຝົນຕົກຟ້າລົມແຮງ, ຫລື ລົດທີ່ກຳລັງແລ່ນມາໃກ້. ຕົວຢ່າງເຫລົ່ານີ້ສິດສອນເຮົາຫຍັງແດ່ ກ່ຽວກັບຄຳເຕືອນຂອງພຣະຜູ້ເປັນເຈົ້າ? ອີງຕາມ ຄຳສອນ ແລະ ພັນທະສັນຍາ 1:1–6, 37–39, ພຣະຜູ້ເປັນເຈົ້າເຕືອນເຮົາໃນວິທີໃດ? ພຣະອົງໄດ້ເຕືອນເຮົາຫຍັງແດ່ ເມື່ອບໍ່ດົນມານີ້? ບາງທີພວກທ່ານຄວນເບິ່ງ ຫລື ອ່ານຂ່າວສານພາກສ່ວນໃດໜຶ່ງຂອງກອງປະຊຸມໃຫຍ່ສາມັນ ແລະ ຊອກຫາຕົວຢ່າງ ກ່ຽວກັບ “ສຽງເຕືອນ” ຂອງພຣະເຈົ້າ.

ຄຳສອນ ແລະ ພັນທະສັນຍາ 1:16.ຄຳວ່າ “ສະຖາປະນາຄວາມຊອບທຳ [ຂອງພຣະຜູ້ເປັນເຈົ້າ]” ໝາຍຄວາມວ່າແນວໃດ? ເຮົາຈະແນ່ໃຈໄດ້ແນວໃດວ່າ ເຮົາກຳລັງເຮັດແນວນັ້ນຢູ່, ແທນທີ່ຈະເດີນໄປ “ໃນເສັ້ນທາງ [ຂອງເຮົາ] ເອງ”?

ຄຳສອນ ແລະ ພັນທະສັນຍາ 1:30.ການເວົ້າວ່າ ສາດສະໜາຈັກນີ້ ເປັນສາດສະໜາຈັກ “ທີ່ແທ້ຈິງ ແລະ ດຳລົງຢູ່” ໝາຍຄວາມວ່າແນວໃດ? ເພື່ອໃຫ້ຄອບຄົວຂອງທ່ານຄິດກ່ຽວກັບຄຳຖາມນີ້, ບາງທີທ່ານສາມາດສະແດງຮູບຂອງສິ່ງທີ່ມີຊີວິດຢູ່ ແລະ ຮູບຂອງສິ່ງທີ່ບໍ່ມີຊີວິດ ໃຫ້ເຂົາເຈົ້າເບິ່ງ. ພວກທ່ານກໍສາມາດສົນທະນາສິ່ງທີ່ພວກທ່ານສາມາດເຮັດເປັນຄອບຄົວນຳອີກ ເພື່ອຊ່ວຍ “ນຳ [ສາດສະໜາຈັກ] ອອກຈາກການປິດບັງ ແລະ ອອກຈາກຄວາມມືດ.”

ຄຳສອນ ແລະ ພັນທະສັນຍາ 1:37.ໃຫ້ຄິດວາງແຜນເປັນຄອບຄົວ ເຖິງວິທີທີ່ພວກທ່ານຈະ “ຄົ້ນຄວ້າບັນຍັດເຫລົ່ານີ້” ໃນ ຄຳສອນ ແລະ ພັນທະສັນຍາ ປີນີ້. ພວກທ່ານຈະເຮັດໃຫ້ການສຶກສາພຣະຄຳພີຂອງພວກທ່ານ ເປັນພາກສ່ວນປົກກະຕິໃນຊີວິດຂອງຄອບຄົວໄດ້ແນວໃດ? ແນວຄິດການສຶກສາໃດແດ່ທີ່ສາມາດຊ່ວຍພວກທ່ານໃຫ້ຮຽນຮູ້ຈາກພຣະຄຳພີ? (ເບິ່ງ “ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ” ຢູ່ຈຸດເລີ່ມຕົ້ນຂອງແຫລ່ງນີ້.)

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ເຮົາຂອບພຣະໄທສຳລັບສາດສະດາ,” ເພງສວດ ແລະ ເພງຂອງເດັກນ້ອຍ, 40, ໂດຍສະເພາະ ວັກສຸດທ້າຍ.

ການປັບປຸງການສຶກສາສ່ວນຕົວ

ຊອກຫາພຣະເຢຊູຄຣິດ. ຈຸດປະສົງຂອງພຣະຄຳພີ ແມ່ນເພື່ອເປັນພະຍານເຖິງພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 1, ໃຫ້ຄິດທີ່ຈະໝາຍ ຫລື ໝາຍເຫດຂໍ້ທີ່ສິດສອນທ່ານບາງສິ່ງກ່ຽວກັບພຣະເຢຊູຄຣິດ.

ການເປີດເຜີຍຊຸດທຳອິດຕໍ່ສາດສະໜາຈັກທີ່ຟື້ນຟູ ໄດ້ຖືກຮວບຮວມເຂົ້າກັນເປັນປຶ້ມພຣະບັນຍັດ.